تقييم متواضع للHonda Civic 2007

**omar_megane** · 04-08-2007 03:34 AM

السلام عليكم و رحمة الله و بركاته
انا الحمد لله كنت استلمت الهوندا فى اواخر يونيو و دلوقتى وصلت ل1500 كم
وده تقييم بسيط للسيارة من وجهة نظرى:
اولا تصميم العربية ملفت جدا للنظر وده علشان الAerodynamics مصممة بطريقة غريبة اشبه بالطيارة
بالتسبة لاداء العربية فهو الحمدلله اكثر من رائع. صحيح ان عدد الاحصنة الحقيقى هو 125 مش 140 بس اداء العربية يتفوق على اى عربية 1600 اخرى واكبر دليل على كده ان الهوندا القديمة كانت تلقب بالطلقة نسبة الى تسارعها.صوت الموتور غير مسموع وسحبها ناعم جدا لدرجة انى كذا مرة بدورها وتكون دايرة من غير محس.ولما بحرق عليها صوت الموتور بيبقى حلو زى الزئير كده.العربية بيبقى RPM على 3000 لفة وهى على سرعة 100كم.
العربية اوتوماتيك 5سرعات بس فعلا استجابته سريعة جدا للكيك داون يعنى مافيش اى داع للستيبترونيك غير للمنظرة.
ثبات العربية ممتاز وده بسبب ان قاعدة عجلاتها طويلة اوى 2.7m ده غير انها منخفضة نسبيا على الارض انا جبت بيها 150كم وكنت حاسس كأنى على 80 وهى ثابتة برده فى الملفات لو اخدتها بسرعة عالية
العربية من جوة افخم بكتير من السيفيك القدام يعنى التابلوه منظم اكتر و الكراسى اريح ده غير انهم زوده مسند وحامل اكواب قدام و ورا انما العربية برده مش فى راحة الاروبى بس تعتبر اريح و اوسع عربية يابانى فى الفئة دى (اريح من التويوتا و النيسان)
التكيف بتاعها ممتاز و فى زرار اسمه Max Ac بيظبط دوران الهواء لدرجة انى مابقدرش اشغله على الاخر لانها بتبقى تلاجة بس الحق يقال التكيف بياثر شوية فى سحب العربية لمل بتكون على سرعات واطية بس التأثير مش محسوس اوى مع قوة الموتور
العربية فيها Options معقولة يعنى Radio cassette Cd و كمان Antenna فى الزجاج الخلفى و Cruise control فى الدريكسيون دة غير المساند و السعات التخزينية وطبعا العداد العجيب بتاع الطيارات بس ينقصها حاجات كتير زى:
السماعات الخلفية (العربية سماعتين فقط لدرجة انى استغربت لغاية لما قالولى فى التوكيل و انهم بيتجابوا ب590 جنيه)
لا يوجد فوانيس ضباب امامية او زينون
لا يوجد جنوط فهى عبارة عن طاسات
الريموت بتاع المفتاح لا يفتح الشنطة
و اغلس حاجة انها مابتنزلش مانويل او حتى بفتحة سقف
ابرز الحاجات اللى ضايقتنى هو انها للاسف حكت معايا فى بعض المطبات بس كانت محملة جامد هى العربية ارتفاعها عن الارض حوالى 15.5 سم يعنى مش واطية قوى بس سبب حكها فى رأيى هو ان قاعدة العجلات طويلة يعنى العجلة الامامية لما تنزل العجلة الورانية بتتأخر علشان تطلع بس االحق يقال الغلط مش فى العربية ولكن فى الشوارع المكسرة
تانى حاجة ان تصميمها يخلى السواق مايقدرش يشوف اى حتة من كبوت العربية يعنى لازم تتعود مدة على سواقتها ده غير ركنها وده مشكلة تانية
بالنسبة لقطع الغيار فهى اكيد نادرة و غالية بس مش للدرجة و الحمدلله المفروض ان هوندا من السيارات التى تعمر ولا تستنزف قطع غيار كتير
التوكيل خدمته جيدة والناس محترمة و اكبر دليل انهم التزموا بمعاد تسليم السيارة من تسويح او اى حاجة من الكلام ده بس الملحوظة على الصيانة ماتحسش ان الناس دول عندهم خبرة كافية انهم يصلحوا اى مشكلة كبيرة فى العربية يعنى انت تشوف هناك فى مركز الصيانة انواع عربيات غريبة زى نيو بيتلز و باسات مع العلم انها مالهاش علاقة بهوندا يعنى اكيد شغلهم من برا برا ومالهمش علاقة بالV-tec ولا غيره بس ده احساس مش عن تجربة لانى لسة عامل صيانة الالف اللى هية مافهاش حاجة تقريبا
الخلاصة العربية الحمدلله اقدر اقول انها افضل اختيار فى فئتها وبصراحة قبل ماتنزل بسنة انا كنت محتار بين ميجان و اوكتافيا وشوية اميل لدى وشوية لدى لغاية لما نزلت الهوندا وروحت شوفتها واليوم التانى كنت حجزتها العربية انعم واقوى واريح واوسع واشيك سيارة يابانى ممكن تجيبها فى الفئة دى وبارشحها لاى حد متردد ويتوكل على الله ويجيبها واحتمال ان سعرها يزيد والله اعلم
ولو حد عنده استفسار انا تحت امركم

