الموضوع: عيادة أسنان المنتدى (للاستشارة)

المشاركة الأصلية كتبت بواسطة brown-eyes

دكتور ممكن اسال حضرتك علي حاجة
انا كنت بعمل علاج عصب في السنة اللي قدام من فوق وفي فترة العلاج قعدت 3 شهور ماروحش للدكتور ف السنة لونها بقي غامق حتي بعد ما اتعالجت بعد كده قالي انا جايب جهاز ايطالي بيبيض الاسنان بس بعد ماعملهولي ماحستش باي فرق مع انه خد مني مبلغ
المهم انا مابقتش اروحله وعايز اتابع مع حد تاني لو ممكن اعرف عنوان عيادتك حضرتك ولو في حل لموضوع السنة ده عشان مضيقني جدا !

حضرتك منورنا في العيادة

نبدأ بقى القصة واحدة واحدة

أولا ..التأخر خلال زيارات علاج الجذور (حشو العصب بالعامية) من أسوأ ما يفعله المريض في نفسه لأنه يقضى على ما يفعله الطبيب و يعود بنفسه كثيرا للوراء .

ثانيا .. مسألة تغيير اللون ...تغيير لون الأسنان بعد علاج الجذور أمر طبيعي حيث يتغير اللون و يكتسب ظلا رماديا أو مائل للزرقه في بعض الأحيان .. وليس هناك دخل نهائيا بين تأخرك في العلاج و تغير اللون

يمكن عن طريق وضع مواد خاصة منع هذا التغير أو تقليله الى حد ما ولكن هذه التقنية غير منتشره في مصر عموما .

نيجي للمهم ...

الجهاز الايطالي المبيض عن طريق الليزر لا يصلح لعلاج هذا النوع من تغير اللون لأن الجهاز يعمل على انتزاع الأصباغ المكتسبة الخارجية بشكل أكبر من الألوان الداخلية لذلك فلن تلاحظ تقدما في هذه السنة بالذات ..بل العكس قد يحدث اذ تبيض الأسنان السليمة و تبقى هذه وحيدة اللون اللي يبرز أكثر و أكثر .

الحل المنطقى في مصر هو تركيب تاج من البورسلين لهذه السنة و هو يحقق هدفين :
1 - حماية جسم السنة الذ بالطبع أصبح أضعف بعد نزع التغذية منها و تكون معرضة للكسر و أحيانا الانفلاق رأسيا تحت ضغط مناسب .

2 - اصلاح اللون و تغطيته بلون جديد أكثر حيوية


نهاية ..
اختيارك بتغيير طبيبك اختيار ليس بالسيء أبدا

أما عيادتي فعذرا هي خارج الخدمة في الوقت الحالي

و في انتظار أي استفسار

طيب ممكن حضرتك ترشحلي حد اروحله بس ياريت لو يكون قريب من المعادي او وسط البلد وشكرا جدا علي المساعدة والاهتمام في الرد

المشاركة الأصلية كتبت بواسطة HeMa_LanCeR

سؤال بقي مدام انا عضو هنا يبقي استفيد (أصل انا بخاف جدا من دكتور السنان مش عارف ليه )
المهم
هل ممكن ارجع اسناني بيضاء تاني
مع العلم انني لا ادخن ابدا طول حياتي
ولكن هي لونها مصفر شويه
وللأسف انا من الناس اللي ديما تنسي تغسل اسنانها تصدق انا بقالي حوالي 10 سنين ناسي اني اغسل سناني
فا كنت عايز اديها بولش وارجعها بيضا وبتلمع زي بتوع السيما كده فهل ده فعلا ممكن يحصل (وياريت لو اعرف ايه اللي هيتم فيها بالظبط )
والتكلفه اكيد طبعا
شكرا يا دكتور بس باردو هفضل خايف منكم مش عارف ليه :k48:

طبعا في طرق كتيرة لتفتيح الأسنان و أخرى لتبييضها

بس المهم انت ....ماتنتظرش أي نتيجة (أي نتيجة) مضيه في غياب اهتمامك بأسنانك

يبقى نمرة واحد فرشة ماركة كويسة و معجون طعمه يعجبك و مضمضة ان شا الله من أي صيدلية و تديها تلات مرات في اليوم و بعدين نبقى نتكلم

( بعدين بقى )

ممثلين السينما مش مبيضين أسنانهم
ممثلين السينما و فتيات الاعلانات و الموديلز بيحطوا قشور بيضاء (زي قشرة الخشب) و تلصق على الأسنان و ممكن تخليها أبيض 100% لو حبيت

