مقارنه بين نيسان صني وشيفروليه اوبترا

**melsaber** · 26-01-2010 04:10 AM

السلام عليكم ..............
ياريت خبراء المنتدي يفيدونا بأرائهم في المقارنه بين العربيتين من حيث القوه, والأداء, والنعومه, والثبات, و استهلاك البنزين, واسعار قطع الغيار, والصيانه, والعمر الافتراضي, ومش عايز اقول التوكيل, وسعر اعادة البيع ,ومعلش طولت عليكم .....بس دي عربية العمر وانا بقالي شهر محتار وسألت عن عربيات كتير وربنا ييسر و أرسي علي حاجه ....

**medo_msmsa** · 26-01-2010 11:20 AM

انا نفس حالتك بس انا موسع دائرة الاختيار للانسر 1300 والكورولا 2002 ومحتار ومش عارف، لدرجة ان انا فتحت توبيك بس للأسف الاجابات كانت مقتضبة جدا.
انا كمان عندي سؤال صغير ما هو لون اضاءة تابلوة الصني 2005-2007، برتقالي ولا أبيض؟

**romeo_6887** · 26-01-2010 04:54 PM

خليك في الصني علي الاقل ياباني

**melsaber** · 26-01-2010 06:03 PM

المشاركة الأصلية كتبت بواسطة medo_msmsa

انا نفس حالتك بس انا موسع دائرة الاختيار للانسر 1300 والكورولا 2002 ومحتار ومش عارف، لدرجة ان انا فتحت توبيك بس للأسف الاجابات كانت مقتضبة جدا.
انا كمان عندي سؤال صغير ما هو لون اضاءة تابلوة الصني 2005-2007، برتقالي ولا أبيض؟

طيب ياريت حد يفيدنا بمقارنه كويسه بين العربيتين . بالنسبه للانسر 1300 فيه ناس كتير قالولي سحبها وحش جدا لأنه والله اعلم الموتور صغير علي حجم العربيه اما اللكرولا 2002 فانا مش عايز اجيب مستعمل فمفكرتش فيها...المشاهدات لحد دلوقتي 34 ومفيش غير اتنين بس اللي ردو.

**melsaber** · 26-01-2010 06:05 PM

المشاركة الأصلية كتبت بواسطة romeo_6887

خليك في الصني علي الاقل ياباني

ممكن الأسباب ...... وشكرا علي الرد

**mohamedbook** · 26-01-2010 06:15 PM

انا جربت الصني
عربيه كويسه في الفئه السعريه لليباني
توكيل كويس ومحترم
عربيه ثباتها عالي
سحبها ممتاز
فرملها فوق الممتاز بس الي كانت معايا مفهاش abs
شكلها حاجة ترجع ليك
قطع الغيار معقوله جدا بالنسبه لانها يباني
الصالون الداخلي ديق نسبيا لو رجعت كرسي الامامي بيديق الكنبه الخلفيه
وياريت تخش علي العربيات النيسان ونت هتعرف كل حاجة عن الصني مميزات وعيوب من خلال الاعضاء
العربيه كانت معايا من 3/2008 مغيرتش فيها اي حاجة غير الصيانات العاديه زيت فلتر بوجيهات ليس اكثر
واستخير الله وسوق السيارتين ابل متشتري والله ولي التوفيق

**romeo_6887** · 27-01-2010 12:48 AM

المشاركة الأصلية كتبت بواسطة melsaber

ممكن الأسباب ...... وشكرا علي الرد

طبعا خامات الصني افضل من الاوبترا من غير كلام
ده كفايه توكيل المنصور اللي بيطفش الناس
هو موضوع التوكيل نسبي طبعا
اما توكيل نيسان الشكاوي منه قليله
الصني فيها عوامل امان زي الفل abs و ممكن يكون فيها ايرباجز
اما الاوبترا مفيهاش علي ما اعتقد
شكل الصني افضل من الاوبترا في رأيي