**hazem_khidr** · 04-08-2007 03:59 AM

شكرا علي تحليلك المنطقي و الرائع للسياره.
انافعلا ركبت العربيه دي موديل 2006 في الامارات و كانت 1800 سي سي !!! تخيل بقي سحب العربيه دي ان عامل ازاي.انا جبت بيها حوالي 208 كم/س بس سحبها ممتاز لحد ال 180 بعد كده بيبدأ السحب يقل لكن ربضه كويس في ظل اني مشغل التكييف و مش طافيه.
احلي حاجه عجبتني فيها المرايات بتاعها.بجد عمري في حياتي ركبت عربيه مرايتها ريحتني زي العربيه دي اطلاقا.كاشفه كل الطريق و الزوايا الميته و كل حاجه من غير ما تظطر انك تحرك كتفك سنتي واحده.

التوكيل و انهم بيتجابوا ب590 جنيه)
لا يوجد فوانيس ضباب امامية او زينون
لا يوجد جنوط فهى عبارة عن طاسات

دي كلها حاجات بسيطه ب 3 الاف جنيه ممكن تظبطها بس من راي استمتع بعربيتك كده و بعدين قدام شويه ركب جنوط بهدف انك كل فتره تغير حاجه علشان ما تحسش بالملل

**AlmAhAtmA** · 04-08-2007 08:12 AM

ربنا يبارك لك فيها و يحفظها لك و يكفيك شرها

**Hassan** · 04-08-2007 05:17 PM

(العربية سماعتين فقط لدرجة انى استغربت لغاية لما قالولى فى التوكيل و انهم بيتجابوا ب590 جنيه)
لا يوجد فوانيس ضباب امامية او زينون
لا يوجد جنوط فهى عبارة عن طاسات

أ\عمر
هل يوجد فى التوكيل الجنوط و السماعات و فوانيس الضباب الاصلية ؟
و ان امكن معرفة اسعارهم فى حالة توافرهم
مع خالص الشكر

**CosmicOne** · 04-08-2007 05:57 PM

الف مبروك على السيفيك
بس ليا سؤال
انت موتأكد انها بتجيب 100 على 3000RPM؟

لأن الالنترا الاوتوماتك 4 نقلات و بتجيب 100 على 2500!!

