الموضوع: شقة الجيران ولعت......

النهاردة حصل موقف اول مرة اشوفه فى حياتى فانا كنت عاوز اتكلم معاكم فيه
شقة فى العمارة المقابلة لينا النار مسكت فيها و كملت ومسكت فى 3شقق جنبها و الموقف كله قدامى واليكم التفاصيل

الساعة 2:30 كنت مريح على السرير مكنتش نايم كنت فارد جسمى شوية و فجأة سمعت صوت انفجار رهيب اول مرة اسمعه فى حياتى لدرجة ان الصوت هز قلبى و بعديه صوت زجاج اتكسر فجريت على البلكونة لقيش شباك الوميتال كامل نازل على سقف عربية لانوس مدغدغ كل الزجاج الى فى العربية والسقف فبصيت فوق لقيت الالوميتال مخلوع من الحائط بتاع البلكونة من قوة الانفجار الالوميتال طار من الحائط و نزل على العربية

بعديها بخمس دقائق لقيت البلكونة بدأت تطلع دخان ولقيت الناس بدأت تنزل من العمارة وكمان عشر دقايق بالظبط و النار مسكت فى البلكونة و كانت بتندفع بصورة رهيبة و مع الهوا النار مسكت فى البلكونات الى جنبها و الى فوقيها و كل شوية اسمع صوت حاجة بتنفجر و النار تعلى

خمس عربيات مطافى جت و عربيتين اسعاف وقسم محرم بك كله كان موجود وبعد ساعة و ربع تمت السيطرة على الوضع
خلال الساعة دى دار فى دماغى حاجات كتير و لاحظت حاجات كتير عاوز احكيها ليكم
- الناس فى مصر لسه طيبين و فيهم الخير ورغم كل مشاكل الحياة انما فى حاجات مفهاش تاخير يعنى الناس فى الشارع بمجرد ما شافت الدخان طلعو يجرو على الشقق فى العمارة علشان ينزلو الناس و الناس العواجيز بقو يشيلوهم على كراسى و ينزلوهم
-المطافى و الاسعاف و طوارىء الغاز الطبيعى فى خلال 10 دقايق كانو موجودين
-انا كنت واقف فى ذهول مش متخيل الى بيحصل قدامى
-االشقة السليمة الى جنب الحريقة بتاعة صاحبى الى زى اخويا و اول ما شفت الدخان جريت اتصلت بيه مردش بس لقيته نزل فى الشارع هو و والده و والدته و اخواته فاطمنت عليهم ولستر ربنا النار ملمستش شقتهم
-سبحان الله اتجاه الهواء يحدد الشقة الى هتولع جنب المولعة اصلا
-مفيش حاجة فى الدنيا مضمونة خالص يعنى فى لحظة ممكن متلاقيش اى حاجة حواليك
-وانا شايف النار ماسكة فى الشقة جه فى دماغى اسعار الشقق المبالغ فيها و انها فى الاول و الاخر شوية طوب فى ثانية ممكن تبقى رماد
-الواحد ممكن يشتغل و يموت نفسه علشان يجيب و يعمل انما فى الاخر ارادة ربنا فوق كل شىء
-انا كنت بدعى لاصحاب الشقق ان ربنا يعوضهم خير و يخفف مصيبتهم

وفى الاخر ربنا يسترها علينا كلنا و يحفظنا من كل سوء

المشاركة الأصلية كتبت بواسطة mzeid

بس إزاي عرفوا أنها من تسريب غاز طبيعي ؟

من المعاينة الى اتعملت


ودلوقتى العمارة مفصول عنها الغاز و الكهرباء و المياه و مشو كل الناس الى فيها