يا دكتور انت عملت فينا ايه سحرتنا بكلامك متابع بأهتمام
عرض للطباعة
يا دكتور انت عملت فينا ايه سحرتنا بكلامك متابع بأهتمام
نسيت أقولكم
أنا شغال معايا بنتين ..البنتين أنا بعاملهم كأنهم إخواتي..ومديهم ثقه - بعد اختبار أمانتهم طبعا- انهم يعملوا الي هما عاوزين
وزي ماقلت ..انا بجيب ليهم كل يومين تلاته ..أيس كريم أو شيكولاته
أو أعزمهم على حاجه ساقعه ..وساعات بجيب غدا من البيت ..ونتغدا كلنا في الصيدليه
متتخيلوش بقا البنات بيحبوا الشغل إزاي
يعني بيعملوا كل حاجه يقدروا عليها عشان يزودوا دجل الصيدليه ..ولو حتى جنيه واحد
يعني بيروحوا للناس البيوت يدوا الحقن ويقيسوا الضغط ويحللوا سكر ..في البيوت
مع ان ده مش مفروض عليهم ...بس هما عاوزين يكبروا شغل الصيدليه الي هما حابين يكونوا جزء منها
بجد شايفين شغلهم زياده عن اللزوم..عشان انا بعاملهم انه شغالين معايا ( مش عندي)
الطريقه دي بتجيب أوي أوي أوي
كمل كمل يا دوك شكلك كدة ها تسقطنى السنة دى من القاعدة عشان اقرا الموضوع بتاعك
:Ob_mak1[1]::Ob_mak1[1]::Ob_mak1[1]::Ob_mak1[1]:
احمد باشا عيب عليك يعني تيجي تحت البيت ومتعديش ياراجل ؟
مش اتفقنا هتقولي وانت نازل عشان نتقابل
وفعلا انا بركن عربيتي ضهرها للاسفلت ووشها لجوه (علي رأي بتوع النقل يقولك عدي الكبينه وصدر الصندوق ههههههههههههه) وهي متغطيه بغطا مقلم كده المهم ياعم الباشا عرفني المره الجايه عشان نتقابل بقه هستناك
فين الباقى !!!!!!!!!!!!!!!!!!!!!!!!!!!!!!!!!!!
مستنيييينك يا دكتور و براحتك متستعجلش
السلام عليكم
زهقتوا مني ..أنا عارف
المهم
نرجع مرجوعنا لموضوعنا
تجارب في حياتي إتعلمت منها ..أتعملت منها بجد ..مش كلام
الجاموسه لما بتكون مربوطه في الساقيه ..بيغموا عنيها
عشان ماتعرفش انها بتلف حوالين نفسها , وإلا هتبطل تلف
صح كلامي..؟؟؟
كنت في المدينه الجامعيه في اولى طب القاهره..كان عندي إمتحان تشريح الصبح ..مش عارف ليه أنا فاكر اليوم ده كويس أوي..الحمد لله كنت مذاكر كويس جدا جدا ..لدرجه اني كنت حافظ كتاب التشريح من الجلده للجلده..ومع ذلك كنت مصمم اني اراجع للمره رقم 10 عشان ماانقصش ولادرجه..كنت تعبان أوي ..كنت قاعد في الأوضه بسقط من قله النوم ..بس كنت مصمم أني مش أنام
نزلت تحت في مدخل المدينه ..ولبس نص كم ..عشان اكون بردان ومش أنام ..وكل شويه العب ضغط ..والف حوالين نفسي والكتاب في ايدي براجع .
يومها
كنت حاسس ان كل كلمه بذاكرها ..وكل امتحان بعديه بتفوق
هيكون خطوه في مستقبل ناجح وحياه جميله
كنت زي البقره الي عنيها متغميه ..بلف حوالين نفسي
وكل تعبي راح من غير فايده
طلع عيني مصاريف في الجامعه ..سواء كنت في طب ولما حولت صيدله..
والناتج
مفيش
كان ليا واحد صاحبي طبيب بشري ..خرجت معاه مره كشف منزلي بالليل.