**melsaber** · 27-01-2010 03:22 AM

المشاركة الأصلية كتبت بواسطة romeo_6887

طبعا خامات الصني افضل من الاوبترا من غير كلام
ده كفايه توكيل المنصور اللي بيطفش الناس
هو موضوع التوكيل نسبي طبعا
اما توكيل نيسان الشكاوي منه قليله
الصني فيها عوامل امان زي الفل abs و ممكن يكون فيها ايرباجز
اما الاوبترا مفيهاش علي ما اعتقد
شكل الصني افضل من الاوبترا في رأيي

شكرا علي الرد ..وفي انتظار المزيد من المشاركات من الأعضاء..

**Hosam_Optrawy** · 27-01-2010 05:56 AM

المشاركة الأصلية كتبت بواسطة melsaber

شكرا علي الرد ..وفي انتظار المزيد من المشاركات من الأعضاء..

دا كان ردى فى أحد المواضيع عن رأيى فى الأوبترا بعد سنه ونص استعمال

انا معملتش غير 19 الف كم فى حوالى سنه ونص ومغيرتش غير زيت وفلتر مرتين

بس من خلال تجربتى العربيه ماشاء الله لحد دلوقتى ممتازه ومعملتش معايا أى مشاكل الحمد لله

- موتور محترم جدا وسحبه عالى واستهلاكه كويس وطبيعى مش عالى خالص زى ماكل الناس بتقول

- الفتيس الاوتوماتيك سلس واستجابته عاليه جدا

- الثبات والتحكم فى العربيه ممتاز جدا لحد 140 وانا نادرا لما بازود عن كدا فالثبات يعتبر من مميزاتها بالرغم من ان عرض الكاوتش 185

- العفشه كويسه جدا معايا لحد دلوقتى وتعتبر متوسطه ولا ناشفه ولا ناعمه , أول ماجبتها كانت ناشفه ودا كان بسبب ان ضغط الكاوتش عالى جدا لكن بعد ماظبطته على 30 العفشه بقت تمام جدا ومريحه

- التكييف ممتاز وعمرى ماجبته على 4 او جبته على أخر درجه من البروده , أخرى باجيبه على 2 ودرجه بروده متوسطه لان تبريده عالى جدا

- الوسع والراحه من أكبر مميزات العربيه فعلا واسعه وقعدتها مريحه

- العلو عن الأرض عمرى ماشفت زيه وبجد نقطة تفوق على عربيات كتير عمرى ماحكيت فى مطب اى كان شكله باعدى بقلب جامد بدون خوف

- أوبشنز العربيه كويسه وموضوع كاسيت الشرايط مش مضايقنى لانى باستعمل وصلة ال Aux وباوصلها بال iPod وصوت السماعات نضيف ومحترم

- العزل حلو جدا وصوت الموتور ميعتبرش عالى ومزعج ودى برضه من الحاجات اللى عاجبانى

- فرامل العربيه جيده جدا وأسعفتنى فى مواقف كتير رغم انها بدون Abs

- اكصدامات العربيه قويه ومبتتنيش بسهوله , ياما عربيات قديمه خبطتنى من ورا وقلت هانزل الاقى الاكصدام جوا الشنطه والنتيجه بالاقى شويه تجريح

- طبعا تقفيل العربيه مفيهوش غلطه ماشاء الله والخامات ممتازه

صفقه ممتازه وفلوسها فيها

بالنسبه للعيوب اللى ظهرت معايا لحد دلوقتى

- صاج السقف والكبوت طرى وضعيف وبيتأثر بسهوله عن بقية صاج العربيه

- احيانا باسمع صوت تزييق من الطاره وانا بالفها يمين وشمال الصبح وانا باسخن وبعد العربيه ماتسخن الصوت بيختفى

- شكلها يعتبر قديم :)

بجد مش لاقى عيوب تانيه

والحاجات اللى ناقصه العربيه زى ال Abs وال Air Bags والجنوط السبور موجوده فى فئه تانيه

الحمد لله ويارب تفضل على كدا على طول