التكلفة ...كتير
القشرة الواحدة هاتعدي الـ400 جنيه اضرب في 12 على الأقل (6 فوق و 6 تحت)
يبقــــــــــــــــى

لسه ناوي ؟

الحل التاني هو التلميع بالفرشة و ده كويس و ابن حلال و اتكلمنا عليه بالتفصيل في الموضوع قبل كده و مش هايعدي 200 جنيه عند أغلى حد

المشاركة الأصلية كتبت بواسطة brown-eyes

طيب ممكن حضرتك ترشحلي حد اروحله بس ياريت لو يكون قريب من المعادي او وسط البلد وشكرا جدا علي المساعدة والاهتمام في الرد

اعفيني من الرد على هذا السؤال
حضرتك ممكن تسأل معارفك عن طبيب (ثقة)

المشاركة الأصلية كتبت بواسطة mo7a_mo7a

بصراحة يا دكتور انا مش عارف اقول لحضرتك ايه
حقا وصدقا سيادتك خير سفير لاطباء مصر
وفعلا بدات تغير نظرتي عن ان معظم الاطباء صنايعية
اسف علي التعبير لكن هذا ما كنت مقتنع به
لان في رايي الطبيب الذي لا يقرا ولا يتعلم باستمرار - يبقي صنيعي
وفي منهم اللي صنيعي شاطر وفي اللي خايب او علي قده

لكن واضح ان سيادتك طبيب فعلا
جزاك الله عنا خير الجزاء

دكتورنا الكبير
شرف كبير لي أن أكون سببا في تغيير مفهوم حضرتك عن عن مهنتنا الجميلة
و أحب اوضح نقطة
مهنة طب الأسنان تحمل دوما و كثيرا هذه الجملة
(Dentistry ,the Art and Science)
فطبيب الأسنان هو حرفي يجيد بناء الهياكل بالقواعد الهندسية للأحمال و التلاصق و الثبات
وهو فنان يرمم جمالا صنعه الخالق سبحانه و تعالى و أفسده المرض و الإهمال
وهو أيضا طبيب يمارس ما سبق في جسد حي لا يجب أن يضره بل يزيده حيوية و فعالية
ومن هنا التعلق بالمهارات الثلاثة بشكل متكامل يصنع طبيب الأسنان الكفؤ.

ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــ

احب انستفسر عن بعض الاشياء الاخري مستغلا سعة صدرك
انا احمل شهادة الدكتوراه في علوم الميكروبيولوجي حيث درست في جامعة هانوفر واعتقد ان البكتريا المسببة للتسوس من جنس streptococci
وبطبيعة الحال الجنس ده مستعمر كل جسم الانسان وجلده واغشيته المخاطية لذلك فالقضاء عليه صعب
لكن مفيش حاجة تانية اقر اعملها اموت بيها الانواع الخاصة بالتسوس غير الفلورايد بتاع المعجون مع وضع خط تحت فلورايد طبعا

بكتيريا التسوس
طبعا streptococci من أشهر مسببات التسوس و تشاركها بعض ال bacilli و actinomyces و أنواع ثانوية أخرى
و كلهم من الفلورا الطبيعية غالبا

القضاء عليهم كيميائيا ممكن عن طريق المضادات الحيوية طبعا ولكن
سيخل غيابهم كما تعلم بتوازن القوى في الجسم كله و تصبح الفطريات و الباكتيريا الأخرى بلا منافس و نبأ في مشاكل من الأمراض الأخرى

لذلك نلجأ دوما لسحق البكتيريا موضعيا (في مكان التسوس و الضرر فقط) و يكون:
- اما بإزالة البكتيريا و الأنسجة الحاوية لها و فتح تجويف نظيف منها
- أو باضافة مواد قاتلة للبكتيريا في مواد الحشو و الحشو المؤقت و منها الفلورايد
- أو اضافة مضادات حيوية فعلا كمبطن لجدار الحشو
و هذا هو طب الأسنان التقليدي المزعج المخيف بتاع زنننننننننننننننننن

ولكن لدينا جديد ...و سأجعله في مشاركة خاصة على شرف حضرتك بس أجهز الموضوع لتسهيل العرض و هايعجبك و هايغير فكرة حضرتك عننا تماااااااااااما.

