الموضوع: قصه نجاح ..وقصص فشل(تجربه حياه)

[OVERLINE]رجعت أكمل لكم الحدوته


.
.
الجزء ده هتكلم فيه عن تجربتي في الصيدليه والتعامل المباشر مع الناس

انا فتحت صيدليه
وزي ماقلت .كان لازم مني شويتين تعب في الأول ..عشان الصيدليه تكون محل ثقه بين الناس ( وتعمل زبون)..كنت بنام في الصيدليه في المعمل جوه
عشان أكون موجود أطول فتره ممكنه ..
اأول أيام فتحت فيها ..الناس كانت بتيجي تتفرج ع الصيدليه الجديده..وحاولت إني أميز الصيدليه عن الصيدليات الي حواليها
يعني عملت فيها ميزان مجاني
وعلمت البنات إزاي يدواا الحقن العضل والوريد ..مجاني طبعا
وتحاليل السكر (ميلغ رمزي)
وقياس الضغط ..مجاني طبعا

المهم
حاولت أكون مميز عن إلي حواليا..ده طبعا غير - والحمد لله - إني بعامل الناس كويس أوي ودايما بضحك في وش الناس- والله ده بطبعي مش مصطنع والله-
المهم
بدأت أعمل إسم من دهب وسط الناس
وبالذات إني عمري ماإتأخرت عن حد في خدمه أو في علاج
يعني حصلت مره ..كانت الساعه 2 بالليل ( وأنا الصيدليه الوحيده الي فاتحه بالليل ) دخل عليا واحد طول بعرض في أوائل العقد الرابع من عمره
دهل بيقول عندي حرقان في فم المعده ...( المفروض يا إما تكون حموضه أو تكون بوادر زبحه صدريه ) ..قبل حتى ما أفكر
يعني الراجل قال الكلمه من هنا ...وراح واقع من هنا
قلبي وقع معاه ..طالما وقع ..يعني زبحه صدريه ..وثواني وهيموت
انا زي الاهبل ..وبدون جدوى حاولت أعمله A.R ..لكن طبعا مفيش فايده
طلعت بره أنده على أي حد في الشارع ..ملقتش حد وطلعت جريت عشان أصحي الغفير الي كان قريب مني ..المهم ..الغفير جه وواحد كان معدي في الشارع ..وحاولنا نشيله نحطه في عربيتي ..مقدرناش ( الراجل كان طول بعرض وضخم جدا )
سيبته في الصيدليه مع الغفير وواحد تاني
وأخدت العربيه وجري على أقرب دكتور ..جبت الدكتور وجيت ..لقيت أهله جم أخدوه ودوه بيتهم ..الدكتور وهوا جاي معايا ..قالي هنروح نلاقيه ميت .
المهم ..رحنا البيت ..عشان نبقا عملنا إلي علينا ..المهم
الراجل مات
ناس كتير جتلي تاني يوم
وواحده ست باست راسي..وشكرتني على الي عملته مع الراجل ..وإن لو حد غيري ..مكنش عمل إلي عملته ده ..مع ان قضاء ربنا كان أسرع من تصرفي
بس القصه دي عملت ليا شعبيه جامده جدا في البلد
ولما كان العمده بتاع البلد تعبان ..كان في مرحله متأخره من الكبد ..درجه ظياده اليوريا في الدم ..مرحله الهلوسه يعني
كان مره عاوز دوا ضروري ..ومش لاقيه
جم ليا بالليل ..وكانوا خايفين الراجل يموت لو مخدوش
قفلت صيدليتي ..وأخدت ابنه معايا ..ورحنا ميت غمر ..لفيت كل صيدليات ميت غمر عشان أجيبه ..مش لقيته ,,إتصلت بالحاج ياسر زلطه ( صاحب مخزن زلطه للأدويه ) الراجل كتر خيره صحي من النوم وجه فتحلي المخزن..وإداني الدوا

اللناس كلها عرفت بالموقف ده ..والحمد لله الناس كلها بقت بتحبني
بفضل ربنا ونعمته ..
والحمد لله أنا كنت بعمل كده مع الناس لوجه الله ..وعشن ماينفعش أتأخر عن حد ..وبالذات في مسأله الصحه والمرض

.
.
وكام مره حد يجيلي بالليل ..اقفل صيدليتي وأروح معاه ..أديله حقنه أوأعلق له محلول
.
خدمت الناس على قد ماقدرت..في ناس قدرت كده..وفي ناس الحقد ملاها من ناحيتي
يعني مثلا واحد كان عليه 100 جنيه شكك..البنت راحتله قالها بالنص:" يعني البيه بتاعكم لسه مغير العربيه ..وكمان عاوزين فلوس ؟؟"

شفتوا الناس..رد الراجل ده حرق دمي بشكل رهيب..يعني أركب حماره وألبس جلابيه عشان أعجب.
وتاخد من ده كتير ..الناس بتكره تشوف حد مميز ..أو حد أحسن منهم

وشباب البلد دي بقا ..بقوا بيكرهوني عمى
البنات بقا بتوع البلد ..حطوني في دماغهم ..الدكتور أحمد ..عربيه وصيدليه ..وشاب صغير ..وحليوه ..وغني
حلو كده
بقيت - بدون قصد مني - محط أنظار بنات البلد
ومحط كره شباب البلد
ووالله بدون قصد مني ..أعمل إيه يعني ..

.
.
.
يُتبع[/OVERLINE]