طبعا البونتو تعتبر سيارة عائلية صغيرة و ممكن Mini SportCar
و انا شايف انها اعتمادية جدا و عملية اكتر من البيكانتو كتير
على الاقل اوسع كتيييير من البيكانتو و الـ I10 و تقدر تقول ان فيها شنطة ممكن تستخدمها للسفر و لاي اغراض انما سواء البيكانتو او الـ I10 الاتنين يكفي تحط Subwoofer في شنطهم و شكرا و لو كانت مفيهاش صب يادوب تحط شنطة صغيرة و تمام على كده و الباقي حطه في الكنبة ورا عندك

بالنسبة للموتور 1242 سي سي 60 حصان اصلي و عربية تجري بيك بتسارع بعربيات مواتيرها اكبر منها زي الكورولا 2007 و الياريس و اللانسر و اللانوس
البيكانتو سريعة بس اكيد متطلعش من الكورولا و الياريس

فيها جنوط سبور 14 " عريضة و ده يحققلها اتزان جميل جدا لابعد الحدود (مشيت بيها لغاية 170 كم/س كانها طوبة على الطريق مبترمش)

عربية ناعمة جدا جدا في سواقتها و مفيهاش اي بوشات ولو 1%
تقفيل محترم و توكيل محترم

اعتقد ان كل ده يخليها اعتمادية جدا و مفيش حد جابها قال عليها غير كده
و البيكانتو كانت قدامي بس انا اخترت البونتو و انا مغمض

تقفيل ايطالي 100% و طبعا افضل من الكوري
5 نجوم في اختبارات الامان

يعيبها:
خفة وزنها و دي على السرعات العالية بتكون خطر لو انت عديت على حجر كبير شوية او حد خبطك (بس عشان هي مصممة للمدن اكتر من الطرق السريعة)
و غلو قطع غيارها نسبيا
دي العيوب الوحيدة اللى انا شايفها فيها

و ده قرارك في الاخر برضه

و ان قدرت تطلع 15000 طبعا هات الجراند احسن بكتير
بس في حدود 72000 يبقى بونتو حتى لو كانت مانوال

و فيه ملحوظة (مش متأكد و ياريت تتأكد بنفسك احسن) فيه ناس كتير بتشتكي من المواتير الصغيرة الكوري عموما في الاوتوماتيك: بيتقل العربةي اوي اوي و مشاكله كتير