الموضوع: باركوولي أخيراً جبت عربية جديدة (نيو اكسنت 2010)

المشاركة الأصلية كتبت بواسطة omarmakeen

1000 مبروك على العربية
انا كمان اشتريت نيواكسنت مع البنك الوطنى للتنمية بس كنت عاوز اسأل حضرتك سؤالين مهمين جدا
1- حضرتك لما مضيتى الشيكات استلمتى بقية الدفتر بتاع الشيكات؟
2- انا مضيت على نسخة وحدة من العقد واخد منها صورة مش اصل حصل كدة مع حضرتك بردة ؟

اسف على الاطالة بس اجابة حضرتك مهمة جدا جدا بالنسبالى

الله يبارك فيك يافندم .
1- بالنسبة للسؤال الاول انا استلمت دفترين شيكات مضيت 20 شيك كل شيك بإجمالي 3 اقساط ومضيت فوقيهم 4 شيكات بقيمة التأمين السنوية كل ماقدم وثيقة التأمين بتاع السنة الجاية استلم الشيك بتاعها.
الدفتر الأولاني خلص بس اخدته طبعا وكتبت في كعب كل شيك قيمة كل شيك ومعاد استلامه واخدت الدفتر التاني كامل مستعملناش منه شيكات تقريباً.
2- انا مضيت على نسختين اصل للعقد اخدت انا نسخة والبنك اخد نسخة تانية (لكن الاتنين اصل ومكتوب البيانات فيهم بخط اليد)
والف الف مبروك على عربيتك الجديدة ربنا يباركلك فيها ويديك خيرها ويكفيك شرها يارب.

المشاركة الأصلية كتبت بواسطة hemahema

الف مبروك يا رنا على العربية الجديدة وربنا يكفيكى شرها وربنا يزيح عنك الهم
على فكرة انا زييك كنت بمر بظروف صعبة وكنت فاكر انى لما هاستلم عربيتى الجديدة نيو اكسنت فضى هاتنسينى همى لكن دة للاسف ما حصلش واللهم فرج هم المكروبين
كنت عايز اعرف من حضرتك استلمتى اية مع العربية انا استلمت الكتالوج والضمان والكوريك وملف العجل ومسمار الجر
ياترى دة الى استلمتية ولا فى حاجة تانية
ومرة تانية الف مبروك واسف على الازعاج

الله يبارك فيك
وربنا يفرج همنا جميعاً وتخرج من ضيقتك قريب ويباركلك في عربيتك وان شاء الله يكون وشها حلو عليك وتنسيك كل همومك.
بالنسبة ليا انا استلمت مع العربية الاستبن وشنطة فيها الكوريك ومفتاح العجل وشنطة العدة فيها مفك وعروة الجر.
واستلمت كمان الاريال ووصلة الكاسيت (USB) واخدت طبعا الكتالوج والضمان والطفاية بتاعة السجاير (شبة الكوباية كده صغيرة وبغطا ولونها رمادي ) والولاعة كمان (مع ان لا أنا ولا اي حد عندي بيشرب سجاير والحمد لله) بس صممت اخدها برده .

المشاركة الأصلية كتبت بواسطة gbeshay

الف مبروك يا رنا وربنا يباركلك فيها بجد انا برضوا معايا النيو اكسنت 2010 بس السقا موتورز الي في شارع السبق طلع عين اهلي فيها و في الاخر عملت معاهم مشكله و اخدت فلوس الحجز معملتهم زي الزفت بجد عالم معندهش دم بس اشكري ربنا ان حظك حلو معاهم قعدو يمطلو معايا في التسليم شهر و تالات اسابيع

تقريبا 50 يوم وكل يوم يقولولي هتستلم بكره
بعد كده سحبت منهم المقدم و جبتها من معرض تاني في خلال 3 أيام بالظبط عادي بقي كل تاخيره و فيها خيره

