الموضوع: تقييم السيتي 2009 علي طريق السويس

السلام عليكم وشكرا علي تعليقاتكم

أولا نسيت أضيف أن السيتى فيها عداد متوسط إستهلاك البنزين (عدد اللترات) لكل 100 ك , بالنسبة لمشوار السويس كان المعدل 7 لتر لكل 100 ك مع العلم أني بستخدم بنزين 92 أما داخل القاهرة فالزحمة ممكن توصل لـ8.5 لتر لكل 100ك و علي الأوتو ستراد والدائري ممكن 6 لتر لكل 100 ك لو ماشي علي 80-100.

ثانيا القوائم الأماية للسيارة محتاجة شوية تعود في الأول لأنها بتأثر علي الروئية رغم أنهم شالوا المثلث ئلي كان موجود فالسيتي القديمة (نتيجة الأستبيان بتاع الـ50 مهندس) بس في الملفات بتعوز شوية تركيز لغاية لما تتعود عليهم, الكبوت عمرك مهتشوفه ولا الشنطة , انا شايف ان السنسورز مهمين.

ثالثا العجل بيجي منفوخ علي 36 و المفرض أمامي 32 و خلفي 30 , لما ظبط العجل فرق كتير واداء العربية أتغير تماما كانت أنعم وفنفس الوقت أثبت على الطريق و تحس بأمان أكتر لما تجري

رابعا بالنسبة لـ
ali357
"القعدة جوة العربية عاملة ازاى وخصوصا فى الكنبة الخلفية وعالية العربية ولالا وتكيفها قوى"

للقعدة مرتاحة جدا للسائق و الراكب الأمامي انا روحت السويس و لفيت فى البلد و أكلت و رجعت تانى ,المشوار كان من 9:30 مساءا حتى 3:30 صباحا محستش بإرهاق غير من موضوع الإضائة بس, أما لو حد جنبك وهينام لازم تجبله مخدة من ئلي بيثبتو الرقبة عشان ميتعبش :)
التكييف المروحة كانت علي 1 و التبريد علي 2 و الجو برة العربية كان سخن برطوبة عالية جدا.
الكنبة الخلفية مرة ركب معايا 3 أفراد حوالى 240ك على الكنبة غير راكب جواري وحوالي 90ك شنط في شنطة العربية كنت رايح المطار, العربية كانت بتسحب و تجمع و مكحتش معايا حتى وانا طالع من النفق أو طالع الكوبري ده غير ان التكييف كان شغال المروحة علي 3 و التبريد على الأخر وكانت الساعة 4 العصر و صلاح سالم واقف, محدش أشتكى أن الكنبة مش مريحة أو من التكييف و التكييف أنا تعبت منه فقررت أخلي المروحة علي 2 و خليت الجريلات بعيد عنى شوية, وكمان بكل الحمولة دى العربية محكتش فأي مطب فى شارع أحمد حلمي و أنت رايح على كوبري 6 أكتوبر.

Ghost2
"ادخل القسم التعليمي هتشوف اساليب التليين لحد 5000 كيلو"
شكرا علي الإضافة و جاري التعامل , أما إضائة السيتي هالوجين , بالمناسبة فى مفتاح Vertical angel adjustment للنور يمكن محتاج لعب وتظبيط مني .

kemo0o
بالنسبة للسرعة القصوى 180 ك/س , انا جبتها من رفيو للعربية فى أستراليا أبحث في ياهو علي city 2009 reviews هيكون واحد منهم, معلش مش هعرف أجبهولك دلوئت, ومتنساش أن الصحافيين بيجربوا العربية أكيد بدون التليين الكافي زي مفهمت منكم.

ashouhdy
العزل الصوتى انا مليش خبرة قوي فالعربيات الحديثة وكده فبالنسبالي لما أقارن بـ127 مينفعش أتكلم , كمان عندي سبارك و مش حاسس أن الفرق كبير , كمان لما كنت لسة بلف و أدور لاحظت أن التيدا ملهاش صوت نهائي كأن العربية مطفية وفى الفضاء الخارجى مش فشارع النزهة , كمان السيتي بتحس بالموتور بسيط فى رجلك و العربية واقفة فمكانها, يعني التيدا أحسن فالعزل.
التكييف الصبح و حتي 5 العصر على الأوتوسطراد المروحة بالكتير علي 2 و التبريد علي الأخر وساعات بتعب منه بقفله خالص و أفتح الشبابيك أسخن شوية ولما أرتاح أشغله تاني و بيكون معايا غالبا راكب واحد أو أثنين و المشوار ده 40ك الساعة 8 الصبح و حوالي 40 ك زيهم الساعة 4 فعز الشمس , بس أنا قرأت هنا فالمنتدي أن تكييف النيسان هو الأفضل فالياباني بشكل عام .
مقاس الكاوتش 15" ده بتاع التوكيل لكن الـ16" منزلش مصر ده بيكون مع الكماليات التانية و بالمناسبة العربية متشال منها حاجات كتير كلها علي بعض بتلاتة تعريفة زي مراية فالشماسة, سمعتين فالأبواب الخلفية مفتاح بالريموت (واحد علي الأقل), مكان مجلات فظهر الكراسي الأمامية , إضائة قرائة, مراية الوسط مفهاش تجهيز للقيادة الليلية, لو الوكيل نزل العربية مانيوال بكل الكماليات و الجنوط كان أفضل وربما أرخص,
جودة خامات التابلوة ممتازة جدا وعملي ومفهوش تعقيد ولا مبالغة و الـ USB بورت تحفة, علي عكس تقفيل الأبواب من الداخل متحسهاش فيها فخامة أو حتى جودة كأنها لعبة بلاستيك.

و أخيرا شكرا علي التجاوب لكل الردود الأخري

spiderbaz الف الف ميروك