ماذا تفعل اذا صدمت شخص بسيارتك ؟؟( تجربة واقعيه )

[tutankhamoun]

و أفرض اللي بيعدي دا عيان! أو عنده حالة وفاة او مرض أو عنده هموم الدنيا اللي مكفياه ومش مركز ولا منتبه!!!! هل يجب أن نفرمممممممه بالعربية لمجرد إننا راكبين عربية و هو ماشي على رجله؟ طالما في أمل من إنقاذه...يبقى ليه لا؟

على فكرة..اللي رخص البني آدم مش الحكومة يا أستاذ توت، اللي رخص البني آدم هو اللي متخيل إنه طالما ماشي في الشارع و مغلطش و غيره غلط يبقى لازم نموته ونمشي.

وخليك فاكر إن كل واحد وله يومه بيغلط فيه! سواء كان بيسوق.. أو من المارة.


منطق الغابة لا يطبق إلا في الغابات....

أنا لو في بلد محترم ............ و مع ناس محترمة
هاقف أساعد مهما تكون الحالة

إنما أبقى أنا مش غلطان و أقف و ألاقي نفسي لابس سجن علشان خاطر واحد كان ماشي سرحان ( أنا مليش دعوة هو سرحان ليه )
المهم أنه أتسبب في مشكلة ليا و أنا مليش بيها أي علاقة
و ده ممكن يدخلني السجن
و أنام مع القتلة و اللصوص و المغتصبين أردء أنواع البشر اللي موجودة في السجن ...........
يبقى الحل أيه ؟؟؟؟
لما يكون فيه قانون ........... أقف و لو أنا غلطان مستعد أتحمل غلطي
إنما ألبس مصيبة بسبب خطأ غيري
فلا و ألف لا ........ إذا كنت أستطيع تجنبها

زمن الطيبة خلاص أنتهى

لو أظهرت للناس طيبتك ........... بتبقى ضعيف
و لو عملت فيها وحش بتبقى شيطان
فالأحسن أجتناب معرفة الناس و خلاص و الهروب إذا أنت لم تخطئ .......... لأنه مفيش حد هايجيب حقك أو يحاول يثبت برائتك

و تحيا ................. ج ع ع

[Noha.M]

أنا أقصد بالغلطان الرجل المتوفى -الله يرحمه- بس خدي باللك ممكن دفاع الخصم يستند بإن أخوكي كان بين التريلتين والمتوفى مكنش شايفه ...فعلا لازم الواحد يحط نفسه مكان الطرف الأخر ... بس دلوقتي إيه حصل جديد في الموضوع؟؟ أعذريني لسه عارف الموضوع ده دلوقتي والله .. كان الله في العون وربنا يسهلكوا الحال ..
بس بجد بعد لما ربنا يسهل بالخير بإذن الله . في رأيي تدوا لأهله قرشين كده مساعده برضو ده ممكن يكون رب لأولاد على وش جواز أو غيره ....وكله في ميزان حسناتكم وتثابوا عليه وأنتو طبعا مش مجبرين .
بس برضو لو الطرف التاني غلطان أنا مصر أني أسيبه يهاتي وأمشي .

لا محمد اخويا مش غلطان خالص لانه اولا ماشي اقل من السرعة القانونية على الدائري ثانيا محمد مكانش بين تريللتين دة كان على اقصي الشمال و على يمينه تريللا و شماله الصور اللى فاصل الاتجاهين !! يعني حتى احنا مش فاهمين الراجل بيعدي ليه اصلاا و رايح فين ! جايز هيعدى الصور الاسمنتي دة اللى فاصل بين الاتجاهين بس بجد حرام عليه نفسه ! ازاى حد يعدي من على الدائري! يعني شفت حضرتك الدائري كله مفصول الاتجاهين بتوعه بالفاصل الاسمنتي دة و مفيش حتى u turn للعربيات عشان تلف !! بعدين يا ريته حتى كمل جري قدام محمد .. دة جه قدام محمد و وقف من التعب بتاع الجري لانه على شهادة الناس اللى شافو الموقف بيقولو دة واخد الطريق كله جرى كدة و قلنا الراجل دة هيتخبط...
بعدين اللى مطمنا ان كل الناس وقفت مع اخويا و قالولو هنيجي نشهد معاك و انت مش غلطان . مع ان دايما فى المواقف دي يحملو الغلط علىطول على اللى سايق من غير ما يعرفو ايه اللى حصل لكن الحمد لله ناس كتير راحت مع اخويا و ادولو نمر موبايلاتهم عشان نبقي نكلمهم و كدة

