الموضوع: عملت حادثة بالبونتو(ربنا يحفظكوا)

كنت فى اسكندرية على الكورنيش و ماشى على 90, بعدى بين عربيتين, اللى على يمينى خبطت فى و خلانى خبطت فى اللى على شمالى , العربية عومت منى و مشيت يمين فى شمال (ثباتها مش حلو و كنت عارف كدة لأنها هاتش باك و خفيفة وكمان عالية عن الأرض) لحد ما رشقت فى الرصيف اللى فى النص و الاير باجز فتحوا

الخساير كتير طبعا, من مقصات و سكاترا و خلافة (كفاية الاير باجز لوحدهم) . على فكرة أنا كنت لوحدى ساعتها و بصراحة الاير باجز ملهومش أى لازمة لأنى كنت رابط الحزام الحمد لله, بالعكس الاير باج عورونى فى يدى الشمال لما طلع! (حاجة بسيطة)
العربية فيات بونتو كلاسيك 2008 . نقلتها على كساحة لحد تحت البيت و لسة مش عارف حاعمل فيها اية.
أنا بس نفسى أعرف حاتتكلف كام ؟ لسة ما جبتش حد يشوفها لأنى خايف أتصدم من الرقم
العربية مش مأمن عليها للأسف و مافكرتش أروح التوكيل أساسا لأن أسعارهم فلكية!
بصيت على شوية حاجات فى ebay.co.uk و لاقيت الأسعار هناك غير هنا خالص , بس المشكلة فى الشحن و الجمارك , دة غير انها مش مضمونة 100% لأنى مش شايف القطع بعينى.

شكرا