أنا مضطر متكلمش عن العربية دلوقتى لأنى لسه مظبطهاش زى منا عاوز, بس عموما قطع الغيار مش غالية أوى, فى المتناول و الاستيراد الحمد لله مفيش أكثر منو و بأسعار جيدة جدا (بس انتا لازم تختار هتتعامل مع مين) التسارع جيد الى حد كبير لكن السرعة القصوى مش أد كده (بتوصل ل 160 و تتخنق و أخرها كان 180 - 185) فالأمان بتاعها على الموتور هو ال 160 مع العلم انى أتوماتيك.
الثبات طبعا جيد جدا الى حد كبير (مع العلم ان الكاوتشات ضايعة و مفروض انى أغيرها الأيام ديه)
نيجى بأه للمفيد, كلو على حسب احتياجك لو انتا عايز عربية فرك أو شد و تسارع عالى يبقى مش هتنفعك, العربية ثقيلة و رزينة و لازم تحترمها عشان تصونك (صحيح ده ميمنعش انها بتتعفرت بعد ما تدى الكيك داون و الار بى ام يعدى التلاتة)لكن لازم يبقى فى دماغك ان مشيك العادى هيكون باحترام.
حاجة تانية هتاخد لفات محترمة عشان تتعرف على ميكانيكية أو ورش صيانة الألمانى و مين بتوع قطع الغيار المحترمين و متحاولش تغامر فى موضوع قطع الغيار عشات متقرفكش.
العربية قديمة طبعا فلازم تلف كويس عشان تلاقى عربية حالة و لازم تكشف عليها كويس و تختار أولوياتك يعنى أنا اهتمت ان البوية تبقى فابريقة داخل و خارج و عداد قليل (90,000)مع عربية صاحبها مهتم بماتورها و فتيسها, و بالتالى خدت عربية من واحدة ست بس طبعا الكمال لله واحده فكانت العفشة تعبانة شويتين و الكاوتشات ضايعة و العربية مخنوقة حبتين.
كمان انت مفروض تعرفنا انتا كنت راكب ايه و أسلوب سواقتك و انتا متوقعو من العربية الهتركبها عشان نقولك هتنفعك ولا لاء.
و مثال بسيط انا عينى كانت رايحة لل 406, و كانت من ضمن لستة الاختيارات و خصوصا عشان موتور ال 2000 سى سى, لكن كان فى كلام كثير على موضوع الفتيس و الورش المتخصصة فيها و محلات قطع الغيار مليش علم بيها كثير و استخرت و ربنا كرمنى بالبورا بس المشكلة و رغم اقتناعى بسيارتى الحمد لله بس لغاية دلوقتى كل ماشوف ال 406 بتزغلل عينى و موتور ال 2000 سى سى واكل دماغى حبتين بس بردو الخير فيما اختارو الله و الحمد لله على ما رزقنى,
حدد احتجاتك و امكانياتك عشان نعرف ننصحك و بالتوفيق