الموضوع: ملاحظات حول الحفل الفاشل لتكريم المنتخب

دة رأيي
1- موضوع السجود دة بقي مبتذل اوي اوي يعني مبقاش حاجة تلقائية كدة بتحصل لما بنجيب جون بقت احس ان اللعيبة بتجيب جون علشان تسجد مش العكس و كمان شكل الفريق و هو ساجد و الكاس قدامه كان ساذج و مبتذل و ماسخ اوي يعني لو مصور لقط صورة و نشرها برة مثلا و حط كلمتين سم كدة من عندة فريق كورة يسجد للكاس يعني زي بيعبد الاصنام كدة و العياذ بالله كان واضح اوي انه كان شو اعلامي و خلاص في 2008 كان شكلها حلو اوي لانها فعلا كانت تلقائية

2- اتفرجتوا علي حفل قرعه كأس العالم في جنوب افريقيا (( مش هقول اكتر من كدة ))

3- انتقاد الشيء مش معناه اننا مش بنعرف نفرح بالعكس لما تكون بتفرح و تحاول تتطور للاحسن دة افضل بكتير ماحنا بنعمل بنفرح و ننسي اي سلبيات علشان كدة نجاحنا دايما صدفه مش بترتيب لاننا مش بنحاول نصلح العيوب

المشاركة الأصلية كتبت بواسطة human12

الحفله المقززه امبارح بتاعه تكريم المنتخب
ملاحظات:
1- احمد حسن ماسك الكاس و موش عايز حد يمسكه
2- ناس كتير موش عرف جايين منين حوالين المنتخب و هما موش باينين
3- احمد حسن مش بيدى الكاس لحد
4- اللواء و رجال الشرطه ماشيين جنب المنتخب بيتكلموا فى اللاسلكى ليه؟!! انا مش لاقى ليهم اى فايده
5- احمد حسن مش بيدى حد فرصه لحد يستجرى ياخد منه الكاس
6- قعدوا الفريق فى المدرجات و الجهاز الفنى فى المدرجات و رجال الاتحاد و وولود الريس و مجلس الشعب و صحابهم فى المقصوره الرئيسيه!!!!! ده كلام بالذمه؟
7- حسن شحاته نجح انه يستعطف احمد حسن و ياخد منه الكاس و يرفعه بس كلنا شوفنا احمد حسن بيقوله رجعه تانى لاما افضح موضوع متعب و طلع ورق مضى حسن شحاته بتعهد انه يرجعله الكاس على طول
8- مين الناس اللى كانت لازقه فى عمرو دياب؟!!! و ايه النرفزه اللى هوه فيها ده ضرب واحد باكوع اه هوه كان ينرفز بلد بس ماينفعش الهضبه يشتغل بلطجى
9-احمد حسن ادى الكاس لوائل جمعه و لو شوفتو الصور برضه ايده لامسه الكاس
10- حسن شحاته اختفى لما الاغتى اشتغلت
11- احمد حسن رجعله الكاس
12- عمرو دياب كان لابس جزمه رواد فضاء من اللى بيمشوا على سطح القمر و غنى و ياه 3 مرات و شويه الحفل قلب انه حفل عمرو دياب
13- احمد حسن طلع مع بنته و الكاس و كل الفريق طلعوا مع عيالهم و قرايبهم و الجيران
14-شويه نخع و الرئيس الاب الفنان الرياضى و الدي جى كان بتاع فرح بلدى و مهندس الصوت تقريبا اخره ووكمان عشان العاده الزفت اللى بقالنا 100 سنه موش عارفين نعمل ميكس بين المغنى و الجماهير فتحس انك بتسمع المغنى من غير جماهير لاما يجيب صوت الجمهور من غير مغنى
15- احمد حسن مازال يحمل الكاس
16- مش معقول الفريق بيلف و الجكمهور بيهتف و مشغلين اغنيه شامبيون بتاعه فيفا و شويه يشغلوا الغندور المتغندر بيغنى زى ما قال دادى الريس احنا فريقنا كويس رييلى اللى سجلوها فى انجوله
17- احمد حسن طلع هو و بنته يسلموا على الريس الصغير و معاه الكاس
18- الحج عمرو دياب ماكنش عارف يقلع و لا يلبس الجاكيت بعد ما اتحر و العرق نزل و ماكانش عارف يغنى ايخ و اداها ساعه و لقى الحكايه بايخه قام قاصص الموضوع و دمتم
19- شوهد احمد احسن مروح و معاه الكاس قاعد جانبه
20- عمرو دياب غلب عليه احساس الافراح اللى هوه بيعيش فيها و ده خلاه يتعامل مع الحفل اكنه فرح و بكده كان محمد سعد ظبط الموضوع اكتر
21- احمد حسن كان حط الكاس قدامهم و سجدوا موضوع السجود كان بايخ و عامل زى ما يكون Show مش كويس - فى اللعب ماشى بس يعنى ماكنش حاسس بالسجود ده زى سجود الملعب
22- اسم عمرو دياب اتكتب فى الخلفيه اكتر من علم مصر و فيه اتنين عمالين يطلعوا جنبه فى كل صوره و فيه واحد هوه زاحوا بايده فى وشه و هوه برضه عمال يطلع و يلزق فيه
23- مشهد ناس كبيره فى المنتخب و اقفين يطلعوا الكاميرا و الموبايل عشات يتصوروا مع عمرو دياب مشهد مقرف جدا عشان ديه ناس مش مقدره نفسها و لا مقدره اللى عملته - المفروض هما الابطال اللى يقعدوا و الناس من كبيرها لصغيرها عايز يتصور معاهم
24- احمد حسن اكتشف ان بنته فى الاستاد و انه خد الكاس و نسى ياخدها