راح سهر مع الراجل وعلق محاليل وروشتات ..وكلام كتير
المهم
واحنا ماشيين
الناس اتمطعوا ..وراحوا مطلعين كاااااااااام؟؟؟
.
.
.
.
.
.
.
خمسه جنيه
ساعتها حسيت ان تعب الراجل ده طووول سنين عمره في الجامعه وبعد الجامعه ..عشان 5 جنيه
والأهم من الفلوس ..تقدير الناس...يعني الناس دي قدرته بـ 5 جنيه
5 جنيه يارجاله
5 جونيه –زي احمد مكي ماقالها –
ودي مشكله
مشكله تانيه بقا ..
ودي موجوده بالذات في الأرياف
عندنا هنا دكتور ..مشهور أوي
الراجل ده بتااااااااااااع كله
نساء وتوليد وباطنه وأطفال وأنف وأذن وحنجره ومسالك بوليه وتناسليه وجراحه عامه ,..................ماسبش حاجه في الطب الا لما عملها
المشكله انه جاهل في شغله ..جاهل جاهل
أمين الشرطه الي واقف على بوابه أداب ( وكان دايما يدخلني الجامعه بالعربيه ..وسطه بقا )..أبوه كان تعبان ومتابع مع الدكتور صاحبنا ده
تخيلوا
الراجل جالي بروشته فيها ادويه للمغص
خدوا بالكم انه متابع معاه من شهور
أمين الشرطه المعرفه ده ..جالي بالروشته وكان فيها محاليل ..روحت معاه البيت عشان أعلق المحلول لأبوه
أول مادخلت على الراجل ..بصيت للروشته وبصيت للراجل المريض
جسبي الله ونعم الوكيل
أنا كراجل صيدلي – علاقتي بالطب محدوده – أول ماشفت المريض ..عرفت إنه Hepatic
مريض بالكبد ..وحاله متأخره كمان ..عشان كان وصل لمرحله الهلوسه وإنتفاخ البطن ..والهلوسه دي معناها ان الكبد تقريبا مبقاش شغال ..واليوريا ( الي المفروض الكبد بيصرفها بره الجسم ) تركيزها زاد في الدم ..لدرجه ان المريض مش حاسس بإلي حواليه ..وبقا عمال يشتمني ويقولي :" سيبيني يا وليه ..وروحي شوفي الغسيل "
قولتلهم هاتولي الروشتات القديمه
لقيتها كلها حاجات سبازمو وبس
شكيت في نفسي
رحت جبتلهم دكتور تاني ..من أول نظره منه ..قالهم خدوه وروحواالمستشفى حالا ..يمكن تلحقوه
وبالفعل
الراجل ماطلعش عليه النهار
ربنا يرحمه
..المشكله هنا إيه بقا
الطب مش عليه رقيب في مصر
خااالص
ودي مشكله ..مشكله ضخمه
.................................................. ......................
أحكيلكم موقف بجد خلى دموعي تنزل غصب عني
كنت في مكتب شؤون الطلبه في طب القصر العيني ..عشان أعمل إجراءات التحويل من طب لصيدله
لقيت موقف لسه فاكر تفاصيله لحد دلوقتي
راجل ( اوائل الخمسين من عمره ) داخل معاه ابنه في طب برضووو
دخل الاب ع الموظفه عشان يعرف ابنه في سنه كام .؟؟
الراجل لما عرف ان ابنه سقط سنتين ورا بعض وهيحول لكليه نظريه ( تجاره أو أداب أو حقوق ).
الراجل – وبكل قوته وعزمه – ضرب إبنه بالقلم على وشه
الولد وقع ع الارض ..وزحف لحد الحيطه وقعد يعيط
وكان نفس الموقف تقريبا مع بنت وابوها في يوم تاني
بس ابو البنت ..ماضربهاش
بس قالها :" ياخيبه أملي فيكي..ياريتك كنتي مُتي يوم ماجيتي الدنيا"
.
