كباريه و الريس عمر.. هي دي مصر؟

[Dr.A.Nabil]

يا جماعه
والله كل ده خطه محطوطه
ومدروسه
من اعدائنا
للوصول بمصر
الى محو الدين تماما
فالمخطط يهدف الى جعل العري الكامل موجود في افلامنا
وهايحصل
بس مش دلوقتي

لاحظوا معايا التدريج....:
-زمان كانت المسلسلات مافيهاش اي عري خالص ولا برامج التلفزيون.. كمان لبس المذيعات كانت محتشم جدا.
-الاغاني زمان والكليبات ماكانش فيها اي عري... وراجعوا كليبات التسعينات..
-بعد كده تطور الموضوع
وظهر قنوات الفيديو كليب... وازداد فيها العري بشكل ملحوظ
-ثم ازداد التعري جدا في افلامنا... وقنواتنا ومسلسلاتنا
واصبحت كل المذيعات يتسابقون في التعري والتبرج...والمحزق والملزق(اللي اخطر من العريان)
-هي خطه مدروسه
ومسلسلسه
ومنظمه
للوصول بنا الى العري الكامل
وتدمير الشباب
وفصل الدين عن الدوله... ليصبح خمس فروض وبس...ومش اكتر من كده..

[meza]

-زمان كانت المسلسلات مافيهاش اي عري خالص ولا برامج التلفزيون.. كمان لبس المذيعات كانت محتشم جدا.

خطأ
بس الفرق زمان إن الناس كانت محترمة و عندها لياقة و ذوق ...

-الاغاني زمان والكليبات ماكانش فيها اي عري... وراجعوا كليبات التسعينات..

زمان مش يعنى فترة التسعينات ..... زمان يعنى زمااااان :D

-بعد كده تطور الموضوع
وظهر قنوات الفيديو كليب... وازداد فيها العري بشكل ملحوظ

صحيح

-ثم ازداد التعري جدا في افلامنا... وقنواتنا ومسلسلاتنا
واصبحت كل المذيعات يتسابقون في التعري والتبرج...والمحزق والملزق(اللي اخطر من العريان)

صحيح

-هي خطه مدروسه
ومسلسلسه
ومنظمه

لا أوافقك الرأى ..... مش بحبذ فكرة الخطة دى .... لأنها أى خطة بيبقى فيها سقطات و صعب قوى تكون مدروسة و محكمة بالشكل الرهيب ده.


ممكن متضايقش من طريقة ردى دى ... يعنى صح و خطأ .... أنا بس عشان مزهقش من كتر الكتابة
بس أتمنى اللى عايز أقوله يوصل.

[shikkobikko]

عندى ملاحظة غريبة شوية و يمكن بره الموضوع كام حد من الاخوة الافاضل الى قامو بالتعليق شافو فعلا الفيلمين؟؟؟
ازاى احكم على حاجة من اعلانها او حتى من خبرتى السابقة على مخرجها انا مش بتكلم عن الموضوع ده تحديدا بس بتكلم بشكل عام احكم ازاى على حاجة انا مش عارفها بس عشان الناس قالت كده

[meza]

عندى ملاحظة غريبة شوية و يمكن بره الموضوع كام حد من الاخوة الافاضل الى قامو بالتعليق شافو فعلا الفيلمين؟؟؟
ازاى احكم على حاجة من اعلانها او حتى من خبرتى السابقة على مخرجها انا مش بتكلم عن الموضوع ده تحديدا بس بتكلم بشكل عام احكم ازاى على حاجة انا مش عارفها بس عشان الناس قالت كده

لأ ما هو كله شغال بالقيل و القال ...

فاهمنى طبعاً

[Dr.A.Nabil]

اازاي الواحد يحكم على الفيلم من غير ما يشوفه؟؟
انا اجاوبك يا سيدي:
-اعلانه
-نقده في الجرايد
-انطباع الناس اللي دخلوه

ولو طبقنا التلات عوامل دول..هاتقدر تستنبط كل ما تريد ان تعرفه..

عموما الواحد مش لازم عشان يتبسط ياخد ذنوب..

انا النهارده كنت في السينما انا وراتي
ودخلنا فيلم كارتون
كونغ فو باندا

والله اجمل عندي من اي فيلم عربي تافه

وبرضه دخلنا انا وهي قبل كده فيلم الجزيره..
لانه فيلم خالي من اي مناظر او قبلات

ودخلنا مسرحية الملك لير.... من لجمل امسرحيات اللي في التاريخ..