طلع يا حرام بعد كدة انه لما ولاده راحو النيابة ان الراجل اصلا لع بيعانى من امراض الشيخوخة و عنده زهايمر و كل شوية يهرب من البيت و يجري كدة فى الشوارع و انهم مكانوش شافوه من يومين !!! و كل دة اتقال فى المحضر و اتكتب و فى صالح اخويا ان شاء الله

ربنا يكملها بالستر يا رب

[Ahmad Allawy]

والله يا جماعه فكرتوني بقصة مشابهة حصلت معايا انا شخصيا من حوالي 6 سنين..
اول ما جيبنا العربية ال125.. و انا كنت لسة مطلع الرخصة. و كنت راع من الكلية لوحدي الساعة 3 الضهر.. في عز الحر و الزحمة..وو لوحدي.. و مشغل الراديو بصوت عالي شوية.. (متجمعه فيا كل عوامل الغلط في نظر الشهود المصريين في الشارع)
الموضوع ده حصل في شارع بورسعيد علي الناصية اللي عند مدرسة الخديوية.. قريب جدا من مستشفي احمد ماهر التعليمي..
الشارع كان ضيق في حته كده عشان كان في تاكسي مالوش فيها بينزل زبون.. و بعد ما الشارع فتح شوية. جريت.. قرصت علي التاني و اديت التالت.. يعني بالكتير علي 50 مثلا..
ماشي علي افصي الشمال و مفيش عبور مشاة و اذا بيا الاقي واحد راجل كبير عنده حوالي 65 سنة.. بيجري بيعدي الشارع.. لقاني باجري شوية فوقف.. وانا كبست فرامل.. فلما شوفته وقف كملت مشي عادي جدا.. و لما قربت منه لقيته فجأة قام نط فجأة و كمل جري في اتجاهي..
لمسته بطرف العربية الشمال طااااااار في الهوا و اترمي علي الارض و راسه خبطت في الرصيف..
المهم وقفت و نزلت اشوف الراجل جراله ايه.. والشارع كله اتلم عليا و اللي يقول ده شيطان.. (عليا انا يعني) و اللي يقول انا شايفه عمال يجري من اول الشارع (و الشارع كان واقف اصلا.. !!!)
و كل اللي عنده كلمه واقفة في زورة طلعت..
المهم لقيت واحد متطوع من الناس دي قام ناطط في العربية و ساحب المفاتيح. مرضيش يديهالي غير لما قولت اني هاوديه المستشفي.. و الكلام ده مكانش تحت اي ضغط.. لأني كان معايا مفاتيح تانية.. و كان ممكن اسيه و امشي عادي جدا.. بس ضميري بقي وجعني و قولت طالما انا خبطته هاوديه المستشفي عشان اطمن عليه.. المهم الناس حطوه ف العربية و ركب معايا 2 م الشهود بس كانوا بخق الله حقانيين.. راجل كبير و واحدة ممرضة كانت ماشية..
اول ما وصلنا المستشفي و ركنت نط امين الشرطة اخد الرخصة اديتهاله بحسن نيه جدا و انا لسة صغير بقي و عندي 19 سنة و لسة مطلع الرخصة بقالي شهرين تلاتة..
الممرضة الي كانت معايا دي قبل ما الامين ياخد الرخصة.. قالتلي امشي دلوقتي في الخباثة كده (هي كانت عارفة اللي بيحصل بقي و انا اللي كنت علي نياتي..) و انا اقولها لأ طبعا..!!!! انا خبطته يبقي لازم اطمن عليه (عرق الرجولة و الحماس بقي لما بيعلي عند الواحد. خيبة شباب بعيد عنكم حتي لو مكنتش غلطان..) المهم اهلي يتصلوا بيا مش راضي ارد غير لما اطمن الاول.. عشان لو في نصيبة هارد عليهم ولو عادي مفيش مش هاقولهم حاجة..
المهم 3 ساعات لحد الراجل ما اتعمل ليه اشعات و الدكاترة شافوه.. (انا كنت شاكك في كسر في الفخد و ربنا يعافيكم جميعا مينفعش فيه غير عملة و مسامير و ليلة كبيرة.. عشان كده فضلت معاه)
المهم النتيجة انه مفيهوش كسور.. انا ارتحت جدا ساعتها.. و بعد ما خلصنا جه الامين و سأل الراجل قاله مش عايز منه حاجة انا عايز امشي.. (الراجل كان عنده ضمير و كان عارف انه غلطان و اني مش غلطان.. او علي الاقفل الغلط علينا احنا الاتنين..)
خرجت برة علي الشارع جيبت تاكسي و اديته الاجرة مسبقا و ركبت الراجل و مشي.. و انا مشيت. بس بعد ما جيبتله الادوية..
رعب بقي و مقولتش حاجة لأهلي ف البيت و مش راضي انزل بالعربية بعد ما كنت باتلك اخدها حتي لو نازل اجيب عيش مثلا.. :) بس عشان مياخدوش بالهم تحاملت علي نفسي و نزلت بيها تاني يوم عادي جدا..و احلام بقي ان يتعمل ليه مضر عشان اخدوا الرخص.. و ممكن اتسجن بقي و مستقبلي يضيع.. :) (مانا كنت لسة في سنة اولي في الكلية..) و كده لحد ما الموضوع هدي..
الحمد لله عدت علي خير لأن الراجل عنده ضمير.. و الحمد لله جت سليمة لحد كبير.

