عايز أغير الزيت أحط أية ؟؟؟

**م/مصطفى محمود** · 20-12-2009 05:23 PM

السلام عليكم

انا لما جيت أكشف على زيت الماتور لقيته تحت العلامة (ناقص خالص) + لونة أسود

مع العلم أن عربيتى فيات سيينا 1400 cc موديل 2000 وعاملة 80000 كم

عايز أعرف أغير بزيت أية وفى حدود كام

وشكرا مقدما

**ahmedyehia515** · 20-12-2009 05:40 PM

متهيألى مش معنى ان الزيت أسود يبقى لازم يتغير, سواد الزيت ده نتيجة طبيعية عشان كده يبقى ماشى صح فى دورته جوه الموتور. المفروض انك لو مثلاً كنت حاطط زيت 10000 و عملت بيه
أقل من 10000 تزود اللى ناقص بس يكون من نفس النوع اللى موجود فالعربية. لو عديت ال 11000, يبقى تغيره و تغير معاه الفلتر كمان. لو انت يقى ناسى اصلاً انت حاطط من امتى, متهيالى أسلم شيئ أنك تغير الزيت و الفلتر و تظبط معاد التغيير على حسب نوع الزيت. انا معيايا فابيا 1400 cc موديل 2001, و بحوطلها موبيل وبنساه بتاع 10000 - 12000 كم و العربية زى الفل, لو نقص, بجيب بس كيلو زيت موبيل وان و بزوده.

يا راب أكون افدتك و متهيألى الباشمهندسين اللى فل المنتدى حيفيدوك اكتر

**م/مصطفى محمود** · 20-12-2009 05:48 PM

الف شكر يا أحمد

بس هو انا مشترى العربية مستعملة من كام يوم ، فمعرفشى الحياة أية

وكمان فلتر الزيت أجيبة منين ؟؟؟؟؟؟ ، هل هو نوع محدد تابع للعربية ولا كلة واحد ، وهل هلاقية فى أى بنزينة ولا لأ وبكام

وشكرا ليكم تانى

**ahmedyehia515** · 20-12-2009 06:07 PM

المشاركة الأصلية كتبت بواسطة م/مصطفى محمود

الف شكر يا أحمد

بس هو انا مشترى العربية مستعملة من كام يوم ، فمعرفشى الحياة أية

وكمان فلتر الزيت أجيبة منين ؟؟؟؟؟؟ ، هل هو نوع محدد تابع للعربية ولا كلة واحد ، وهل هلاقية فى أى بنزينة ولا لأ وبكام

وشكرا ليكم تانى

بص نصيحتى لو مستعملة يبقى غير الزيت بنوع نضيف و بعد كده غيره بمعاده, معلوماتى ان فلاتر الزيت مش مختلفة اوى عشان أنا بغير فى موبيل وان اللى فى صلاح سالم و بلاقى عنده نوعين او 3 انواع فلاتر على حسب نوع العربية فلو حتغير هناك ممكن تجيبه من عندهم, فلتر الفابيا عامل 35 جنيه ، لو ملقتوش حتلاقى الف محل بيبيعوه فى شارع دمشق.
بس لو العربية مستعملة, اعمل حسابك انك تغيرلها الفلاتر كلها لو صاحبها القديم مكنش مغيرها ( انا اشتريت العربية مستعملة و كان جزء من الاتفاق انو يغير الفلاتر كلها و الزيت و البطارية) عشان الحاجات ده ليها عمر فلو غيرتها بدرى دلوقتى و بعد كده ضبط وقت التغيير أضمن ما تفضل تستخدمها و هى المفروض تطلع معاش :)
أى سؤال تانى أنا فل الخدمة انت بس تؤمر

**mr_sameh** · 20-12-2009 06:22 PM

موضوع الزيت من المواضيع اللي فيها اختلافات كتير بس انا باستخدم زيت شيل

**ahmedyehia515** · 20-12-2009 06:35 PM

شل زيت زى الفل و ماحدش عمره اشتكى منه بالعكس فى ناس كتير بتشكر فيه ، انا بحط موبيل عشان العربية عامله 295000 كم و عملت كل ده بموبيل وان عشان كده انا شايفة كويس مع عربيتى. و متهيألى نوع الزيت مش مهم بقدر الانتظام فى معاد تغييره قبل ما يفقد لزوجته و يبقى زى الميه :)

**م/مصطفى محمود** · 20-12-2009 07:28 PM

الف شكر يا شباب

بس للأسف طلع الزيت زى الفل وطلع عندى عيب فى الجوان بتاع فرن العادم

عل العموم هروح بكرة لبتاع اشكمانات وربنا يسهل

**Ahmed Hamdy** · 21-12-2009 05:07 PM

المشاركة الأصلية كتبت بواسطة م/مصطفى محمود

الف شكر يا شباب

بس للأسف طلع الزيت زى الفل وطلع عندى عيب فى الجوان بتاع فرن العادم

عل العموم هروح بكرة لبتاع اشكمانات وربنا يسهل

ان شاء الله تحل المشكلة بسهولة ..
بس كده كده المفروض تغير زيت وسيور وفلاتر وبوجيهات ... عشان تبقى عارف تغيرهم بشكل دورى ..
أحسن واحد تشترى منه قطع غيار هو الكيلانى فى شارع شامبليون - وسط البلد - أمام كشرى أبو طارق ..

**م/مصطفى محمود** · 21-12-2009 11:21 PM

الف شكر يا أحمد والحمد لله النهردة غيرت الجوان بتاع الفرن (ب 7 جنية الجوانين + 30 جنية مصنعية)

وبإذن الله هغير الزيت والفلتر بكرة وكمان كام يوم أبقى أدخل على السيور والبوجيهات