سيارات المعاقين وحكايتي معاها وسيارتي الـ BMW 1997

**Ghamrawy** · 21-02-2008 09:23 AM

(وعلى فكره حكومتنا مش غبيه اوى للدرجه دى
هى بس سايبه الناس تشترى وتعمل نفسها ناصحه وبعد كده هيعملوا حمله هيلموا كل العربيات دى تانى :)
حكومتنا ذكيه جدا
كده بتستفاد انها بتبيع وبتكسب وفى الاخر هتلم العربيات دى كلها تانى او تدبسك فى دفع الجمارك كامله مع الغرامه طبعا لتهربك من الجمارك)

لا اظن

**Khalid_Mostafa** · 21-02-2008 10:02 AM

الموضوع مش موضوع ان الجمارك مبالغ فيها وان الدولة ملهاش حق في الجمارك دي ، الموضوع هو نفسه موضوع حكاية الإستثناء . يعني ليه انا ادفع جمارك والي بيجيب العربية بطريقة المعوقين ميدفعش ؟؟
اشمعني هو مع اننا احنا الإثنين مصريين زي بعض و احنا الإثنين مش معاقين. المساواة في الظلم عدل .
ثم مينفعش نعمل الغلط و نحاول نحلله .ونفس المنطق ممكن اللص الي بيسرق يقول ماانا بسرق من لصوص وممكن الي بيدفع رشاوي عشان يعلي مباني مخالفة يقول مانا بفتح رزق للي بياخد رشوه و الحكومه مهي عارفه وسيباه..مينفعش كده

ثم زي مفيه صحيح مرتشي فيه معاق مرتشي مهم بنأدمين برده

ثم يا استاذ ادهم إزاي تقول الكلام ده ؟؟

و حضرتك مش بتدفع في المرور علشان ورقك يمشي؟

ومش بتدفع لمهندس الفحص 10 جنية و إلا حايطلعلك القطط الفطسا في عربيتك و يتلكك لك علشان ياخد البريزة التانية يا اما مانتاش مرخص؟

و مش بتدفع لعسكري المرور جوز جنيهات و انت راكن صف تاني علشان ما ياخدكش مخالفة؟؟

و مش بتدفع اكرامية في اي إجراء في اي مصلحه حكومية علشان ورقك يمشي و إلا مافيش حاجة حاتمشي؟؟؟

ولو انت تاجر مش لازم تهادي و تراضي و إلا حايخرب بيتك من التقديرات الجزافية للضرايب و غيرها؟؟

و لو انت مستورد مش حاترش في الجمارك علشان ماتلاقيش الكونينر اترفض و قالولك إعاده تصدير؟؟ او يتقدر علية جمارك بأرقام فلكية؟؟

متدفعش في المرور علشان ورقك يمشي وبرضه حيمش بس بشوية تعب من حضرتك (وانا بعمل كده مع ان حمايه ضابط شرطه م ووكن استغل ده)
-ومهندس الفحص مبدلهوش حاجه ولكن بدي للراجل الغلبان الي بيجيب البصمه ورقم الشاسيه
-و جوز الجنيهات الي بتدفعهم للعسكري عشان صف تاني دول ياباشا رشوه ححتحاسب عليها انت وهو والصح انك تدور علي مكان تركن فيه او تيجي بمواصلات مدام انت عارف انك رايح لمكان مفيهوش ركنه
-وليه تدفع إكرامية في المصالح الحكومية ؟؟؟ مهو الناس دي متعينتش وهما مرتشين ، احنا الي علمناهم كده و بوظنا اخلقهم ومش عايز اسمع البق بتاع انه موظف غلبان بيجري علي عياله..الي مش عجباه وظيفة الحكومة ميشتغلهاش و يعيط ...يشوفول شغل في القطاع الخاص
-وحكاية الضرائب دي مبقتش شغاله بالطريقه دي ولو لازم يبقي بلاش منها ...مش حأكل عيالي من حرام عشان مصلحة الضرائب
-الرش في الجمارك ده هو الي مودي البلد في داهية كبيرة وشوف البلاوي الي بتدخل البلد ومش مجرد منتجات سيئة الصنع و فقط لأ كمان بتأثر علي المنتج المصري لو موجود

اتقوا الله في انفسكم لو عايزين البلد دي تتصلح...لو الجيل بتاعنا ده مقدش عجلة تغيير السلوكيات يبقي مفيش امل في مستقبل افضل لعيلنا

