جيت أ‘عمل نص عمرة لقيت الموتور خلصان

**thedeveloper87** · 24-10-2009 06:19 PM

السلام عليكم ورحمة الله وبركاته
أنا اشتريت عربيتي دي من حوالي 5 شهور وأكتر حاجة كانت عجباني في العربية الموتور.
كذا واحد ساق العربية دي وقال لي الموتور ده بسم الله ماشاء الله.
المهم ،بعد كده اكتشف زيت في العمة مطرح خرطوم الفايظ وسألت هنا في المنتدى وقالولي ده طقم شنبر قلت بسيطة إن شاء الله. قلت برضه أعمل حسابي في فلوس زيادة يمكن ألاقي كام حاجة كده في السكة ، وفعلا ، فكيت الموتور النهاردة ولقيت الآتي:
1. الصبابات خفيفة.
2. الشمايز معتبه.
3. وش السلندر فيه بارومة جامدة (مطرح مجاري المياه)

كل ده ولسة مابصيتش على السبائك. قلت للميكانيكي يلم الموضوع ويلصم الموتور بحيث أمشي بيه شوية لحد ما ألم فلوس موتور جديد.

عندي كام سؤال كده:
1. هل الأفضل شراء صبابات جديدة ولا يعمل قواعد ودلايل على الصبابات القديمة؟
2. ينفع يركب طقم شنبر جديد والشمايز معتبه؟

**samirayad** · 24-10-2009 07:24 PM

1. هل الأفضل شراء صبابات جديدة ولا يعمل قواعد ودلايل على الصبابات القديمة؟

صبابات جديده على طول لأنك بتقول

1. الصبابات خفيفة.

يعنى معدش فيها لحميه

2. ينفع يركب طقم شنبر جديد والشمايز معتبه؟

**thedeveloper87** · 24-10-2009 07:33 PM

ألف شكر على ردك يا باشمهندس
بالنسبة لوش السلندر الميكانيكي قاللي الصدأ ده هيتعالج وهخللي الخراط يكشط وش السلندر وهيرجع زيرو إن شاء الله. هل الكلام ده صح؟؟

**samirayad** · 24-10-2009 07:43 PM

لو أ تعمل صح يبقى مفيش مشاكل
أهم شىء مهارة الخراط
وبرضه ده مرتبط بعمق بؤر الصدأ الموجوده فى رأس السلندر
لو مش عميقه يبقى ده من حظك

ومنه لله اللى باعلك العربيه
عن نفسى عندى شك بنسبه كبيره أنه كان حاطط زيت شنبرللمكنه قبل البيع
علشان يلزق العربيه
فلك حق عنده يوم القيامه (لأنه غشاش )
فأحتسب عند الله

**thedeveloper87** · 24-10-2009 08:26 PM

أنا كلمت الميكانيكي علشان يجيبلي طقم صبابات جديد. قال لي لازم يتعملهم برضه قواعد ودلايل.
هي ايه قواعد ودلايل دي؟

**samirayad** · 24-10-2009 08:40 PM

قال لي لازم يتعملهم برضه قواعد ودلايل

كلام مظبوط
طالما سيتم تسوية وش السلندر بأجراء عملية القشط
على المقشطه
وحدورلك على صوره واضحه لكى يتضح لك

هي ايه قواعد ودلايل دي؟

**thedeveloper87** · 24-10-2009 08:46 PM

ربنا يبارك فيك يارب - والله حضرتك والمنتدى ده يعني يعتبر أحسن مكان الواحد المهموم يلجأ ليه بعد الله.
أنا راجع من عند الميكانيكي وشايل هم الدنيا ومش عارف أعمل ايه.
يللا حسبي الله ونعم الوكيل.

طب معلش ممكن استشارة بس. مش عارف أقرر: أخلي الميكانيكي يقفل الموتور على كده وامشي بيه لحد مايموت خالص واسقط موتور استيراد بفتيسه؟ ولا أعمل عمرة كاملة أحسن؟

**samirayad** · 24-10-2009 08:53 PM

دى عباره عن صوره لمحرك ديزل 6 سلندر (طراز فولفو )
الصوره عباره عن أحد رؤؤس السلندر
لأن المحرك يشتمل على رأسين سلندر جنب بعضهما على بلوك المحرك
1- دليل الصباب هو القطعه رقم 4 على الرسم ويتم شحطها داخل رأس السلندر حفاظا على الرأس
ولكى تكون دليلا لحركة الصباب التردديه أثناء طلوع ونزول الصباب مع خبطة كامات عمود الكامات
2- القطعتين أرقام 2 & 3 دى قواعد الصبابات وتركب بالشحط أسفل رأس السلندر ومشطوفه
بزاويه معينه لكى يستند عليها الصباب بصوره جيده وبتطبيع فائق ( عملية الروديه )
3- القطعه 19 دى سيل الصباب (كاوتش الصباب) وتركب على الدليل من أعلى لمنع نزول الزيت المتواجد فى منطقة التاكيهات من النزول الى غرف الحريق أثناء عمل الصبابات

**samirayad** · 24-10-2009 08:58 PM

طب معلش ممكن استشارة بس. مش عارف أقرر: أخلي الميكانيكي يقفل الموتور على كده وامشي بيه لحد مايموت خالص واسقط موتور استيراد بفتيسه؟ ولا أعمل عمرة كاملة أحسن؟

لو عاوز رأيى
خليه يلم الموضوع
مدام البلوك معتب
لأن ده خراطته حساسه جدا
والمفروض تغير بساتم تانى بمقاس أكبر
وده حيكلفك كتير
ومتضمنش النتيجه
وأبقى سقط موتور تانى أفضل
من موضوع البلوك ده
لو البلوك سليم وغرف الحريق ملمسها ناعم من جوه
ومش معتبه
كنت حقولك عمر
بس نفض الفيلم ده
وأبقى غير المحرك بالفتيس كمان (أستيراد على تجربه وأتفاق مع البائع )
وده أحسن ليك

**thedeveloper87** · 24-10-2009 09:08 PM

أنا بقول كده برضه لأن الفلوس معايا دلوقتي محدودة وأنا مش قد العمرة حاليا.
دلوقتي ايه خطوات العمل اللي أعملها علشان ألم الموضوع؟
- أخليه يخرط الوش ولا اسيبه زي ما هو (مع العمل إن بعض بؤر الصدأ كبيرة لدرجة إن فيه منها قرب يوصل لغرفة الحريق) ولا مش مهم؟
- بالنسبة للصبابات أخليها زي ماهي خفيفة؟ ولا مش مهم؟
- و أيضا أهم حاجة طقم الشنبر ده طبعا مش هعمل فيه حاجة؟ تمام كده؟