السلام عليكم ورحمة الله وبركاته
بفضل من الله
عملت صيانة اول ألف كيلو لل جين2
رغم اني روحت بدري شويه 888 كيلو
لكن وانا راجع من التوكيل عملت حوالي 100 كيلو
باقيلي حوالي 10 كيلو مثلا واخلص اول الف

امبارح اتصلت برقم الحجز رد عليا الاستاذ: محمود
قلتلو عاوز احجز صيانة الالف
قالي تحب في يوم ايه
قلتلو ياريت في اقرب فرصه لان العربيه بتنقط زيت
قالي تعالى بكره الساعه 11

طبعا نقطة ان العربيه بتنقط زيت السبب اني اخدت مطب جامد على سرعه عاليه
وفلتر الزيت تقريبا زي ما قالت المهندسه انو مكانش مربوط كويس
يعني اتفك مثلا من المطب ولا ايه مش قادر افهم

المهم تاني يوم اللي هو النهارده
وصلت التوكيل على الساعه 1.30 تقريبا
ووقفت تحت التنده وسلمت العربيه
المشاكل اللي كنت ملاحظها :-
1- طبعا الزيت اللي بينزل من العربيه
2- الفرامل بقت خفيفه ومداها بعيد
 3- لمبة الشنطه مش بتنور مع فتح الشنطه

وكفايه كدا

المهم قلت للمهندسه على المشاكل دي
وجه واحد حط كيس على كرسي السائق وعلى الدركسيون
وعلى مقبض الفتيس واخيرا حط دواسه ورق

ودخلت الاستراحه اللي بقالي كتير بشوفها في الصور بس
وكنت متخيل انها في دور تاني مثلا وحجمها أكبر من كدا
لكن طبعا الواقع غير كدا تماما
لكن في نفس الوقت مناسب لعدد الافراد اللي كانو موجودين
من 5 الى 7 أفراد تقريبا وبيزيدو وبيقلوا
وطبعا في تلفزيون ووايرلس وانا عارف الكلام ده
لكن قمت اخد جوله كدا واشوف مكان صيانة العربيات
والعربيات الكتير اوي اللي موجوده بره مكان الصيانه
اخدت جولتي الصغيره أوي دي
وأنا في طريقي قابلتني عربيه مش غربيه عليا
شفتها قبل كدا وكانت بروتون (savvy )
وكان لونها أسود ومترخصه زي اي عربيه
صورتها (وانا بصور واحد جه وقالي ممنوع التصوير )
قلتلو طيب وانا كنت خلصت تصوير اصلا
وطلعت بره المركز وشفت تاني واحده بس المره دي لونها اخصر فاتح
وبردو صورتها
وبعد كدا اخدت لفه في داندي مول (كيلو الا شويه تقريبا من التوكيل )
ورجعت وكانت العربيه خلصت بس محدش قالي انها خلصت
رحت للمهندسه وقلتلها العربيه خلصت ؟!!
قالتلي هي دي عربيتك !!!!!!!
قلتلها اه
قالتلي مش عارفه (هههههههههههه) ومش فاهم بتضحك ليه
رحت عملت بارد اوي وقلت بهزار (مش تاخدي بالك من شغلك )
قالتلي بهزار بردو (معلش اصل انا مهمله في شغلي ههههههههههههههه)
(هههههههه دي ضحكه بجد )
المهم قالتلي استريح وهشوف ولو خلصت هقولك
دخلت الاستراحه ولسا بقول يا هادي لقيتها جت بتقول العربيه خلصت
ورحت دفعت الفلوس 171 بندق و 60 قرش
مع انها كانت قيلالي ساعة الاستقبال ان الصيانه بتتكلف 180 وانا عارف انها المفروض تكون 177 بس قلت اوكي
طبعا العربيه للاسف متغسلتش برغم اني شفت عربيه اتغسلت قبل كدا
الراجل اللي سلمني العربيه وشال الاكياس قلتلو انتو مبتغسلوش العربيه
قالي هو ممكن نغسلها بس دي حاجه مش مفروضه علينا
لو تحب اغسلهالك اوكي وكدا قلتلو لا شكرا
واخدت العربيه وهربت من التوكيل عشان كنت زهقت جدا

تقريبا أيمن كان موجود في التوكيل النهارده بس مش متأكد بصراحه
شفت واحد كان بيتكلم مع مهندس وكان نفس أسلوب أيمن في الكلام
(يامعلم) هو انا سمعتو اتكلم كام كلمه كدا وعرفت انو هو
لكن مكنتش متأكد بصراحه
وطبعا الشغل في التوكيل كان على قدم وساق وكراتين قطع الغيار بتتنقل لمكان الصيانه

الشغل اللي اتعمل في العربيه اتعمل بضمير تقريبا ( انا مقدرش اقيم علشان اول مره )
لكن لمبة الشنطه اتصلحت
والفرامل بقت حساسه على السرعات الصغيره فقط ومداها بقى اقصر
لكن على السرعات الكبيره لفرامل مداها كبيره شويه ( هل دا طبيعي ؟؟)
والحمد لله مفيش زيت نزل من العربيه
كان ناقص بس غسيل السياره عشان اتبهدلت جدا

وبكدا اكون انتهيت من اللي حصل
في الصيانه النهارده
وشكرا

(الجزء القادم تقرير عن اداء السياره )