خناقات مع الجيران

**Eng_Mostafa_89** · 14-12-2009 12:05 AM

نبتدى بقى نحكى مشكلة من اول المشاكل اللى حصلت كما وعدتكم
فى الشقة عاملين حجرتين باركية المهم الباركية دة بيقى خشب ولازم يروح الورشة علشان يتظبط ويجى يركب فى الشقة فطبعا الخشب بيبقى مليان نشارة المهم جيبين الخشب من الورشة وجين لقينا العمارة لسة ممسوحة ومتنضفة طبعا طلعنا الخشب خلال اكتر من ساعة والدخل اتملى نشارة خشب المهم بابا قالى عيب مينفعش نسيب المدخل كدة لازم ننضفة لانهم هيتكلموا علينا وكدة فننضفة احسن قلتلة خلاص يا بابا مش مشكلة هجيب مقشة وجروف من واحد صاحبي جارنا قالى ماشي
المهم كنست المدخل وبقى فلة وبلم النشارة فى كرتونة انا ووالدى (والدى مهندس وانا فى كلية هندسة) ينزل واحد من العمارة المفروض انة مهندس زميل والدى نازل لابس ملابس داخلية وبيزعق انتم معندكوش دم لازم تنضفوا العمارة زى موسختوها المهم والدى بيحاول يهرج معاه ويمتص غضبة دة الطبيعى بتاع بابا التانى يقل ادبة اكتر ويقول المفروض ان فى اصول وانتم متعرفوهاش بابا اتغاظ جدا من الكلنة دى وقالة لا انا اعرف الاصول وعلى استعداد اعلمهالك انت وبلدك سامع وقالة انت لو محترم مكنتش تطلع من بيتك كدة يالى بتتكلم على الاصول والادب اصلا يا متربي ونزلنا المهم انا راسي والف سيف انى اطوح الكرتونة فى المدخل واوسخة تانى بس بابا قالى لا عيب باقى العمارة ملهمش ذنب ودة غبي وكدة
المهم بعد لما خلصنا بابا حس انة زعقلة جامد
طلع علشان يصالحة ويهرج معاه الراجل ساب بابا ويزعقلى انا انت مالك اعصابك مشدودة لية قلتلة لان عيب قوى ان 2 مهندسين يقفوا يكنسوا السلم وانت مش عجبك وطالع تزعق وبتتكلم على الاصول
امال لو كنا مشينا وسبنا السلم كنت عملت اية
وانتهت المشكلة دى على كدة ولم تنهي بينى وبين الراجل دة
انتظروا باقي المشاكل
بس عايز ردودكم وهل احنا غلطنا فى كدة

**Ghamrawy** · 14-12-2009 12:09 AM

اه الحوش اللى فوقى صرف الحمام بتاعهم بايظ و السقف بتاعى حصل فيه نشع و البوية وقعت و بما انهم عندهم شقة تانية فمش هاممهم حاجة
بس ليك عليا اول لما اسمع صوت رجل فوق اوعدك انك حاتقرا الخبر فى صفحة الحوادث فى الطابعة التانية...
فى نوعية تانية هبلة كده و مخها صغير و لما تلاقيك داخل العمارة تجرى على الاسانسير تفتحه و تنط جواه و تطلع و دول دايما بروح جاى شادد السكينة بتاعت الاسانسير و اوقفه مكانه و اسحبه تانى و لو ما نزلش بفضل معلقه فى الضلمه شوية حلويين
و عموما علاقتى بجيرانى اللى ليهم ولاد فى سنى و كنا بنلعب مع بعض زمان كويسة غير كده ما اعرفش حتى اساميهم

**MoToRiZeR** · 14-12-2009 12:22 AM

المشاركة الأصلية كتبت بواسطة gemino

اه الحوش اللى فوقى صرف الحمام بتاعهم بايظ و السقف بتاعى حصل فيه نشع و البوية وقعت و بما انهم عندهم شقة تانية فمش هاممهم حاجة

دي كانت نفس المشكلة مع الجيران في الشقة القديمة .. لدرجة سقف الحمام وصل للمحارة!! و كان الواحد يبقي واقف بياخد دش يلاقي حتة من السقف نازلة علي دماغه و دول بارديييييييين .

مشكلة تانية بقي دي عند بيت جدتي .. فيه واحد بارد معين بييجي يركن صف تاني و يعشق العربية و يشد الهاند بريك .. و لاقيه بقي !!!!! مش ساكن في المنطقة أصلاَ ولا له مكان معروف ده ساعات تلاقيه واقف في محل بتاع صاحبه .. و ساعات علي قهوة و ساعات بيصلح عربية .. كذا مرة سبتله ورقة علي الإزاز "من فضلك مور العربية عند الركن صف تاني" .. حوالي 4 مرات .. و أنزل ألاقيه معشق برضه! مرة بقي كان عندي مشوار مهم جداَ و نزلت لقيت البيه حابسني و مش عارف أجيبه .. جبت ميكانيكي و قلتله حركلي العربية دي .. معرفش نزل تحتيها عمل إيه بقت حلاوة .. حركتها و رجعتها مكانها و سبتله ورقة "اللي إنت بتعمله ده عيب و مصالح الناس مش هتمشي علي مزاجك .. للمرة الخامسة مور العربية لو هتركن صف تاني"

نازل تاني يوم لقيت ورقة عندي مكتوب عليها "إنت بتحذرني انا؟ تحذيرك ده هتدفع تمنه غالي" !

