الموضوع: تجربتى مع العوض و السبع

المشاركة الأصلية كتبت بواسطة ahmed_abbas

السلام عليكم
يا جماعة انا شارى صنى من حوالى أسبوع و كنت عامل 500كم
فوجئت إن الزجاج الخلفى ربنا يكفى الجميع الشر سرطن و هى راكنة فى الظل و ما فيش و لا مرة واحدة سيبت العربية فى الشمس
المهم رحت للعوض اللى على الأتوستراد رفضوا تغيير الزجاج فى الضمان و لما كلمت حماية المستهلك من هناك قاللى من حقك كل حاجة ده إنت ممكن كمان ترجع العربية كالما فى أول 14 يوم و قاللى ممكن تغيره على حسابك و تأخد منهم ورقة رسمى بإنهم رفضوا يغيروا الزجاج فى الضمان
قابلت مدير الصيانة هناك و طبعا مافيش حد كلف نفسه يبص على العربية حتى!!
المهم إنهم رفضوا حتى يدونى الورقة دى و قالوا مافيش ضمان للزجاج و الدير قاللى تحب تستنى لبكرة علشان السبت بيكون المسئول عن الضمان أجازة طبعا انا قلتله إنت ترضى تسيب عربيتك يومين مفتوحة كده
المهم رحت للسبع ناس فى منتهى الذوق و الإحترام فى أقل من 5 دقائق صوروا العربية علشان يبعتوا الصور للضمان و غيروا الزجاج و المعاملة ما فيش أحسن من كده خلونى سحبت الشكوى من حماية المستهلك
مش بس كده اتصل بى النهارده مهندس من نيسان موتور إيجبت بيحقق فى الموضوع و ألح على إنه عاوز يشوف العربية علشان يتأكد بنفسه إن كل حاجدة تمام و قاللى أنا حاجى لغاية عندك فى الوقت المناسب ليك و واضح إنه لام مدير الصيانة فى العوض لأنه لما كلمه قاله الزجاج الامامى لأنه طبعا و لاسمع منى و لا بص على العربية من أساسه

أنا بس حبيت أعرفكم إن فعلا السبع توكيل محتم و إن الشركة نفسها محترمة جدا و حريصة على رضا الناس

حضرتك كنت تروح تعمل محضر إثبات حالة في أقرب قسم شرطة ، وبالمحضر د تطلع بيه على جهاز حماية المستهلك علشان العوض دول لازم يتعلمو الأدب وازاي يعمل الزباين بإحترام ، من فضل حضرتك ياريت تكمل الشكوى فيهم علشان ماينفعش نسكت على حقنا ، لأن مفيش حد حيجري ورى حقق غيرك.
وياريت تكلم جهاز حماية المستهلك تاني وتقلهم اى إلي إنت عملتو ولو ينفع تشتكي العوض دول تاني ولا لأ ، لأن لو ينفع ياريت تشتكيهم.