لو سمحتم الطريق من أسكندرية الصحراوى إلى مطار القاهرة و العكس

**mody26** · 23-11-2009 02:19 PM

فعلاً أنا لقيت أن المنتدى مفيد جداً لمعرفة الطرق الطويلة و خاصة للمدن الكبرى
لو سمحتم ممكن حد يفيدنى لمعرفة الطريق من أسكندرية الصحراوى و حتى مطار القاهرة و العكس (طريق الرجوع)؟
أنا سمعت أن فيه وصلة جديدة للربط بالطريق الدائرى (وصلة المريوطية) و هل الوصلة دى أحسن من لو أخدت طريق المحور ثم الدائرى؟
أرجو أن يكون الوصف بالتفصيل مع الاخذ فى الاعتبار لو فيه علامات و أشارات فى الطريق

**aymansaad** · 23-11-2009 07:32 PM

فى البداية طبعا حتاخد الصحراوى لاخرة ثم تاخد الدائرى مرورا بالمعادى كوبرى المنيب ثم كارفور حيكون على يمنك وتفضل ماشى حوالى 20كم وبعد معسكر مبارك للامن (كلية الشرطة)حتلاقى منزل السويس سيبه وانزل المنزل اللى بعده اللى رايح على مدينة نصروالكيلو4.5 وطبعا حتبقى على طريق السويس القاهرة وبعد الكوبرى فى مدخل يمين الى مطار القاهرة الجديد

**A.Lotfy** · 23-11-2009 11:13 PM

تمام زي ما أستاذ أيمن قال بس احب اوضحلك زيادة
بعد ما تدخل من الصحراوي على ميدان الرماية .. حتكمل لغاية ما تدخل اول شارع الهرم وخليك ماسك اليمين
هتمشي في شارع الهرم وتدخل اول يمين رئيسي هتلاقي مكتوب لوحة المعادي يمين (ده شارع المنصورية) وتمشي فيه لغاية ما تلاقي كوبري فوقك وفيه كمين تحت الكوبري. هتدخل شمال بعد الكمين على طول وتطلع مطلع الكوبري (انت كده عالدائري في اتجاه المعادي ومصر الجديدة)
هتمشيي عالدائري وتعدي كارفور وأكاديمية مبارك للأمن كل دول هيبقو عاليمين
وهتلاقي مخرج طريق السويس هتنزل المنزل اللي بعده على طول في اتجاه مصر الجديدة وتمشي شوية هتلاقي مخرج عاليمين للمطار مباشرة

توصل بالسلامة

**mody26** · 24-11-2009 12:33 PM

فعلاً متشكر جداً على الوصف ده
بس حبيت أسأل عن طريق الرجوع هل سيكون نفس الطريق بالعكس؟
و هل الوصف ده للطريق أسهل من لو أخدت طريق المحور ثم الدائرى (حسب ما سمعت؟)
وشكراً

**Imhotep** · 24-11-2009 04:48 PM

فى الرجوع من المطار هتمشى مع طريق المطار الجديد و مش هتتلخبط فيه لانه اسفلت جديد..... تمشى لغاية ما تلاقى يافطة مطلع بتقول الطريق الدائرى هتطلع المطلع ده تلاقى نفسك على الدائرى الفردة الراجعة......

**wisambasha** · 24-11-2009 05:04 PM

احب بس ان اضيف لحضرتك انك ممكن ما تكملشي مع الصحراوي لغاية ما يسلمك لشارع الهرم وبعدين المنصورية ثم للدائري (حسب وصف amah_totala)

انت تفضل ماشي في الصحراوي لغاية ما تلاقي الطريق الدائري فوقك وهاتلاقي يافطة مكتوب عليها الي الطريق الدائري والمعادي هاتطلع علي طول من هناك وتمسك بعدها وصلة المريوطية الجديدة اللي حضرتك ذكرتها في البداية وهي هاتحدفك علي اتجاه المعادي وكارفور وتكمل زي ما باقي الاخوة قالوا

توصل بالسلامة