انا عن نفسي في الاول كنت حاجزة مع ايتدكوا (الشرقاوي جروب) وشرطوا عليا اني ادفع 3 الاف جنيه تحت الحساب وابقي استردهم بعد كده لكنهم عملوا معايا حركة سخيفة اخروا عني الورق بتاع العربية وكدبوا عليا وقالوا ان الورق بيتعدل في غبور والورق لسة متحركش من عندهم اصلا والمندوب كان بيقول كلام ومديره بيقول كلام مختلف فشكيت فيهم ان العربية تكون 2009 وعايزين يبيعوهالي علي انها 2010 وكنسلت معاهم .
في التوقيت ده العربية كانت متأخرة على كل الموزعين اصلا ومنهم السقا وناس كتير والسبب ان غبور هو اللي كان مأخرها عليهم عشان بيركب الكاسيت والانذار ومرحلة التفنيش النهائي فكان حال السقا زي حال باقي الموزعين وكنت كل ماسأل عند اي موزع يقولي مش موجودة لسة قدامها اسبوع اسبوعين يإما لون غير اللي انا عايزاه وهكذا ولما مبقتش اسأل خالص لاقيت السقا وموزع تاني بيقولولي العربية وصلت وتعالي خديها.
بس الصراحة هما معاملتهم معايا مكنتش سيئة بالعكس مندوبهم كان بيتابعني على طول وكانو عايزين يسلموني قبل ماياخدوا وثيقة التأمين كمان ، واخدوا 70 جنيه عشان شهادة البيانات والاعتمادات (بدل ماروح انا واتبهدل في مرور بين السرايات و6 اكتوبر) رغم ان معارض تانية كانت بتقولي 100 و120 جنيه والشرقاوي كان بيقول 220 جنيه كمان (كانوا عايزين يشتغلوني بجد ) لكن السقا كانوا محترمين اوي معايا ومدفعتش حجز ولا حاجة وروحت استلمت بسهولة يمكن عشان مدير البنك كان مكلم احمد السقا شخصياً لحجز العربية بتاعتي (جايز)
بس عموما خير فعلا كل تأخيرة وفيها خيرة فعلا والحمد لله انك استلمت على خير .

المشاركة الأصلية كتبت بواسطة gbeshay

بالنسبه للاخ hemahema انت نسيت اهم حاجه بس اكيد انت نسيت تقولها الاستبن طبعاً وفي حاجه مهمه جده للنيو اكسنت وصله الكاسيتانا متمرمط عليها

وفي برضه الاريال بتاع الراديو لو في حاجه مختهاش فيهم روح المكان الي اشتريت منهم و خدها

و ربنا يبريكلك فيها يا باشا بجد و 1000 مبروك

انا فعلا استلمت الاريال والوصلة بتاعة الكاسيت (وطبعا طلبتها بنفسي) عشان في معارض بتطنش عليها بس انا اصريت استلم كل حاجة مع العربية

المشاركة الأصلية كتبت بواسطة mustafa_maghraby

بالنسبة للمشاكل مع البنك انا لسة دي اول تجربة ليا في موضوع التقسيط ولسة حتى مدفعتش اول قسط والحمد لله مواجهتش مشاكل

هو أول قسط بيتدفع بعد كام شهر من استلام العربية ؟؟؟؟

وهل في امكانية تاجيل أول قسط بعد 3 أو 4 شهور ؟؟؟

اول قسط المفروض لو انت مضيت العقد قبل يوم 10 او 15 في الشهر بيكون اول الشهر اللي بعديه على طول لكن لو مضيت بعد يوم 15 او 20 بيدوك فرصة تدفع القسط اول الشهر اللي بعد بعديه.
يعني مثلا لو العقد كان تاريخه 10/06/2009 بيكون اول قسط 02/07/2009 مثلا يعني.
لو تاريخ العقد كان 22/06/2009 بيكون معاد اول قسط 2/8/2009 مثلا.
كله بيكون حسب تاريخ العقد واستلام العربية.
بس هما بيدوك فرصة 10 او 15 يوم تسدد فيهم القسط يعني مش شرط 2/8/2009 بالظبط معاك لحد 15/08/2009 مثلا.
بالنسبة لإمكانية تأجيل القسط 3 او 4 شهور مسألتش فيها واعتقد انها صعب تكون موجودة في البنك ده.

مبروك يا رنا .. 1000 مبروك

ربنا يخايهالك :) و يكفيكي شرها

خلى بالك و أنت سايقة بقى.

عايزة أقولك اني لسة مستلمتش :(

ادعيلي بقى..

مبرووووووك

المشاركة الأصلية كتبت بواسطة buzzy

مبروك يا رنا .. 1000 مبروك

ربنا يخايهالك :) و يكفيكي شرها

خلى بالك و أنت سايقة بقى.

عايزة أقولك اني لسة مستلمتش :(

ادعيلي بقى..

