مقارنه بين نيسان صنى و شيفورليه اوبترا

**Mohamed Ezz** · 31-05-2007 11:45 AM

السيارتين قريبين جدا فى السعر و الكماليات - الواحد محتار بينهم - ياريت حد يعمل مقارنه و يقول ايهم افضل ؟

**أبو عبدالله** · 31-05-2007 12:20 PM

اولا اهلا بك في معنا في هذا المنتدى

واحب ان اوجه حضرتك الى أن اخونا سبعاوي كاتب كل حاجه عن النيسان من الالف الى الياء في منتدى نيسان ....

**mina_ramsis** · 31-05-2007 04:32 PM

اى استفسار بخصوص الاوبترا انا تحت امرك

**sab3aawy** · 31-05-2007 06:15 PM

انا ممكن اتكلم عن النيسان واتمنى من احد الإخوة ان يفيدنا بمعلومات عن الأوبترا

بالنسبة للنسيان صانى: (ملحوظة، الكلام هنا على الموديل الأوتوماتيك ال EX-saloon، فيه موديل مانيوال، وفيه موديل تانى اوتوماتيك اسمه super saloon فيه كماليات اكتر)

معلومات خاصة بالأداء:
المحرك:1600 سى سى، ثنائى الكامة ذو 16 صباب
تغذية الوقود: حقن إلكترونى متعدد النقاط(رشاشات ووحدة كومبيوتر)
نظام الإشعال: شمعات احتراق(بوجيهات) ذات ملفات رفع جهد منفصلة لكل شمعة( كل بوجيه له بوبينة صغيرة لوحده)
القدرة الفعالة: 108 حصان( البياعين بيقولو 118 بس الرقم اللى هم بيقولوه دا قدرة خرج المحرك اللى بيروح منها جزء فى نظام الجر)
نظام الجر: ناقل حركة يدوى ذو خمسة سرعات امامية وواحدة خلفية، او اوتوماتيك ذو اربعة سرعات امامية وواحدة خلفية، الجر أمامى باستخدام محرك مثبت بعرض السيارة، وناقل حركة مزود بعلبة تروس تفاضلية(كورونا) فى علبة واحدة مع ناقل الحركة، وعمودين جر غير متساوييى الطول ووصلات سرعة ثابتة (كبالن) (ببساطة هذا الكلام هو اللى موجود فى كل سيارات الجر الامامى)
نظام التعليق: مكفرسون ذو نوابض حلزونية(سوست) وروادع ارتجاج(مساعيدن) وقضبان توجيه(مقصات) وقضيب منع الإنقلاب(ميزان)) من الأمام، وروادع ارتجاج ونوابض حلزونية ووصلة تعليق متعددة النقاط فى الخلف

نظام التوجيه: علبة التوجيه من نوع الجريدة والبنيون مزوة بدعم التوجيه الآلى(باور ستيرنج) يشمل بالإضافة للعلبة مضخة زيت وخزان الزيت

طول السيارة: 450 سم
عرض السيارة: 170 سم
اقل ارتفاع عن الأرض: 18 سم
حجم الشنطة الخلفية: 450 لتر تقريبا
الوزن الفارغ:1180 كجم
السرعة القصوى 180 كم /ساعة تقريبا

ملامح عن أداء السيارة:

تسارع السيارة ممتاز من السكون الى السرعات المتوسطة(حتى 50 او 60 ك/ساعة) تقل كفائة التسارع من 60 الى 100 الى حد ما ثم تتحسن بشدة بعد 100 ك/ساعة
افضل مساحة لاداء المحرك هى 3500 الى 4500 RPM
المحرك صوته مرتفع الى حد ما اثناء التسارع، لكن فى السرعات الثابتة لا صوت له،حتى على السرعات العالية لا صوت له طالما انت ماشى على سرعة ثابتة مش بتكبس

الثبات ممتاز على كل السرعات، مع ملاحظة انه تحسن جدا بعد تليين السيارة، بتاخد بيها غرز على 130-140 ك/ساعة بكل اطمئنان، العفشة ذات طابع رياضى، يدعم الثبات على الأرض على حساب تخفيف الصدمات عن الركاب

