الموضوع: نيسان صنى- تقفيل مصرى....أم الأجنبى

المشاركة الأصلية كتبت بواسطة tutankhamoun

ما شاء الله مقال أخر ممتاز من مقالات المهندس سبعاوي ...

==================================

فعلا أحنا عندنا عقدة خواجة متقدمة جدا .............

عربية مرسيدس مش قادر أنساها .......... بنصف مليون جنيه جابت موتور بعد 800 كم فقط من الزيرو ......

تعالوا نتخيل أن دي عربية صناعة مصرية و جابت موتور مثلا بعد 100 ألف كم مش 800 كم ؟؟؟

طبعا كان الدبح هايشتغل في الصناعة المصرية و العمال المصريون و الحكومة المصرية و الشعب المصري .

الأكادة ( على رأي بتوع الأفلام ) .......... أن أحنا بندمر أقتصادنا بنفسنا ......



و أنا عايز أقول .............. أغلب العربيات التجميع المصري ........... جيدة جدا إلى ممتازة
و قطع الغيار اللي بتركبها الشركات الكبيرة زي مرسيدس و بي أم و نيسان و هيونداي في عربياتها المصنوعة في مصر و قطع غيارها مصرية .......... تكاد تكون متتازة

الفارق الوحيد هو علامة " صنع في مصر "

فيه مصانع بتشيل علامة صنع في مصر و تحط علامة صنع في الأتحاد الأوروبي و البيع بالهبل .
لو علامة صنع في مصر مازلات عليها و لا حد هايشتريها ..

عقول .

استاذ توت مع احترامي الشديد لحضرتك واستاذ سبعاوي ورغم حزني اني فرد ممن لا يثقوا في الصناعه المحليه. احب اقول ان عدم وجود ضمير حي عند اغلب العماله المصريه والتي تعمل بمنطق علي اد فلوسهم ومنطلق ان كان عاجبهم وما الي اخره وضعف الرقابه وعدم مراعاة معايير الجوده هي السبب فيما وصلنا اليه..

العامل عندنا لو شاف غلطه في التقفيل فيه احتمال ان محدش يكتشفها ما بيصلحهاش واوقات بيتغاضي عنها مجامله لزميله اللي اتسبب فيها علشان ما يضروش او علشان ما يتقلش عليه ويضطره انه يصلحها والغريبه ان نفس العامل لو اشتغل في مكان فيه رقابه وقواعد صارمه لجودة المنتج بيعمل شغل هايل وممكن يكون جودته اعلي من المنتج المستورد وبامكانيات اقل. عارفين ليه؟ لانهم بيخافو ما بيختشوش. بيخاف يتقطع عيشه بيخاف يتأذي لكن مابيختشيش من ربه ما بيحللش الفلوس اللي بياخدها..

أستاذ توت حضرتك ذكرت المرسيدس اللي بنص مليون وجابت موتور طيب ما المرسيدس تقفيل محلي و البي ام تقفيل محلي.. اركب مرسيدس تقفيل محلي و نفس الموديل استيراد وشوف الفرق..

علي فكره ما ينفعش نتكلم علي التقفيل المحلي بتعبير مطلق فمن الممكن ان التقفيل المحلي في مصانع غبور سيء وجيد في مصانع نيسان او العكس لان فيه عوامل كتير بتحكم جودة العمل ذي الأداره والرقابه ودخل العامل اللي بيختلف من مكان للتاني.. انما للاسف المشكله ان جودة المنتج في بعض الاحيان بتختلف داخل المصنع الواحد بمعني اننا بنلاقي سيارتان خارجين من مصنع واحد ونلاقي واحده زي الفل ومفيهاش غلطه والتانيه كراسيها بتزيق وقوايمها مفارقه والهوا بيصفر في ودنك او الطابلوه سايب وبيشخلل.. يعني انت وحظك اما ان عربيتك يكون اشتغل فيها طاقم عنده ضمير وربط كل حاجه كويس او مجموعه من اياهم او عربيتك اشتغلوا فيها في الاصطباحه وهم مزاجهم رايق ولا في اخر اليوم وعايزين يخلصوا علشان يروحوا..

انا نفسي مشتريش غير صناعه محليه بس انتم عارفين احنا في مصر بنجيب الفلوس اذاي فمينفعش احط شقي عمري في منتج محلي اشجع بيه صناعة بلدي واساهم بيه في فتح بيت عامل وهو ما يراعيش ربنا فيا وفي بعض الاوقات بيبقي ناقم علي اللي هيشتري العربيه من غير ميعرفوا علي اعتبار ان اللي هيشتري العربيه اللي تمنها الاف الجنيهات بيلاقي الفلوس او الفلوس مش فارقه معاه...