اكتر حاجة عجبتني هي كلمة الريس الصغير

يا ريت يا جماعه الكل يتقبل كلامى و ما يضايقش منه لانى بصراحه مختلف مع معظم اللى اتقال و طبعا فى ناس هتختلف مع اللى هقوله و هتهاجمنى بس عادى هو ده الشعب المصرى
المهم انا و انا بقرا التعليقات كنت و الله مذهول اكيد الناس اللى كاتبه بتتريق على المنتخب و على احمد حسن هما هما نفس الناس اللى و هى بتتفرج على الماتشات كانت بتهتف باسم احمد حسن و بتقول مش ممكن الراجل و تسلم يابنى و هتافات من هذا القبيل و انه سنه كبير بس بيلعب و بيجيب اجوان انا مش فاهم هو الشعب ده حكايته هيبطل امتى ينتقد كل حاجه على الفاضى و المليان انتو بصراحه و ما حدش يزعل جيتوا فى الهايفه و اتصدرتوا زى ما بيقولوا لا و نزعل لما بيقولوا علينا متخلفين و همج و الجزاير بتبهدلنا .
يعنى الراجل عمل كل اللى عمله ده و كنتزا بتهتفوا باسمه دلوقتى بتتريقوا عليه ليه عشان فضل شايل الكاس و الله انا مستغرب شعب يا يرفع واحد اوى لسابع سما يا ينزله سابع ارض . و على فكره هو من الطبيعى ان احمد حسن هو اللى يفضل شايل الكاس على طول لانه هو كابتن المنتخب و هو اللى بيمثله فده طبيعى انه يبقى معاه الكاس مع العلم ان فى ناس تانيه كتير خدته و رفعته و اتصورت بيه و سبب انه كان دايما بيبقى لامسه حتى لو فى ايد حد تانى انه خايف ليقع منهم و ده كان باين اوى و هو حتى بيشده من بنته
و بالنسبه لعمرو دياب و اللى عمال يقول يعتزل كفايه عليه كده ده عنده 50 سنه بقولهم يارب انا لما اوصل 50 ابقى باللياقه بتاعته دى انا دلوقتى 26 سنه و لما بجرى خطوتين بنهج فشوف هو جرى اد ايه و رجع غنى على طول و مش بينهج و هو بيغنى و الغنى اساسا محتاج نفس سليم و انا عاوز اشوف الناس اللى بتتريق عليه دى لما توصل لسنه هتبقى عامله ازاى و عندها امراش اد ايه
و ياريت يا جماعه بجد و الله اللى خايف على البلد دى يبدا يغيرها و يغيرها ازاى ؟ يغير من نفسه الاول بدل ما عمالين نقول الحكومه مش بتعمل و الحكومه و الحكومه ...... خلاص ده واقع و حقيقه مره الحكومه مش هتعملنا حاجه انسوا خلاص و يبقى الوضع على ما هو عليه و عى المتضرر الهجره الى بلد اخر
نغير من نفسنا ازاى يعنى نحاول بجد نحب بعض نستغل الحب اللى ظهر فى الفتره اللى فاتت لبعض و لمصر و نحوله لحاجه ايجابيه ابسط حاجه ممكن تعملها انك ما ترميش مثلا زباله فى الشارع تحترم المرور ما تحاولش تخالف القوانين و تقول ما هو كله بيعمل كده لو كل واحد قال كده عمرنا ما هنتقدم ابدا بنفسك الاول انا عن نفسى بعمل كده و الله بجمع زبالتى فى عربيتى ان شالله لو علبه سجاير و ارميها فى اى باسكت زباله اقابله . انا كنت فى لندن من اسبوعين و يادوبك اللى قعدته هناك 10 ايام زعلت اوى لما لقيت الناس هناك محترمين و البلد نظيفه و صعبت عليا مصر اوى قلت ليه ما نبقاش كده و بعد طول تفكير توصلت ان الموضوع لازم يبدا بنفسك الاول فياريت يا جماعه كلنا نبدا بنفسنا و بعدين اهى حفله و عدت و لازم نراعى انها كانت حفله خيريه و متنظمه فى 4 ايام و عدد جماهير من مختلف الطبقات مهول جدا صعب انك تعمل عليه كونترول و بدل ما نشكر عمرو دياب على انه جه غنى و من غير مقابل لا نقول ده غنى 45 دقيقه بس و هو بيغنى فى مارينا 5 ساعات ما هو كان ممكن ما يغنيش اصلا و لا ده جزاته و اى حد هنا لو مكانه و قالوله هتشتغل شهر فى شغلك و مرتبك هيروح لضحايا السيول هيرفض و يقولك و انا مالى طب ليه بننتقد حاجه اصلا احنا مش هنعملها و بعدين فى مارينا الموضوع بيبقى منظم اكتر فبيعرف يغنى احسن و طبعا ما يمنعش انه عشان هناك بياخد فلوس عادى يا جماعه
و انا متفق معاكو ان موضوع السجده ده ما كانش له لازمه زى ما يكون بيتاجرو بموضوع منتخب الساجدين اللى طلعت عليهم اسجد فى الملعب بعد جون ماشى لكن فى وسط رقص و غنا ما ينفعش
و فى النهايه يا ريت ما حدش يزعل منى او يفهمنى غلط و تتفهموا كلامى و نتناقش و اللى شايف انى غلط فى حاجه ياريت يوضحلى و معلش انا فعلا طولت عليكم جدا جدا بس ياريت تقروا كلامى كله