نيسان صنى ولا هيونداى النترا الجديده؟

**Hacker5** · 21-12-2007 01:24 PM

اة ماشى دى الانترا الكاملة فى واحدة تانية بـ 98000فى كل حاجة معدا abs , air bag ,و الكاسيت الاصلى

لكن الكاملة فيها كل دة مع العلم ان الاتنين فيهم 4 زجاج كهربائى و مرايات كهربائى الخ

لكن اللى قولت عليهم دول هما بس الزيداة فى الكاملة بالاضافة للتكيف التاتش و انا مبحبوش و جنوط سبور

**Nile_Storm** · 21-12-2007 01:32 PM

الالنترا الجديده تحففففففففففه

**mohaismail** · 21-12-2007 10:38 PM

لو مكانك هجيب صنى هوفر 25 الف جنيه وهركب عربية فيها جميع الكماليات ما عدا abs ده غير اهم نقطة وهوه التوكيل فى فرق شاسع بين توكيل نيسان وغبور الفاشل والحرامى جداا

**الريس** · 23-12-2007 02:29 AM

بص انا بتعامل مع التوكيلين ... نيسان افضل طبعا
و بتعامل مع الكوري (ماتريكس) و الياباني تقفيل مصري (صني) و المقارنة في صالح الصني
و فر فلوسك و كلنا كده كده بنغير بعد فترة
برضو الالنترا عربية جميلة .. بس لو ب 100 اوتوماتيك كاملة او حتى 105 .. مش 125الف

**Ahmed Anwer** · 23-12-2007 03:51 AM

المشاركة الأصلية كتبت بواسطة الريس

بص انا بتعامل مع التوكيلين ... نيسان افضل طبعا
و بتعامل مع الكوري (ماتريكس) و الياباني تقفيل مصري (صني) و المقارنة في صالح الصني
و فر فلوسك و كلنا كده كده بنغير بعد فترة
برضو الالنترا عربية جميلة .. بس لو ب 100 اوتوماتيك كاملة او حتى 105 .. مش 125الف

طيب يا ريس ما هو لو المبدأ أركب و أقلب

يبقي الإلنترا أفضل علي الأقل يبقي بيستمتع بعربية مهيبة و فخيمة و شيك و ليها طلة ،، و تكنولوجيا حديثة ،، مادام إمكانياته تسمح ،، أصل لو المبدأ توفير فلوس كل الناس تجيب لانوس أو فيرنا و هتقضي الغرض برده ،،

الصني موديل 95 ،، يعني لو أي حد واخد علي العربيات الحديثة نسبيا مش هيحس إنه جاب عربية جديدة ،، عربية و خلاص ،، و مشاكل التجمع المصري فيها كتير بناء علي كلام الأخوة في المنتدي ،،

غبور مش خدمة متميزة ،، بس مش الوحش المرعب هوا بس بقي حاجة من أدبيات المنتدي اللي بنرددها غبور وحش ،، بس مش السوء اللي يخليك تسيب عربية جميلة عشانه ،،

الإلنترا مش غالية كل مقارنات الإلنترا في المواقع العالمية مع الكورولا الجديدة والسيفيك و اللانسر الجديدة ،، لو قارنتها بالحاجات دي هتبقي مكسب

أنا مع رأي الإستفتاء لا وجه للمقارنة بين عربية حديثة و شيك بمجرد عربية قديمة تأدي الغرض ،، غير فرق الفلوس و كل واحد أدري بظروفه

hh · 23-12-2007 02:05 PM

يا ريت تضع الموضوع في منتدى نيسان عشان تعرف اراء أصحابها. رأي الشخصي النيسان تكسب بمراحل لعدة أسباب. أولا و ثانيا صني يابانييييييييييييي. مينفعش أساوي بين الياباني و الكوري عشان ال Options و الا بنفس المنطق تروح تشتري اسبرانزا!!!!!!!!(مع احترامي لأصحابها). تالثا الشكل ده أزواق يعني ناس كتير مش بتحب شكل النترا الجديدة و بعدين شكل الصني فخم جدا و حتى الموديل الجديد مش حينزل مصر غير في 2009 و هو فيه اختلافات بسيطة مش شكل مختلف خالص زي هيونداي ما عملت في النترا. يعني اللي أشتري النترا القديمة فوجئ بعد سنتين أنها بقت شكل أثري. أخيرا تستطيع أن تقارن بين موديلات نيسان و هيونداي القديمة لتري حالة السياراتين مع الاستخدام الطويل و التي قطعا تصب في صالح نيسان وتؤثر في سعر أعادة البيع.