ادوات السيارة مريحة جدا فى التعامل وموضوعة فى اماكن تسهل استخدامها تماما، الرؤية الأمامية والخلفية معقولة جدا، يعيبها فقط عدم امكانيه رؤية نهاية الكبوت نظرا لطول السيارة وشكل انحاناءتها

الكراسى الامامية مريحة جدا وقابلة للتعديل لكافة احجام السائق، يعيب الصالون ضيق مسافة الأقدام بين الكنبة الخلفية والكرسى الامامى

المكونات المصرية فى السيارة: الموكيت، الكراسى، الزجاج، الكاسيت والسماعات، كاوتش الأبواب، الخراطيم، ضفيرة الكهرباء، الردياتير، البطارية ، الشكمان

كماليات السيارة: 4 زجاج كهرباء مع تحكم من باب السائق او الأبواب الجانبية مع زر فى باب الساق يلغى تحكم الأبواب الجانبية، سنترال لوك مع زر اضافى فى باب السائق يسمح بغلق الثلاثة ابواب الأخرى وابقاء باب السائق مفتوح، مرايات كهرباء، فتح الشنطة من داخل السيارة او من الريموت كونترول كهربائيا، فتح التنك من الداخل(شداد)، رفع وخفض الديريكسيون، رفع وخفض نقطة تعليق احزمة الامان، مكيف باربعة سرعات، عداد كيلومتر ديجيتال مع عدادين رحلات، عداد RPM، ساعة ديجيتال فى التابلوه، امكانية التحكم فى زيادة او انقاص السرعة البطيئة للمساحات الامامية، سلك إزالة الشبورة على الزجاج الخلفى،ايرباج امام السائق،حامل أكواب، باور ستيرنج، كاسيت و4 سماعات، مقابض خارجية نيكل،غنذار وريموت كونترول

الألوان المتاحة للسيارة: فضى، ذهبى، نبيتى ميتاليك، ابيض،جنزارى غامق ميتاليك

مميزات اعجبتنى فى السيارة:
قضيب حماية محترم اسفل المحرك ، وصلة تعليق العفشة الخلفية مميزة تماما عن السيارات المماثلة،لا توجد بها قطعة البلاستيك التى ابتلانا بها كل صناع السيارات الجديدة والتى تغطى المحرك وتعيق اى صيانات ولا هدف من ورائها سوى اضفاء منظر حديث على المحرك، إطارات بريدجستون يابانى 15 بوصة، التابلوه انيق جدا متعدد الألوان وخصوصا البيج ، نسب تخفيض الجيربوكس ممتازة(الموتور بيكون 3000RPM لما العربية بتكون ماشية 120 كم/ساعة)

اشياء لم تعجبنى فى السيارة:
الصاج الخارجى خفيف زى كل اليابانى (نفس صاج اللانسر والكورولا)، المفتاح مش بيخرج من الكونتاكت غير والفتيس على وضع البارك(بالنسبة للأوتوماتيك فقط)، استهلاك البنزين عالى شوية(مع ملاحظة ان سيارتى اوتوماتيك)بتعمل ال 200 جوة البلد بالعافية،الكاسيت صوته عادى جدا، الإيريال يدوى،الكنبة الخلفية مافيهاش مخدع، لما بيكون راكب معايا واحد قدام و 2 ورا الشكمان بيحك فى المطبات ، بس برضه انا لما شفت العربية وهى مرفوعة مقلقتش من الحك لأن الشكمان هو اللى بيحك وهو متركب على حوامل كاوتش بتاخد وتدى، صوت الهواء اسفل السيارة يكون مسموع فى السراعت العالية(بعد 110 )

لو فيه اى استفسارات تانى ابعتلى

**Mohamed Ezz** · 01-06-2007 12:52 AM

أولا أود ان اشكركم على الرد .

بالنسبه للأوبترا كان عندى كام سؤال على النسخه المانيوال :
1- هل فيها ABS و لا مافيهاش.
2- هل فيها Air bags و لا مافيهاش.