يعني مش لازم نختزل المجتمع المصري في الكباريهات وصالات القمار والعريانه والسكران والشاذ والعاهره

مش هو ده المجتمع المصري

[meza]

خلاص يبقى حضرتك مينفعش تحكم على شىء مشفتوش.

كده حضرتك كونت رأيك بناء على أراء أخرى . قد تصح و قد تخطىء .... و كمان يبقى الرأى ده مش بتاع حضرتك ... يبقى تجميع لآراء ناس تانية.

يعني مش لازم نختزل المجتمع المصري في الكباريهات وصالات القمار والعريانه والسكران والشاذ والعاهره

طبعاً مينفعش نختزل المجتمع المصرى فى الصور دى ..... و إلا يبقى منعرقش حاجة عن مصر و مش عايشين فيها.
بس جزء كبير و خطير من مشكلات المجتمع موجودة فى الأماكن دى.

و على فكرة مش كل الأفلام كده ... هتلاقى أفلام تانية كتير زى اللى حضرتك ذكرتها بتظهر الناحية التانية من الصورة.

[shikkobikko]

خلاص يبقى حضرتك مينفعش تحكم على شىء مشفتوش.

كده حضرتك كونت رأيك بناء على أراء أخرى . قد تصح و قد تخطىء .... و كمان يبقى الرأى ده مش بتاع حضرتك ... يبقى تجميع لآراء ناس تانية.



طبعاً مينفعش نختزل المجتمع المصرى فى الصور دى ..... و إلا يبقى منعرقش حاجة عن مصر و مش عايشين فيها.
بس جزء كبير و خطير من مشكلات المجتمع موجودة فى الأماكن دى. .

بالظبط كده و هو ده الى انا قصدته مينفعش احكم على شىء من غير ما اشوفه و على العموم انا شفت الفيلمين و بالرغم من تحفظى على عدد كبير من المشاهد الا ان الفيلمين بهم فكرة ما و فيلم كباريه بالتحديد بيتكلم عن عدم جدوى المال الحرام.

[Adham_Sabry]

الناس اللي بتقول ان مشهد الإغتصاب مفيد ...
كنت عاوز اسألهم يا تري يرضوا ان اختهم او امهم تقوم بالدور ده علشان توضح المعاناه والمأساه ..يعني الأغراض النبيله والكلام الكبير ده ؟؟؟ أترضاه لأختك ؟؟ أترضاه لأمك ؟؟

ويا جماعه اللي دخل الفيلمين دول يقول لنا هو بعد ما اتفرج هايكون اكتسب حسنات ولا سيئات ..

[Dr Ahmed]

يا شباب
أنا شفت الفيلمين الأسبوع الماضى

فيلم الريس عمر حرب:
كإخراج: يمكن القول إنه عمل فنى متقن
كفكرة ومضمون: على حسب فهمى:
القصة مغزاها إن الشيطان يسيطر على الأشخاص المفسدين ويصبحون عبيده ويصبح كأنه ربهم ، وحين يسيطر الشيطان فسيكون ذلك على حساب كل القيم الموجودة فى حياتك...
كلام جميل .. ولكن..
ليس كل من رأى الفيلم وصلته هذه الفكرة... لأن طريقة توصيلها مليئة بكل أصناف القذارة التى تستحى معها أن تذهب حتى لوحدك لمشاهدة الفيلم ، ناهيك لو معك أسرتك... دعارة عينى عينك ، سمية الخشاب والتانية (مش فاكر اسمها) وغيرهم: كلهن قرايب للأسد فى الفيلم وسامحونى لأنهم فاقوا كل كل الحدود حتى اللى كان المتساهلين عاملينها... ومش هقول أكتر.. باختصار: إياك أن تذهب لرؤية هذا الفيلم.

فيلم كباريه:
كنت متوقع أن يكون فيلم هابط (كانوا 3 أفلام فى السينما الصيفية) .. لكن المفاجأة: فيلم على مستوى فكرى عالى جدا جدا ، بيعرض حياة بشر مليئة بالمتناقضات والازدواجية .. وبتتجمع خيوط قصص كثيرة فى ليلة واحدة فى الكباريه الذى ينفجر وتختلط دماؤهم..
الفيلم بيقدم رسالة رهيبة.. ما يهمنى منها طريقة محاربته الراقية للعنف الدينى ، فلم يسخر من المتدينين كعادة أبالسة السينما.. بل قدمهم بصورة قريبة من الواقع...
ولن أحرق الفيلم على من لم يره ، فباستثناء بعض مشاهد الرقص -الخليع طبعا- والأغانى الهابطة - كجزء من الكباريه- يصير الفيلم تحفة فنية
لا أستطيع أن أنصح أحد برؤية فيلم.. لكنى لست نادما على رؤيته، بل بالعكس تماما..
أما الريس عمر فنادم على كل دقيقة قضيتها أمامه، وقررت مقاطعة أفلام مخرج الفيلم الذى يسير على نفس الوتيرة الرديئة - مهما كانت حججه- لأن الغاية لا تبرر الوسيلة.