ـــــــــــــــــــــــــ ـــــــــــــــــــــــــ ـــ

ثانيا زوجتي تم حشو احد ضروسها سلفر هل ممكن تغييره الي حشوو اخر باللون الابيض؟ ام هناك مخاطرة باذالة هذا الحشو؟

المخاطرة يا صديقي هي ترك الحشوة الفضية و عدم استبدالها بأخرى ملونة
الحشوات الفضية Dental Amalgam تتميز بقو تحمل معدنية فعلا و يعيبها شكلها الرديء و عيب أخر ...
أنها لا تلتصق بجدار السن يعني
micro gap is always opened 24/7
و طبعا بمرور الوقت يبدأ تسوس جديد في الظهور
و ربما تجد الوضع مأساة حقيقة بعد خمس أو ست سنوات في الحشوات الفضية ذات الكفاءة العالية
لا أنكر طبعا أن الكثير و الكثير من هذه الحشوات صمدت عقودا بدون أدنى مشاكل
ولكن الآن لدينا البديل الأفضل فلماذا نتركه و نطرق باب الشك !!!
البديل هو حشو من طبقات متدرجة القوة شديدة التماسك مع جسم السنة و تبلغ قوتها تقريبا 85 % من قوة الـAmalgam -علما بأنه معدن يفوق قوة المينا فعليا - و لها منظر يمكن بأيد مبدعة أن يماثل الطبيعي باستحقاق.

وفي محاولة مني لزيادة مساحة التعاون بيننا انا علي استعداد لارسال لسيادتك اي ورقة علمية تبحث عنها وغير متواجدة في مصر من خلال المكتبة العلمية الخاصة بجامعة هانوفر في صيغة ملف PDF فقط حدد اسم البحث والمجلة ورقم الاصدار وانا في الخدمة

في غاية الامتنان لعرض حضرتك السخي و أنا بالفعل عندى طلب مدوخنى متعلق بالموضوع ده
Bacterial growth and treatment in skin penetrating titanium implants

لأني باشتغل على تعويض أجزاء الوجه المفقودة بتركيبات للوجه و الفك محمولة على مسامير عبر الجلد
osseointegrated implant supported craniofacial prosthetics

لو حضرتك (بدون تكليف) تعثرت في أي ما له علاقة بكليهما في مكتبتكم هاتكون مساعدة حضرتك ليا في منتهى التقدير


و نهاية استمتعت بالرد على حضرتك

دكتور احمد صديقي واخاويا العزيز

اولا شكرا على وقتك وان شاء الله في ميزان حسناتك

سؤالي:
انا مركب 7 طرابيش بورسلين !!!
ايوه سبعه !!

السؤال:
ساعات بينزل دم من الضروس من جانب اللثه
ايه ده؟
سببه ايه؟

المشاركة الأصلية كتبت بواسطة نور العمر

شكراً د/أسد ......... قصدي شكراً د/ أحمد
أنا كنت مشغولة شوية بعالم الأبراج عشان كده لم أقرأ كل المداخلات هنا
لكن حضرتك نورتنا وفرحت أسنانا بتشريفك العظيم وكرمك الطبي البالغ
أنا عندي مشكلة في السخن والساقع والحلو ( حلاوة - بنبون - شيكولاته ) وبخاف موووووووووووووووووووت من دكاترة الأسنان
من فترة ذهبت لدكتور اسنان قاللي دي مجرد التهاب في اللثة وأسنانك جيدة وبلاش حد يلعبلك فيها ... المهم كتبلي على مس ( رهيب والله رهيب )من أول استخدام ما كررتوش ...
بس الحالة بتسوء ومعنديش تسوس مزمن خالص... أعمل إيه أصل بحب الحاجات الحلوة جداً :k31:بس لسة بتوجعني لما باكلها

العيادة منورة النهاردة قوي قوي
و كلها ناس من أحسن ناس

المهم
الشكوى بتاعة حضرتك دي مطـــــــــــــــــــــــ ـــــــــاطة قوي يعني ممكن تكون أي حاجة و ممكن تكون تهيؤات
اعتني بأسنانك كويس
تابع الطبيب مرتين في السنة
ولما تلاقي وجع واضح و صريح يبقى تقلقي
لكن مادام الطبيب مطمنك يبقى الاهتمام الشخصي و الدوري كافي ان شاء الله

اولا اشكر حضرتك على مساعدة الزملاء والسادة الاعضاء بدون مقابل وعلى سعة صدرك .
ثانياً : انا خلعت اخر ضرس فى الجانب الايمن علشان ضرس العقل طالع بزاوية ميل ناحية الشمال والضرس كان مسوس شوية صغيرة فشيلته فهل بنفع اركب مكانه وضرس العقل اللى طلع بزاوية ومظهرش لسه ومختفى تحت اللثة اعمل فيه ايه واسف على الاطالة وتحياتى .