الموضوع: انا آسف ..... لن استطيع الاستمرار في المنتدى بهذا الوضع

المشاركة الأصلية كتبت بواسطة pop3

راحت كرامتي / إتحرق علمي / إنتقم لشرف بلدك

كلها عبارات تبادلها أكثرنا و أنا منهم ومش بس كده وصل بيا الأمر إني لو شفت واحد جزائري هفرمه بالعربيه لكن قعدت مع والدي و إلي شارك في 73 وعانا وبلات حروب كثيره وقالي كلمتين:

البلد أتحررت من مستعمر أجنبي على أيد أناس أمنوا بالله و بقضية بلدهم علشان تغرق في أحضان مستعمر من نوع تاني وهو الفساد الحكومي و الإداري.

البلد حربت في 73 وحررت أرضها من نجاسة اليهود علشان تفتح أرضها تاني لليهود بس المره دي سياح و تحت حراستنا و بفلوسهم.

البلد حررت الإقتصاد المصري من المركزيه الحكوميه علشان يقع فريسه للإحتكاريه الرأسمالية

كل حدث من دول كان من الممكن أن يدفع بأي أمه أو شعب إلي أفاق التقدم و الرقي ولكن لم يحدث هذا مع مصر بل و حدث عكسه.

وتحول الهدف لكل هذه الأحداث الخالده إلى أهداف ماديه بحته, حررت الأرض وبعد كده تبيع غازها لليهود, حررت الإقتصاد من إللي مابيدفعش علشان تديه لليدفع .

إنهارده بتتكلم عن كرامتك إلي إتهانت في السودان طيب ما انت كرامتك ملهاش قيمه أصلا في بلدك وأي أمين شرطه ممكن يمسح بكرامة أي حد, أي رجل أعمال مشغل الآلآف ممكن يسرح نصهم علشان يواجهوا ذل السؤال والرقابه نايمه في الزبادي

لما وزير النقل استقال علشان الناس إللي راحت في حادث القطار قامت الدنيا و لم تقعد لأن دي أول مره نحس لأرواحنا تمن خاصة و إن 1000 شهيد غرقا في العباره لم تكن لأرواحهم تمن.

بس و فلحين نقول حضارة 7000 سنه و الفراعنه و جيل أكتوبر .لغاية أمتي هنفضل عايشيين على موروثات الماضي. في حين إن دلوقتي

بلد الحضاره بلا حضاره

بلد الكرامه بلا كرامه

بلد القوميه العربيه بلا سند عربي والتي أصبح التلاعب بها متاح حسب أهواء الزعماء و الملوك

فقدت مصر زعامتها عندما فقدت دورها في الدفاع عن القوميه العربيه وعندما أضاعت دم الشهداء الذين أريقت دمائهم في سبيل الله دفاعا عن تلك القوميه.

ماعك في كتير من كلامك لكن برفض كتير منه بردو
انا كمان والدي حارب مش بس 73 لا من اول اليمن ل67 ل73 يعني من قدماء المحاربين وضحايا الحرب على اسم جمعيتهم لكن مش معني ده اني اهاجم كل شئ
1- الفساد الحكومي والاداري احنا السبب فيه لان مين الادارة ؟ الادارة هي احنا الموظفين هما الادارة يعني من الشعب ولو كل واحد احترم نفسه مش هيبقي فيه فساد اداري ببساطة شديدة وفيه ناس كتير بتعمل كدة لكن الشيء بس هو اللى بيظهر في الصورة لو دخلت مبني حكومي وموظف واحد اخد منك رشوة او عاملك وحش هتقول كل موظفين المبني او كل الموفظين كدة رغم ان فيه مئات والاف وملايين مش كدة ابدا
2- بيع الغاز لليهود لاحكومة هي اللى عملته مش امواطنين وبعض المواطنين الشرفاء رافعين قضية على الحكومة لمنع تصديره لليهود لو مكنتش تعرف والموضوع كله في يد القضاء وليس لنا حق التعليق عليه حتي صدور الحكم
3- اللى يقبل ان اي امين شرطة يمسح بكرامته الارض هو حر لكن ما دام الواحد مش بيغلط والله لو مين قرب من كرامتي ما هسكت لا انا ولا غيري ولو فيها موتي مش هسكت الا الكرامة المهم تبقي عارف واجباتك وتلتزم بيها علشان متديش فرصة لحد يفتح بقه معاك وتبقي عارف حقوقك علشان لو حد قرب منها تاكله
4- عيب لما تقول اننا بلد بلا كرامة لان البلد دي مش هقولك 73 لا هقولك البلد دي الى خرج فيها مئات الالاف في مظاهرات لمساندة الامة العربية في كل مشاكلها وهي اللى خرج منها سليمان خاطر وغيره كتير لو نسيت
يا ريت تقول العرب عملوا ايه طول الوقت ده
وامتي العرب كانوا سند لينا ؟
لما زلونا بعد نكسة 67
ولا لما شاركوا بكام عسكري في 73 ومن وقتها يقولوا ساعدناكم في الحرب
ولا لما استفادوا من الحرب بجنون بسبب ارتفاع اسعار البترول من 3 دولار الى 40 دولار وتركونا نعيد بناء ما هدمته الحرب دون مساعدة
ولا لما قاطعونا لاننا عملنا صلح مع اليهود رجع ارضنا وهما دلوقت بيبوسوا جزمة اسرائيل علشان تديهم ربع اللى كان السادات جايبه لهم واتهموه بالخيانة
ولا لما قتلوا يوسف السباعي وضربوا وزير خارجيتك على قفاه في الحرم القدسي وهو داخل للصلاة
ولا لما النعوش الطايرة كانت بترجع من العراق واحنا بنساعدها في حربها ضد ايران
ولا لما ساعدنا في تحرير الكويت من العراق ورجعوا يزلونا ويقولوا حاربتم بفلوسنا يا مرتزقة
بقولك ايه يا ريت وحياة ابوك المقاتل البطل ما تجيب سيرة العرب مرة تانية