تقرير هام عن صيانة 1000 كم لـ byd

**sv065** · 24-06-2009 10:59 PM

السلام عليكم ورحمة الله وبركاته

السادة الأفاضل ملاك الجميلة BYD والسادة أعضاء نايل موتورز الكرام

عاوز أحكي لكم عن صيانة أول 1000 كم لعربيتي الجديدة
BYD
وهي علي فكرة أتوماتيك GLX-I

وماخبيش عليكم أنا الصراحة كنت خايف جدا من الصيانة دي بدرجة كبيرة جدا جدا ومرعوب منها من اللي الشكاوي اللي سمعتها من الزملاء اللي قاموا بالصيانة في توكيل الأمل فرع القاهرة بالعباسية وكان أساس شكواهم من سوء المعاملة من القائمين علي المركز والإستغلال والزحام والتأخير والإهمال في التعامل مع السيارات والتهرب من مسئولياتهم تجاه عيوب الصناعة

طبعا ده كلام جامد جدا مني ... بس كله من شكاوي الزملاء وكله مكتوب في الموقع واللي شاكك يدخل ويشوف المواضيع كلها

والصراحة أنا حاطط شقى عمري كله في العربية دي وده مبلغ مش صغير إطلاقا ومش مستعد أنه يضيع بسبب سوء الخدمة في التوكيل

أنا الحقيقة كنت بافكر أعمل الصيانة خارج التوكيل في أي مركز عام يعني مش متخصص في موديل معين خصوصا إن السيارة موتورها ميتسوبيشي وعفشتها وصالونها تويوتا كورولا يعني مش حتتعبني بره كتير خصوصا إن رسوم الصيانة عندهم رخيصة جدا بتوصل ل 30 جنيه فقط بس معاملتهم كويسة لأنه طبعا مش عاوز يخسرك كعميل عنده

ولما وجدت بعض الزملاء بيشكروا في فرع التوكيل اللي في إسكندرية الصراحة إتصلت بيهم علي طول وعرفت مواعيدهم وخدت فكرة عن نظامهم وبيعملوا إيه في الصيانة وكده ونويت أجرب صيانة أول 1000كم عندهم

فقررت عشان ظروف شغلي إني أسافر إسكندرية الجمعة وأكون السبت الصبح اول زبون علي باب مركز صيانة الأمل بالأسكندرية

ووصلت المركز الساعة 9.10 صباحا لقيت المركز علي وشك يفتح لإستقبال العملاء وكان في طابور مكون من 3 عربيات لادا جايين يعملوا صيانة زي حالاتي ففرحت :10D5C8~1107:إني مفيش قدامي ناس كتير ووقفت وراهم فالطابور وكلها ربع ساعة ولقيت طابور طويييييل من اللادا أيشي ملاكي وإيشي تاكسي ملوا المركز قلت الحمد لله لحقت نفسي

مفيش نص ساعة وجالي مهندس الإستقبال البشوش محمد فرج وطلب مني رخصة العربية وملا النموذج بتاعهم وسألني عاوز زيت نوعه إيه ووضح لي اللي حيتعمل في الصيانة ....المهم سألته فين المهندس أسامة لأني سمعت عنه كتير من الزملاء في الموقع ورحت له فعلا والصراحة قابلني بترحاب شديد جدا وعرفته بنفسي وقعدت معاه شوية صغيرة وأنا كنت مجهز ورقة مطبوعة بملاحظاتي اللي عاوزهم يظبطوها في العربية زي مثلا قوة التكييف أقل من العادي وفيه صوت خفيف في طارة الدريكسون وتثبيت جزء من موكيت الأرضية وشوية حجات صغيرة كده...
المهم الراجل أخد الورقة وقعد يقراها بتمعن وفضل يسألني عن التفاصيل اللي أنا كنت كاتبها وصور منها صورة وسلمها للمختص اللي حيقوم بالصيانة وإحتفط بالأصل عنده وطلب مني أنتظر بالإستراحة قلت له ماشي..

طبعا وأنا في الإستراحة كل شوية أبص من الشباك علي العربية بيعملوا فيها إيه ولقيتهم مهتمين جدا بيها وماسابوهاش لحظة رغم طابور العربيات اللي عندهم ورفعو العربية وربطوا العفشة وغيروا الزيت وكشفوا علي كل أنظمة العربية ...

