تقييم متواضع عن اللوجان

**derinyym** · 09-02-2010 03:03 PM

الحمد لله على مااعطى
انا اشتريت اللوجان بعد عناء من التوكيل بسبب تاخر الاستلام بس استلمت العربية وعملت بها الف كيلو لحد دلوقت
بالنسبه لتقييمى للعربية من وجهة نظرى وبدون زعل
-الابواب تقيلة شوية يعنى علشان اشارة وجود باب مفتوح ماتظهرش لازم ترزع الباب
-الغيارات قريبة من بعضها شويه يعنى على سبيل المثال بتاخد التانى على سرعة 20 ك/س عند 2000 ل/د وطبعا مابازودش عن 2000 ل/د علشان العربية بتلين وبتكون السرعة 78 ك/س على الخامس عند 2000 ل/د
-انا شايف ان الفرامل قريبة شوية من دواسة البنزين يعنى كل مادوس الفرامل ادوس بنزين مع الفرامل مع ان رجلى صغيرة مش كبيرة يعنى لازم اسوق وانا لامؤاخذه قالع الجزمة ومش عايز حد يضحك
-لما بادى العربية الغيار الاول احيانا بيكون صعب شويه
- صوت الموتور عالى شويه وهزة الفتيس بس دى حاجات طبيعية
-الباور تقيلة شوية يعنى بتتعب فى السواقة لمسافات طويله
المميزات
الشكل عاجبنى جدا
عالية عن الارض
العفشه كويسه
السحب كويس
استهلاك البنزين كويس
الخلاصة
العربية لو قطع الغيار اتوفرت فى الاقاليم تبقى العربية كويسة جدا وها تكون صفقة ممتازة لاى حد عايز يشترى عربية اقل من 70 الف

**ahmadalsattar** · 09-02-2010 03:33 PM

المشاركة الأصلية كتبت بواسطة derinyym

الحمد لله على مااعطى
انا اشتريت اللوجان بعد عناء من التوكيل بسبب تاخر الاستلام بس استلمت العربية وعملت بها الف كيلو لحد دلوقت
بالنسبه لتقييمى للعربية من وجهة نظرى وبدون زعل
-الابواب تقيلة شوية يعنى علشان اشارة وجود باب مفتوح ماتظهرش لازم ترزع الباب
-الغيارات قريبة من بعضها شويه يعنى على سبيل المثال بتاخد التانى على سرعة 20 ك/س عند 2000 ل/د وطبعا مابازودش عن 2000 ل/د علشان العربية بتلين وبتكون السرعة 78 ك/س على الخامس عند 2000 ل/د
-انا شايف ان الفرامل قريبة شوية من دواسة البنزين يعنى كل مادوس الفرامل ادوس بنزين مع الفرامل مع ان رجلى صغيرة مش كبيرة يعنى لازم اسوق وانا لامؤاخذه قالع الجزمة ومش عايز حد يضحك
-لما بادى العربية الغيار الاول احيانا بيكون صعب شويه
- صوت الموتور عالى شويه وهزة الفتيس بس دى حاجات طبيعية
-الباور تقيلة شوية يعنى بتتعب فى السواقة لمسافات طويله
المميزات
الشكل عاجبنى جدا
عالية عن الارض
العفشه كويسه
السحب كويس
استهلاك البنزين كويس
الخلاصة
العربية لو قطع الغيار اتوفرت فى الاقاليم تبقى العربية كويسة جدا وها تكون صفقة ممتازة لاى حد عايز يشترى عربية اقل من 70 الف

مبروك على السياره ربنا يديلك من خيرها ان شاء الله
الابواب طبيعى لانها لسه جديده
لكن ما معنى الغيارات قريبه من بعض
و هل سحب العربيه مرضى لك و خصوصا لو العربيه فيها ناس كتيير راكبه معاك
مبروك مرة اخرى

**fido2010** · 09-02-2010 03:40 PM

مبروك مليون مبروك علي اللوجان

**derinyym** · 09-02-2010 03:47 PM

معنى الغيارات قريبه يعنى مثلا لو انا عايز سرعة الموتور ماتزيدش عن 2000 ل/د بانقل التانى على 20 ك/س وبعدين انقل التالت على 30 ك/س وبعدين الرابع على 45 ك/س وبعدين الخامس على 60 ك/س وبعدين الاقى سرعة العربية 78 ك/س على الخامس وسرعة الموتور 2000 ل/د
بمعنى ان range بين كل نقلة والتانية صغير