بعد كده بقي بقيت لو داخل علي حد بيعدي او بيفكر يعدي.. باهدي و انور النور او الكلاكس.. و اشاور بايدي كمان..يا اما اشاور عدي او اشاور اقف متعديش..
ملحوظة: انا كنت عنيف جدا في الرد علي الناس ساعتها فغي الشارع.. يمكن عشان كده محدش ساق فيها و اتكلم كتير.. فعلا بيشو عنده حق ف الحته دي..
و رأيي في الموضوع.. توديه المستشفي عادي بس ممكن تقف بعيد بالعربية.. و متديش رخصك لحد
و تمشي وقتي و متعملش فيها ابو الشهامة و الرجولة.. كفاية انت اخدت ثواب انك وديته المستشفي اصلا.. و ربنا يستها معاكم جميها و محدش يمر بالتجرية القاسية دي.. ولا خابط ولا مخبوط.. :)

[Ramy.Gamal]

على فكره فى امريكا مثلا لو حد بيعبر الطريق السريع اوبيعبر طريق واشاره السيارات خضراء او بيعبر الطريق من مكان غير مخصص لعبور المشاه وعربيه صدمته بيعتبروه كلب وراح ولا حد بيسعفه مش طبعا علشان الناس هناك ملهاش قيمه انما علشان هو اللى غلطان .انما هنا لو اى حد خبط اى واحد فى اى طريق وحتى اشاره العربيات خضراء بيعتبروا ان سواق العربيه قاتل وجايب عربيه علشان يدوس على خلق الله وكذلك العجل اللى ماشى يبرطع زى ما هو عاوز ويكسر اشاره زى ما هو عاوز ويمشى معاكس زى ما يحب اصل سعاده البيه لسه مرخصش العجله ولو عربيه خبطته اول حاجه يقولك العربيه هى اللى غلطانه طيب يا عم ده ماشى معاكس يقولك هو فيه عجله بتمشى معاكس طيب ده كاسر اشاره يقولك يعنى هتديله مخالفه وعلشان كده انا معجب جدا بتجربه الصين اللى عامله طرق للعجل غير طرق العربيات ومفيش اى شوارع مشتركه بينهم .دائما هنا بيعتبروا ان صاحب العربيه هو القوى الجبار المتهور الارعن الاهوج وانا علشان كده لما بدخل على اشارتى الخضراء ويكون فيه مشاه مصممين انهم برده يعدوا بدوس على حاجتين الكلاكس والبنزين وازود السرعه علشان اللى بيعدوا يخافوا .واول مره اشوفها ان الناس تيجى فى صف التاكسى اللى كان هيخبط واحده واشاره التاكسى خضراء وكل الناس غلطت الست بس طبعا بعد ما الراجل اتشتم واتلعن سلسفيل جدوده