الموقفين دوول مش قادر أنساهم
عارفين ( ارحموا عزيز قوم ذل )
الواحد لما يكون خلاص أخد لقب دكتور وسط الناس ..وأهله يفرحوا بإبنهم
الدكتور راح ..الدكتور جه
وفجأه
أحلامهم كلها تضيع .
ساعتها عرفت قيمه بابا أوي
بابا إنسان مُتفهم جدا ..وعاقل لأبعد حد
مع انه كان نفسه أكمل في طب..بس ماوقفض ضد رغبتي أني أحول صيدله..
..
يُتبع
طيب وعملت ايه فى الامتحان بعد كل السهر والمذاكرة ديه ؟؟؟؟؟؟؟؟؟؟؟؟؟؟؟؟؟؟؟
الحمد لله تمام..
بس بقولك
يومها كان يوم برد غير طبيعي
تخيلي معايا
كنت لابس بنص كم ..وماشي تحت قدام المدينه في الشارع ..والجوو برد برد
وكنت مصمم أراجع ..مع اني كنت مذاكر كويس..
بس الفكره أيامها كان الواحد جواه طاقه كبيره أوي
وفي الأخر ..أخدنا إيه ...
ياريت تعبنا ده كان جه بفايده .
انا قصدي فشل نظامنا التعليمي ..ونظامنا الاجتماعي..ونظامنا المهني
فهمتي قصدي يا غاده
فيه حاجة كتير من الاهالى دايما بيقعوا فيها . انهم عايزين ولادهم يحققوا حلمهم هما " حلم الاباء يعنى " وفى معظم الحالات بيبقى حلم الاباء غير حلم الابناء .
وده اللى حصل فى القصتين اللى حكتيهم
مينفعش احاسب حد على حلم بتاعى هو مقدرش يحققه
فهمت قصدك
بس بعد ما الزمن يعدى والواحد يفتكر الحاجات ديه بيبقى فخور بيها . مش مجرد النجاح بس كفاية التصميم اللى اتعمل علشان يحقق ده و بيبقى جزء كبير من اثبات الذات .
وانا فى اولى كلية فى الترم الاول كان عندى مادة طول عمرى كنت شاطرة فيها من اقل مجهور بعمله و كنت فاكرة انى حفضل طول عمرى كده انى مذاكرهاش وانجح فيها واجيب اعلى درجة كمان . لحد ما دخلت الامتحان الترم الاول وانا مش مذاكرة قوى و طلعت بالمادة ديه.
وفاكرة حالاتى ساعتها كانت ازاى
الموقف ده لحد دلوقتى انا فاكراه كويس قوى لانه غير كتير فى حياتى
بعد كده كانت كل تقدايراتى فى المادة ديه على الاقل جيد جداااا ده فى اسؤاء الظروف وعادة امتياز وكمان فى باقى المواد و بقيت دايما من الاوائل على دفعتى .
دلوقتى بعد ما السنين مرت لما بفتكر بفتكر انا قدرت احقق ايه .
دايما اللحظات الصعبة لما الواحد بيحقق فيها نجاح بتفضل دايما فى خياله وهى ديه الدروس اللى بيتعلمها وبتفرق من واحد لواحد .
تجربه تانيه بقا حصلت ليا
ودي سبحان الله عليها ...
حكمه ربنا فيها ..
الي بيعمل خير ..بيلاقي الخير
كنت في القاهره عند جماعه اصحابي وراجع الصيدليه بالليل ..لقيت عربيه فيات قديمه أوي ( حتى مش عارف موديلها إيه ) صاحبها واقف مستني حد يقفله ..الراجل كان الكاوتش بتاعه نايم ومش معاه استبن ولا حتى كوريك..كان معايا وليد صاحبي
الراجل والله صعب عليا ..وقفتله ..واديته الكوريك بتاعي ..واخدت الكاوتش بتاعه وروحت عند اقرب واحد بتاع كاوتش ..لقيته قافل( كنا حوالي الساعه 2 صباحا) ..روحت للي بعده ..برضوو لقيته قافل ..كملت لحد ميت غمر ..عملتله فردة الكاوتش ورجعت
حوالي ساعه ونص بالظبط وانا ماشي ع الاسفلت بدور على حد فاتح بتاع كاوتش ..لحد ماوصلت ميت غمر عملته هناك
المهم
رجعت ..لقيت الراجل ( وكان معاه مراته وعياله ) نايم في العربيه..
