ممكن نصيحة بخصوص شراء عربية صغيرة

**hopeandfaith222** · 24-10-2009 11:02 PM

انا بعد ماشفت جدعنة الناس هنا مع الاخت كوكو طمعت فيكو اوي هيهيهي
انا ماسوقتش قبل كده وعايشة في القاهرة الجديدة وماادراك ما المواصلات هناك!! فعايزة عربية صغيرة ويفضل اوي انها تكون اوتوماتيك ومعايا 7 الاف جاهزين وممكن اوصلهم 20 او 25 الف وماعنديش مشكلة مع القسط بس في حدود 400 جنيه في الشهر ومش مرتاحة للمستعمل
معضلة مش كده!!!!!!!!!
كان نفسي في برودوا كليسا عن طريق بنك بس لقيتها خلصت
اي نصايح يا اهل الخبرة؟؟؟؟؟

**A.Saad** · 24-10-2009 11:08 PM

ماروتى

**aymansaad** · 24-10-2009 11:24 PM

كيا برايد
ماروتى

**hopeandfaith222** · 24-10-2009 11:32 PM

متشكرة اوي للناس اللي ردت ربنا يكرمكم
هي بس مش المانيوال يبقى صعب لحد لسه بيتعلم السواقة في الزحمة اللي في مصر دي ولا ايه رأيكم؟
ومعلش يا اخ ايمن و لوما اعذروا جهلي بس كيا برايد و ودايهاتسو 93 دول اكيد مستعمل مش كده ولا فيه جديد؟؟
ومتشكرة جدا تاني واسفة للازعاج

**mxz911** · 25-10-2009 12:40 AM

حضرتك ارخص عربيه جديده هيه الماروتى ب حوالى 38 الف ودى ارخص عربيه فى مصر .وكمان مانيوال مش اوتوماتيك .
لو اوتوماتيك تبقى السوزوكى التو هيه ارخص عربيه ودى تمنها ضارب شويه وهتبقى فوق ال 50 الف

غير كده منزلين اختراع هبل حاجه شبك التوك توك اسمها نايل توك باين .. ب 25 الف جنيه وده قمه ف الهبل والضحك على الشعب المصرى واستخفاف عقله ...

طبعا انا وجهه نظرى ان احسن حل انك تجيبى عربيه مستعمله بحاله نظيفه .. زى ما الاقتراحات اللى اقترحت عليكى من الاعضاء مثل البرايد والاونو والشاريد .. اهم حاجه فالمستعمل الحاله ..

وربنا يوفقك