الموضوع: تقييم السيتي 2009 علي طريق السويس

انا بحب أنقل تجربة صغيرة عن العربية لأن في ناس كتير عايزة تعرف العربية دي
أولا انا مش حريف سواقة أوي يعنى مش بتاع جري و غرز و الذي منه, رغم اني بسوق من حوالي 17 سنة بس الشقاوة كانت زمان جرى و طنطيي وهربدت الدنيا و الـ127 كمان بس خلاص الواحد كبر و بقة في أسرة و مسئولية.

المهم نخش فالموضوع أنا جبت السيتي من حوالي أسبوعين كان مكتوب فالمانوال ان أول 1000 مهم جدا عدم التسارع بحدة أو أستخدام الفرامل الفجائية لأن الحاجتين دول بيحددو مستقبل العربية بعد كده, طبعا الواحد كان نفسه يطلع أي حتة فاضية و يجرب إحساس السرعة ئلى أتحرم منه من زمان بس تم التعامل مع الموقف (الحمد لله)

بعد لما خلصت الـ 1000 طلعت علي الدائري وقلت هنطير يا معلم, بس معرفتش أعدي الـ 140 , دايما بتظهرلك عربيات عند الملفات و الموضوع مش محتاج مجازفة و الواحد مش أول مرة يجرب العربية يحرق ويزننق في الملفات و هوة لسة مش عارف ثبات العربية وواخد عليها كويس, لكن فالمشوار ده الموتور كان وحش جبار تحس انه بيشد علطول و مش بيريح , عند الـ 80 هنلائى نقلة و عند 120 حتلائي نقلة تانية و عند الـ 130 في نقلة برده
و بعد كل نقلة من دول الماتور بيجمع بقوة و ده بيدى إحساس ان الموتور عنده أكتر ممكن يديه و ان تقفيل العداد موضوع سهل لو الظروف مناسبة.

كانت نتيجة التجربة دى ان العربية عايزة طريق مناسب أكتر من ناحية ان ميكونش في مخاطرة من الجري, يعني مغامرة محسوبة و استمتاع بدون أضرار للنفس أو للغير, وجت الفرصة دي فيوم كنت رايح السويس وراجع فنفس اليوم, الساعة 9.30 مساء و الطريق للي عارفه فى مساحات طويلة بدون إضائة و بالمناسبة إضائة العربية مش قوى يعنى النور الواطي بيفرش حلو علي المسافات القريبة و بعد كده عتمة عتمة عتمة أما النور العالي بينور مسافة بعيدة شوية عن العربية ومش بقوة يعنى من غير ميفرش وكمان المنطقة القريبة مبيكنش فيها نور خالص, رغن أن العربية سبارك مثلا ممكن تشغل العالي و بيوضحلك كل شئ من بعد أول العربية لغاية مسافة محترمة, وده انا بعتبره أول عيب فالعربية. يعنى لو بتسافر بليل فى طريق زي ده هتحتاج إضائة أقوي على العالى مع إضائة قريبة من شبورة مثلا أو حاجة زي كدة

في رحلة الذهاب بظروف الإضائة غير المشجعة مع اني مش حافظ الطريق كان القرار أنى أجري على خطوة ئلى قدامي ولو حبيت أعديه بعدى بس لما يظهر من بعيد حد تانى أجري لغاية عنده وهكذا , أنتو عارفين المثل بيقول الغريب أعمى وأن كان بصير, ملحوظة : معظم الطريق كنت ماشى خلف فرنا قديمة ملاكي السويس كان فيها أسرة وكل لما أعديها و أبعد عنها تظهر بعد شوية وتعدينى بثقة و ثبات. وكانت النتيجة انى معرفتش أعدى الـ 140 و أكتشفت موضوع النور ده, وحاجة تانية كمان العربية كانت بتحدف من قدام مش بتعوم من ورة و ده لما مبيكونش فى الحاجز الأسمنتى على الشمال بينك وبين الطريق الراجع وده على سرعة 140 و مش مستمر كتير حصلت مرتين بس وبعد كده العربية كانت ثابتة.

في رحلة العودة كانت الظروف أحسن شوية الطريق كان فاضى و الناس خارجة من السويس علي 120 وأنت طالع بس النقل كان كتير وكان بيوقع منه طوب صغير كان بيرزع فالأزاز رزع يخلي قلبك يوقع فرجلك, المهم زى مقلت الطريق كان فاضى وئلي موجود طاير , وكانت دى الفرصة الأخيرة ليه لإختبار الجرى و الثبات.

طبعا العربية بتجمع معاك لغاية الـ 140 بسهولة مش بسرعة قوى بس بسهولة ونعومة وتحس أن الماتور أسد
لكن الحقيقة غير كده, بعد 140 الماتور بيفلس مش بيحافظ على التجميع بتاعه بيحتاج وقت شوية عشان يديك سرعة أكتر , بس الحقيقة لغاية الـ140 أسد فعلا صوته أسد و الـrpm مريح مش بيعدى 4 تقريبا والأحمر من أول 7 لغاية 8 و الثبات والتحكم زى الفل لو الأسفلت خشن بتكون العربية مكلبشة وتديك ثقة في تعرجات الطريق و الأنحنائات لكن لو الأسفلت جديد و ناعم بتحس أن العربية عايمة شوية , نرجع للطريق , طبعا علي 140 كنت معدى من نقل تقيل (100-120) لميكروباص تويوتا (120) لبيجو 7 راكب (120-140) لغاية لما الفيرنا ظهرت (فيرنا تانية طبعا) المهم المعلم بتاع الفرنا شرخ مني فقلت مبدهاش كبست بنزين علي الأخر الماتور زمجر و زمجر و زمجر و بس معرفتش أجيب المعلم و العربية أستقرت على 160 و لا عزاء للهوندا , المعلم بتاع الفرنا طبعا فص ملح وداب ومشفتوش تاني ولا حتي فالحلم لما وصلنا البيت بالسلامة ونمت.

الخلاصة عشان طولت عليكوا:
1- العربية ناعمة و مريحة وشيك وكفاية أنها هوندا
2- مش عربية سحب وشد وجرى وسباقات , طبعا بتسحب وتجرى بس فالمعقول و العملي
3- موضوع أن الموتور بيدى أحساس أعلى من قوة الحقيقية ده عن طريق أستبيان عمله 50 مهندس من هوندا مع عينة من مالكى السيتى القديمة و الناس كانت عايزة إحساس رياضى وقوى للموتور وكانت النتيجة أنهم شالوا الفتيس الأوتوماتيك الـ cvt و حطوا أوتوماتيك 5 سرعات, الأول أنعم والتاني متوحش
4-موضوع الفرنا ده يمكن عشان هيا أقرب للأرض من السيتي
5-تجربة العربية في أستراليا كانت النتيجة أن السرعة القصوي للسيارة جنط 15" بحمولة 2 راجب بالغ بالإضافة للسائق و الدواسة علي الأخر وفمنزل كانت 180 ك أما النسخة الأخري من السيارة بكل الكماليات (غير موجودة بمصر أو الإمارات) بجنوط 16" كانت 170ك بنفس الظروف السابقة
6-الإضائة مش مريحة للسفر الليلي ولازم إضافات
7-ئلى عايز يعرف أكتر عن سيتى 2009 يضور على موقع هوندا أستراليا

أخيرا فى أنتظار أرائكم وتقيمكم للسيارة و أدائها

مليون مبروك وربنا يباركلك فيها