**omar_megane** · 04-08-2007 06:38 PM

السلام عليكم ورحمة الله وبركاته
شكرا جدا على الردود و جزاكم الله كل خير
اولا بالنسبة لأسعار فوانيس الضباب فسألت عليها التوكيل و قالولى 2200 جنيه بالتركيب وده سعر فى رأيى مبالغ فيه جدا و لكنهم بيقولوا انها اصلية و مضمونة بس انا انشاءالله ناوى استفسر عن اسعارها بره التوكيل لأنها اكيد حتكون ارخص بكتير
بالنسبة للسماعات فانا لقيت ان Sony Xplod سعرها بين 150 و 200 يعنى السعر اللى قالوهولى فى التوكيل (590 ) ده استهبال رسمى
اما عن RPM 3 على سرعة 100 فده انا متأكد منه بس خلى بالك ان العربية 5 نقلات مش 4 يعنى الرقم ده مش عالى اوى يعنى لو حسبتها حتلاقيها ممكن تجيب 200 من غير مايزيد اوى
بالنسبة لتعليق الاستاذ حازم فانا فعلا ملاحظ ان مرايتها الجانبية جامدة و بتجيب زوايا ميتة وانا بعتمد عليها اكتر من المراية اللى فى الوسط لان الازاز الخلفى بيرطب كتير وبياخد وقت على بال مايوضح بس اكيد الهوندا اللى حضرتك سوقتها كان مرايتها فيها فلاشر زى المرسيدس و دى حاجة مش موجودة هنا للاسف
اداء العربية كويس جدا لدرجة انى مش متصور ال 1800 حتبقى عاملة ازاى ولا ال Type R الهاتشباك 2000CC بتربو دى حتبقى صاروخ مش طلقة وربنا يوعدنا ان شاءالله
و شكرا مرة اخرى على الردود الجميلة

**memoo_1st** · 04-08-2007 07:55 PM

تفييم رائع وربنا يبارك لحضرتك فيها
وفعلا كلمه سيفيك بقت مرتبطه بأداء عالي يسبق مثيلاتها

**CosmicOne** · 04-08-2007 09:01 PM

شكرا على ردك يا باشا
بس عاندى سؤال تانى لو سمحت
ماتفتكرش لما جبت 150 كان الRPM كام؟؟
و باردو على اى سرعات اعلى من ال100 بيبقى كام؟ ياعنى 120 او 140

و شكرا تانى ليك (:

**CosmicOne** · 04-08-2007 09:21 PM

ايضا ممكن تقولى لو كنت جربت,هيا بتجيب كام على كل نقلا؟؟
يعنى اخر التانى كام مثلا؟؟؟ هل 80 مثل معظم السيارات والا اكتر؟؟

و شكرا تانى (:

**omar_megane** · 05-08-2007 12:33 AM

السلام عليكم ورحمة الله و بركاته
انا لما جيت 150 كان الRPM على ما اظن 4000 لفة بس مش متأكد انا على العموم ما كنتش بزود عن 4 او 4.5 علشان التليين بس ساعات كنت باعمل Acceleration سريع من 0 الى 60 علشان اجيب U turn على الواقف وباكون بقطع الصحراوى فكان الRPM بيعلى ساعتها و يعدى 4 حتى
بالنسبة لأقصى سرعة للنقلة انا محسبتهاش بس ممكن اقولهالك من الكتالوج والارقام دى للموديل ال1.6 المانويل فاكيد هى نفس ارقام الاوتوماتيك علشان هما الاتنين 5 نقلات
: النقلة الاولى ---------> 52 كم
النقلة الثانية ----------> 88 كم
النقلة التالتة ----------> 133 كم
النقلة الرابعة ---------> 173 كم
اما نقلات الاوتوماتيك فدى اقصى سرعة بالنسبة لها:
1 ---------> 61 كم
2 --------> 105كم
D3 ---> كم 167
واتمنى انى اكون افدتك واى استفسار تانى انا تحت امرك

الموضوع: تقييم متواضع للHonda Civic 2007

LinkBack

أدوات الموضوع

عرض

-

-

-

-

-

المواضيع المتشابهه

Civic 2007 , jetta 2006 , octavia a5 2007 , bmw 318 2004

تقييم متواضع عن اللوجان

honda civic 2007

تقييم متواضع لشيفروليه افيو

مطلوب vw jetta 2007 a/t او honda civic 2007 بحالة الزيرو

الكلمات الدلالية لهذا الموضوع

المفضلات

المفضلات

ضوابط المشاركة