اديته الكاوتش ..وركبه ..وشكرني ومشيت
,
,
,
بعدها بشهر أو إتنين
ماشي بعربيتي الدايو ( قبل ما تتباع ) مروح من الصيدليه للبيت من طريق زراعي
فجأه ..النور فصل ..نزلت اشوف فيه ايه ..معرفتش
وكانت حوالي الساعه 4 الفجر..
طيب اعمل ايه
استني لحد الشمس ماتطلع ..عشان اعرف اروح
ماهو مستحيل امشي من غير نور في طريق زراعي بالليل.
الحمد لله ..دقايق
عربيه نوبيرا (ملاكي اسكندريه ) معديه ووقف من غير مااشاور له
نزل صاحبها يبص معايا ع النور الي فاصل...برضوو معرفش
المهم
الراجل –كتر خيره-مشي قدامي لحد ماوداني لحد باب بيتي..شكرته
ومشي
.الي بيعمل خير ..بيلاقي خير ..والله ياشباب
عشان كده أنا عمري – على قد مااقدر-ما إتأخرت عن مساعده حد .
عشان ربنا
وعشان يمكن كنت اكون انا مكانه
دقايق بقا وأحكيلكم أخطر مواقف حياتي
في الانتظاررر
الواحد بقي بيستني كتاباتك بطريقة غريبة
عندك موهبة في جذب الناس
+ الواحد بيشوف نفسة في مواقف كتير من دي
ربنا سبحان وتعالى يادكتور قال انا عند حسن ظن عبدى بى خير لخير وشر لشر
وانت عملت الخير مع حد متعرفوش وجه اليوم ان حد يردلك نفس الموقف و......ساعدك بغرض المساعدة بس ...........يارب كولنا نتعلم من المواقف دى
تحياتى يادكتور ومنظرين .....المخاطر ........اتمنى يكون فيها أكشن
الموضوع ده بقا يضحك موووت
انا عندي بندقيه صيد رمسيس 2 ..بمنظار ألماني
عشان انا بركب العربيه لوحدي...كنت تلاقي حاجات غريبه على الكنبه ورا ...ممكن تلاقي كبايه شاي فاضيه ..وممكن تلاقي علبه كشري فاضيه ..حاجات غريبه كده
المهم ..البندقيه كانت محطوطه ورا في الكنبه..
[IMG]http://www.l22l.com/upload-l22l/362b20e9c4.jpg[/IMG]
طق في دماغي إني أروح شرم الشيخ لجماعه اصحابي شغالين هناك( مكنتش متخيل ان مشوار شرم الشيخ ده علقه سخنه لو مسافر لوحدك والتكييف بتاع العربيه مش شغال).
المهم ..غيرت زيت ..وفولت العربيه ..وشيكت ع الميه وكل حاجه
وإتكلت على الله
كان تقريبا يوم 16 في شهر يوليو الي فات
ماشي .. ماشي ..ماشي ولا بيدي
لحد ما عديت النفق ..ودخلت أول كمين بعد النفق ( انا مش حافظ الطرق أوي ..بس متهيألي كان إسمه كمين العين السخنه).
المهم ..دخلت الكمين
شافوا الرخصه ..وكل تمام ,,عدي يادكتور ( مكتوب في رخصة سواقتي طالب بطب القاهره- زي البطاقه..أنا مغيرتش بيانات بطاقتي بعد ماحولت من طب)
لسه بعدي
الظابط شاف البندقيه ع الكنبه ورا
إركن على جنب وانزل رافع ايدك
أنا أعصابي سابت
مش عارف هوا عمل كده ليه( ماأخدتش بالي أصلا إن البندقيه معايا في الكنبه)
.
