الموضوع: شوية أسئلة و مشاكل مع التريوس

المشاركة الأصلية كتبت بواسطة melhefnawy

السلام عليكم يا شباب ,

عندي مشكلتين أو ثلاثة .... و يمكن أربعة عايز أحكلكم عليهم يمكن حد يعرف يساعد

1- كان فيه صوت زي التزييق أو صفارة أو كان حد بيقطع حديد بصاروخ لما بأمشي بالعربية , من أول ما أتحرك ( للأمام بس , لو بارجع لورا مش باسمع الصوت ) و جاي من ناحية العجل قدام يمين

المهم رحت التوكيل كشفوا و قالو تيل الفرامل مات الحمد لله والصوت ده العجل كان بيصوت عليه ,, قصدي الصاج مش عارف أيه كان بيحك في مش عارف أيه فكان عامل الصوت ده لأن التيل كان هو مش بيخليه يحك.

المهم غيروا التيل ب 550 جنيه و الصوت راح , ركز بأه وخلي بالك من السؤال

هو معقول التيل يحتاج يتغير بعد 12000 كم , هل ده طبيعي ؟
باشا التيل ده متفاوت علي حسب السواقه والطرق وكده يعني بس اعقد انه كده قليل نوعا ما

السؤال التاني و هو أعقد شوية من الأولاني

كان من ساعة سيادتي رحت أشتريت العربية و الفرامل بتعمل ذي حكة تحت رجلي و صوت كده بالذات لو واقف في اشارة وبارفع أو باحط رحلي على الفرامل بالراحة

طبعاً لما سالت و جربوا قالولي ده عادي عشان مش عارف أيه ماسك في أيه فا بيعمل كده

سؤالي التاني االي هوا أصعب من الأولاني : هل الحكة والصوت ده طبيعي في الفرامل و هل ده ممكن يكون كان ليه تأثير على أن تيل الفرامل يبوظ بسرعة ( بما أن ديه الفرامل و ده تيل الفرامل ) فيه علاقة وثيقة يعني.
باشا لو الصوت ده بيجي وانت دايس فرامل وحضرتك جايب الD ده عادي في اي عربيه اتوماتيك وهو صوت زي تزييق كده وده عشان العربيه ببقي عايز تتطلع وانت محجرها بالفرامل بتمعمل الصوت ده حاول حضرتك لما تقف في اشاره او هتقف تتكلم مع حد هات الفتيس علي الN اريح للعربيه وللفيس كمان
السؤال الثالث مالوش علاقة بالأتنين اللي فاتوا غير أن كلوا في نفس العربية

المشكلة : الدريكسيون بيترج ويتهز جامد بصورة غير طبيعية عند 120 كم وده كان لما جبت 3000 كم بالعربية

المهم في صيانة ال 5000 قولتلهم , قالولي ترصيص , قلت رصص , قالوا رصصنا , ما عرفتش أجرب على 120 ساعتها و سافرت بعد كدة و جربت و نفس البروبلم

روحت في ال 10000 ( كنت عامل 12000) قلتلهم , قالولي بارضوا ترصيص , قلت بارضوا رصص وكانت المفاجأه ال 4 جنوط فيهم مشاكل ماينفعوش يترصصوا .
طبعا ده عيب صناعه وممكن تحصل بس ازاي يعني رصصوها اول مره وبعدين تاني مره لقوا ان الجنوط بايظه ؟؟
يبق اكيد هما اول مره ما رصصوش اصلا يعني ده هبل واهمال ن التوكيل
الحل كتر خيرهم هيغيروا ال 4 على حسابهم , طبعاً فاكرني مبسوط علشان على حسابهم بس بصراحة أنا هاطق , واخد عربية ب 4 جنوط بايظين و التيل يبوظ بعد 10000 ..... هوا ينفع أبدل العربية؟
اعتقد مساله تغير العربيه دي لو حاجه جامده اوي يعني موتور فوت مثلا
السؤال بأه : هوا أن ال 4 جنوط يبقوا بايظين والدريكسيون اللي كان بيرج عند 120 كم هل ممكن يكونوا أثروا على حاجة تانية ( علبة الدريكسيون , العفشة...) , طبعاً أنا سألت قالولي لا أبدا ديه حاجات كلها مالهاش علاقة ببعض!!!
النهارده الخبر بفلوس بكره يبق ببلاش والجنوط الجديده تكدب التوكيل يعني حضرتك هيغروا الجنوط ليك وهتمشي بالعربيه وهتشوف فيها حاجه هما المسؤلين وتعرفهم كده من الاول

جدير بالذكر أن العربية تريوس 2x4 2009 أوتوماتيك

وشكراً على وقتكم.

وخير ان شاء الله وابقي طمنا عليك