الموضوع: تقييم مبدئى لفيات لينيا

طبعا الناس مستنية التقييم ده من زمن بس الظروف معكسانى شوية و بقالى اسبوعين من ساعة ماشترتها ماشوفتهاش غير يومين بس فبعتذر عن التاخير و ارجو ان التقييم يكون مفيد ليكم
الشكل العام
العربية اول ما تقرب منها تحس بنظرة هجومية شوية و ان كانت هادية بعض الشئ بس بتدى انطباع ان العربية ده بتاعة جرى و سبق و فى نفس الوقت ممكن تكون عربية برستيج عالى الشبكة بتاعة العربية واخدة من ال Audi بعض الشى و ان كنت افضل ان الجزء تحت النمر فى الاكصدام يكون نيكل
المرايات الجانبية طالعة من الباب بشكل ملفت و جميل و الرؤية فيها متكاملة جدا و ما تحسش بان الصورة فى المراية غير حقيقة اوى , الحكاية ده كانت بتدايق جدا فى الكورولا 2009 كانت المراية واضح اوى انها مقعرة و ده مش ظريف اوى
الاجزاء الزجاج اللى فى القايم الامامى بتساعد فى الرؤية برده لو انت بتلف تعرف تشوف منها كويس العربيات اللى جاية عليك
صاج العربية قوى جدا و الاكصدامات قوية برده يعنى تحس انها ممكن تاخد خبطة حلوم و ماتتاسرش و تحمى الرادياتير
الصالون
هانفتح العربية من الريموت و نفتح الباب , باب العربية تقيل و ماسك نفسه عامل زى باب العربيات الالمانى
اول ما تقعد جوه العربية تحس بالفخامة و البساطة فى نفس الوقت تلاقى زراير التحكم اماكنها مرتبة و جنب بعض و الوصول اليها سهل
الكرسى الامامى واسع و ان كنت تحس و انت قاعد ان المساحة اللى انت قاعد فيها صغيرة و لكن التحكم فى ارتفاع و انخفاض الكرسى و التحكم فى الطارة بيعالج المشكلة ده تماما
الكنبة الخلفية واسعة جدا و تشيل 3 مستريحين جدا و مساحة الارجل جيدة
القعدة جوه العربية ممتعة و مريحة جدا الى ابعد الحدود انا بعلم اختى السواقة و بفضل قاعد فى العربية 4 ساعات و مبحسش بحاجة نهائيا
الموتور و العفشة
هندور العربية صوت الموتور واطى جدا و غير مسموع و العربية واقفة بس اذا فتحت غطاء الموتور هتسمع صوته تحس انه عامل زى مواتير العربيات النقل بس على واطى اوى (مش عارف ده عيب فى العربية و لا ده حاجة عادية)
صوت الموتور غير مسموع نهائيا من داخل العربية حتى لو انت بتجرى و فاتح الشباك صعب اوى انك تسمعه
الموتور فيه تصفيح اسفله يعنى لو اى حاجة خبطط من تحت الموتور مش هايتثر نهائى و باقى العربية مصفح برده ل نزلت تحتها مش هاتشوف غير علبة الشكمان
اول ما تطلع بالعربية هتلاحظ ان الدبرياج مشواره طويل شوية و ده يمكن مش حاجة ظريفة هو مشوار التحكم قصير لكن مشوار البدال طويل بس مع الوقت بتاخد عليه و مش هاتحس بيه
الفتيس بتاع العربية ناعم الى ابعد الحدود و نقلاته صغيرة جدا و سريع فى الاستجابة
العربية عزمها عالى اوى و مره وانا طالع بيها بسرعة فركت جامد (معلش الواحد بقا متعود على الشاهين فمابيشوفش الفرك ده كتير), الشد و الجرى بتاعها وهمى جدا لو دست على الدواسه هتلاقى الاستجابة فورية و سريعة جدا
الثبات حدث و لا حرج انا وصلت بالعربية 130 فى طريق منحنى جامد شوية و العربية كانت ماسكة نفسها كويس اوى و مكنتش حاسس انه منحنى
العربية بتاخد فواصل الكبارى (6 اكتوبر بالذات اللى فواصله بقت عاملة زى المطبات) بمنتهى الهدوء و متحسش بيها نهائى

العربية لازمها بنزين 95 (مكتوب كده فى الكاتلوج) و انا حاليا بحاول اشوف موضوع ال 92 و هارد عليكم برده

الفرامل
اجمد حاجة فى العربية فراملها لو لمست الفرامل العربية هتقف مكانها استحابة الفرامل سريعة جدا و قوية جدا تحس انهم مهتمين اوى ان العربية تقف و فى اقل زمن و مسافة
فرامل اليد لو رافعها العربية مش هاتتحرك الا لو قرصت جامد على الموتور و ان شايف ان ده ميزة جامدة جدا
طبعا الفرامل امامى و خلفى سكينة و ده انا اكتشفتها بالصدفى كده برده
التكييف
انا مجربتش تكييف عربيات قبل كده كتير لكن العربية تكيفها قوى جدا و ساقع اوى انا كنت مشغله على الساعة 5 باليل على واحد و هى نص ساعة و طفيته لانى سقعت
برده ماتعتمدوش على فى حوار التكييف لانى مش بحبه اوى يعنى بحب التكييف اللى يظبط الجو بس ما بحبش التكييف اللى بيقلب بفريزر ده

ارجو ان التقييم يعجبكم و اذا فيه اى حاجة ناقصةقولولى و انا اكتبها

ممكن توضح اكتر مميزات trip computer

افضل انك تقرا الموضوع ده هيفيدك كتير
http://www.nilemotors.net/Nile/99609-a.html:majd%284%29:

طب لو استعملت بنزين 92 الفرق كبير و فية ضرر على الموتور ؟؟؟؟؟؟؟؟؟؟

مش عارف لسه الموضوع ده ايه ظروفه بس السحب اول حاجة هتتاثر ثاينا لو ظاهرة ال knocking ظهرت يبقى بنزين 92 ماينفعش للموتور ده نهائى انا لسة بجرب و هاقولكم على المختصر المفيد فى الموضوع ده

طب معدل الاستهلاك كام فى اللتر

انا العرببة لما حطيت فيها العشرين لتر كتبت انى ممكن اعمل بيهم 200 كيلو و ده على سواقة بسرعة 40 الى 60 كيلو فى الساعة
و انا اختى لسة بتتعلم على العربية فبتمشى على 20 - 40 كيلو فى الساعة و العربية عملت 120 كيلو و كاتبة ان البنزبن اللى فيها يعمل 123 كيلو فانا شايف انها موفرة جدا
كمان الراجل فى التوكيل قالى لو حطيت 10 لتر 92 يعملوا 100 كيلو انما لو حطيت 10 لتر 95 يعملوا 150 كيلو (مثلا الارقام مش صحيحة بس انا كاتبها كتوضيح ان العربية هتوفر بنزين لو حطيت 95)