و حاجه تانيه فى ناس خوفتنى من الأوبترا و قالت انها حاجه كورى مالهاش صله بالشيفورليه الأمريكانى غير فى الشعار فقط

و إنها مش هيبقى ليها سوق فى إعاده البيع - فرجاء إللى يعرف معلومات عن هذه النقاط ياريت يفيدنا.

بالنسبه للنيسان :

الحاجه إللى تقلق فيها موضوع ال45% مكونات محليه فهل المكونات المحليه تقتصر على ما ذكره الأستاذ سبعاوى و لا فيه حاجات تانيه؟

أيضا شوفت فى بعض المعارض صنى خلفيه العدادات فيها فضى فاتح و دى كان شكلها مش حلو خالص على عكس الخلفيه البيضاء المعروفه
فهل الإنتاج الجديد منها كده و لا ايه؟

**mina_ramsis** · 01-06-2007 01:23 PM

انا هاقولك حاجة لو فاكر ان الشيفوليه بتنافس الكاديلاك او الفيرارىاو الهامار تبقى غلطان العربية بتنافس اللانسر ال 1600 و الصنى و الواجا و الالنترا يعنى اللى يقولك انها كورى ملهاش لازمة و لا تمت للشيفوليه باى شئ ده راجل بيفتى من الاخر
الخلاصة : لو عاوز عربية ليها اسم كبير على حساب التقفيل هات الصنى ( لا اعتقد ان الزجاج و الكراسى و الكهرباء فقط تمثل 45 % من ثمن العربية )
لو عاوز عربية تقفيل محترم جدا من اكبر شركة فى العالم فى صناعة السيارات و اوسع من الصنى و شكلها مش هيتغير دلوقتى جيب الاوبترا قطع غيارها رخيصة
اما بخصوص انها هتبقى تقيله فى بيعها لا اعتقد ذلك نهائيا لان العربية فى سنتين بس بقا نسبة وجودها ليس بقليله على عكس اللانسر مثلا انها من سنة 2004 مغيرتش شكلها تغيير كبير لذلك هتحس ان البلد كلها جايبة لانسر
هكلمك بصراحة لو ما يفرقش معاك تغيير الشكل و انها ضيقة شويه من ورا و الشنطة صغيرة شوية هات لانسر 1600
لو الفلوس مش اد كده و عاوز تتمسك بالحلم اليابانى هات صنى على حساب التقفيل و تغيير الشكل برده
لو الفلوس مش قد كده متوصلكش لتمن اللانسر ال 1600 كامله و عاوز عربية تقفيل نظيف جدا و موتور عفى جدا من شركة محترمة و مش هتغير شكلها دلوقتى و اوسع من اللانسر و الصنى هات الاوبترا
اما بخصوص الاوبترا فيها abs و لا لأأ و لا المانيوال و لا الاوتوماتيك و لا الانسر و لا الصنى فيها abs
اللانسر الاسبورت بس هى اللى فيها abs

**mina_ramsis** · 01-06-2007 05:18 PM

هو حضرتك عاوزها مانيوال و لا اوتوماتيك انا رأيي اللى كتبته فى الرد اللى فوق على اساس ان حضرتك عاوز اوتوماتيك اما اذا كان حضرتك عاوز مانيوال يبقى بيتهيألى فكر فى اللانسر 1300 بس لو اوتوماتيك رأيي انك تبعد عن اى عربية 1300 اوتوماتيك انا لما اخترت الاوبترا اخترتها علشان 1600 تستحمل الاوتوماتيك

**sab3aawy** · 04-06-2007 04:02 PM

لا اعتقد ان الزجاج و الكراسى و الكهرباء فقط تمثل 45 % من ثمن العربية

على فكرة حكاية ال45% دى خمة كبيرة جدا

مافيش شركة بتكمل ال45% من مكونات السيارة مصرى ولا حتى شركة النصر

يعنى احنا لو حسبناها بالنسبة للسيارة الشاهين اللى انا فكيتها حته حته ممكن اقول لك على المكونات المصرية اللى فيها اللى لو اتشالت واتهبدت لا يمكن تكمل 45%