[meza]

دكتور أحمد .... أشكرك على رأيك و أحييك عليه و على طريقة عرضه.

المفروض يا جماعة لما حد يكتب رأيه فى شىء يكتبه بالطريقة دى .... حتى لو هينقض الشىء ده ... برضه فى طريقة لعرض الرأى ...... مش يبقى هجوم أعمى على شىء مشفتهوش أصلاً .... كده ميبقاش رأى. :)

تقبلوا تحياتى

[Adham_Sabry]

برضه فى طريقة لعرض الرأى ...... مش يبقى هجوم أعمى على شىء مشفتهوش أصلاً .... كده ميبقاش رأى.

شكلك كده تقصدني .. عموما كتر خيرك .. بس انت برده مردتش علي سؤالي

الناس اللي بتقول ان مشهد الإغتصاب مفيد ...
كنت عاوز اسألهم يا تري يرضوا ان اختهم او امهم تقوم بالدور ده علشان توضح المعاناه والمأساه ..يعني الأغراض النبيله والكلام الكبير ده ؟؟؟ أترضاه لأختك ؟؟ أترضاه لأمك ؟؟

ولا حد رد علي السؤال ده

ويا جماعه اللي دخل الفيلمين دول يقول لنا هو بعد ما اتفرج هايكون اكتسب حسنات ولا سيئات ..

وبعدين انت معترض علي اني مشفتش الأفلام دي .. يعني فيه زجاجه مكتوب عليها "سم بطيء المفعول" وموجوده في محل مبيدات حشريه .. وانا باعترض علي الناس اللي بتروح تشرب من السم ده .. فانا كده يبقي حكمي اعمي ولازم اشرب من السم الأول قبل ما انتقده واقول انه ضار ..
انت عاوزني اتفرج علي ايه ؟؟ انا هاقتبس بعض الكلام اللي انتم كتبتوه

فيلم زي "حين ميسرة" .. أولا الفيلم معلق لافتة (للكبار فقط) .. و أكيد اكيد مش فيلم رعب .. يبقي أكيد الفيلم فيه بعض الكلام او المناظر الغير مناسبة لغير البالغين

يعني هيا المناظر دي حرام لغير البالغين وحلال للبالغين ؟؟

يعني مشهد اغتصاب سمية الخشاب من أهم مشاهد الفيلم

طب ليه ينقول علي افلامنا الابيض و اسود افلام الزمن الجميل و هي كانت مليانة ملابس ساخنة و احضان و قبلات ؟ و كانت سينما جميلة بجد .. بس الفرق ان محدش كان شاغل دماغه بموضوع السينما النضيفة دي .. و كان ده العادي .. و مكنش فيه حد بيبحلق و يريل و كانوا نجمات السينما وقتها قمرات ..

السينما عملية ابداعية ( وانا بتكلم عن المبدعين الحقيقين و ليس التجار امثال السبكي و غيره و منتجين افلام البورنو من اجل البورنو) .. ممكن نناقش المخرج ( رب العمل ) في مقصده من تقديم مشهد معين و ما غرضه .. انما مينفعش نقوله انت ازاي تعمل كدة !؟ اوعي تعمل كدة تاني ! لأن دي رؤية ابداعية .. ممكن نختلف او نتفق معاه فيها .. انما نحجر عليه فيها .. مينفعش

يعني لو مخرج عمل فيلم فيه فكر عالي وحبكه دراميه لمحاربه المخدرات وفيه مناظر زني ( اسمحلي استخدم اللفظ الأصلي ) .. يبقي عادي ومينفعش نقوله انت ازاي تعمل كدة ؟؟

مثلاً مشهد إغتصاب ممكن يخلى شاب يحس على دمه و يعرف خطورة الجريمة دى و شاب تانى .... !!!

فى ناس دخلت حين مسرة و قعدت ساعتين كاملين عشان تتفرج على مشهد و لا مشهدين .... و دول ناس عندهم نقص ... عقلهم مش سليم.
.
.
.

أسلوب الرقيب طول عمرى بقول إنه فاشل فاشل .. و هفضل عند رأيى.
الناس دول بالغين و مش محتاجين رقابة .... لو عاوز الغلط هيروحله بألف طريقة.

