رقم الموتور مش ظاهر فى اللوجان !

**rere** · 19-11-2009 05:01 PM

السلام عليكم
لو سمحتوا يا جماعه عندي استفسار احنا اشترينا اللوجان الاسبوع الي فات لحد ما الافراج الجمركي وصل اخدها زوجي وراح عشان يرخصها بس حصلت حاجه غريبه رقم الموتور مش ظاهر راح لميكانيكي عشان يصنفر الموتور بس برده الرقم مش يظهر انا بجد قلقانه ومش عارفه هي دي حاجه عاديه ولا ايه بالضبط لان طبعا في المرور مردوش يرخصوها

**bishoy02010** · 19-11-2009 05:17 PM

غريبة قوى ديه هوة انتوا تبع مرور إيه ؟؟؟ ممكن يكون مداش للراجل اللى بياخد البصمة 5 جنية بس فطلعلة ان رقم الموتور مش ظاهر :)

**yahiahelaly** · 19-11-2009 05:21 PM

مش عارف ربنا يسترها ممكن تسئلي الاعضاء لغاية ميقلولك يمكن بتشوفوا في مكان غلط ولو كان صح عليكي وعلى التوكيل لانها لو خلصت المرادي كل مرة ترخصوا هتبقى مقرفه

**amr.elsayed** · 19-11-2009 05:25 PM

اتصلى ب 16202 وقوليلهم على الموضوع ... دة رقم التوكيل
وللاسف ضرورى الراجل بتاع البصمة يتظبط

**elnopy** · 19-11-2009 05:39 PM

نفس الموضوع كان عندى وقعدت اقاوح واعاند مع المهندس فى المرور واوريه الافراج الجمركى بتاع العربيه وفى الاخر اقتنع ورخصت الحمد لله

**medoadel** · 19-11-2009 05:41 PM

المشاركة الأصلية كتبت بواسطة rere

السلام عليكم
لو سمحتوا يا جماعه عندي استفسار احنا اشترينا اللوجان الاسبوع الي فات لحد ما الافراج الجمركي وصل اخدها زوجي وراح عشان يرخصها بس حصلت حاجه غريبه رقم الموتور مش ظاهر راح لميكانيكي عشان يصنفر الموتور بس برده الرقم مش يظهر انا بجد قلقانه ومش عارفه هي دي حاجه عاديه ولا ايه بالضبط لان طبعا في المرور مردوش يرخصوها

انا حصل معايا نفس الموضوع فى الترخيص بالظبط
لدرجة انى اتصلت بمحمد ذكى عشان يقولى البصمة تطلع ازاى
وفى الاخر مهندس المرور بعد واسطة طبعا اخد البصمة 3 مرات ولزقهم على ورق الترخيص على مسؤليته، ومش عارف فى التجديد هتحصل نفس المشكلة واللا ايه.

**medoadel** · 19-11-2009 05:43 PM

المشاركة الأصلية كتبت بواسطة medoadel

انا حصل معايا نفس الموضوع فى الترخيص بالظبط
لدرجة انى اتصلت بمحمد ذكى عشان يقولى البصمة تطلع ازاى
وفى الاخر مهندس المرور بعد واسطة طبعا اخد البصمة 3 مرات ولزقهم على ورق الترخيص على مسؤليته، ومش عارف فى التجديد هتحصل نفس المشكلة واللا ايه.

والمهندس خللى الراجل بتاع البصمة يرفعها على ورقة بافرة "ورق سجارة" وبانت شوية بس طبعا مش واضحة للدرجة، والحمد لله الموضوع اتحل مؤقتا ورخصت 3 سنين.

**nomercy22** · 19-11-2009 06:13 PM

حصل معايا نفس الموقف واديت لراجل 5 جنيه وخلاص الموضوع

**rere** · 19-11-2009 06:45 PM

هي الحكايه منتشره ولا ايه احنا كمان اتصلنا بمحمد زكي وقالولنا استحاله تحصل وان الغلط في المرور مش عارفين يرفعوها بجد ربنا يستر وتعدي علي خير

**Mohd_Adel_Amin** · 19-11-2009 07:32 PM

انا الموضوع ده اتكرر معايا مرتين في العربيتين مرة في مرور الدقي ومره في العجوزة بس طبعا كله مشي بخمسة جنيه في ايد الراجل بتاع البصمة وخمسة ثانية في ايد الراجل بتاع المطابقة !!
هو حسب ما سمعت ان الرينو بصمتها بتكون صعبة شوية بس مش عارف ايه السبب بصراحة ..