يعنى فى الشاهين كانت المكونات المصرية هى: الزجاج، الموكيت، الكراسى، جزء من فرش الأبواب،فرش السقف، كاوتش الأبواب، الخراطيم، الضفيرة، الشكمان،البطارية ، كارتيرات الرفرف البلاستيك، الباكتات الجانبية،تانك البنزين ،الإطارات النسر عار الصناعة المصرية

فى الشاهين كل المكونات الآتية كانت تركى: المحرك، الجيربوكس، عمود الكردان والكورونا واعمدة الجر، كل العفشة، كل الطنابير بملحقاتها الصاج بالكامل، الشاسيه بالكامل، كل الفوانيس، كل الإكصدامات، الشبكة الامامية والخلفية، المساعدين، كل بلاستيكات المحرك(قربة المياه، قربة المطر الخ) كل تغذيات المحرك(كاربراتير دينامو اسبراتير الخ) كل بلاستيكات الصالون، التابلوه بالدريريكسيون بعداداته، دوسات البنزين والفرامل والدبرياج،

طب بذمتك ، دا احنا حتى لو شلنا الموتور والجيربوكس برضه اللى فاضل تركى هايكون اكتر من 55% قصاد المصر اللى مفروض يكون 45% ودى اسمها الشاهين بتاعة شركة النصر

يبقى 45% ايه اللى هتتكلم عليها فى النيسان

الموضوع يتم تسويته بطريقة أخرى عن طريق شراء المكونات المستوردة من مستوردين آخرين داخل مصر بالعملة المحلية واثباتها بفواتير بالجنيه المصرى وتبقى كدة اتسوت واتظبتت 45% ، ويطلع المسئول الفخم فى التلافازيون يقول عندنا 45% مكون محلى

ياراجل دا احنا بنعمل رفرف ال127 بالعافية ومصنع واحد بس فى مصر اللى بيعمله اسمه مشمش، ولما حصل فى وقت من الأوقات ان اسطمبة رفرف ال127 اليمين اللى عند مشمش انكسرت بقى العثور على رفرف 127 اصعب من الحصول على كيلو هيروين

تقوللى النيسان جسمها بيتصنع فى مصر؟ ساعتها ولا كنت هاحط فيها قرش صاغ، كلها كراتين جاية من برة وكل شغلة المصنع هنا هو التقفيل والدهان، والعبرة بالمصنع اللى عنده كواليتى كويسة فى اللحامات والدهانات، لكن حكاية ان العربية بيتعمل فيها 45% هنا دى، معلش، إنسى، دا كلام لصفحة الصناعة فى الأهرا وخلاص

سبعاوى

**mina_ramsis** · 04-06-2007 06:44 PM

طبعا يا استاذ سبعاوى حضرتك ادرى بالموضوع ده علشان كده قولت اعتقد من اعرف
بعدين العربيتين اخوات و انا لسة شاريها من حوالى شهر بعد منافسة شرسة بينها و بين الصنى بس الصراحة الفروق طفيفة جدا بين العربيتين و فيها حاجات الصنى بتكسب و فيها حاجات االاوبترا بتكسب :D :D

**adidas_vip2** · 21-04-2008 08:18 AM

اعتقدمن الناحية العملية النيسان تحس انها ماسكة نفسها شوية وبالرغم من التقفيل المصرى الا انها ذو امكانيات محترمة فعلا وذو شكل انسيابى وجميل اعتقد انها متفوقة عن الاوبترا فيه وبالنسبة للوسع اعتقد النيسان مش ضيقة اوى يعنى بس اكيد الاوبترا اوسع حاجه بسيطة بس اللى عاوز اوصلهولك انك مش هاتبقى قاعد فى النيسان متكتف لا طبعا ثانيا ويبقى الاهم وهو الموتور واعتقد بردة ان شركة شيفروليه مش وحشة بردة هى اسم كبير بس اعتقد نيسان ليها باع وصيط افضل على الاقل عندنا هنا فى مصرواللى بتتميز بالمحرك اليابانى المحترم وانا هنا بتكلم على عمر محرك ومش بتكلم على شد وسرعات وكلام من دة