الموضوع: رأي المتواضع في القضية ...ولكم التأييد او المعارضة

المشاركة الأصلية كتبت بواسطة aif

ايه اللي بيحصل ده
ايه الهيستيريا دي ......
كل ما افتح اي اذاعة او تلفزيون محلي او فضائي الاقي الناس عمالة تشتم في الجزائر
حتى اعلانات الشوارع بقت دعوة للفتك بكل ماهو جزائري
حتى نايل موتورز بقي ساحة للشتم والسب والقذف ضد الجزائر
......
انا طبعا دمي اتحرق زي اي مصري من اللي سمعته وقرأته في الخرطوم والجزائر
لكن احنا كدة بنلطش ..... عمالين نقول كلام هيستيري بيخلي كل الناس الل يسمعوه يجزم باننا الجانب المخطئ ...
الاسلوب غاية في الفظاظة والسوقية والهمجية والعصبية .... حتى في القنوات الرسمية التلفزيونية كل مذيع يتبارى في إظهار قلة ادبة على الهواء
.....
المفروض اننا شعب متحضر ..... 7000 سنة حضارة .... يعني حتى لما نعادي ناس يكون اسلوبنا افضل من كدة ...... احنا كدة مش بنضرهم ...احنا بنضر نفسنا ونشوه سمعتنا ..... وهما اللي بيكسبو تعاطف العالم كله بكلامنا المنفعل الهيستيري ....
.....
انا بصراحة مستغرب جدا من اللهجة دي ...... كأننا بنتخانق في خمارة ......
وللاسف الحكومة عرفت تستغل الموقف علشان كل الاصوات المعارضة تسكت ..... وتبقى الحكومة هي اللي زي الفل وماعندهاش مشاكل وكله تمام ....
وسحب السفير للتشاور ..... دي محصلتش لما اسرائيل كانت بتدبح الاطفال في غزة ..... ساعتها الحكومة رفضت سحب السفير المصري ....لكن دلوقت طبعا لازم تركب الموجة
.....
من آيات المنافق انه إذا خاصم فجر ....... هو احنا شعب منافق ولا إيه ؟؟؟؟؟؟