وبعد حوالي ساعتين جالي موظف ينده عليا رحت له قاللي أنهم عاوزيني أطلع معاهم أجرب العربية قلت حاضر

رحت لقيت العربية خرجت علي الباب مع المهندس وركبني جنبه وخرجنا عالطريق نجرب العربية بعد الظبط والصراحة أنا حسيت بإختلاف أول ما ركبت صوت الموتور بقي أهدي والسحب ممتاز والتكييف ثلااااجة وكان فيه ملاحظة إن السي دي بيفصل في المطبات فمشي بالعربية في طريق مليان مطبات ولقيت السي دي شغال تمام التمام

بس ورجعنا المركز وخدوا العربية يقفلوا الشغل بتاعها وقالو لي عشر دقايق وتكون جاهزة....
ورحت أدفع الفاتورة كانت ب 302 جنيه وده ثمن زيت موبيل وان + فلتر أصلي فقط والمصنعيات مجانا

وفعلا ... بعد عشر دقايق لقيتها جاية عند الباب ومغسولة غسلة فلة
بسم الله ماشاء الله

زي ماتكون طالعة من المعرض والله... وركبت أنا والأسرة العربية والأولاد كانو مبسوطين بيها أوي وطلعنا بيها علي الطريق زي الفل

وهنا بقي أحب أفجر مفاجأة من العيار التقيل

أنا فولت من بنزينة موبيل قبل التوكيل بتاع إسكندرية بعد ما عملت صيانة الألف كم فيه يعني بعد ما تخرج من إسكندرية بـحوالي 23كم ومتجه للقاهرة راجع بيتنا وفاتح التكييف ومشغل الراديو ومعايا الأسرة كلها السحب تمام التمام وشديت مع لانسر وكانت زي الفل وعملت أحلي شغل

وبعد ما روحت البيت خلاص وأنا باركن العربية يعني مشيت حوالي 250 كم بعد ما فولت في إسكندرية .... بابص علي عداد البنزين .. !!! إتصدمت ومصدقتش نفسي

لقيت العداد بيقول إن العربية إستهلكت أقل من ربع التانك بشرطة واحدة .....تخيلوا؟؟
والعربية أتوماتيك والتكييف شغال طول السكة
طيعا أنا إستغربت وقلت يمكن العداد بايظ !!! ... بس أنا جربتو كتير جدا وشغال تمام التمام

وده إن دل إنما بيدل علي أن العربية إستهلاكها نموذجي جدا جدا

وعل فكرة أنا كان معايا عربية قبلها علي طول 1300 كان إستهلاكها أعلي من دي بكتير تخيلوا؟؟!!

بس برضه لازم نعرف إن طريقة السواقة ليها دور كبير في معدل الإستهلاك وده جربتوا علي BYD برضه يعني كنت باشد عليها واقرص علشان أشوف حتستهلك بنزين قد إيه لقيتها ممتازة جدا بالمقارنة بعربيات كتير

............................*

علي فكرة طول الطريق وانا رايح كنت ملتزم بسرعة 100كم علشان الردار وكمان كان فيه حادثة شنيعة علي الطريق واللحظة اللي فكرت افتح شوية بسيطة كنوع من تغيير الملل فوجئت بلجنة الرادار المتينة وهبشوا 150 جنيه ربنا يسامحم

وبكده أنهي تقريري عن صيانة الألف كيلوا

وباوجه الدعوة لكل الزملاء حتي اللي عملوا الصيانات من مدة طويلة يحكوا لنا بالتفصيل عن كل اللي قابلهم من ساعة ما دخلوا مركز الصيانة لحد ما مشيوا علشان ده يكون دليل لينا كلنا وممكن نعمل موضوع مثبت عن الصيانات نجمع فيه تقارير كل صيانة علي حدة مثلا 1000كم مع بعضه و ال 5000 مع بعضه وهكذا علشان الفائدة تعم وكل واحد يعرف حيدفع كام وحيتعمل إيه في عربيته ومحدش يضحك عليه ويعرف حقوقه كاملة وعلشان كمان نقدر نقيم أداء فروع الوكيل تقييم مظبوط