مبرووووووك

الله يبارك فيكي
اديني بحاول اخللي بالي رغم اني خلاص خبطها وعملت بيها حادثة بسيطة لكن الحمد لله على كل شئ
ان شاء الله تستلمي قريب وترخصي وتفرحي بيها بإذن الله

مبروووووووووووووك وانا ان شاء الله ناوى اجيب نيو اكسنت بصراحه السايت هنا حببنى فيها اوى العربيه دى . بس عايز اعرف مشاكلها ايه؟؟

عايز اعرف حضرتك متعامله مع انهى بنك بالظبط والضمانات ايه . وياريت لو فى رقم تليفون للبنك والمعرض علشان لو كدة اتعامل معاهم احسن

المشاركة الأصلية كتبت بواسطة weekastar

مبروووووووووووووك وانا ان شاء الله ناوى اجيب نيو اكسنت بصراحه السايت هنا حببنى فيها اوى العربيه دى . بس عايز اعرف مشاكلها ايه؟؟

المشاركة الأصلية كتبت بواسطة weekastar

عايز اعرف حضرتك متعامله مع انهى بنك بالظبط والضمانات ايه . وياريت لو فى رقم تليفون للبنك والمعرض علشان لو كدة اتعامل معاهم احسن

الله يبارك في حضرتك بالنسبة للعربية انا ملاحظتش فيها مشاكل جوهرية لحد دلوقتي لاني لسة العربية جديدة ومقعدتش معايا الفترة اللي اقدر احكم عليها بمنطقية لكن في ناس بتقول ان من عيوبها انها عفشتها ناشفة موضوع العفشة الناشفة انا يمكن بحسه لما بيكون في تكسر مثلا او عديت علي مطب غبي ومخدتش بالي فبحس بوصت رزع كدة مش عارفة ده هو المقصود بالعفشة الناشفة ولا ايه. وفي ناس بتقول عيبها انها خفيفة ومش ثابتة انا بصراحة مقدرش برده اقول رأي قاطع في الموضوع ده لإن اكتر سرعة جبتها بيها كانت 110 او 120 والعربية كانت عادية وبرده عادية في الملفات فموضوع الثبات محتاج سرعة اعلي من كدة عشان يتحكم علي ثباتها صح واعتقد ان الموضوع محتاج شاب ويكون ساق عربيات تانية غيرها في نفس الفئة عشان يكون الحكم عادل.
ولو فيها مشاكل تاني ممكن حضرتك تعمل بحث في المنتدي وهاتلاقي ناس كتير ذاكرين مميزاتها وعيوبها.

بالنسبة للمعرض انا اتعاملت مع معرض السقا ودي ارقام تليفوناته
26344440 - 26355550 - 26366660

بالنسبة للبنك هو اسمه البنك الوطني للتنمية (أبو ظبي الاسلامي)
عناوين فروعه وارقام تليفوناتهم في اللينك ده
http://www.nbdegypt.com/Cairo%20arab.html