يعني ممكن نطالب بالسماح ببيع المخدرات علنا وفي السوبرماركت ؟؟
ظهر الفساد في البر والبحر بما كسبت ايدي الناس

يتبع ....

[OlaOsman]

بالرغم من اختلاف الآراء، إلا ان الحوار ثري و راقي إلى حد مرضي :)

طيب انا هاحط ردي في نقاط:

1- بالرغم من تشعب الحوار حابة بس أذكر بعنوان الموضوع.. كباريه و الريس عمر.. هي دي مصر؟ و تسائلت عن مغزى نزول فيلمين في وقت واحد الأول بيصور حياة الكباريهات و التاني بتدور أحداثه في صالة قمار و تسائلت عن النماذج الجيدة في البلد.. مافيش يعني خلاص نموذج واحد كويس لشخصية تطرح ضمن أحداث الفيلم الواحد يحس من خلاله ان فيه أمل في البلد دي؟

2- بالنسبة لفيلم كباريه معظم اللي شافوه أثنوا عليه و واضح انه فيه فكرة بالرغم من إعتراض البعض على مشاهد الرقص الخليعة اللي فيه.

3- بالنسبة للريس عمر فأنا بالرغم من اني ما شفتش الفيلم إلا ان اعتراضي مش ع الفيلم في حد ذاته، انما على المخرج و إسلوبه الفج في عرض المشاهد ذات الصبغة الجنسية و التركيز عليها بطريقة مبالغ فيها و قلت اني مقاطعة لأفلام خالد يوسف من ساعة ما اتهورت و شفت فيلم حين ميسرة.

4- نقطة توضيح بس بالنسبة للمشاهد اللي بنتكلم عنها دي و اللي عدد من الأعضاء هنا أشاروا بأهميتها دراميا.. انا بس عايزة أقول اني و لله الحمد دراستي في كلية الآداب قسم اللغة الانجليزية أتاحت لي اني أدرس جانب من الفن و النقد الأدبي و من ضمن ما درسنا هو ان العمل الفني الجيد هو اللي يقدر رب العمل انه يقدمه بأقل قدر ممكن من التفاصيل.. أما الإغراق في التفاصيل ده فبيظهر لنا مخرج مش متمكن من أدواته كويس و مش قادر انه يوصل لنا الفكرة كاملة عن طريق الإيحاء. فبالرغم من ان المفروض ان خالد يوسف مخرج متميز، إلا انه عجز عن انه يوصل لنا مشاهد معينة من غير ما يأذينا.. على سبيل المثال مشهد الاغتصاب في فيلم حين ميسرة.. كان ممكن بمنتهى البساطة ان الكاميرا تتنقل بين الغرفة اللي فيها سمية الخشاب و المغتصبين و برة الغرفة اللي فيها الشاب و هو بيتعاطى المخدرات.. في تصوري انه كان هايكون أفضل كتير لو الكاميرا فضلت تتنقل هنا و هناك لحد ما تفاصيل عميلة الاغتصاب بدأت، هنا الكاميرا كانت هاتثبت على الولد اللي بيتعاطى المخدرات و بيتقطع بين رغبته في إنقاذ المغتصبة و بين رغبته الجامحة في تعاطي المخدرات اللي في إيده.. و في الخلفية الصراخ بتاعة المغتصبة شغال.. لحد الحتة بتاعة الولد و هو بيقرر إسكات ضميره بجرعة زائدة من المخدر و ينتهي المشهد على كده. هل المشهد بالطريقة دي مش مفهوم؟.. هل الأحساس ما وصلناش ببشاعة الاغتصاب و عبودية المدمن للمخدرات؟.. هو خالد يوسف مستغبينا اوي كده عشان يورينا مشهد الاغتصاب بتفاصيله المؤذية دي؟ و بعدين فيها إيه لما المخرج يرمز باللي بيحصل في المشاهد دي بشمعة تنطفي و لا إزاز شباك يترقع و لا اي من الحاجات دي؟ طيب ماهي مدارس فنية كاملة قايمة على الرمزية.. يعني الرمزية مش عيب، ده لو ما سلمناش بإنها مطلوبة في أحيان كثيرة منها المشاهد اللي بنتكلم عنها دي.

