انا اسف على الرد المتأخر بس انا شغلى على النت محدود و مش بخش على النت كتير وبسافر كتير.
و بالنسبة للصاج فالصاج الروسي غير معالج ضد الصدأ ومتصدقش حد يقولك حاجة غير كده(مع احترامي ليه ايا كان)
و الصاج الروسي مش بيتعالج ضد الصدأ فى روسيا بسبب طبيعة المناخ عندهم تختلف عن المناخ فى مصر ،فدرجة الحرارة العادية
-5 درجة تحت الصفر و تصل الى -20 تحت الصفر و اي رطوبة موجودة فى الجو بتتحول بسبب البرد القارس الى ثلج و يبقى الجو هناك جاف مع وجود برد قارس و عملية الصدأ لاتتحقق هناك بسبب غياب الرطوبة وجفاف الجو البارد فالمصنعين هناك مش محتاجين لمعاجة صاج ضد الصدأ لأن حدوث الصدأ قليل جدا و شبه نادر، اما فى مصر فالمناخ معتدل الحرارة و يصاحبه رطوبة عالية (المسبب الرئيسي للصدأ) وعملية معالجة الصاج ضد الصدأ بعد شراء العربية امرها سهل (مش مشكلة)
بالنسبة لصاج النيفا الحديثة موديل الفينات اضعف من صاج النيفا القديمة موديل الثمانينات فقط.
(انا مش بقارنه بصاج الكوري او الياباني) .
صاجها جامد بالنسبة للعربيات الحديثة اللى من عمرها . ارجو فهم مدلول كلامي لأني بقارنها بأختها القديمة فقط.
بس النيفا عربية عضم و انا شفتلها حادثة غريبة كانت ماشية قدامي نيفا ثمانينات و دخلت فى منطقة زلقة على الأسفلت فإنحرفت و إصطدمت بعامود نور محترم و جعلته ينهار و يميل و يسقط على الأرض و انا خفت لا يقع على عربيتي و انحرفت بعربيتي بعيد خوفا من وقوعه علي سيارتي و بعدها وقفت بالعربية علشان اشوف الناس المصابة و التكسير الموجود بالعربية النيفا وفوجئت بالناس بينزلوا من العربية و بيشوفوا ايه اللى زحلق العربية و ذهبت للعربية (نيفا)من الأمام لرؤية مقدمتها و فوجئت بتطبيق بسيط جدا بالكبود و يترد بالرخيص عند اى سمكرى و تعجبت من ان العمود اتكسر و وقع على الأرض و العمود معدني (ليس بلاستيك) . لو كان الحادث ده حصل مع اى عربية جديدة كانت العربية غيرت نص بالكامل و كان الناس اللى فيها حدث لهم اصابات بالغة من كسور و ارتجاج بالمخ و غيبوبة ومش بعيد وفاة.
و الناس ركبوا العربية تانى و نزلوا من على الرصيف و كملوا مشي و تركوا عامود النور مكسور وواقع على الأرض و انا ركبت عربيتي و مشيت. و كأن الحادث ده حدث مابين (عربية نقل أو دبابة عسكرية) مع عامود نور معدني محترم. إحترمت العربية و متانتها.
فى روسيا مصنع لادا هو اكبر مصنع منتج للسيارات فى الإتحاد السوفيتي و بينتج بعض المعدات الحربية للجيش الروسي.
و بيعتبروها الدب القطبى عندهم.
وهي تعتبر عربية قوية -اقتصادية -بسيطة التصميم-رخيصة التكلفة-متوفرة قطع الغيار-تؤدي المطلوب منها بمنتهى البساطة.