سلام عليكم
كل سنة وانتم طيبين
دبحنا الخروف وعيدنا
وجبنا هدوم جديدة وانبسطنا
طب ما تيجو نشوف الجانب الاخر من الحياة
نقطة ومن اول السطر
لى صديق منذ سبع سنوات او اكثر اسمه كريم
كريم عبد الرحمن
شافه بعضكم ممن حضر افطار الوفاء والامل الاخير في رمضان واتعرفو عليه
لاء ماكنش معانا في الفطار معزوم
لاني نسيت اقولكم ان كريم مصاب بشلل رباعي ولا يمكن من تحريك عضلاته سوى اصبعين وعضلات فكه
حتى رقبته مش بيقدر يحركها
لكن عنده ارادة غريبة للحياة
وكان سبب معرفتي بيه من سبع سنين انه عايز يصلي الفجر حاضر في مسجد الجمعية والعمال اللي بيزقوه بيكونو نايمين وكان نفسه في كرسي كهربائى
وتمن الكرسي من 7 سنين كان ب 8500 جنيه اتلمو في 23 يوم فقط
المهم
كريم اصيب بحالة صدرية تسمي بفشل تنفسي من الدرجة الثانية
واتصل بي احد المرضي في الجمعية واخبرني انه في طريقه لمستشفى الصدر في العباسية في سيارة اسعاف
ولاني اعرف المستشفيات الحكومية قصدي المدافن الحكومية في مصر كلمت زميلنا احمد كمال وقولتلة يعمل الموضوع ده
http://www.nilemotors.net/Nile/108557-a.html
لكن للاسف محدش كلمني ومجرد ما دخلت المستشفى اتاكدت من اني في مدفن
رائحة زبالة
اهمال جسيم
الولد سنه 20 سنة ومعاق رباعي ومحمول في الاسعاف حطوه في غرفة الاشعة ذات تهوية رديئة انا مش قادر اخد نفسي فيها والولد بياخد شهقات عنيفة كمن يحتضر تماما
نزلت جري للدكتور عشان اقوله هات انبوبة اوكسجين لانه قطع التنفس والولد بطل يتكلم تماما وجحظت عيناه وكان اقرب ما يكون للاحتضار
بكل برود اخبرني ان الانبوبة ثقيلة ولا يوجد من يحملها ولا داعي فكلها 5 دقائق وينزل الاستقبال
تنحت من الرد وقولتلة هانزل اشيلها انا
ماردش عليا وسابني ومشى هو والممرضه
قولت لرجلي الاسعاف هاتو الانبوبة المحمولة من عربيتكم قالولي ممنوع ندخلها في مستشفي
دي مستشفي يا فندم يعني الف باء استقبال (قصدي استهبال)انبوبة اوكسجين
فني الاشعة ضرب الاشعة بسرعة وخدنا الولد ونزلناه بسرعة على غرفة الملاحظة
قمة الاهمال والتلوث
وممرضات وممرضين مش عارفين ياخدو عينة دم
ويجي الدكتور ياخدها
وتطلع نتيجة التحليل هبوط شنيع في مستوى الاوكسجين في الدم
الولد اتحط على جهاز الاوكسجين
وسبتة لان اعصابي تعبت وخرجت برة الاودة
لتشنف اذناي بحديث ام نسمة الممرضه عن ابنتها نسمة واخيها الشقي وابيهم ابو عين زايغة والراجل مش طمران فيه البتنجان
بصوت يصل الى ميدان العباسية الواقع على بعد كيلومترين
ولا من استجابة من توسلاتي لخفض صوتها قليلا ونظام مش عاجبك سد اذناك
ما منعني عنها اني بدات اتصالاتي بدكاترة المنتدى ليدلوني ماذا افعل
جزاهم الله كل خير على محاولة المساعدة ولن اذكر اسمائهم ليصل الثواب كاملا

وتاتي النتيجة النهائية بضرورة وضعه في العناية المركزة ولا غرف لديهم
اجريت اتصالي من سويتش المستشفي بخدمة طوارئ وزارة الصحة لمعرفة اي مستشفي اخر بها مكان فاضي
ولا يوجد اي شيئ ويخبرنا الطبيب انه سئل طبيب اخري في منشية البكري (وديا ) واخبرة عن وجود غرفة عناية فاضية
خدت الولد في عربيتي وخرجت
وتذكرت ان لي نسيب كان يوما مدير مستشفي الحسين الجامعي
كلمته وقاللي اطلع على هناك فورا
وانا فاكر ان مستشفي الحسن نضيفة وجيدة زي ما شوفتها في زياة ايام ما كان نسيبي(دكتور اسماعيل خلف)مدير لمستشفى الحسين الجامعي من كذا سنه
روحت مستشفى الحسين ودخلت بالولد
استقبلتني الرائحة القذرة وكانها علامة جودة لمدافن وزارة الصحة
ولا وجود لاسرة فارغة او كراسي معاقين او تروللي سليم
حاجة في منتهي القذارة
بعد الكشف والتوصية من واسطتي
قامو بالازم وما هو اتي هو مكمن الفرس..
اخبرني طبيب الاستقبال بصفة ودية جدا وبطريقة دبلوماسية وهو شاب احسبه على خير بحق من اسلوبه
ان أخذ الولد واعملة رعاية طبية في الجمعية
ايه ده
لـيــــــــــــــــــــــ ـــــــه
لانتشار احد انواع فيروسات الصدر في غرف العناية
وانها شديدة الفتك تبعا لشدة حدتها وتحورها الجيني واكتساب مناعات جديدة من المضادات الحيوية
وان المريض كريم لن يتحمل جرعة مضاد حيوي واحدة والا ستكون جرعة الموت بالنسبه له
صدمت مما سمعته على الرغم انه اخبرني به بصفة ودية للغاية ولي كنوع من التطفيش لان واسطتي كان مدير المستشفى السابق وكلهم يكنون له كل الحب والتقدير
ولم استكمل بقية اجرائات الكشف وخدت الولد وطلعت اجري برة الوباء ده

عذرا اني نكدت عليكم
لكنى صعقت مما رايت وسمعت
على رغم من كثرة زياراتي لاماكن مرضى

لكم الله يا غلابة مصر عندما تمرضون
وانا لله وانا اليه راجعون