**mahamedaraby** · 21-02-2008 10:21 AM

ياجماعه يارررررررررريت محدش يحلل حاجه حرام علشان بيعملها هو كده بياخد ذنب اكبر
الفكره انا العمليه مش علاقه تراضى ولا حاجه ما البنك علاقه تراضى بين الطرافين لكن حرام
ممكن اكون انا حاطط فلوس فى البنك لكن محللهوش علشان انا حاطط فلوس فيه

هى الفكره كده مش علشان كلنا بنعمل حاجه حرام خلاص تبقى حلال
والصراحه انا معرفش اذا كان الموضوع ده حلال او حرام لكن محللهوش علشان انا بعمله دى كلمه كنت عايز اقولها

وبجد انا مع راى ان الحكومه هتعمل فيهم زى ما عملت فى التوك توك

**eng_mkhalaf** · 21-02-2008 11:56 AM

طب يا جماعم ممكن حد مشكور يجيب فتوى فى الكلام دة - لأنى بالصدفة أمبارح لقيت ليا سكة فى الكلام دة وكمان بأية - عربية هوندا سيفيك 2003 فابريكة وهتعمل حوالى 90 إلف شاملة كل حاجة وأنا قاعد فى البيت ورخصة بأسمى - موضوع جامد بس أنا خايف من الحرمانية لأنة لو حرام يبقى الله الغنى والشيرى بتاعتى أحسن ميت مرة منها

**Xpert** · 21-02-2008 11:01 PM

بص يا سيدي .. برضه هارجع اقول لونج ستوري شورت انسر ... اللي يقضيلك مصلحتك ماتبخلش عليه .. (هذه المقوله تسري فقط في ظل الظروف الاقتصاديه الاستثنائيه (هي مش استثنائيه برضه ؟) السائده في البلاد .. فاصبح من الضروري انك عشان تركب عربيه حاله شاذه و نضيفه انك تتبع اسلوب المعاقين ده .. و لو انه يحدد السعه اللتريه مثلاً .. بس خلاص يا عم مش مشكله .. يعني معظمنا لو ركب 2000 سيسي .. هايلاقي يجيب بنزينها منين ؟ .. بسيطه يا عم .. اما تجيب عربيه معاقين .. هاتها 1600 16 صباب ..
برضه في ظل الظروف السائده .. اصبح المعاق يستخدمها لمصلحته عشان يطلعله بقرشين .. و اصبح التاجر احترف المهنه عشان ياكل عيش .. و اصبح المرور بيقاوح معاك شويه عشان العسكري الغلبان اللي مالطوع في الشمس ...
يعني ببساطه .. بلدك عاوزه كده ...

**temokemo** · 21-02-2008 11:08 PM

مش بيقولو لازم المعاق تكون معه رخصة عشان تقدر ترخص العربية,,,,,,,,,,
واذا كان الامر سهل انا عندي بدل المعاق اتنين وثلاثة

**Xpert** · 21-02-2008 11:36 PM

المشاركة الأصلية كتبت بواسطة gemino

(وعلى فكره حكومتنا مش غبيه اوى للدرجه دى
هى بس سايبه الناس تشترى وتعمل نفسها ناصحه وبعد كده هيعملوا حمله هيلموا كل العربيات دى تانى :)
حكومتنا ذكيه جدا
كده بتستفاد انها بتبيع وبتكسب وفى الاخر هتلم العربيات دى كلها تانى او تدبسك فى دفع الجمارك كامله مع الغرامه طبعا لتهربك من الجمارك)