ناقص يمضيلي عصابة القط الأسود.

الصراحة فيه نوع بني أدمين غير قابل للمناقشة و معندوش دم .. بني أدم غير متحضر زي ده المفروض يتنفي بقية عمره!

**نور القمر** · 14-12-2009 12:29 AM

خناقة جيرانا
كل اللي في ايده سلطة لازم يستغلها ولو حتى مخالف للقانون

الحكاية بدأت تقريبا الساعه 2 بالليل طلعنا البلكونة على صوت صويت بنات في الشارع
والناس اتلمت وعرفنا الاتي
4 بنات وشاب في اوائل العشرينات كانوا في زيارة لسكاان جدد في العمارة اللي قصادنا
صاحب الشقه طردهم لاسباب منعرفهاش
هم بيقولوا انهم اصدقاء مراته وانه بيضربها ويجرجرها من شعرها على السلم وطردهم والبواب قفل البوابة ومنعهم من الرجوع تاني
الجيران اتلموا ودخل 2 منهم العمارة وقابلوا والدة الست اللي جوزها بيضربها وقالت للناس مفيش حاجة ومنعرفش الناس دي
والجيران قالولهم لو مش مشيتو حالا هناخدكم القسم وطلعوهم من الشارع فعلا
بس رجعوا تاني لانهم راكنين عربيتهم في الشارع
خلاص ركبوا عربيتهم وماشيين لقينا 3 عربيات جايين من الاتجاهين وقفلوا عليهم الشارع ومنعوهم من المشي
نزل واحد من عربية منهم باعلى صوته انا فلان الفلاني رئيس نيابة كذا كذا
وهاتي بطاقتك يابت انتي وهي
البنات شكلهم ولاد ناس بس كلهم سلموه بطاقاتهم الا واحدة منهم قالت انها محامية ومش من حقه ياخد البطايق وطلبت منه الكارنيه الخاص بيه
شتم وقل ادبه وطبعا مطلعش الكارنيه
كانت هي في نفس الوقت بتتصل بواحد وبتسمعه وكيل النيابة بيزعق ازاي ويشتم ازاي وخلته يكلمه على الموبايل
سامعين وكيل النيابة حدة صوته هدأت تمامه وكل كلامه احترام وبيسأل فين في مجلس الدولة
قلت في نفسي اه يا بلد دلوقت الجبروت والتكبر وقلة الادب اختفت لما لقيت واحد اعلى منك على الموبايل كمان مش وجها لوجه

وبعدين طلب من واحد معاه يطلع يجيب الست وجوزها اللي فوق
انا اتجننت بصراحة
بصفته ايه يطلع شقة ناس وينزلهم الشارع هو مش ظابط بوليس ولا معاه اذن بدخوله الشقه
انا دخلت بعد كدة ومفهمتش ايه مين دول ولا فيه ايه

**Eng_Mostafa_89** · 14-12-2009 12:31 AM

المشاركة الأصلية كتبت بواسطة motorizer

نازل تاني يوم لقيت ورقة عندي مكتوب عليها "إنت بتحذرني انا؟ تحذيرك ده هتدفع تمنه غالي" !

ناقص يمضيلي عصابة القط الأسود.
!

هههههههههههههه
جامدة قوى الحتة بتاعت عصابة القط الاسود

**Eng_Mostafa_89** · 14-12-2009 12:36 AM

المشاركة الأصلية كتبت بواسطة نور القمر

خناقة جيرانا
كل اللي في ايده سلطة لازم يستغلها ولو حتى مخالف للقانون

الحكاية بدأت تقريبا الساعه 2 بالليل طلعنا البلكونة على صوت صويت بنات في الشارع
والناس اتلمت وعرفنا الاتي
4 بنات وشاب في اوائل العشرينات كانوا في زيارة لسكاان جدد في العمارة اللي قصادنا
صاحب الشقه طردهم لاسباب منعرفهاش
هم بيقولوا انهم اصدقاء مراته وانه بيضربها ويجرجرها من شعرها على السلم وطردهم والبواب قفل البوابة ومنعهم من الرجوع تاني
الجيران اتلموا ودخل 2 منهم العمارة وقابلوا والدة الست اللي جوزها بيضربها وقالت للناس مفيش حاجة ومنعرفش الناس دي
والجيران قالولهم لو مش مشيتو حالا هناخدكم القسم وطلعوهم من الشارع فعلا
بس رجعوا تاني لانهم راكنين عربيتهم في الشارع
خلاص ركبوا عربيتهم وماشيين لقينا 3 عربيات جايين من الاتجاهين وقفلوا عليهم الشارع ومنعوهم من المشي
نزل واحد من عربية منهم باعلى صوته انا فلان الفلاني رئيس نيابة كذا كذا
وهاتي بطاقتك يابت انتي وهي
البنات شكلهم ولاد ناس بس كلهم سلموه بطاقاتهم الا واحدة منهم قالت انها محامية ومش من حقه ياخد البطايق وطلبت منه الكارنيه الخاص بيه
شتم وقل ادبه وطبعا مطلعش الكارنيه
كانت هي في نفس الوقت بتتصل بواحد وبتسمعه وكيل النيابة بيزعق ازاي ويشتم ازاي وخلته يكلمه على الموبايل
سامعين وكيل النيابة حدة صوته هدأت تمامه وكل كلامه احترام وبيسأل فين في مجلس الدولة
قلت في نفسي اه يا بلد دلوقت الجبروت والتكبر وقلة الادب اختفت لما لقيت واحد اعلى منك على الموبايل كمان مش وجها لوجه