راجعة أكمل ان شاء الله عشان كده طولت اوي في رد واحد :)

[OlaOsman]

بالنسبة لنقطة للكبار فقط هي الحكاية مش كبار و صغار.. هو انا ينفع تحت اسم للكبار فقط أقدم فيلم من إياهم و بعدين اللي يسألني أقول له ما انا حاطط يافطة للكبار فقط؟؟ و هي يعني المشاهد اللي بيقدمها خالد يوسف مش صادمة للكبار؟ انا من ساعة ما شفت حين ميسرة و انا فهمت الرسالة اللي عايز خالد يوسف يوصلها للناس.. الرسالة محتواها هو ان هي دي طريقتي في تقديم أفلامي القادمة و اللي يقبل بشروطي يدخل أفلامي و اللي مش قابل ما يدخلش.. و بالفعل صدقت توقعاتي و جه الريس عمر أسوأ بكثير من حين ميسرة من حيث المشاهد إياها و المبالغة في تصويرها و ده بشهادة كل اللي شافوا الفيلم و منهم ناقدة سينمائية مستاءة من الطريقة دي.

[meza]

شكلك كده تقصدني .. عموما كتر خيرك .. بس انت برده مردتش علي سؤالي

أستاذى العزيز أدهم .... و أنا بكتب الرد مكنتش حاطط فى دماغى حد معين ... و كنت أقصد كل الناس اللى بتكتب آرائها عن حاجة لم تختبرها ... و أسف لو كنت ضايقتك ... ده إحنا هنا كلنا إخوات. :)

الناس اللي بتقول ان مشهد الإغتصاب مفيد ...
كنت عاوز اسألهم يا تري يرضوا ان اختهم او امهم تقوم بالدور ده علشان توضح المعاناه والمأساه ..يعني الأغراض النبيله والكلام الكبير ده ؟؟؟ أترضاه لأختك ؟؟ أترضاه لأمك ؟؟

حضرتك أنا مبحبش الأسئلة اللى من النوعية دى ... بس ما دام حضرتك مصر .... هجاوبك عليه من وجهة نظرى الخاصة.

لازم أولاً نقسم الممثلين .... فى منهم محترمين و قى منهم زى الزفت
الممثلة اللى بتمثل مشهد الإغتصاب ممكن تكون نيتها مش سيئة ..... و يكون هدفها فعلاً هو توصيل رسالة .... بقول ممكن ... يعنى حسب الممثل و نيته.

لو أخدت مثال على الفنانة سمية الخشاب ..... لما بتفرج على لقائتها بحس إنها طيبة جداً و مش قصدها وحش من أى مشهد بتمثله ... بالعكس دى مرة ذكرت إنها دايماً بتاخد رأى والدتها فى المشاهد دى ... فأنا اللى حسيته إنها كويسة و مش زى ناس تانيين.

أما بخصوص أمى أو أختى .... فمش هعمل فيها حمش و أقول لع و هقتلها لو فكرت بس تعمل كده .....لكن أنا واثق فى تربيتها و أخلاقها ... و لو إختارت إنها تكون ممثلة .. أنا عارف كويس هى هتختار إيه ... و كمان واثق فى القرارات اللى هى هتاخدها .... بالإضافة إلى إنها مش قاصر و المفروض عارفة الصح من الخطأ .... و أكتر حاجة ممكن أقدمها هى نصيحة ... مش أكتر.


و كمان كل واحد و وجهة نظره
ممكن واحد يشوف مشهد إنه سىء و مخل و واحد تانى يشوفه مشهد رائع و هادف.

[meza]

بالنسبة لنقطة للكبار فقط هي الحكاية مش كبار و صغار.. هو انا ينفع تحت اسم للكبار فقط أقدم فيلم من إياهم و بعدين اللي يسألني أقول له ما انا حاطط يافطة للكبار فقط؟؟ و هي يعني المشاهد اللي بيقدمها خالد يوسف مش صادمة للكبار؟ انا من ساعة ما شفت حين ميسرة و انا فهمت الرسالة اللي عايز خالد يوسف يوصلها للناس.. الرسالة محتواها هو ان هي دي طريقتي في تقديم أفلامي القادمة و اللي يقبل بشروطي يدخل أفلامي و اللي مش قابل ما يدخلش.. و بالفعل صدقت توقعاتي و جه الريس عمر أسوأ بكثير من حين ميسرة من حيث المشاهد إياها و المبالغة في تصويرها و ده بشهادة كل اللي شافوا الفيلم و منهم ناقدة سينمائية مستاءة من الطريقة دي.

بتختلف يا أستاذة علا حسب المتلقى ..... يعنى لو طفل صغير... أكيد مش هيفهم المشاهد دى ... و كمان هو لسه منضجش لدرجة إنه يفهم معنى المشاهد دى .... و تأثيرها عليه هيبقى سلبى.

أما الكبار بقى .... ففى منهم اللى هيفهم ...و للأسف فى منهم اللى عقله معداش طفل صغير.