الموضوع: ممكن دكتور سنان يرد عليا للأهمية

الأستاذ KSA2011 شكراً لردك و اهتمامك

انا هرد على الي انا عارفه

بس عند 5 شهور يقدر يقعد و حد سانده ( كان بقعد لوحده من غير ما حد يسنده )
6 شهور يشب على طاوله ( صح )
6-7 شهور تديله حاجه بايدك يمسكها و يديها لحد تانى ( صح بردو )
7-8 شهور يقعد لوحده ( كان بيعملها من 5 لـ 6 شهور )
9 شهور يشور بايده ويقول باى باى ( عملها في الشهر السابع ) و كمان لما اقوله ينده على الكو كو ( يمامة عندنا في المنور ) يعمل توك توك توك
10 شهور يخبط المعلقه فى الكبايه ( عملها بدري بردو و سن 10 شهور كان بيعيط علشان عايز يمسك المعلقة و ياكل لوحده )

و بعدين لما جرس الباب بيضرب بيروح للباب علشا يفتحه

و عند حد قريبنا الجرس بتاع الباب من تحت عند باب العمارة لما حد يضربه يشاور على المفتاح و عايز يرميه من الشباك للي بيرن
و طبعاً بيعرف الناس عادي و بيمسك التليفون و يحطه على ودنه و يمسك ريموت التليفزيون و يوجه للتليفزيون و يقلب ( طبعاً هو مش عارف بيعمل ايه بالريموت بس بيعمل زينا بيوجه للتليفزيون و يدوس على الزراير )

بالنسبة للوزن و الطول ما اعرفش بس سهلة اوزنه و اقيس طوله في اقرب وقت
و الشمس مش بيتعرضلها بصفة مستمرة
تحليل الدم مش عارفه بردو

السلام عليكم انا دكتور سنان و هاجاوبك
بالنسبة لطلوع الاسنان اللبنية هى المفروض تبتدى عند سن 6 شهور
لو اتاخرت شهرين تلاتة مش مشكلة لاكن اكتر من كدة ماتسكتش
انا طبعا هاقولك تروح تعمل بانوراما و تشوف الاسنان اتكونت ولا لا لو لقدر الله ماتكونتش .....
لكن لو كانت متكونة(للعلم الاسنان اللبنية بتتكون جوة و الطفل جوة رحم الام) يبقى فى حاجة ماخرة الطلوع زى ملازمات كتيرة (syndromes) بس دى نادرة و بتبقى وراثية
فبلاش منها وحضرتك بتقول انه بيمشى.
فممكن يكون نقص فيتامين د
ممكن حضرتك تعمل تحليل وظائف الغدة الدرقية و الجاردرقية عشان دول افرازاتهم بتاثر على مستوى الكالسيوم
وزن الطفل عند الولادة فى دراسات بتقول ان الاطفال الى اوزانهم قليلة عند الولادة عادة بيبقى فى تاخر فى طلوع السنان
اخر حاجة بتبقى اسباب فى اللثة ممكن تكون سميكة فمتسمحش بطلوع السنة او فى حاجة فى الاربطة اللى ماسكة السنة فى العضم مش قادرة توصل force كفاية عشان تتطلع السنة

يبقى الحاجات اللى تعملها بالترتيب:
تروح لدكتور اسنان اطفال(عشان مش تخصصى انا دكتور تركيبات و حشو)
تعمل بانوراما او اي اشعة الدكتور هايقولهالك
لو السنان موجودة و ده انشاءالله يبيقى تعمل تحليل مستوى الكالسيوم ووظائف الغدد اللى قولتلك عليهم
لو السبب الاخير هو اللى ماخر طلوع السنة يبقى فى عملية بس لما يكبر شوية و انشاء الله ماتوصلش لكدة و اهم حاجة تروح لدكتور سنان اطفال انا عارف انهم مش كتير بس دور و هو هايقولك على الحاجات دية و لو فى حاجة تانية هايقولك عليها
اتمنى اكون افدتك

د\محمد دردير

شكراً ليك يا دكتور محمد
و ياريت لو حضرتك ترشحلي دكتور أسنان أطفال علشان انا بصراحة ما اعرفش حد في التخصص ده

العفو ده اقل حاجة
بص انا هاقللك على حاجة تقدر تيجى الدمرداش فى كلية طب الاسنان و تسال على قسم ال pedo
اطفال يعنى بس عشان مايودكش مستشفى الاطفال اللى قدام الكلية هناك هاتلاقى عاتاولة المجال دوة اساتذة جامعة و معيدين و طلاب امتياز

نفس الكلام لو هاتروح القصر العينى فى كلية طب الاسنان و انا ارشحلك القصر العينى عشان اقربلك و عشان انضف(لسة مجددين المبنى مش اكتر) و ربنا يقدم اللى فيه الخير

صح فى عندكم دكتور فى المهندسين اسمه مدحت الزينى الراجل ده علامة بس غالى شوية حلوين بس متخصص اساسا فى مشاكل تكوين السنان و طلوعها هو استاذ و رئيس قسم و كان نائب عميد الكلية فكلم الدليل و اسئله عن مكان العيادة(كان الاستاذ بتاعى فلو رحتله سلملى عليه) و شكرا

شكراً ليك جداً
و ان شاء الله ابتدى الرحلة دي الاسبوع الي جاي