الموضوع: أرجو من الاخوة المساعدة في استفسارات بسيطة

السلام عليكم
أنا عندي النترا 2009 عاملة 4000كم و العربية ممتازة جدا بس ليا شوية استفسارات
1/ فيه صوت تزييق في العفشة و تكتكة في ناجية الباب الشمال (باب السائق) بيبانوا في المطبات و الطرق المتكسرة ده من ايه و حله ايه ؟

2/ بعد ما اشد فرامل اليد و اسيب فرامل القدم بيظهر صوت تزييق لفرامل اليد و كمان لو هزيت العربية و فرامل اليد مشدودة بيظهر صوت تزييق ده من ايه ؟

3/ الفرك بالعربية (الأمريكاني) و هي لسة 3000كم ممكن يكون أثر على حاجة فيها ؟ انا عملتها مرتين بس و مش هعملها تاني بس في اخر مرة شميت رائحة شياط مع اني عملتها على طريق ترابي و على الأول و ال rpm ما وصلش 7.. ياريت تقولولي لو فيه اي مشكلة حصلت .. انا خايف يكون حصل حاجة لأسطوانة الدبرياج او اي حاجة

4/ العربية دايما بتمشي في طرق صعبة جدا مليانة حفر و مطبات و انا خدت مرة حفرة و انا على سرعة 50 كم/س ممكن ديه تكون اثرت على حاجة ؟ و الطرق الصعبة ديه ممكن تأثر على العربية بشكل كبير؟

أنا لما سألت اصحابي عن النقطتين 1 , 2 قالولي العفشة بس مش متربطة كويس و ما ربطوهاش كويس في صيانة الألف كم فهل ده صحيح ؟

اسف جدا على الاطالة.. انا عارف اني بدقق بس انا بحب العربية ديه جدا و ما بحبش الاقي فيها اي مشكلة و لو صغيرة

شكرا مقدما