احنا عايزين إيه من المرور

**Abdallah** · 13-05-2007 01:38 PM

من حوالى سنتين كنت بسجل عربيتى فى المرور وكانت على اسم صديق ليا ولما رحت اجيب براءة ذمة فوجئت بان العربية عليها مخالفات بحوالى 8400 جنيه ( ثمانية الاف واربع مائة جنيه فقط لا غير ) وطبعا طلبت اشوف المخالفات دى وكانت اول مرة فى حياتى اسمع عن حاجة اسمها مخالفة مطار دو بجانب بعض المخالفات فى اسيوط والقاهرة واماكن اخرى وطبعا انا اخر طريق المنصورة بورسعيد , حتى القاهرة مبروحهاش, ولحسن الحظ لقيت رئيس نيابة المرور ايامها يعرفنى وطبعا خفضلى المبلغ...
تفتكروا دفعت كام ؟؟؟؟
تسعون جنيها مصريا فقط لا غير.
وعجبى.

**KiNgMaX** · 13-05-2007 04:41 PM

والله يا جماعة كل الكلام اللى انا سمعته منكم كويس بس اظن ان الحقيقة ان الموضوع اكبر من كده شويه يعنى احنا لو عايزين نصلح الاوضاع فى المرور نبقى محتاجين فلوس وبالتالى فرض غرامات كبيرة فتلاقينا نتصدم فى الواقع ان مستوى الدخل فى البلد منخفض جدا وبالتالى محدش يقدر ينفذ الكلام ده يعنى لما اقول ان كسر الاشارة بقى بالف جنيه ومع فرض ان فيه نظام مظبوط ومفيش وسايط والحياة بقت وردى كام واحد ممكن يدفع الالف جنيه بسهولة كده فى مصر
يبقى لازم نبدا باصلاح البلد من اساسها وتصليح كل الاخطاء اللى موجودة عندنا بدءآ من رغيف العيش لغاية اى مسئول كبير حرامى وبالتالى كل الكلام ده تخاريف فى تخاريف وأحلام فى أحلام
وللاسف احنا اتكتب علينا نعيش طول عمرنا فى ظلام وظلم
ومضطرين ان يبقى الحال على ماهو عليه

**جندى مجند** · 13-05-2007 05:46 PM

أنا معنديش مانع انهم يزودوا الغرامات لأرقام رادعة بشرطين مهمين جداً:

1- تركيب كاميرات فى جميع التقاطعات و الاشارات و نقط الرادار بحيث ان أى مخالفة تكون مثبتة بالتاريخ و الصورة و يتم ارفاق الصور مع المخالفات فى الملف اللى فى المرور

2- أن يتم تطبيق المخالفات على الجميع و بدون أى استثناءات (لا شرطة و لا نيابة و لا قضاء و لا هيئات قضائية عليا و لا دبلوماسية ... الخ الخ)

ساعتها المرور حيمشى زى الألف فى البلد كلها

**هشام.النجار** · 13-05-2007 11:51 PM

بصراحة شايف الإخوة بالمنتدى ردوا كويس جداً
ألخص الردود في نقط :
1- الحكومة بتلهف ملايين الملايين وضرائب بتدفع على أي شيء وغير منطقية والأولى أن توجه الفلوس دي لخدمة الشعب وليس شوية منها يتسرق وشوية يهدر .
2- الغرامات غير منطقية والتخفيض ده أسلوب ترضية ولا أرضاه بالفعل لكن غير منطقي أن نرى مخالفات خيالية إرتكبت في كوكب أخر , يبقى الحل العادل هو أن أدفع غرامة على شء أخطأت به بالفعل ليس ترضية ولا إحتساب مخالفات وهمية .
3- عدم إلتزام المرور والضباط نفسه حدث ولا حرج .
4- فساد أمناء المرور كما ذكر .
نستطيع بإذن الله حل جميع المشاكل بنشر الوعي وأداء دور إيجابي في المجتمع ومراقبة الله , لما كل واحد مننا يراقب الله في تصرفاته ( من أول عسكري المرور إلى أكبر مسئول والمواطن العادي ) حنبقى كويسين بإذن الله .

**sokasoon** · 14-05-2007 01:54 PM

تفعيل نظام الغرامات الكبيرة وتحسين خدمات المرور والطرق

**AlmAhAtmA** · 19-05-2007 02:02 AM

حسبي الله و نعم الوكيل
الرخصه مسحوبه من 3 اسابيع و كل اسبوع اروح اجدد علي الوصل في ساعتين
زي ما يكون عندي استشاره عند دكتور
بكره حروح المرور للمره الرابعه علشان اشوف الرخصه
ليه ميكونش فيه نظام مصالحه فوري في حاله سحب الرخص
ليه مش بيسهلوا علينا الدنيا
ليه بيعذبونا
ليه استني الضابط لحد ما يخلص القهوه بتاعته في ساعتين
ليه و ليه و ليه
اقتراحي نلغي نظام المرور
و نجيب شركه تاخد العمليه من بابها اصدي من رصيفها
و لا عزاء للشعب المصري