لادا 2170 .... هل هناك امل في التطوير؟؟

**zego** · 21-12-2009 10:21 PM

عايزين يا جماعة نشوف الاراء في العربية دي

**x_gomgom** · 22-12-2009 12:01 AM

انا انهارده نزلت اعاين العربيه عشان الصراحه داخله دماغي جداً.....
التقرير كلاتي:....
المظهر الخارجي انا شايفه انسيابي و جميل (ازواق اولاً و اخيراً) بصراحه العربيه دهانها باين انه متكلف جامد و كمان جوده التقفيل يعني البيبان تقيله و بتقفل مظبوط و الاكر تمام....
نيحي بقي للموتور هو 16 صباب 1600 كامتين و الصراحه الراجل دوره صوته هادي جداً (بيقول انها موتور ال لادا ال 2110) بس انا شايفه مختلف شويه من حيث الشكل الحوض و شكل الموتور و ترتيبه و تقفيل الفوانيس داخل الحوض و قربه الياه الصراحه منظر جميل...
العربيه الباور فيها كهرباء و دي ميزه و ثانياً لفت نظري وجود لمبه الاير باج في التابلوه....
التكييف شغلته شويه بسم الله ما شاء الله تحفه و السرعه الاولي فيها بصحتها يعني تجيبه على اتنين بيبقي شديد....
ندخل على التصميم الداخلي...
التابلوه شيك جدا و اناره العداد خضراء محترم زي الاوبترا و واضحه جداً في ساعه و شاشه عرض بيانات...
التابلوه خامته انضف من عربيات كتير لا تقول فرنا ولا لانوس ولا هيونداي هو مش بلاستيك صب تحس ملمسه مقارب للجلد و متبطن فوم مضغوط خامته محترمه جداً و وضعيه القياده و مسكه الفتيس ممتازه بجد.....
الكراسي مريحه في الامام و الخلف لو مرجع الكرسي لاخر المجري اللي قاعد ورا يبقي قاعد مستريح لكن في حاله انك رجعت ظهر الكرس ممكن تضايق اللي وراك شويه و دا جاي نتيجه وسع الشنطه المهول هو عميقه و طويله لجوه (ممكن تخبي فيها قتيل ههه) العربيه علوها على الارض محترم جداً يعني انسي المطبات...
نيجي بقي للكماليات هي سنتر و انذار و زجاج امامي كهرباء و تحكم كهربي في المرايات و انوار ضباب خلفي و تحكم في شده الاضائه و ارتفاعها من الدخل و فتح التانك من الداخل العربيه و من غير كاسيت و سماعات....
نيجي بقي للكلام اللي يزعل بقي اولا سعرها اتحدد ب 68,0000 و دي المسمار الاول في نعش الفقيد الذي لم يولد لوجود منافس شرس هو ال byd الكامله ب 63,000 جنيه (يفسر لاحقاً)...
الضمان سنه فقط او 10.000 كيلو!!! في حين الاخت الشقيقه ضمان 3 سنوات او 60.000 كيلو مع ملاحظه فرق السعر (هي كمان ال byd فيها امكانيه استبدال قطع غيارها من حيث العفشه بالكرولا و الموتور بالمتسوبيشي البوما و دا يديك نقطه تفوق انك ممكن تعمل الصيانه بره بدون التقيد بالتوكيل)...
الصدمه انهم (المقصود هنا توكيل الامل اللي في روكسي) جايب عربيتين بس و بيشوف الدنيا هتمشي ازاي و لو نجحت هيبتدوا يجيبوها بنطاق اوسع (الخوف كله بقي من تكرار تجربه الكالينا).....
مع كامل احترامي التوكيل كدا بيموت عربيه بالفعل منافس شرس لكل السيارات في فئه ال 70,000 جنيه و اقصد فعلياً الجميع...
بس الصراحه العربيه تستاهل ال 68,000 بس قله الضمان دي تخوف و كمان المفروض سعرها يكون اقل عشان المنافسه السعريه و كمان موضوع التجربه دا يرجح ان الواحد يستني لحد اول السنه الجديده عشان يعرف الدنيا فيها ايه....
لكن السياره كمجمل بالفعل غيرت انهارده مفهوم الادا عندي....
ارجو ان اكون افدت

