الموضوع: ما هو رأيك فى التوكيل أو مراكز الصيانة اللى إتعاملت معاها؟

توكيل منصور
عملت صيانة 5,000 كم في مركز رابعة :
اللي بيستلم العربية فني واقف بالشبشب والسيجارة وداخل يقعد في العربية ولا اكياس ولا الكلام دا
الحمد لله ماكانشي فيها غير الطارة معووجة والباقي الصيانة بتاعة ال خمس آلاف عادي وعدلوها واصريت احط العربية واكشف عالزوايا دي أول صيانة والدريكسيون معووج والعربية بتبقى ماشية سترييت
الميزة انك شايف العربية وقاعد جنبها
بعد كدة بصراحة بقيت أروح أبو رواش منصور بصراحة انظف والاستراحة حلوة والمشاريب بالمجان ( بس واخدين تمنها بكتيييييير في الصيانة طبعا وقطع الغيار ) وبرضة بالحجز ومحصلشي مشاكل لحد دلوقتي ومهندس بيستلم ولو حاجز ورايح في ميعادك بتدخل في مجرة معينة ولو اي حاجة تانية يتدخل في مجرة تانية يعني لو حاجز ورحت في معادك مالاكشي دعوة بباقي الناس اللي رايحة قبل منك وعاملين فهلوية & وبعد مايخلص الصيانة بيغسلوا الموتور
واتعاملت معاهم في حادثة كان فيها تغيير ورش اكصدام وبصراحة الناس كانت تمام واقترحوا علي آخد العربية وبلاش اسيبها عشان مش مستاهلة تقعد يومين تلاتة عشان الكصدام ييجي ويترش وكدة وفعلا واتصلت بعد يومين قال لي تعالى ركب الاكصدام ورحت وماستغرقتش تلات ساعات جوة التوكيل

الميكانيكيون العرب بشارع جوزيف تيتو (خدمة صيانة لرينو والآن كيا أيضا)
كنت أتعامل معهم منذ سنوات زكنت راضية عن خدمتهم - الا انهم مؤخرا أصبحوا سيئين جدا - أولا سوء المعاملة والنتظار الطويل الغير مبرر- ئانيا والأدهى سوء تشخيص العطل الذى لا أعرف متعمد أو غير متعمد - كادوا يكلفوننى تغيير لوحة العدادات ب 4 الاف جنيه وصلحتها العداد عند واحد بتاع عدادات بنصيحة الميكانيكى ب 250 جنيه فقط - كلفونى تغيير تلاجة التكييف وبعدها باسبوع فضى الفريون - روحتلهم وفضلت أروحلهم كل مرة يشحنوه ويفولوا مش شايفين ايه سبب انه بيفضى و:انى أنا اللى باشرب الفريون - اتخانقت معاهم لما فى الأخر قالولى ان السربنتينة عاوزة تتغير - واتهمتهم انهم شخصوا غلط وكلفونى 2000 جنيه على الأرض - واش ضمانى ان تغيير السربنتينة هيحل المشكلة - وفعلا كشفت عليها برة فى 3 مراكز واكدولى كلهم ان السربنتينة (اللى كانوا هيغيروها بألفين جنيه فقط عشان خاطرى) سليمة والمشكلة من الكباس.
بعض فنييهم قمة فى المراوغة وسوء المعاملة ومدير الصيانة على رأسهم - تجنبوا التعامل معهم

رينو المقطم زي الفل و الكول سنتر محترم جدا ... و بيتابعوك كويس جدا ... وواضح انهم مدربين و على خبرة جيدة .... وانا هناك اقعدت احكي مع ناس تانية منتظمين في الصيانة و شكروا جدا الصيانة .... و للامانة لقيت ناس بتشتكي بس المجمل عاجبني لانك مستحيل تلاقي مكان بدون مشاكل

انا عندى تجربة مريرة ولم تنتهى حتى الآن مع مركز صيانة فى صقر قريش أسمه أوتو ألفا فمنذ حوالى شهر ونصف سلمت عربيتى البرافا هناك لميكانيكى اسمه عمرو على ( كان ليه ورشة فى فيصل ) المهم كنت اتفقت معاه على تغيير الموتور بواحد استيراد واستلم من تحت الحساب 3500 ج ووعدنى يومين والتالت واستلم الموتور المهم دخل علينا العيد وبعد العيد رحت له لقيت العربية زى ما هى وقال انا حأجيب موتور ولما اظبط العربية حأتصل بيكم ومر اسبوع والتانى واتصلنا بيه قال لنا انا ركبت الموتور وكلها يومين والعربية تكون جاهزة واخد من ابنى 300 ج وبعت له واحد فاهم لقاه فاكك الموتور وبيشتغل فيه قاله لا احنا اتفقنا على موتور مقفول استيراد وحالته تكون ممتازة ومن هنا بدأت المشاكل لأ مش حأرجع الموتور واتدخل اخوه ايمن وشريكه م شريف ووعدوا بحل المشكلة ولم تحل وزاد وغطى ان الباشا كان بياخد العربية يخرج بيها وعمل تلفيات كتيرة فى العربية كسر الكابوت والأكصدام وخبط الشنطة والرفرف اليمين وشوية حاجات متكسرة جوة وبرة وزى ما يكون بينتقم مننا وكل يوم والتانى نروح مشوار سفر من العاشر من رمضان والعربية ما خلصتش وفوجئت بأن خرطوم المياه اتقطع والشكمان بالكامل دمر والسيور تم تبديلها والبوجيهات زى ما هى وكل شوية طلبات وخناق وفى الآخر استلمنا العربية ودفعنا الحساب ورفضوا أعطائنا فواتير وقلنا نجربها يومين وعطلت مننا قرب مدينة العاشر وصلحنا اللى نقدر عليه وعرفنا عيوب العربية ولما رجعنا لهم وقلنا لهم ان الموتور بيسخن جدا وفيهيها كذا وكذا و ..فوجئنا بمعاملة سيئة جدا ورفضوا يعملوا اى حاجة ورموا الموتور بتاعنا امام المركز ولم يسلمونا ورق الموتور الجديد وقررت اتخاذ اجراءات قانونية ضدهم بعد ان فشلت كل المساعى .. فإحذروا من عمرو الميكانيكى ومركز أوتو ألفا بصقر قريش امام كوبرى المشاة