وبعدين احنا الاعلام بتاعنا اعلام كله محلي .... مش بيخاطب غير المصريين .... يعني كل اللي بنقوله ده مالوش تأثير غير فينا إحنا وبس ..... لكن تأثيره في باقي الشعوب يكاد يكون عكسي ..... الشعوب والناس كلها متيقنين تماما ان الخلاف بسبب نتيجة مباراة كورة ....
وكل ده بسبب اسلوبنا المندفع الهيستيري الأحمق ... زي بالظبط الحملات الاعلامية الرهيبة ايام صفر المونديال ...... كنا بنكلم نفسنا ... لكن ماحدش سامعنا خارج حدودنا
......
من المنطق ان نسأل نفسنا سؤال مهم .... الجزائر غلطانين من ساسهم لراسهم ......لكن هل احنا مش غلطانين خالص ؟؟؟؟؟؟
لأ بقى احنا كمان غلطانين ......
احنا عملنا شحن جماهيري غير مسبوق بقنواتنا الفضائية وألسنة اشباه المذيعين السليطة والتي لا يملك اصحابها اي تأهيل اعلامي غير انهم كانو لعيبة كوووورة شراب .....وربنا كرمهم ومسكو مكروفون ....ولكن لجهلهم كانو غير مكترثين أنهم بيتكلمو في فضائيات العالم كله بيسمعهم ..... وبالتالي كسبنا عداء الملايين وكراهيتهم ..... ده حتى السودان احتجو لدى السفير المصري على الاتهامات الموجهه ضدهم من الاعلام المصري ..... يعني بمنتهى الغباء خسرنا الطرف المحايد الوحيد اللي كان ممكن يكون في صفنا في الفيفا ...... ذكاء خارق
اذا كان الجزائريين شعب عنيف ودموي ومتهور ومتعصب ..... فنحن شعب واعلام سليط اللسان لا نحترم شعور الآخرين ......
وهل الجمهور الجزائري لم يتعرض للضرب في القاهرة بعد المباراة ؟؟؟؟؟؟.... لأ انضربو وحصل اصابات اعترفت بها وزارة الصحة المصرية ....... لو كانت السلطات المصرية ذكرت الحقائق واعتذرت عنها ..... كان الامر اختلف .... لكنهم بتعتيمهم اعطو الفرصة لصحف الجزائر الصفراء للمبالغة وشحن الشعب الجزائري بالكامل ضدنا لأهداف دنيئة .....
وفي الآخر كل حكومة مبسوطة من اللي بيحصل وراكبة الموجة لكسب تعاطف شعبها ... في البلدين .... واحد عاوز يجيب ابنه والتاني عاوز يجيب أخوه ..... وكلنا في الهم شرق
....
مافيش حد وهو بيشتم 30 مليون مسلم فكر اننا في العشر الاوائل من ذي الحجة التي يعد العمل الصالح فيها خير من الجهاد ؟؟؟؟؟
ماحدش فكر ان الشتيمة اللي حاططها في توقيعة بتمس 30 مليون مسلم ...... يعني كم مهول من الذنوب في هذه الايام الكريمة
.....
انا كنت مش ناوي اكتب في الموضوع ده .... لكن مش قادر .... ح اطق من الغيظ وانا شايف ابناء بلدي بيلطشو و يطبشو وفي الآخر بيضرو نفسهم ويفيدو خصمهم ....... زي الدبة اللي قتلت صاحبها علشان تحميه من لدغة النحلة
فيه اساليب اكثر احتراما ممكن نقول بيها اللي احنا عاوزينة ...... بدل ما نكسب سخرية العالم وكراهيتهم ..... كان ممكن العالم كله يتعاطف معانا .... لكن احنا مش بنتعلم ....
ما حدش من البهوات الأذكياء فكر ان البعثة المصرية تصور المباراة ولو بكاميرا واحدة وتركز على تصرفات الجمهور الجزائري ؟؟؟؟ برغم من وجود ارهاصات تشير الي نيتهم المبيته ..
ماحدش من المسئولين فكر يضع كاميرات في اتوبيسات الفريق الجزائري في القاهرة .....
ما حدش فكر غير في العويل والولوله والسب والشتيمة ......
ونيجي في الآخر نقول نسحب الاستثمارات المصرية من الجزائر .... انا في حياتي لم أر مثل هذا الغباء ....
يعني شركة زي اوراسكوم دافعة للجزائر مليارات علشان تاخد امتياز الشكة بتاعت المحمول هناك .... تيجي بكل بساطة وتتنزل عن المليارات دي وتقولهم سلام عليكم .... ويروحو هما بايعين حق استغلال الشبكة لشركة تانية بمليارات تاني ..... يبقى مين الكسبن ومين الخاسر
الشركات المصرية في الجزائر ذهبت هناك بهدف الربح مش علشان الوحدة والقومية العربية .... يعني لما يمشو الجزائر مش ح تغرق في غيابات الجهل والظلام و يقعدو يقولو ياريتهم ما مشيو .....بالعكس الشركات دي هي اللي ح تخسر مش الجزائر .... الجزائر ح تجيب 100 شركة غيرها تعمل نفس الشغل اللي كانت بتعمله
....
الكلمة أمانة ..... وستحاسب عنها ... لك او عليك
اتقوا الله احنا مسلمين وبلاش تنساقو ورا الاعلام المصري .... دول ناس جهلة ....
...
...
انا بطبعي عندما ارى تصرف لا يعجبني ولا استطيع ان أغيره .... بأمشي من المكان بهدوء
وانا دخلت هذا المنتدى وتمسكت به لمدة سنتين لأني وجدته مكان محترم واعضاءه اغلبهم محترمين
انا بأعلن تعليق مشاركاتي في المنتدى لحين عودة الاحترام للمشاركات والتوقيعات مثلما كانت ....

وانا بضم صوتي للحاج احمد

امريكا لما احتلت العراق كل الموضوع 70 الف جندى و دول مايجوش حاجه
و كان فيه دول باعته فى الحرب 200 جندى

الموضوع مش بيتحسب قله و الكلام بتاع الحزب ده

لو الدوله بتأيد اى فعل و باعته واحد يعمله يبقى الكل فى نفس الموضوع حتى لو معارض له

ماينفعش نقول فيه ناس كويسه و اغلبيتهم مش عارف ايه لان لو الكلام ده صح كان المفروض ليهم وقفه

و شكرا