وبعدين طلب من واحد معاه يطلع يجيب الست وجوزها اللي فوق
انا اتجننت بصراحة
بصفته ايه يطلع شقة ناس وينزلهم الشارع هو مش ظابط بوليس ولا معاه اذن بدخوله الشقه
انا دخلت بعد كدة ومفهمتش ايه مين دول ولا فيه ايه

حكاية ملغبطة قوى

**AhMeD EzZ** · 14-12-2009 01:27 AM

طبعا حضرتك على عيني وراسي بس ممكن اعرف حضرتك اتخانقت معاه ليه مع العلم انه زي ما حضرتك قولت انه مش ساكن ولا من المنطقه اساسا لكن هو قالك ان ابنه جاي يركن هنا هي الفكره لو كانت اشتغاله ومفش اي حد جه ركن لكن مادام حد جاي اوك ولو راي غلط حضرتك ممكن تتفضل تقولي لاني الصراحه بحاول استفاد من المواقف دي واتصرف ازاي لو حصلتلي وشكرا

هو لو هيركن شوية و يمشي مش هقول حاجة
بس دة عايز يبيت العربية بتاعة ابنة قدام البيت عندي و يمشي
طيب ما الاولي يركنها تحت بيتهم همااا

**Terrible_DaRsH** · 14-12-2009 08:25 AM

مشكلتنا مع الجيران بسبب الصرف بتاعهم برده , الاكل فى المطبخ بقي مضاف عليه سكيب و شوية رمل و توابل لذيذة كده من السقف ..

النهارده ان شاء الله هنشوف حل معاهم بقي , احنا خفنا على زعلهم سنتين معتقدش ان لو حصلت مشكلة دلوقتى هتفرق :( بلا جيران بلا زفت .

**Ghamrawy** · 14-12-2009 11:11 AM

موضوع السقف ده تانى مرة تحصل على فكرة و اللى فوقى دلوقتى دول سكان جدد غير الاولانى اللى كان قالبها مسخرة لغاية ما مرة الساعة 2 صباحا سقف الحمام بتاعنا نزل و كسر الحوض و الباب و شرخ البانيو و عملنا محضر اثبات حالة و جت النجدة تعاين و هدينا السقف و صبينا سقف جديد و كانت شغلانة مقرفة جدا و طبعا واضح بما ان النشع رجع تانى يبقى القفا الاولانى قبل ما يبيع جاب سباك حمار زيه و ليط السباكة بشوية امير و مشى و اهى الدنيا حاتبوظ تانى ............الله يلعنهم دنيا و اخرة

**أحمد كمال** · 14-12-2009 01:20 PM

المشاركة الأصلية كتبت بواسطة akram

انا بحاول دائما أراعي الجيران ,
و كام مرة الاقي واحد من العمارة اللي قصادنا راكن مكاني فأقول في نفسي اننا جيران و مش مشكلة و أدور على ركنة و لما الموضوع اتكرر طلبت من البواب بتاعهم يقوله ميركنش مكاني , و برده الموضوع اتكرر ,
و اكتشفت انه ضابط في الجيش و بارد جداً و مش بيراعي الجيرة و لا أي حاجة ,
فقررت إني مش هخليه يركن مكاني تاني و في مرة جيت متأخر و لقيته راكن مكاني فركنت موازي ليه و قفلت الشارع و شديت فرامل اليد و سبت العربية و طلعت , لغاية لما نزل و معرفش يطلع غير لما نزلته ,
و من ساعتها مركنش مكاني و الحمد لله ساب المنطقة كلها دلوقتي.

يعني ايه يركن مكانك؟ الشارع ملكية عامة !!!

الموضوع: خناقات مع الجيران

LinkBack

أدوات الموضوع

عرض

-

-

-

-

-

-

المواضيع المتشابهه

الجيران الساقعة

الكلااااااب عند الجيران

شقة الجيران ولعت......

خناقات بسبب البنات

الكلمات الدلالية لهذا الموضوع

المفضلات

المفضلات

ضوابط المشاركة