نزلت رافع إيدي
وإتلموا حواليا ..المهم لما شافوا البندقيه بتاعة عصافير..هديوااا خالص
وأنا الي اعصابي كانت هتروح مني
دخلت مع الظابط مكتبه ..واخد مني بطاقتي
ومسك تليفونه المحمول( بيكلم جهه غير معلومه ) :B4_564:وإداهم بياناتي الي في البطاقه.الظابط بجد كان محترم..كان في حوالي 3 ظباط في الكمين
مسكوا البندقيه بتاعتي وقعدوا يهزروا مع بعض بيها
واحد فيهم كان شكله مدايق مني في حاجه
بيقولي :" عندك كام سنه..؟"
قولتله :" 25 سنه "
قالي وهوا بينفخ :dontudear::" مش عيب عليك – وإنت الي زيك دلوقتي نقيب – تلعب ببندقيه عصافير .؟؟؟"
معرفتش أرد عليه أقوله إيه
المهم
(الجهه الغير معلومه ) اتصلت ع الظابط
قالي :شوف يادكتور
اسمك دخل على كمبيوتر المباحث ..لقينا عليك قضيه سرقه محكوم عليك فيها بأسبوعين سجن.:stink[1]:
وشي إحمر وإزرق وإبيض وإخضر
يانهار إسود
لما قالي كده ..قلت بس
هيقبضوا عليا ..يسلموني لمباحث تنفيذ الأحكام.
وقضيه سرقه ايه دي الي عليا في دمياط ..ده أنا عمري مارحتها
المهم ..الحوار كان بيني وبين الظابط كالأتي.
أنا :" انا عمري مارحت دمياط حضرتك"
الظابط :"طيب انت تعرف بنات او حاجه زي كده "
أنا :"مش فاهم حضرتك"
الظابط :" يمكن مثلا تكون كنت تعرف بنت .وسيبتها ..فقامت عمله فيك محضر سرقه .والمحضر اخد مجراه لحد ماوصل قضيه واتحكم فيها"
قولتله :" لا والله أبدا ..حضرتك"
الظابط :" عموما ..الحكم اسبوعين حبس دوول .يعني قضيه سرقه محمول .بس انا شايف انك راجل محترم ومؤدب..بص..انا ولا كأني عرفت حاجه ..وهسيبك تمشي ..بس تروح قسم أول دمياط ومعاك محامي ..وتسأل على الموضوع ده "
أوك
وطبعا ما كملتش ..ورجعت تاني ..مارحتش شرم الشيخ
ورجعت وأنا جماغي وارمه ..انا سوابق ؟؟؟؟؟
يالهووووووووووي
.
.
المهم
ساعتها إكتشفت إن فعلا في ظباط محترمين جدا ..وزوق جدا
الظابط لما عرف إني دكتور ..جابلي شاي وقعد يرغي معايا ويهزر
بس انا حسيت انه اشتغلني في موضوع دمياط ده
.
المهم
ليا واحد يعرف واحد في المباحث..سألي على الموضوع ده
طلع فشنك
.
ماتتخيلوش بقا
ظابط ماسكك ..بيقولم إنت محكوم عليك بـ اسبوعين سجن.
والله ده كان أكتر موقف إترعب فيه في حياتي لدرجه إني مكنتش عارف أجمع كلمتين على بعض
.
.
.
