شوية نقط بسيطة اعلق بيها على ماسبق:
1- انا ماشفتش الحفله بصراحة فمش هينفع حكم على حاجة فيها
2- اى تصرف تلقائى -فى رأيى - يعبر عن علاقة اللاعب بربه (سجده، رشم لعلامة الصليب، رفع اليد للاعلى، ...الخ) بيكون مقبول لانه لحظى وعفوى ... وبيبقى نوع من اعتراف اللاعب بفضل الله عليه ومساعدته فى الهدف او الفوز
3- نفس الكلام ممكن يتقال على لاعبى المنتخب لو هما جمعوا الكاس وسجدوا شكرا لله ... ممكن تمشى كده وربنا وحده اعلم بقلب كل واحد منهم .. منهم الى بيسجد تمثيل واللى بيسجد شكر لله .. ودى حاجة مش هنقدر نحكم عليها .. وبرضه بكرر انى ماشفتش هما عملوا ايه بالظبط
4- ساعات كتير فى الفرق لما بيكونوا فى بطوله او حاجة ... بيبقى دايما فى تشجيع بينهم وبين بعض على التقرب لله والعبادات ...إلخ ... علشان ربنا يكرمنا زى مابنقول .... يعنى كعادتنا الدائمة اننا مابنفتكرش ربنا الا لما نتزنق .... فعلشان كده بعد كل جون بيبقى فيه لعيبة بتشجع بعض على السجود لنسب الفضل دايما لله سبحانه وتعالى ... علشان "النعمة ماتغورش من وشنا"
5- بالنسبه للمسيحية - ولو انه المفروض انه مش موضوعنا -:
أ) مين قال ان المسيحية مافيهاش سجود؟؟ دى بصراحة غريبة عليا شوية .... اساسا ايه اللى يخللى اى حد يفكر ان اى حد تانى مؤمن بالله لا يسجد له ؟؟ المسيحية فيها 7 صلوات يومية (غير القداس) كل صلاة بها على الأقل 6 سجدات (على الأقل دى علشان ممكن اللى بيصلى يزود عن كده حسب قدرته وممكن لدى الرهبان توصل لأكتر من 50 سجدة فى الصلاة الواحده).
ب) فى بعض الايام المقدسة بيكون فى صلوات تصل فيها السجدات لـ 500 (أيوة الرقم صحيح) وبرضه كل حسب طاقته
ج)أحب أعيد وأؤكد ان المسيحية (وكل الاديان فى اعتقادى) لا تنظر للسجود على انه اداء حركى او تمثيلى او يعنى واحد بيعمله علشان واجب عليه ....انما لازم يكون نابع من احساس صادق لدى الشخص الساجد .... وده يرجعنا لنقطة التمثيل من عدمه بالنسبه للمنتخب
وفى النهاية انا شايف ان المنتخب ده فرح مصر كلها فى وقت اصبحت الفرحة بهذا الشكل شئ نادر ..... وعمل انجاز رياضى يقترب من حد الاعجاز وغير متكرر فى التاريخ وده بالارقام وبشهادة الدنيا كلها ... والحفلة ... زى اى حاجة فى مصر .... اكيد كان فيها كل المتسلقين والساعين للاضواء ومحبى الظهور وكل الامراض النفسية المتعارف عليها ...... فمعلش خللينا نمسك فى المفيد ونسيب المظاهر اللى احنا عايشين فيها اصلا لانها مش جديدة
ودمتم بخير
المفضلات