**sab3aawy** · 23-12-2007 02:58 PM

اسمحولى اضيف كام نقطة فى الموضوع ده باعتبارى من مستخدمى الصنى واتيحت لى فرصة تجربة كل العربيات الهيونداى تقريبا

1-اولا تعليقا على كلام الأخ اللى قال ان الصنى موديل 1995 فانا بس حابب اوضح ان الشكل الحالى للصنى اوله 2002 بقاعدة عجلات جديدة تماما كما ان المحرك المستخدم فيها والمسمى Qg16DE برضه مصمم فى بداية الالفية ومستخدم فى موديلات نسيان ما بعد 2000 فى العالم كله، يعنى مش بنتكلم على تحفة ولا عربية اثرية لكن عربية بتكنولوجيا يابانية تعود الى 5 سنوات ومضت وهو بالمناسبة نفس حال اللانسر شكل 2003-2007 بدون زيادة ولا نقصان ،

2- ثانيا، الميزة الاساسية اللى انت بتاخدها لما بتشترى عربية فيها power train يابانى (power train يقصد بها المحرك وآلات الجر) انك بتشترى محرك طيع وخدوم وهادئ وطويل العمر، انا جربت عربيات هيونداى ودايوعمرها 5 سنوات فاكثر، صحيح ان المحرك يؤدى وظيفته بكفائة لكن صوته يعلو ويخشن ويصبح مختلف بشكل واضح عن محركات الماركات اليابانية التى تحتفظ بنفس جودة ونعومة الأداء لدرجة اننى عندما كنت اجرب سيارات يابانية يملكها اصدقاء معتدلين فى القيادة وقد قطعت مسافات تزيد كثيرا عن ال150 ألف كيلومتر افرق بصعوبة بين اداءها واداء الزيرو والكلام ينطبق على تويوتا وميتسوبيشى ونيسان ، فى حي ان الفرق فى النعومة كان يكون واضحا جدا مع هيونداى او دايو عاملة اكثر من 50 الف

فلو انك زى حالاتى من النوع الذى يقدر المحرك الناعم الطيع الذى يحافظ على جودة اداءه اطول فترة ممكنة فاظن ان الصنى ستكون مبتغاك ، وهى الميزة الاساسية التى اراها للصنى عن الإلانترا، اما لو ان شكل وكماليات الإلانترا لها عندك اعتبار اكبر يبقى خليلك فى الحاجة اللى مريحاك نفسيا ، لأن مش معنى كلامى ان الإلانترا وحشة لكن انا بس اقصد انك هتحس انها اختلفت شوية عن طبعها وهى جديدة وفقدت شئ من رونقها بعد فترة قصيرة

**Kisho** · 23-12-2007 03:46 PM

انا بس عاوز اصحح معلوماتين

اولا الالانترا الشكل السابق بدايه انتاجه سنه 2000 يعنى من 6 سنين مش من سنتين
اما بالنسبه للتغيير الجذرى للشكل فا ده سياسه كل الشركات حتى مرسيدس و كون ان الصانى لسه بتنتج بنفس الشكل فده مش شطاره دى بسبب ان مصنع مصر هو الى لسه بينتج موديل تقريبا 2000 زى بالضبط ما الهيونداى الاكسنت فضلت تتأفل فى مصر لغايه مش عارف 2006 تقريبا و هى فى الحقيقه بطلت من سنه 1999