[جمال]

بنتى كانت سايقة عربيتها و كانت جديدة فى السواقة لكن بتسوق كويس و بحرص
كانت واقفه فى اشارة و بعد الاشارة مافتحت اتحركت يادوب لقت واحد مرمى ادام العربية و معاه شوية ادوية مبعثرة على الارض متعرفش طلعلها من فين
طبعا اتخضت و نزلت تشوف ايه , قبل ماتنزل واحد سايق جنبها قلها ماتنزليش ده موجود هنا علطول وبيعمل الحركة دى كل يوم و انا حافظه , والناس كلها شتمته
اتضح انه محترف فى الحكاية دى وبيعمل زى نور الشريف فى فيلم ( نسيت اسمه ) بس الحق يقال كانت الحكاية دى قبل فيلم نور الشريف , يعنى هو صاحب السبق

[Ghamrawy]

لا حول ولا قوة إلا بالله على النفوس المريضة دي للأسف مبقاش في إحتارم ولا رحمة ..
أنا عن نفسي أسيبه يولع لو لاقيته بيتدلع يعني مثلا خبطة زي حضرتك كده واضح أنها حتكون بسيطه لكن لما ألاقيه يقولي جسمي والحكايه والروايه أسيبه يولع ..
حصل مع والدي موقف زيه بس الحمد لله خلصه في ساعتها ..
كان في الشارع اللي قدام الهانوفيل من بره وبيطلع على ال21 وماشي على 30 .. ووالدي شايف واحد عينه في عينه من اليمين ووالدي كان عالشمال ووالدي بيهدي عشان حاسس ان في حاجه مش مظبوطه حتحصل وفجأه الواد ده قام معدي الطريق بسرعه وعمل نفسه اتخبط ونط عالكبوت المفتري ...والدي أفتكره بجد أتخبط المهم نزله لقاه بيتكاهن وبيستموت قاله مالك في ايه قاله جسمي ودراعي والحكايه فوالدي قاله يابني عيب دانا ماشي على 30 وانت عينك في عيني المهم الواد ده أتلم وقاله أسف أنا فعلا اللي غلطان أعذرني وخلص الموضوع (العربيه كانت جمرك )(وكان فيها أمم يعني كان لو كتر كان زمانه أتطحن منهم بس والدي مش بتاع خناق ومبيحبش يظلم حد ) ومتهيألي كمان والدي أداله قرشين مش فاكر بصراحه .

نفس الحيوان ده عملها معايا فى نفس المكان و كان معايا والدتى و اختى و مراتى و اختها !!! تخيل ؟!! و رمى نفسه و فعلا كان بيبص فى عينى قبل ما يعمل كده و فرملت عليه و العربية زحفت و خبطه بالجنب الشمال بتاع العربية و و قع على حرف الكابوت و دراعه خبط فى المرايه الشمال و نزل على الارض و و قف و مشى عادى و انا اثناء ما هو كان بينل من على الكابوت كنت جايب الاول تانى و طالع و فتحت الشباك عدلت المرايه و كملت عادى.
و فى واحد تانى فى الدخيلة بعد مطبات السرعة بيرمى العجلة بتاعته تحت العربية و فعلا عمل كده معايا و دست على العجلة بتاعته بالعجلة اليمين و را و خبطت العربية كلها من تحت و سمعت اصوات غريبة طالعة من العربية من تحت و كملت ما وقفتش و بعد كام متر لقيته بيجرى جنب العربية و عايز يفتح الباب و يكسر الازاز بايده رحت مزود السرعة و كاسر عليه شمال جامد و نطرته بجنب العربية و وقعته فى الارض و مشيت ما وقفتش.
فى الزمن ده فى ناس بتعدى الشارع و نفسها تتخبط علشان تتعوض بالفلوس و زى ما تيجى ما هو كدا كدا ميت.