**zego** · 22-12-2009 07:04 AM

فعلا يا باشا كلامك صح بالسعر ده اروح اجيب فيرنا واهو قطع غيارها رخيصة وببلاش وسعر اعادة البيع زى الفل ومنتشرة انما توكيل الأمل كده ما فيش حد فاهم له حاجة خالص وبعدين انا مكلمهم امبارح بعد ما كلمتك تانى يوم قالو العربية ب 66.000 والضمان سنتين او 40.000 طب ازاى بين يوم واحج ومن غير ليلة يتغير السعر والضمان هو الناس ايه اللي في دماغاها بالظبط
حد يدينى تفسير منطقي

**x_gomgom** · 22-12-2009 08:06 AM

الصراحه انا شاكك في المسطول اللي فرجنا على العربيه استحاله تكون سنه او 10.000 كيلو....
لكن السعر بالفعل كان 68.000 جنيه للاسف....
هي الصراحه برقبه الفرنا . الصراحه انا ابتديت اصرف نظر عنها لحين ما الامور تظهر و بفكر في ال byd التجميع المحلى الكامله و 63.000 و بصراحه انا شايف انها برضه احسن من الفرنا...
ربنا يوفقنا جميعاً لما فيه الخير

**sameh127** · 22-12-2009 12:28 PM

فيها عيب خطير ماحدش لاحظه. إن إكصدامها عامل زي إكصدام اللانسر و الإكسيل من ناحية عدم وجود بار صلب خلف الإكصدام لحماية الإكصدام من الكسر عند ملامسة اي عربية له ولزيادة تأمين خلفية العربية عند وقوع حادث من الخلف و لتقليل اثر الصدمة علي الرفارف الخلفية و الصدر الخلفي و باب الشنطة للعربية.
طبعا مش مصدقين كلامي.
طيب حد يروح تاني للمعرض و يروح عند ظهر العربية و يثبت رجلة في الأرض و يزق بركبته الإكصدام الخلفي لجووه و اتفرج قد ايه الإكصدام دخل جوا العربية(ده بإستخدام رجلك) أممال لو عربية وزنها 1 طن ونصف لودخلت فيها من ورا حيبقي ايه الحال للعربية وللركاب.

**zego** · 24-12-2009 11:53 AM

المشاركة الأصلية كتبت بواسطة sameh127

فيها عيب خطير ماحدش لاحظه. إن إكصدامها عامل زي إكصدام اللانسر و الإكسيل من ناحية عدم وجود بار صلب خلف الإكصدام لحماية الإكصدام من الكسر عند ملامسة اي عربية له ولزيادة تأمين خلفية العربية عند وقوع حادث من الخلف و لتقليل اثر الصدمة علي الرفارف الخلفية و الصدر الخلفي و باب الشنطة للعربية.
طبعا مش مصدقين كلامي.
طيب حد يروح تاني للمعرض و يروح عند ظهر العربية و يثبت رجلة في الأرض و يزق بركبته الإكصدام الخلفي لجووه و اتفرج قد ايه الإكصدام دخل جوا العربية(ده بإستخدام رجلك) أممال لو عربية وزنها 1 طن ونصف لودخلت فيها من ورا حيبقي ايه الحال للعربية وللركاب.

طيب يا باشا ياما هو عيب خطير اووووووووى
قولى اللانسر والاكسيل ناجحة ليه ومنتشرة فهمنى وبعدين لادا بالذات العربية اللى والحد ياخدها وهو مغمض عربية زي دي هتحدفها في الحيط هترجع ليك تانى سليمة

**x_gomgom** · 22-12-2009 02:11 PM

يا باشا اولاً كل الجديد الاكصدامات بلاستيك كلانسر و اليارس و ما الى ذلك...
مش شايف دا عيب نهائي و الكلام دا لو موجود هو في الاكصدام الخلفي فقط....
و شاكر جداً على الملحوظه

**HRH_Sameh** · 23-12-2009 11:14 AM

هي فعلا شكلها كويس
بس باين ان مستقبلها ممكن يكون مش مضمون
ع العموم متشكرين ع الصور والتفاصيل

**zego** · 26-12-2009 10:57 PM

هل من صوت هنا

**x_gomgom** · 27-12-2009 01:57 AM

والله مش عارف اقول ايه...
يا فرحه ما تمت حتى يوم ما نزلوا جديد موتوها بالغباء الطبيعي....
ازاي عربيه ب 68,000 جنيه و ضمانها سنه او 10,000 كيلو؟؟!! هي موتوسيكل؟؟؟
كمان سعرها مش قليل يبقي ازاي؟؟؟؟ دا حتى لو مفيهاش الهوا الامر ميسلمش....
الظاهر انهم مركزين جداً مع ال byd و الادا بالنسبه لهم كارت محروق...
انا هستني بدايه السنه الجديده يمكن تخفيض الجمارك يأثر في سعرها شويه...