الموضوع: الابيزا اتخبطت 3 مرات

ربنا يعوضك خير بإذن الله .. معلهش بقى هي دي مصر هانعمل إيه .. بقى تتحجز و انت المخبوط !!!
تعالوا نشوف إيه اللي بيحصل في السعودية مثلا مش هاقول أمريكا و لا السويد و لا العالم دي:

- تحصل الحادثة و الناس تتصل بالشرطة اللي و يالا العجب بترد على طول و من أول مرة
- تقريبا في 5 دقائق بيكون فيه عربية شرطة و أول ما ينزل الشرطي بيطمن على الناس و بعدين يفتح محضر معاينة و يقرر مين اللي غلطان و ياخد منه كارت التأمين و بعدين يقول للاتنين مع السلامة
- اللي اتخبط بيروح القسم ياخد جواب بتقدير الخسائر عند ورش معتمدة في المرور و تقدير الخسائر بيبقى يا إما تصليح الوكالة يا إما تعويض كامل عن العربية لو الخبطة كبيرة
- بعد معينة الخسائر و تقدير التعويض اللازم من قبل فنيي الورش المعتمدة .. الراجل اللي اتخبط بياخد الظرف المقفول -ميعرفش قيمة الاصلاحات كام- و يرجع تاني للقسم
- في القسم بيفتحوا الظرف و يدولوه إذن صرف المبلغ المستحق من شركة التأمين
- ياخد الاذن و يروح لشباك شركة التأمين -اللي في نفس القسم بس عشان الناس ما تتعبش- يصرف فلوسه و يمشي يصلح عربيته في الحتة اللي تعجبه.

انا عاوز أعرف بقى الإتاوة اللي مسمينها تأمين إجباري عندنا دي لزمتها إيه؟؟ دا انت لو قريت الشروط تقريبا استحالة تعرف تصرف قرش صاغ واحد في جميع الاحوال.

طب يا سامح إنت كبرت دماغك و مشيت عشان ما تتحجزش .. انا بقى اتصلت بالشرطة و قعدت متابعهم حوالي 3 ساعات على التليفون و لغاية دلوقت ماجوش !!!

واحد حكالي على موقف بصراحة و رغم إعتراضي على الطريقة إلا إنها الحاجة الوحيدة اللي تمشي في البلد دي:
- واحد راكب عربية جيب دخل في واحد قدامه و كسرله الفوانيس الخلفية و طبعا بتاع الجيب عشان العربية عالية محصلوش حاجة .. الراجل اللي اتخبط نزل بص على الفوانيس و لقى التاني محصلوش حاجة و بيتعامل معاه بمنتهى البرود و الجليطة و كأنه هو اللي غلطان !! راحل الراجل اللي اتخبط جايب عصاية كانت معاه في الشنطة و كاسر الفانوسين الاماميين بتوع الجيب و قالوه خالصين يا باشا .. طبعا التاني على ما فاق من اللي حصل تقريبا الأولاني كان وصل بيتهم.

عشان اللي بيحصل ده و عشان محدش بياخد حقه في البلد دي تلاقي الناس بتزعق و تتخانق و تكسر في بعض لكن في الدول التانية الناس بتنزل تتطمن على بعض و بمنتهى الهدوء بيستنوا الشرطة تفصل في الموضوع.

المشاركة الأصلية كتبت بواسطة ehab_mansour

لا حول ولا قوة الا بالله
قدر الله وما شاء فعل المهم انك بخير ربنا يحفظهالك انت وجميع المسلمين
معلش عايز بس اذكركم ونفسي بان تحافظ علي قول اذكار الصباح والمساء كل يوم وان شاء الله تنجو من كل المصائب دي ولكن المهم انك تقولها وانت حاضر القلب وعند بداية ركوبك للسيارة ابدأ دائما بقول " بسم الله الذي لا يضر مع اسمه شيء في الأرض ولا في السماء وهو السميع العليم " ثلاث مرات
والله المستعان

حافظ على أذكار الصباح وأذكار المساء

الف شكر يا جماعة لكل الناس اللي ردت و ياريت يا جماعة لو حد بيفهم في القانون يعرفنا ايه الحكمة في ان عربيتي تبقي مخبوطة و عشان اخد حقي اتحبس الاول تيجي ازااي دي ده عقاب يعني عشان عربيتي اتخبطت ولا عقاب عشان اصلا فكرت اخد حقي و هاتعبهم و اخليهم يكتبوا محضر

المشاركة الأصلية كتبت بواسطة mohamed_momi88

زي لما لاقدر الله بتلاقي واحد مخبوط في الشارع و تنقلوا المستشفي و يموت تبقي انت حياتك انتهت لانك شهم
عادي دي ناس حافظة مش فاهمه لو كان ليك اي معرفه هناك ( واسطة يعني ) كان المحضر جالك لحد البيت عادي
ابقي غيرشركه التامين في شركات بتعمل المحضر لو التلفيات اكترمن 5000 جنيه يعني الخبطات العاديه ابقي اامن مع النوع دة احسن
بس الله يباركلك بلاش الكلام في الموبيل و انت سايق ملوش اي لازمه لان الحمد لله انت كنت ماشي علي سرعه خفيفه فالخبطة جت بسيطة اتعلم نها و بلاش الموضوع د تاني اي مكالمه ممكن تستني لما توصل او علي الاقل مش عيب انك تركن علي جنب و تتكلم او هات بلوتوث حفاظا عليك و علي غيرك لان دة كان ممكن يبقي واحد معدي الشارع مش عربيه

و الحمد لله علي كل حال العين فلقت الحجر ربنا سترها معانا كلنا .

الف شكر علي ردك و اهتمامك يا باشا و ان شاء الله هاجيب بلوتوث او حتي ابقي اخد معايا الهاند فري العادية اهي ارحم من اني امسك الموبايل برده و متشكر جدا لنصيحتك
و الحمد لله ربنا و ربنا يسترها معانا جميعا

و اصلا شركة التامين اللي انا مامن معاها مش فاكر اسمها ايه لما انزل العربية هاشوف الوثيقة و اقولكوا لأني ل معايا رقم تليفونهم ولا اعرف عنهم اي حاجة انا عشان كنت جايب العربية قسط المصرية هما اللي عملولي الوثيقة معاهم فاهاجيبلكوا الاسم لو حد يعرف عنها حاجة يفيدني
و موضوع الفانوس ده اصلحه انا و خلاص مش مستاهلة ولا ارحلوهم صاحبي بيقولي رحلوهم طبعا امال انت دافعلهم فلوس ليه