الموضوع: تقييم السيراتو ...ادخل و شوف

السلام عليكم
انا حبيت اكتب بكل صراحة ووضوح عن تجربتى مع الكيا سيراتو ....اولا احب اقول انى واحد من الناس اللى معجبين جدا بشكلها و كنت ناوى انى اجيبها فى اقرب وقت و مستنى الفرصة انى ابيع عربيتى الحاليه نوبيرا و على طول اجيب السيراتو ....المهم ندخل فى الموضوع انا شغلى فى الدقى و فى يوم من الآيام كلمنى مديرى فى التليفون و قالى ان فيه زميل لى فى فرع تانى ح يعدى عليا دلوقتى علشان نروح عند عميل فى العاشر من رمضان و فعلا جه زميلى ده و نزلنا علشان نركب العربية و فوجئت انه معاه سيراتو و كنت سعيد جدا لما شوفتها لآنى دى تعتبر اول مرة ح اركب فيها بره المعارض و كده اكيد فرصة التعرف عليها ح تبقى اكتر المهم ركبنا و ابتدى يتحرك من الدقى طبعا هو اللى سايق طبعا عربية من الداخل جميلة جدا حسيت بأرتياح اول ما ركبتها و شكل العربية من بره و من جوه تحفة و ابتدى يشغل التكييف فعلا حاجة جميلة جدا تكييف ممتاز بس حسيت ان سقفها واطى شوية عن النوبيرا اللى انا راكبها قولت مش مهم يمكن علشان تصميمها الرياضى ...المهم ابتدينا ندخل ع التحرير على صلاح سالم و طبعا عارفين الدنيا كانت زحمة موت (الساعة 2 ظهرا ) اول انطباع حسيته بعد موضوع السقف ده ان صوت الموتور عالى شوية عكس ما كنت متوقع ان ح يبقى الموتور ملوش صوت المهم ابتدينا نخرج من زحمة وسط البلد و ابتدى يجرى شوية و ابتديت احس بالمطبات و احس بكل صغيرة و كبيرة فى الأرض و حسيت ان العفشة بتاعتها سيئة جدا ببساطة لآنى حاسس بكل حاجة على الأرض انا كل ده و مش عاوز اكلمه فى حاجة عن العربية لآنها عاملة 2000 كم بس و محبتش انى اعيب فيها ولا حاجة انتوا عارفين الحاجات دى بتبقى حساسة شوية المهم وصلنا العاشر و خلصنا مصلحتنا و احنا راجعين ابتديت افاتحه فى موضوع العربية و اخد رأيه فيها وهنا اتصدمت :
انا قولت له ايه رايك فى العربية بعد ما عملت بيها 2000 كم انا بصراحة شكلها عاجبنى و عاوز اجيب واحدة زيها ...اجابته كانت بلا تردد : اوعى تجيبها..... قولت له ليه قالى انا جايبها بقالى حوالى شهر دلوقتى و جريت ورى شكلها زى كل الناس و روحت استحملت رزالة التوكيل فى التسليم بالشهور و فى الأخر اكتشف ان عفشة العربية زفت (نفس انطباعى من غير ما اقوله ولا كلمة ) و زيها زى اى عربية عادى بل بالعكس عربيتى الآوبترا اللى بعتها كانت برقبتها و كانت ارخص و انا بندم على انى بعت الآوبترا اللى كنت بأركب فيها انا و مراتى و عيالى و بنحسش ان العفشة ناشفة كده و حاسين بكل مطب المهم يا جماعة انا طلعت من الموضوع ده بنتيجتين
اولا انى اشيل من دماغى السيراتو و الألنترا و الفئة دى خالص لآنها غالية ع الفاضى
ثانيا انى اجيب فئة من الفئتين يا أما 130 الف و انت طالع و كده ادخل فى فئة الكرولا او الأوروبى و اريح دماغى أو انى اجيب عربية سعرها معقول مثلا ب 60-80 الف يعنى نيو اكسنت / افيو / فيرنا يقوم الواحد ما يكونش منتظر منها انها تكون مية مية و لما يحصل فيها حاجة الواحد يقول على قد فلوسها انما بصراحة اجيب عربية ب 100-115 الف و اركب فيها احس ان العفشة زفت زى ما جربت بنفسى تبقى حاجة تزعل طبعا
انا حبيت بس انقل تجربتى البسيطة دى بكل صراحة ووضوح للجميع علشان اقول ان مش كل حاجة الناس تجرى ورا الشكل و تجرى ورا ان التسليم بعد 4-6 شهور يعنى فيه ناس كتير حاجزة يعنى العربية دى مية مية ....بلاش يا جماعة التفكير كده دى عربيات مش رخيصة
و شكرا و اسف على الأطالة

مش عارف ليه حاسس ان فيه عوامل تانيه على السواق

يعنى مثلا لو راكب عربيه حتى اوربى وبتجرى وخدت مطب على السريع اكيد هتتشال وتتهبد فى الهوا هتعملك ايه يعنى العربيه فى الحاله ديه

فياريت ياجماعه يكون التقييم عادل يعنى متقنعنيش انك بتاخد المطب على الهادى او النقره وتقول العفشه ناشفه ومش مطلوب منك تبهدل العربيه علشان تختبرها
متمشيش مثلا على 80 ولا 90 وتاخد مطبات بلدنا ديه حرام انت كده بترمى فلوسك فى الارض

ارجو مراعاه ان العربيه زيرو واغلب العربيات الجيدده بتاعت طرق ناعمه هى مش هامر ولا لاند كروزر