وطبعا حرمت أخد البندقيه معايا تاني في حته
هههههههههههههههههههههه حلو موقف البندقيه ده بس حرام ليك يا احمد تروح شرم لوحدك ده مشوار رخم اوي
محروق ببساطة يعنى بنسبة خصم أكبر من الخصم المقدم من الشركات الام او شركات التوزيع المعتمدة
وطبعا بتبقى غير خاضعة للضرائب عشان مافيش فواتير وخلافه (حتى الان)
ومنها المضروب يا دكتور لأن أصحاب المخازن دول لا دكاترة ولا صيادلة ولا زفت
دول دخلاء ع المهنة وهمهم وشغلهم الشاغل الكسب المادى فقط لا غير
طيب
افهم الناس معنى كلمه دوا محروق
لما مثلا صيدلي يروح يشتري علبه دوا تمنها 100 جنيه من شركات الادويه الكبيره...الشركات هتديهاله على خصم 20%
يعني الصيدلي يكسب فيها 20 %
يعني لو تمنها 100 جنيه ..شتريها بـ 80 ..ويبيعها بـ 100 ..ويكسب 20 جنيه ..متابعني لحد كده
لما المخزن يروح يشتري من شركات الأدويه 100 علبه ..الشركه بتديله بونص عليها 20 علبه .وبرضووو على خصم 20 %
يعني المخزن هيدفع 8000 جنيه ..تمن 100 علبه+20 علبه اضافي
يعني المخزن هيدفع 8000 تمن 120 علبه
يعني العلبه تقف على المخزن بخصم 33 %
المخزن يبيعها للصيدلي بخصم 30 % مثلا
يبقا كده المخزن كسب 3 % من تمنها
والصيدلي بدل مايشتريها من الشركه بخصم 20 %
يشتريها من المخزن بخصم 30 %
يعني في العلبه الي تمنها 100 ..بدل مايكسب فيها 20 جنيه (من الشركه)
لا
يكسب فيها 30 جنيه ( من المخزن )
يعني المخزن فكرته البوانص الي بتعملها الشركات
وكده كده الكل مستفيد
الشركه بتبيع للمخازن كميات ضخمه ..وبتكسب
المخزن بيبيع للصيدلي ..وياخد نسبه ..ويكسب
والصيدلي يستفيد ..بزياده نسبة ربحه
والمخازن دي مُرخصه
وكل صيدليات مصر شغاله من المخازن
إلا طبعا الصيدليات الضخمه ..الي ممكن تروح تجيب من الصنف الواحد 1000 علبه وتاخد عليها البونص بتاعها..ويكون بالنسبه لها عااادي خالص
.
.
.
وبالنسبه للمخازن
انت طبعا -كصيدلي - مش هتروح تتعامل مع مخزن مشبوه
لازم تروح للناس المحترمه
وجه بتعرفه من خبرتك
وانت أكيد صيدلي وفاهم ..وأكيد عارف ان المخازن دي هيا الي مخليه الصيدليات شغاله لحد دلوقتي
ومن غير المخازن ..نص صيدليات مصر تقفل
يعني مثلا
لما يكون نسبه ربحك ..20% ثابت
تشيل منه فواتير التليفون التجاري
وتشيل منها فواتير الميه التجاري
وتشيل منها فواتير الكهربا التجاري
وتشيل منها رواتب عُمال
وتشيل منها إيجار محلات
وتشيل منها أدويه هالكه
وتشيل منها راتب صيدلي معاك في الصيدليه
وتشيل منها نثريات
وده طبعا غير الضرايب..
كلامي صح ولا غلط يادكتور
احب اضيف مصدر تاني للادويه المحروقه بالنسبه للمخازن دي
مندوبين الدعايه بياخدو طلبيات وهميه لادويه معينه وينزلوا يبعوها للمخازن دي علشان يقدر يحقق التارجت بتاعه
A.Yakout
كلامك صح
بس ده طبعا مش عيب..