**logan2010** · 09-02-2010 03:54 PM

المشاركة الأصلية كتبت بواسطة derinyym

معنى الغيارات قريبه يعنى مثلا لو انا عايز سرعة الموتور ماتزيدش عن 2000 ل/د بانقل التانى على 20 ك/س وبعدين انقل التالت على 30 ك/س وبعدين الرابع على 45 ك/س وبعدين الخامس على 60 ك/س وبعدين الاقى سرعة العربية 78 ك/س على الخامس وسرعة الموتور 2000 ل/د
بمعنى ان range بين كل نقلة والتانية صغير

و ما العيب فى الموضوع ده بقا التسارع يعنى ؟؟؟؟؟

**frhateg** · 09-02-2010 03:55 PM

1000 مبروك عليك و ربنا يديك خيرها و يكفيك شرها .
البابين اللي وارا ثقال شوية ده بالنسبة لأن استعمالهم قليل شوية . انما ايه رايك في الباب اللي جنبك . بالنسبة للنقل عندك لغاية 3000 rbm ده علشان زي ما انت في التليين . اما بالنسبة لقرب دواسة البنزين و الفرامل فبصراحة انا مش حاسس بالموضوع ده . بالنسبة لصعوبة الغيار الأول فطالما العربية ماشية فهي لا تقبل الغيار الأول و علي فكرة ده في معظم ان لم يكن في كل العربيات . المهم ان انت تكون متمتع بقيادة اللوجان حتلاقي كل اللي انت بتقول عليه طبيعي جدا و الف مبروك عليك مرة ثانية .

**mostafabakry** · 09-02-2010 04:07 PM

اولا مبروك عالعربية و ربنا يبارك لك فيها
انا بصراحة معايا اللوجانmcv و بصراحة ابوابها عمرها ما كانت تقيلة ابدا و بتقفل عادي و بدون ما ترزع الباب و بالعكس تحس ان الباب بيروح لوحده و هو بيقفل بسبب الراع الحديد اللي ماسك الباب و باقل دفعة بتلاقي الباب قفل كويس
ممكن حضرتك تشيك علي الأبواب بنفسك و تنضف الكوالين بتاعتها يمكن فيها تراب و لا حاجة بيحوشها و هي بتقفل

اما موضوع الغيارات انا معاك ان مشوارها مش كبير بس هو ليه انت بتنقل عند 2000 ار بي ام دا قليلة جدا و فعلا متعبة انت لو قريت المانوال بتاع العربية هتلاقه بيقولك انك ماتزودش عن 3500 ار بي ام في اول 1500 كم عشان الموتور لسه جديد
انا عن نفسي كنت بغير عند 2500 ار بي ام و ما كنتش حاسس بمشكلة
اما موضوع الدواسات فأنا كنت راكب بيجو قبل اللوجان و تخيل بقا الوسع اللي في العربيات القديمة دي و لما ركبت اللوجان ماحستش بالفرق الكيبر اللي حضرتك بتقول عليه يعني عمري ما جيت ادوس فرامل رحت دايس بنزين
انا متفق معاك ان صوت الموتور عالي نسبيا بس هتحس بفرق كبير كل ما العربية مشيت يعني انا حاليا عامل 35 الف كم و الصوت ارتاح كتير عن الأول و يمكن انا اتعودت بس لما سألت ناس كانت بتركب معايا و كانت بتركي عربيات مختلفة قالولي ان صوت الموتور مش عالي للدرجة بس هو اعلي من الياباني و قريب جدا من الكوري

هزة الفتيس دي اغلب الناس اتكلم عنها بس بصراحة انا الحمدلله معنديش اي هزة او عضة في الفتيس

عموما حضرتك لسه العربية جديدة و اكيد لسه ما اتعودتش عليها ، مع الوقت هتتعود علي العربية و لو لسه في حاجة متضايقاك اتصل بالتوكيل و شوف ايه هيقلولك عليها

و مرة تاني الف مبروك

**derinyym** · 09-02-2010 05:12 PM

المشاركة الأصلية كتبت بواسطة logan2010

و ما العيب فى الموضوع ده بقا التسارع يعنى ؟؟؟؟؟

العيب ان حضرتك وانت راكب العربية كل شويه تنقل

**derinyym** · 09-02-2010 05:21 PM

اما موضوع الغيارات انا معاك ان مشوارها مش كبير بس هو ليه انت بتنقل عند 2000 ار بي ام دا قليلة جدا و فعلا متعبة انت لو قريت المانوال بتاع العربية هتلاقه بيقولك انك ماتزودش عن 3500 ار بي ام في اول 1500 كم عشان الموتور لسه جديد
انا عن نفسي كنت بغير عند 2500 ار بي ام و ما كنتش حاسس بمشكلة

انا بانقل على 2000 rpm علشان زى ماقلت لحضرتك العربية بتلين ومش عايز اقرص عليها لحد 1000 km وعلى فكرة كانت بتعمل 6L/100km