[mo3tazelgamal]

بنتى كانت سايقة عربيتها و كانت جديدة فى السواقة لكن بتسوق كويس و بحرص
كانت واقفه فى اشارة و بعد الاشارة مافتحت اتحركت يادوب لقت واحد مرمى ادام العربية و معاه شوية ادوية مبعثرة على الارض متعرفش طلعلها من فين
طبعا اتخضت و نزلت تشوف ايه , قبل ماتنزل واحد سايق جنبها قلها ماتنزليش ده موجود هنا علطول وبيعمل الحركة دى كل يوم و انا حافظه , والناس كلها شتمته
اتضح انه محترف فى الحكاية دى وبيعمل زى نور الشريف فى فيلم ( نسيت اسمه ) بس الحق يقال كانت الحكاية دى قبل فيلم نور الشريف , يعنى هو صاحب السبق

يا ريت حضرتك تقول المكان إللى حصل فيه الموضوع دة للإستفادة

[mohamed_88sk]

لا محمد اخويا مش غلطان خالص لانه اولا ماشي اقل من السرعة القانونية على الدائري ثانيا محمد مكانش بين تريللتين دة كان على اقصي الشمال و على يمينه تريللا و شماله الصور اللى فاصل الاتجاهين !! يعني حتى احنا مش فاهمين الراجل بيعدي ليه اصلاا و رايح فين ! جايز هيعدى الصور الاسمنتي دة اللى فاصل بين الاتجاهين بس بجد حرام عليه نفسه ! ازاى حد يعدي من على الدائري! يعني شفت حضرتك الدائري كله مفصول الاتجاهين بتوعه بالفاصل الاسمنتي دة و مفيش حتى u turn للعربيات عشان تلف !! بعدين يا ريته حتى كمل جري قدام محمد .. دة جه قدام محمد و وقف من التعب بتاع الجري لانه على شهادة الناس اللى شافو الموقف بيقولو دة واخد الطريق كله جرى كدة و قلنا الراجل دة هيتخبط...
بعدين اللى مطمنا ان كل الناس وقفت مع اخويا و قالولو هنيجي نشهد معاك و انت مش غلطان . مع ان دايما فى المواقف دي يحملو الغلط علىطول على اللى سايق من غير ما يعرفو ايه اللى حصل لكن الحمد لله ناس كتير راحت مع اخويا و ادولو نمر موبايلاتهم عشان نبقي نكلمهم و كدة

تمام غعلا كده أخو حضرتك موقفه سليم الحمد لله ... ربنا يتمها بالخير إن شاء الله

طلع يا حرام بعد كدة انه لما ولاده راحو النيابة ان الراجل اصلا لع بيعانى من امراض الشيخوخة و عنده زهايمر و كل شوية يهرب من البيت و يجري كدة فى الشوارع و انهم مكانوش شافوه من يومين !!! و كل دة اتقال فى المحضر و اتكتب و فى صالح اخويا ان شاء الله

ربنا يكملها بالستر يا رب

لا حول ولا قوة إلا بالله ربنا يرحمه برحمته ...ويثبت أهله ...
دعائي لكم بالتوفيق وربنا يكرم بالخير إن شاء الله ..