مشكورين إخوتي وآآآآآسف جدا علي الإطالة وإنتظروني مع تقرير صيانة الـ5000 إن شاء الله اللي إحتمال أعمله في فرع القاهرة

وربنا يستر

**noureldenadel4** · 26-06-2009 02:12 AM

انا بشكرك كتير على التقرير الواضح و المفصل و الشامل عن الصيانه و انا برضه لسه عامل صيانة 1000 كيلو بس فى العباسية و قعدت برضه ساعتين بس ناس زى الفل ما شفتش منهم حاجه وحشه اطلاقا و فعلا عربية محترمه و لغاية دلوقتى صيانه محترمه ما شفتش منهم حاجه وحشه عشان روحت ليهم من اسبوع عشان اظبط التاره ما اعتقدتش نص ساعة و استلمت عربيتى و الدنيا من بعدها زى الفل على فكره انا مش عارف الاقى اسمك عشان اشكرك باسمك

**sv065** · 18-07-2009 09:10 PM

يا تري باقي الزملاء الأفاضل فين ؟ يحكو لنا عن صيانة سيارتهم الـ byd

**hassan_mohamed21** · 19-07-2009 01:31 PM

السلام عليكم و رحمة الله
بالنسبة ليا لما عملت صيانة 1000 توجهت الى توكيل الامل فرع الاسكندرية انا معايا الهاتش باج كان عندى مشكلة فى الفايز بتاع تنك البنزين و التكييف مكنش بالكفاءة المطلوبة بعد اللى قراته هنا على النت قررت انى اتوجه الى فرع الاسكندرية منها اقضى يوم بدل الحر اللى هنا و اعمل صيانة ال1000 و بالفعل رحت هناك الساعة 10 تقريبا كان فى قدامى سيارتين بعد شوية جالى الاستاذ محمود فرج ( العريس حاليا ) و اخد منى الملاحظات على السيارة و بدء فى ملىء الاجراءات المطلوبة و اخد العربية و العمالة هناك كسوا الكراسى و الطارة بالبلاستيك علشان يحافظوا عليهم و دخلنا بالسيارة فى المركز ( عندهم تعليمات ان اللى جاى من القاهرة يدخل جوة المركز ) و ده طبعا قرار حكيم من مدير المركز الاستاذ المحترم احمد اللى شرفنى انى اتعرف عليه و اتكلم معاه على السيارة لانه مقتنى واحدة اوتوماتك
المهم دخلت و قابلت المهندس اسامة شخص متميز جدا له حضور عرف المطلوب بالسيارة و ابتدوا فعلا العمل فيها و بعد ما خلصوا الخرطوم التالف للفايظ خرج معايا المسئول و رحنا فولنا فى البنزينة و كان كله تمام التمام رجعت تانى المركز و اتظبط التكييف و برضه جالى المسئول على التكييف و جربه ليه تمام التمام كل حاجة كانت بتم فى العربية كنت بقول راى فيها بعد ما تتم على طول و هما عملوا الحاجات الللى بتتعمل فى صيانة الالف تغير زيت و فلتر و ظبط الابواب و التاكيد على كهربة العربية و ربط العفشة يعنى تقريبا تشك عام على كل العربية بعد كده العربية اتغسلت و طبعا ده ميزة انا مشفتهاش فى اى توكيل تانى و جتالى زى العروسة بالظبط
مفيش بنى ادم هناك قبل انه ياخد اى مبلغ او اى اكرامية او ما شباه ذلك تمام على العلم انى كنت فعلا ده حاجة منى و بنفس راضية تمام بس كل محاولاتى قوبلت بالفشل فى الاتجاه ده مع كل اللى فى المركز انا دفعت 154.00 جنيه ده رسوم و تغير الزيت و الفلتر ( انا حاطط زيت xhp) و الحمد لله رجعت بالعربية و قتها زى الفل و اه كام يوم و رايح صيانة ال 5000
و بالتوفيق لكل مالكى السيارة
و مزيد من التوفيق و التقدم لتوكيل الامل فرع الاسكندرية
و مزيد من التقدم و علو الشأن كل من السادة المحترمين ( الاستاذ / احمد مدير الفرع - المهندس / اسامة مهندس المركز - الاستاذ العريس / محمود فرج بالاستقبال)
و مزيد من التقدم و الكفاءة للعمالة الفاهمة المدربة بالمركز

