بمناسبة قرب رجوعي نهائياً لمصر بعد انتهاء السبب الذي سافرت لأجله، قررت شحن منقولاتي و اجهزتي من هونج كونج لمصر، و بالفعل تم الشحن عن طريق شركة هونج كونجية ذات سمعة طيبة جداً علي ان يكون ميناء الوصول في مصر هو بورسعيد.

كان من ضمن المنقولات احدي مجموعتين كاملتين من مضارب الجولف (الحمدلله فضلت ان اترك المجموعة الاخري معي ارجع بها علي الطائرة) بالاضافة لحوالي ٢٠ دستة من كور الجولف، بدأت المشكلة باتصال من المستخلص، علشان موظفين الجمارك عايزين يحسبوا مضارب الجولف انه استخدام تجاري لان الكمية كبيرة (١٨ مضرب) فطبعاً شرحتلهم ان دي مجموعة كاملة و مضارب مختلفة و مقاسات مختلفة و شرحتلهم الفروق بين المقاسات و الكلام ده كله، المهم المشكلة عدت علي خير و الحمدلله، و كل حاجة خرجت شخصي، و اخويا قام باستلام كل شئ، و بعد نقلهم لمنزلي طلبت منه مراجعة الحاجة و خصوصاً شنطة الجولف علشان مكنتش مطمن، و خصوصاً انه بلغني ان كل حاجة كانت متبهدلة و مفتحين الكراتين كلها بشكل غبي، لنتفاجئ انهم سارقين ٤ مضارب جولف انواع و مقاسات ملهاش علاقة بعض، يعني اللي سرقهم، سرقهم بشكل عشوائي...

المستفز في الموضوع اني طبعاً هتضايق لو اي اتسرق مني اي حاجة، بس علي الاقل ممكن اتفهم ان واحد هيسرق حاجة يستخدمها او يبيعها او يستفيد بيها باي شكل، انما يسرق مضارب جولف ليه ؟؟؟؟؟ و هيعمل بيهم ايه ؟؟؟ لا هيستفاد بيهم ولا هيعرف يبيعهم، يعني سرقة و خلاص و يا ريته عارف قيمتهم حتي، و لخبطلي العدة و خلاص.....

علي العموم انا اعتقد ان مسير المضارب دي هتكون مع سواقين التاكسي او عربيات النقل لاستخدامهم في الخناقات بدل الشومة، فيا ريت لو حد من الاخوة خاصة في مدينة بورسعيد او المحافظات القريبة شاف حد بيتخانق او معاه مضارب جولف يا ريت يبلغني علي الخاص و له جزيل الشكر.....