[جمال]

يا ريت حضرتك تقول المكان إللى حصل فيه الموضوع دة للإستفادة

المكان كان نفق كليوباترا وانت طالع على طريق الحرية
بس الكلام دة كان من فترة طويله زمان الراجل مات

[mohamed_88sk]

أرسل أصلا بواسطة haima
بنتى كانت سايقة عربيتها و كانت جديدة فى السواقة لكن بتسوق كويس و بحرص
كانت واقفه فى اشارة و بعد الاشارة مافتحت اتحركت يادوب لقت واحد مرمى ادام العربية و معاه شوية ادوية مبعثرة على الارض متعرفش طلعلها من فين
طبعا اتخضت و نزلت تشوف ايه , قبل ماتنزل واحد سايق جنبها قلها ماتنزليش ده موجود هنا علطول وبيعمل الحركة دى كل يوم و انا حافظه , والناس كلها شتمته
اتضح انه محترف فى الحكاية دى وبيعمل زى نور الشريف فى فيلم ( نسيت اسمه ) بس الحق يقال كانت الحكاية دى قبل فيلم نور الشريف , يعنى هو صاحب السبق

فعلا حضرتك في ناس كتييييييييير بتعمل كده وبيتكسبوا من الحكايه دي

[shalaby2001]

يا ليت الطفولة تعود يوما لأخبرها بما فعل الشباب

ليه بس يا اخى العزيز ؟

فوقنى
مش عارف بس احساس غريب غمرنى وانا اقرأ هذه الكلمات

[Nader]

بس المهم يا جماعة اللي يخبط حد ميهربش، دة انت لو موتة حتى

متجريش، دي لوحدها قضية وفيها حبس لو جريت، وربنا يسترها معانا

جميعاً.

[hesham_tawfiq]

أنا حصل لى موقف معاكس
شباب بيلعبوا كوره وسط الشارع وواحد واقف جون وعمال ازمرله ومش عاوز يتحرك ( عاوزنى أنا اللى امشى من جنب الجون) أخدتتنى الجلاله وأنا عمال ازمر وضربت فرامل متأخر عن قصد وكانت الفرامل محسوبه أنها تخبطه خبطه بسيطه
وطبعا الناس غلطته ما أنا ضارب كلاكس وضربت فرامل:)

انا حصل معايا موقف شبه دا بس كانو اتنين عيال من الشباب الساقع شويتين بس يظهر مكانوش شافو بعض من مده طويله ييجى نص ساعه كده ولا حاجه وقفو يسللمو على بعض ويبوسو بعض وهاتك يا احضان فى نص الشارع بالظبط وانا من اكتر من 150 متر عمال ازمرلهم واهدى سرعه واقللب نور ولا هما هنا . روحت واخد قرار شيطانى مش صحيح بس هما يستاهلو .
خبطتهم بجنب العربيه وسيبتهم ومشيت.
ومع ذلك كان دمى محروق جدا حتى بعد ماخبطتهم

[soundoffear]

البلد دي ******** بجد انا مش قادر استني فيها يوم واحد
خصوصا بعد ما اتخبطت من شخص غبي ومتخلف وعربيتي اتبهدلت وهي لسة زيرو وقضية ورشاوي وقرف
انا بقيت دلوقتي عندي فوبيا كل ما ااجي افرمل اترقب اللي جاي ورايا يخبطني
وكل يوم نتكعبل في الناس المتخلفة اللي ما بتعرفش تسوق و ماشيين يخبططوا في عربيات الخلق وخلاص
والناس اللي بتعدي الشارع وهما باصيين الناحية التانية صباح التخلف

البلد دي لو فيها قانون او فيها ناس عندها ضمير او عندها دم مكانش يبقي في كدة
وحتي وكيل النيابة دا بني ادم متخلف ولا بيسمع ولا بيفهم وواخد في نفسه قلم وفاكر نفسه بني ادم

[Ghamrawy]

انا بقيت دلوقتي عندي فوبيا كل ما ااجي افرمل اترقب اللي جاي ورايا يخبطني
وكل يوم نتكعبل في الناس المتخلفة اللي ما بتعرفش تسوق و ماشيين يخبططوا في عربيات الخلق وخلاص
والناس اللي بتعدي الشارع وهما باصيين الناحية التانية صباح التخلف

البلد دي لو فيها قانون او فيها ناس عندها ضمير او عندها دم مكانش يبقي في كدة
وحتي وكيل النيابة دا بني ادم متخلف ولا بيسمع ولا بيفهم وواخد في نفسه قلم وفاكر نفسه بني ادم

انت اسكندرانى ؟؟؟