لا اظن

مش ساهله زي ما انت متخيل .. هيا الحكايه ايه .. هاقولك انا ... انت تروح تشتري عربيه معاقين .. مع اتخاذ كل الاحتياطات الممكنه (الحكومه ذكيه و الشعب اذكي) .. و يقولك ايه بقي اللي انا اسمعه (عن نفسي انا سمعته من ناس غير موثوق فيهم) .. ان العربيات المخالفه هاتاخد غرامات ماليه .. و اللي يتكرر مخالفاته هاتتسلم تاني للجمرك .. انما ايه بقي اللي هايخالفه ده ؟ انا هاقولك ...
قال ايه .. بيقولك لو خالفت الشروط .. و الشزرط دي ان العربيه يكون سايقها صاحبها .. و فيها جهاز الاعاقه و المعاق يكون معاه رخص و اوراق سليمه و كده) .. عربيتك هاتاخد بوينت مخالفه و لو اتكررتخلال 3 سنين هاتتسلم ..
ايه العمل ؟ بسيطه .. هم عاوزين عربيه مخالفه .. انا انصح منهم .. اجيب بي امايه 316 موديل حديث (اعلي حاجه ممكن اجيبها) .. اركنها في جراج لمده 3 سنين .. (كده كده ال 3 سنين دول هيا شرط حظر البيع علي العربيه) اجيب عربيه ضاربها السلك حاجه كده 127 ولا حاجه .. للاستخدام اليومي يعني و لزوم العربيه .. و بعد ال 3 سنين اروح ارخصها باسمي بدون هايلامانات حظر البيه و الكلام ده ..
الاحتياطات تتمثل في : (الظلم حرام خليكم فاكرين) .. عقد بيع بالعربيه ممضي من المعاق و بدون تاريخ .. مثبت فيه ان العربيه تم شراؤها مجهزه للاعاقه الطبيه .. و في نفس الوقت تاخد علي المعاق شيكات بقد تمن العربيه .. و تثبتها في العقد ان تم الدفع نقداً .. و بالتالي مافيش ازدواجيه الالتزام (ايه رأي الجماعه المحامين هنا في الكلام ده ؟ ) ..
و بعد ال 3 سنين يا سيدي .. تبيع العربيه اللي ضاربها السلك و تبقي راكب بي ام موديل حديث صناعه الماني خاليه من العيوب و حاله شاذه .. ان حبيت تبيعها هاتجيبلك سعر ..
باشا .. الحكومه ذكيه ماباقولش لاء .. بس .. انا انصح من الحكومه .. هاتقوللي انت مين .. هاقولك انا الشعب !

**Ahmed Samy** · 22-02-2008 12:00 AM

حبيبي يا بيشو :D
بس ايه التزنيبة الجاز دي ؟؟
اقعد تلات سنين انزل الصبح اصبح على الجمال النائم و مالمسوش ؟؟؟
حرام كده
شغلها شويه يا بيشو و شوف حل يخلي الناس تدفع و تركب

**Xpert** · 22-02-2008 12:07 AM

لاء يا باشا .. انت مش الحكومه .. انت الشعب برضه هههه ..
حل سليبينح بيوتي ده يا باشا اخر ما تغلب ..الحل الرئيسي طبعاُ انك ياءما كل ما تلاقي لجنه و قلق تزوغ منهم .. يأما تنقل محل اقامتك بني سويف زي حالاتي و تتفرج احنا بنعمل ايه هنا مع الحكومه (قال الناس مش عاجباها نمر بني سويف علي العربيات ) ...
انت مين يا عم ؟ ماتقولش انا الحكومه ... قول انا الشعب ! (محدش من الحبايب يجيلي .. انا من الشعب السويسري يعني .. نيااااااهاها)

**Mido80** · 05-03-2008 08:46 AM

طب ولية يا جماعة ما نقولش ان قيمة الجمارك المفروضة علي السيارات المستوردة مبالغ فيها حبتين. يعني انا عايش في بلد خليجي ونفسي اجيب سيارة جديدة معايا وتكون بالمواصفات اللي انا عاوزها يعني علي سبيل المثال انا كنت بفكر اجيب معايا سيارتي التويوتا كامري 2008 بس لما عرفت قيمة جمركها كرهت نفسي وكرهت السيارة وكرهت مصر كمان. لية يعملوا فينا كدة ولا المفروض اني انا انزل اشتريها من مصر ب 550.000 جنية يعني مبلغ مش سهل.
الغريب في الامر انة فية بلاد مش لاقية تاكل بس ما عندهاش جمارك علي السيارات نهائيا زي دول جنوب افريقيا.

طب امال احنا بقي اللي المفروض بلد اقل ما يوصف انة بلد متحضر لية يكون فية عندنا كدة؟

تعالوا بقي لما هو اشبة بحكاية سيارات المعوقين بل انة انيل شوية. واحد صاحبي اردني اشتري سيارتين علي الزيرو علي البنك " اقساط"، هوندا اكورد 2006 ونيسان باترول سوبر سفاري 2007 وما دفعش فيهم ريال واحد وهب يا معلم تاني يوم لاقيتة بيكلمني عالموبايل ويقولي انا مسافر اجازة عمان والبية اللي سافر من سنتين ما حدش شاف وشة تاني. تعرفوا السيارتين دول بيروحوا فين؟؟

بياخدوهم من هنا ويروحوا يبيعوهم في المنطقة الحرة بين الاردن والعراق من غير ورق ولا دياولة. وصاحبنا خد لة مش اقل من 30 او 40 الف دينار في العربيتين وكان الله بالسر عليم.