ده عادي جدا
الشركه تحقق ربح
والمندوب يحقق ربح
والمخزن يحقق ربح
والصيدلي يحقق ربح
,,,,,,,,,,,,,,,,,,,,,,,,,,,,,,,,,,,,,
وعاوز أقول حاجه
لو الشركات تعلى نسبه الخصم عن الـ 20% دووول
كان الصيادله اشتروا منها عادي
لكن جشع اصحاب الشركات دي..هوا الي بيخلي الصيادله يلجأوا للمخازن
يعني الشركه لما ممكن تطلع الدوا على خصم 33 % (الكميه بالبونص بتاعها)
طيب ماتوزع الخصم ده على الكميه كلها
وتبيع النوع ده بخصم 33% للصيدلي بشكل مباشر
لكن لأ
الفاضل صاحب الشركه المتحده لتجاره الأدويه..لازم يعوم على وش الفته
والصيدلي يطلع عين أهله
المتحده والمصريه وكل الشركات دي لازم تعمل كده لاااااازم
يعني دلوقت مثلا ينفع تروح مصنع زي مصنع جهينه وتقوله عايز بكتة عصير واحده بس؟؟
ولا اقل واجب لازم تطلع من هناك بربع نقل؟
ممكن تروح المعرض الي تبع المصنع
وبرضه مش هتشتري بنفس سعر الي اشتري 300 بكته
الفكره في الجمله انها بسعر اقل شويه ودي نفس فكرة البونص
يعني بدل ما يقولك سعر الجمله كذا
لا بيقولك تعالي خد كميه وهديك فوقيها شويه
وعلي فكره بالنسبه لموضوع حرق الدوا بتاع مندوبين الدعايا محدش قال انه عيب لان اصلا لو اتمنع
تلتين الناس دي مسيرها الشارع
ده يا راجل بيوصل ان المندوب بيدفع اكتر من تلت مرتبه وفي بعض حالات النص كمان علشان يقدر يادوب يحقق التارجت بتاعه بالطريقه دي
A.Yakout
يعني ميجيش حد يقولك بتجيب دوا محروق يادكتور
وكأنها تهمه أو حاجه عيب
.
وبالنسبه لكون أصحاب المخازن من غير الصيادله ..وهدفهم الربح المادي بس
يعني هوا لو المخزن ده صاحبه صيدلي ..ده هيفرق في ايه
خراب الذمم موجود في كل البشر
ملوش دعوه لو كان صيدلي أو غير صيدلي
ممكن الموضوع ده ناس تشوفه حرام
وناس تانيه وسط تقولك في مواقف بتستدعي ده وهقولك علي مثال
دوا زي الـ singulair اكيد تعرفه
كان من حوالي خمس سنين بحاجه وتمانين جنيه كان وقتها علشان اقربلك السعر جرام الدهب بـ 83 جنيه
الله اعلم سعره متهيالي عدي الـ 100 جنيه انهارده
للي ميعرفش الدوا ده للناس الي عندها حساسيه في الصدر او ربو
الدوا ده بصراحه فعال فعلا في حالات الربو الشديده وبيعالج اعراض ازمة الربو بسرعه للاطفال
الدوا ده علبته عباره عن 8 كبسولات بس
وبيتاخد مرتين في اليوم
يعني الي بياخد العلاج ده محتاج 8 علب في الشهر
يعني اقل واجب 850 جنيه في الشهر
طيب الي علي قد حاله وعنده المرض ده (ربنا يحفظنا ويحفظكم) هيجيب الدوا ده ازاي
الناس دي ممكن بتروح المخزن ويشتروا وبرضه مش بياخدوا الخصم الي زي ما تشتري صيدليه
يعني ممكن يوفرله في الشهر بتاع 250 جنيه
يبقي 600 مش زي 850 جنيه
يعني من الاخر موضوع الحرق ده بينفع برضه الناس الي علي قد حالهم في الادويه الغاليه الي زي دي
A.Yakout
بسم الله الرحمن الرحيم
أنا أسف ياجماعه على الموضوع ده
في ناس قالولي إن موضوعي ده دعايه ليا ..
وإنه كلام فاضي من غير لزمه
واني إتكلمت في حاجات مش المفروض إني أتكلم فيها
انا كان غرضي الافاده
وكان غرضي نقل تجارب انا اتعلمت منها
واتعملت منها اساسيات في حياتي
مكنش غرضي دعايه لنفسي
أو كتابه موضوع بلا هدف
أو أي شئ أخر
.