اما شروطه وضماناته فموجودة في الاقتباس ده

المشاركة الأصلية كتبت بواسطة R A N A

بالنسبة للتقسيط تبع البنك ده فشروطه كالتالي:
المقدم ميكونش اقل من 25% من تمن العربية
القسط لايقل عن 35% من الراتب الشهري
الفايدة بتكون 9% ثابتة سنوياً
أقصى مدة للتقسيط 5 سنين
الورق المطلوب صورة بطاقة + ايصال كهربا أو مياه أو غاز حديث (ميكونش مر عليه أكثر من 3 شهور تقريبا) + خطاب HR مفردات المرتب + عرض سعر بنوع وموديل وسعر العربية من معرض معتمد لدى البنك.
حضرتك بتودي الورق ده للبنك وبعدين تاني يوم بيتبعتلك استعلام على البيت والشغل وفي خلال 3 ايام الموافقة بتطلع (بس هما بتوع الاستعلام رخمين شوية واسئلتهم كتيرة ورخمة) بعد الموافقة ماتطلع ، المندوب بينزل المعرض ويعاين العربية بنفسه ويكتب عقد شرا بين البنك وبين المعرض فيه رقم شاسيه العربية وبياناتها كلها.
بعدين حضرتك بتروح البنك تسدد المقدم وتمضى الشيكات (بتمضي على شيكات ربع سنوية كل ماتسدد 3 أقساط تاخد شيك وبتمضى كمان على 4 شيكات كمان بقيمة التأمين الشامل لل 4 سنين لما بتجيبلهم وثيقة التأمين بتاعة كل سنة بتستلم الشيك بتاعها) والعقد اللي بينك وبين البنك، وتاني يوم بتروح البنك تاخد خطاب التوصية وخطابين للمرور وبتعمل طبعا وثيقة تأمين شامل على العربية بإسمك ولصالح البنك وبتاخد كل الورق ده وتروح المعرض تستلم العربية.
تاني يوم بتنزل ومعاك مندوب من المعرض ترخص وتعلق نمر وتسلمه صورة من الرخصة بتاعة العربية.
بس كده
هي دي كل الإجراءات الموضوع مش معقد اوي لكنه محتاج صبر شوية وشوية مشاوير خصوصاً لو العربية مش متوفرة في المعارض (زي حالاتي كده) .
بالنسبة لموضوع انه إسلامي صرف بصراحة انا مش هاقدر أجزم إن كان فعلا فعلا اسلامي اكيد او لأ !
لكني فضلت البنك الأبعد عن الشبهات لإنه مش بياخد نسخة مفتاح ومش بيكتب توكيل على العربية (حظر بيع فقط) وكمان بيكتب عقد شرا بينه البنك وبين المعرض ولازم تاريخه يكون قبل تاريخ توقيعك على عقدك مع البنك (وإسمه عقد مرابحة) ومش بيكتب شيك إجمالي بسعر العربية كلها ومش بيحتاج ضامن وكمان كان في بند إن في حالة التأخير عن دفع القسط بيعمل غرامة 2% من قيمة القسط لكني الحمد لله لاقيتهم لغوا البند ده في العقد الجديد (بند الغرامة كان مطبق لحد نهاية الشهر اللي فات واتلغي من اول شهر 7 والحمد لله ).
وكمان انا طلبت الإضطلاع على كل الورق قبل ماكمل أي اجراءات معاهم والمندوب أكدلي إن عندهم لجنة شرعية هي اللي حاطالهم ترتيب الإجراءات بالشكل ده وبنود العقد دي.
عموما انا هاحاول اعمل العقد Scan وارفعه على المنتدي هنا تشوفوه.
انا بعتذر عن تأخيري في الرد لكنى كنت مشغولة اوي امبارح والنهاردة فمعرفتش ارد بسرعة.
اتمنى المعلوماتي دي تفيد حضرتك وألف مبروك مقدماً

[marq="3;right;3;scroll"]الف مليون مبروك[/marq] رنا على العربيه الجديدة انا ناوى اجبها من ابو غالى من اسكندرية وكنت خلاص حجبها بس حصل ظروف عندى فلمى راحت الظروف خلاص نويت اجبها من المصرية للسيارات مانيوال لون فضى ميتالك 2010 فايه رائيك فيها كعربية وبقولك حافظى عليها وخلى بالك منها وممكن لو ظروفك تسمح تجيبى عربية صغيرة 127/128 تروحى بيها المشاوير الصغيرة اللى مثلا فى المناطق المكسرة على اساس تحافظى عليها وعموما ربنا يحفظهالك

المشاركة الأصلية كتبت بواسطة med

[marq="3;right;3;scroll"]الف مليون مبروك[/marq] رنا على العربيه الجديدة انا ناوى اجبها من ابو غالى من اسكندرية وكنت خلاص حجبها بس حصل ظروف عندى فلمى راحت الظروف خلاص نويت اجبها من المصرية للسيارات مانيوال لون فضى ميتالك 2010 فايه رائيك فيها كعربية وبقولك حافظى عليها وخلى بالك منها وممكن لو ظروفك تسمح تجيبى عربية صغيرة 127/128 تروحى بيها المشاوير الصغيرة اللى مثلا فى المناطق المكسرة على اساس تحافظى عليها وعموما ربنا يحفظهالك

ان شاء الله ربنا يكرمك وتجيبها قريب بإذن الله بس بلاش المصرية للسيارات لإن في ناس كتير بتشتكي منهم في المعاملة وانهم معندهمش مصداقية في كلامهم فلو عرفت تشوف موزع تاني موثوق فيه افضل من المصرية يبقي افضل.

بالنسبة للاكسنت هي عربية لطيفة ومش مضايقاني في حاجة لحد دلوقتي والحمد لله ولما اخترتها اخترتها عشان مناسبة ليا كسعر وكماليات وكمان عيوبها مش كتيرة اوي زي عربيات تانية في نفس فئتها.
اما موضوع العربية الصغيرة فده مستحيل طبعا لإني بدعي ربنا يقدرني اني اعرف الاحق علي قسط الاكسنت ومصاريف صيانتها فصعب جدا اني اجيب عربية تانية واصرف عليها خصوصا ان كان معايا قبلها 128 وعارفة غن العربيات القديمة بتصرف كتير .
عموما ادعيلي ان ربنا يحفظهالي ويقدرني اوفي باقي اقساطها.
والف مبروك علي الاكسنت الفضي مقدماً