ثانيا سعر اعاده بيع الهيونداى احسن من النيسان

hh · 23-12-2007 05:58 PM

الاخ Kisho أنا لا أهاجم شكل الالنترا و لكن كما قلت من قبل هي أزواق. أنا رأي الشخصي أن الصني أحلى و ده ما يقللش من الالنترا. و بعدين زي ما قال م.سبعاوي شكل الصني من عام 2002 و لم يتغير في الخارج الا 2008 وهو الشكل الذي سيتأخر نزوله مصر حتى 2009 مش 5 سنين زي غبور. و التغيير في الشكل بسيط و ليس جوهري يعني لو اشتريت النهاردة مش حتحس بعد سنتين أن عربيتك أثرية. و ده برده رأي شخصي. لكن ما لا يستطيع أحد انكاره هو كفاءة سيارات نيسان و أعتماديتها الممتازة.
أما مسألة أعادة البيع فهناك خلط بين سهولة أعادة البيع الذي قد يكون لصالح سيارات هيونداي و سعر أعادة البيع الذي يعتمد على حالة السيارة و سمعة الماركة و الموديل.

**ahmedfd** · 23-12-2007 06:59 PM

مع إحترامي لجميع الإخوة الأعزاء لكن يا جماعة موضوع كوري و ياباني محدش بيقولها في الدنيا كلها غيرنا إحنا بس و بعدين مش معقول نقول بالمطلق إن الياباني أحسن من الكوري و إلا الـ Azera اللي مكسرة الدنيا برة نقول مثلاً إن الكورولا أحسن منها.
ممكن بكل بساطة نشوف الـ Reviews عن الإلنترا في أمريكا و العالم كله و حتلاقوا بالنسبة للمحرك كمثال و ليس حصراً إن الإلنترا محركها من المحركات القليلة المؤهلة لتتوافق مع قوانين البيئة الصارمة في ولاية كاليفورنيا خلال الفترة القادمة و يطلق عليه PZEV أو partial zero emission vehicle، فبالتأكيد هي مش محركات ضعيفة تفوت بعد 50000كم بالإضافة لوجود تكنولوجيا الـ CVVT أو constatnt variable valve timing الذي يعطي أداء مرتفع للمحرك مع إستهلاك منخفض للوقود.
و السيارة حاصلة على معدلات سلامة مرتفعة جداً و حجمها الداخلي يصل لـ 114 قدم مكعب أي أكثر من السيفيك و الكورولا و اللانسر و السنترا (السنترا على فكرة هي موديل نيسان المقابل للصاني في أمريكا كما أفادنا مشكوراً الأخ سبعاوي سابقاً و هو موديل ناجح جداً أيضاً) و هذا الحجم يضعها في مصاف السيارات الـ mid size و ليس ال compact مثلا نظرائها.
الإلنترا بها تكنولوجيا الـ EPS أو Electric Power Steering أي أن دعم الدريكسيون أو الباور بمحرك كهربائي منفصل و ليس النظام الهيدروليكي المعتاد، و هو نظام حديث يجعل الدريكسيون مثل الهواء في خفته حتى أن في أحد المنتديات الأجنبية كانت هذه شكوى من السيارة لإن الناس مش واخدة على هذه الخفة.
بالطبع الصاني سيارة ممتازة و لا خلاف عليها و الأخ سبعاوي كلامه عن تجربة و لكن ما دفعني للمشاركة الحقيقة هو موضوع الياباني و الكوري اللي أعذرني يا أخ سبعاوي لا أتفق معاك فيه.
المفروض يا جماعة اللي يدفع فلوس في سيارة يبحث عن أحدث موديل و أحدث تكنولوجيا و أحدث شكل (دي أذواق طبعاً) و إلا كنا قلنا نستورد بيجو 504 من نيجريا (لسة بتنتج هناك لحد إنهاردة) لإن بالنظر كدة في شوارعنا المكسرة فهي عايشة من 38 سنة و شغالة تاكسي و سفر بين المحافظات و في الأقاليم و الصعيد و تشوفها في الشارع زي العروسة و تتباع إنهاردة بـ 40 و 50 ألف و بدون زعل تدوب وراها كل الياباني و لا أعتقد إن في سيارة ياباني واحدة مشية في مصر موديل 1970.
و شكراً لسعة صدركم.