عشان كده أنا مش هكمل في الموضوع ده
وشكرا لكل إلي شاركني هنا
الله ليه كده يا دكتور انت بجد فصلتنى اوى كده
انا كنت متابع جدا
و بجد اول مره اكمل موضوع للاخر
بليز تكلم الموضوع اصل انا شايف نفسى ف حاجات كتير اوى
كلمتين وبس (علي راي فؤاد المهندس)
متديش ودانك لحد
والي شايف ده دعايه عنك
يمكن لانه غيران منك ومش عارف يعمل الي انتا عملته
كمل يا راجل كمل وسيبك من الكلام الفاضي
والي مش عاجبه الحمد لله المنتدي كبير والمواضيع كتير
ومش هذكرك بـ لو كل كلب القمته حجرا ..........
A.Yakout
كمل يا دوك
سوري في اللفظ مترميش ودانك لحد
الي مش عاجبة المووع يقرا الف موضوع غيرة
كمل يا دكتور ده موضوع في القسم الاجتماعي يعني الواحد يقول الهو عاوزه طلما الموضوع لم يمنع من ادارة المنتدى
صعب انك ترضى الناس كلها .
فى كل حاجة حتلاقى ناس مش راضية ولو حتمى ورا الناس عمرك ما حتعمل اى حاجة فى حياتك وبيتهيألى ان ده اكيد من الحاجات اللى اتعلمتها فى حياتك ... ولا اللى اتعلمناه ده بس بنكتب عنه ومش بنفذه لما بتقبالنا فى حياتنا .
نفذ اللى اتعلمته ....
اعتقد انك معملتش حاجة تضايق حد :B4_237:والمتضرر يقراء حاجة تانية :whtauwant::whtauwant:ولا هى دى الدعاية زى بتوع السينما..... بهزر:3mla::3mla: اتوكل على الله وكمل يا دوك:3_3_102[1]::3_3_102[1]::3_3_102[1]::3_3_102[1]:
باقولك ايه يا دكتور
انا كمان اول مرة اقرا حاجة للاخر.
زى مانت شايف كدا دا اول ظهرو ليا فى الموضوع دا اصلا.
اساسا بقى انت لو تعرف انا قريت موضوعك دا ازاى مش هاتصدقنى، الحكاية كلها انى بدور على نوع كاوتش كويس للعربية وعملت بحث عن كلمة كاوتش، وعشان الكلمة دى موجودة فى موضوعك وهوه اول موضوع اتعرض عليا لقيت نفسى باقرا بانسجام شديد جدا لدرجة انى نسيت الكاوتش دا اصلا ونسيت انا عالنت ليه اساسا وماصحيتش الا لما انت قولت مش هاكمل.
يعنى ماتزعلش منى هايبقى حرام عليك جدا لو مكملتش.
وبعدين مش انت بنفسك اللى قولت فى موضوعك دا ان الناس بتشوف اللى هيه عايزة تشوفه، ومش شرط انها تشوف الحقيقة.
وللا انت بتعملنا غلط بقى وللا ايه ؟
باقولك ايه يا دكتور
انا كمان اول مرة اقرا حاجة للاخر.
زى مانت شايف كدا دا اول ظهرو ليا فى الموضوع دا اصلا.
اساسا بقى انت لو تعرف انا قريت موضوعك دا ازاى مش هاتصدقنى، الحكاية كلها انى بدور على نوع كاوتش كويس للعربية البولوبيف بتاعتى "قصدى البولونيز" وعملت بحث عن كلمة كاوتش، وعشان الكلمة دى موجودة فى موضوعك وهوه اول موضوع اتعرض عليا لقيت نفسى باقرا بانسجام شديد جدا لدرجة انى نسيت الكاوتش دا اصلا ونسيت انا عالنت ليه اساسا وماصحيتش الا لما انت قولت مش هاكمل.
يعنى ماتزعلش منى هايبقى حرام عليك جدا جدا جدا يعنى لو مكملتش.
وبعدين مش انت بنفسك اللى قولت فى موضوعك دا ان الناس بتشوف اللى هيه عايزة تشوفه، ومش شرط انها تشوف الحقيقة.
وللا انت بتعملنا غلط بقى وللا ايه ؟