غرفه الطلبه الجامعيين

**evoo90** · 26-10-2009 08:26 PM

بسم الله الرحمن الرحيم

فكره جاتلى فى دماغى اننا نساعد بعض فى المواد الدراسيه بتاعتنا
والحمد لله معظمنا هندسه وطب و IT
يعنى اساس البلد
عايزين نساعد بعض فى المذاكره والمشاريع والتقارير والشغل ده كله
بمعنى تانى نجمع طلبه الهندسه سوا وطلبه الطب سوا
وطبعا التجمع ده اكيد هيفيدنا ويفيد غيرنا
كفايه اننا كلنا نبقى يد واحده ومانفرقش بين هندسه حلوان ولا قاهره ولا سوهاج ولا منصوره
ولا المعاهد الهندسيه والكليات الخاصه لأن الهدف كله واحد
انا الحمد لله دخلت هندسه الاهرامات اللى قدام دريم لاند فى مدينه الفردوس ( 6 اكتوبر )
بعد شقى خمس سنين ثانوى صناعى وفى الاخر ضحكوا عليا
المهم طبعا انا ماكنتش باخد فيزياء ولا رياضه
الماده الوحيده اللى تشبه الميكانيكا ماده كنت باخدها اسمها - اداء معدات -
المهم مشكلتى هتبقى فى الفيزياء والرياضه وانا هبتدى الموضوع بأول طلب للمساعده
تقترحوا عليا اعمل ايه عشان ابقى كويس فى الفيزياء والرياضيات ؟؟

ياريت تفاعل من الاخوه البشمهندسين
الموضوع مفتوح لأى استفسارات او اسئله او مشاكل تخص الكليه او المواد الدراسيه لأى كليه

**Ahmed Nouh** · 26-10-2009 10:11 PM

مفتاح الفيزياء اتعلمته فى ثانوى لما كنت الوحيد فى الفصل اللى بيستنى الحصه دى بفارغ الصبر

طبق كل قانون عرفته وكل قاعده شوفتها فى حياتك اليوميه وانت هتلاقى الفيزياء دى زى السكينه فى الحلاوه معاك , طبعا بما اننا بنحب العربيات مش هيقابلك قانون فيزياء ابدا الا وهيزود معرفتك بطبيعه حركه العربيه وردود افعالها على الطريق

حتى الان دايما درجاتى فى الفيزياء مرتفعه للسبب ده بس

**Abdo_Eldesokey** · 27-10-2009 12:05 AM

أنا رأيي تجيب كتب الثانوية العامة وتذاكر أو حتى تقرأ الي فيها ، لأنها فعلاً بتأسس كويس في العلوم الأساسية

وصدقني انت في سنك ده هتحس إنك بتقرأ ميكي لما تشوف الكتب دي ، يمكن لما كنا في ثانوي كنت تحسها صعبة ، لكن مع النمو العقلي بعد الثانوية العامة المواد دي هتكون أسهل كتيييييير

**نور القمر** · 27-10-2009 12:34 AM

كنت بعشق حاجة اسمها رياضة وجبت درجات نهائية ماعدا فرع واحد حتى المستوى الرفيع ومن بعدها الفيزياء
لو حبيت الرياضة هاتقدر تلمها بسرعه
انت محتاج مدرس ثانوي يبدأ معاك بالاساسيات

**abdo_general** · 27-10-2009 01:21 AM

بجد يا ايفو لو بداءت بكتب ثانوي من اول اولي ثانوي بعدين ثانوية
هتبقي تمام اوي ومش هيبقي ناقصك حاجة
خصوصا ان انت هتحس ان حاجات انت عارف اغلبها وكمان دماغك اكبر منها
بس تاخدها بانتظام
ومش بحماس زائد علشان ما تبداءش جامد اوي وبعدين تكسل
يعني واحدة واحدة
وربنا يوفقك

**icetak** · 27-10-2009 01:42 AM

إيه ده حد في معهد الاهرامات هنا :) بجد يا ايفو
لو احتجت أي حاجة قولي على طوول

**evoo90** · 27-10-2009 05:21 AM

متشكر ياجماعه انا هبتدى ادور على كتب فيزياء بتاعه ثانويه عامه
انا كمان معايا كتاب فيزياء اعدادى هندسه القاهره بس حاسس انه متقدم شويه فى الفيزياء

المشاركة الأصلية كتبت بواسطة icetak

إيه ده حد في معهد الاهرامات هنا :) بجد يا ايفو
لو احتجت أي حاجة قولي على طوول

ايه ده انت معايا ولا ايه ؟؟؟ دى صحراء

**eng.octooo** · 27-10-2009 08:42 AM

انا فى معهد العاشر فرع اكتوبر ومطحووووووووووووووووون فى الفيزياء والرياضة

**maka** · 27-10-2009 02:49 PM

بامانة شديدة رياضة وفيزياء ثانوية عامة حاجة ورياضة وفيزياء اعدادى هندسة حاجة تانية خالص ملهمش علاقة ببعض الا فى مواضيع بسيطة

والخلاصة يا ايفو اشترى نفسك ودماغك وهخدلك درس