**sv065** · 19-07-2009 07:19 PM

مشكور جدا أ/ حسن علي تقريرك الرائع ده

وطبعا مهما نقول من شكر وتقدير لكل الناس في فرع الإسكندرية مشنوفيهم حقهم

**muslem** · 21-07-2009 05:35 PM

[OVERLINE]
تقرير متميز فعلا
و فعلا البنزين فى العربية عمل معى كده لما سافرت اسكندرية نزل شرطة واحدة فقط من القاهرة الى الاسكندرية و احنا مشغاليين التكييف و طبعا برضوة على سرعة 100
و طبعا اوعوا تعمل صيانة للعربية فى العباسية من حيث سمكرة خبطة او ما شابه لان لى تجربة مريرة فى فرع العباسية علشان سمكرة خبطة فى الباب لطعنى المهندس حسام منه لله شهر على سمكرة باب فقط مع انى اديته فلوس علشان ميلطعهاش !!
لكن من حيث الصيانة الدورية فهم بيهتموا بيها فعلا لكن علشان تسمكر او غيره ربنا معاك بقي و ممكن ترجع منقرة زى ما نقروا لى كابوت العربية اللى مكنش فيه حاجة يظهر كانوا بيحدفوا عليه عدة فعملت تنقير فى كابوت العربية
منه لله المهندس حسام ده لانه فعلا هو اساس المشكلة فى التوكيل بتاع العباسية
و انا بفكر جديا نبعت للشركة الام البي واى دى شكوى جماعية عن فرع العباسية يا ريت الاخوة يقولوا رايهم فى الموضوع ده نبعت شكوى جماعية للشركة عن فرع العباسية
[/OVERLINE]

**hassan_mohamed21** · 22-07-2009 08:02 AM

انا سمعت من المهندس احمد مدير فرع الاسكندرية ان هيتعمل فى القطامية مركز خاص بى byd و ان شاء الله يكون ناس زى المهندس احمد و اسامة و محمود فرج هما اللى مسئولين عن المركز ده متهيالى وقتها هتتحل مشاكل التوكيل فنصبر شوية و نشوف هيصل ايه و كفاية ان كل الناس دلوقت عرفت ان فرع الاسكندرية اجود و امهر و ناس اخلاق و دى بتخلى الناس يروحوا هناك و اكيد فى تقارير بتروح للادارة الام هيعرفوا منها ان فى خلال فى العباسية اللى يخلى العملاء يسفرو للاسكندرية من غير ما نبعت او نعمل حاجة
ده راى عن نفسى شوفوا حضارتكم عايزين ايه و انا معاكم فى اى حاجة

**elmanahry** · 15-10-2009 08:46 PM

شكرا للجميع على الخبرات التى عرفونا بها ولى سؤال عن السيارة فالسيارة بدون لمبة ضباب اماميه واتصلت اليوم بالتوكيل ولا يوجد عندهم لمبة ضباب والدراع الذى يتغير معها ولا يعرفوا متى ستتوفر واذا تم اتغيير خارج الضمان سيلغى ضمان السيارة هل عند احد معلومات عن هذا الموضوع

**hani945** · 16-10-2009 04:49 PM

التقرير ده يخلى الناس تحب العربية دى

**hani945** · 16-10-2009 04:50 PM

لإن المشاكل بتيجى من مراكز الصيانة

الموضوع: تقرير هام عن صيانة 1000 كم لـ byd

LinkBack

أدوات الموضوع

عرض

تقرير هام عن صيانة 1000 كم لـ byd - انشر الموضوع فى :

-

-

-

-

-

المواضيع المتشابهه

تقرير عن صيانة ال 1000 للبيرسونا 2012

تقرير صيانة 1000 كم

تقرير صيانة ال 1000 كم لنيسان صنى 2011

تقرير صيانة 1000

تقرير عن صيانة ال 1000 كم في السبع

الكلمات الدلالية لهذا الموضوع

المفضلات

المفضلات

ضوابط المشاركة