الموضوع: عيادة أسنان المنتدى (للاستشارة)

المشاركة الأصلية كتبت بواسطة tamergalal

اولا اشكر حضرتك على مساعدة الزملاء والسادة الاعضاء بدون مقابل وعلى سعة صدرك .
ثانياً : انا خلعت اخر ضرس فى الجانب الايمن علشان ضرس العقل طالع بزاوية ميل ناحية الشمال والضرس كان مسوس شوية صغيرة فشيلته فهل بنفع اركب مكانه وضرس العقل اللى طلع بزاوية ومظهرش لسه ومختفى تحت اللثة اعمل فيه ايه واسف على الاطالة وتحياتى .

أسف لتأخري في الرد على حضرتك

نيجي للمهم
وصف الحالة (من واقع رواية حضرتك)
ضرس العقل يظهر بشكل منحرف و بميل تجاه جاره الأقرب مع ظهور جزء من ضرس العقل و اختفاء الأخر مما يكون (خندق) صغير يتجمع في الطعام و بعيد عن شعيرات الفرشاه مما يسبب التسوس في جسم الضرس الجار و قد يتسبب في موته .


الحلول : هناك الكثير من الحلول و لكننا سنناقش الحل المتعلق بحالة حضرتك لكونها أمر واقع حاليا .

تم خلع الضرس الجار لتسوسه البالغ و يبقى مشكلة تعويض هذا الضرس

طبعا في وجود ضرس العقل نصف ظاهر في الفم فمن المستحيل تعويض الضرس . دي نقطة

و حتى لو ضرس العقل غير موجود فإن التعويض سيكون بطاقم جزئي متحرك يحمل سنة واحدة و هو غير عملي و لا مقنع في حالتك . دي نقطة كمان

و إياك ان تفكر في تتعويض بجسر ثابت (تركيبة ثابته) لأنها ستكون تركيبة محملة بالكامل على طرف واحد (أخر ضرس موجود) و تحمل عبء ضرسين (الموجود و المخلوع) و بذلك فأنت تحكم على أخر ضرس موجود حاليا بالخلع بعد فترة من الاجهاد بسبب الحمل الزائد .

اذاً .. .. ..
فكرة التركيبة الثابتة أو المتحركة غير عملية

يتبقى لنا حل من ثلاثة :

1 - اسخراج ضرس العقل ووضعه في مكان جاره المخلوع (وده عند طبيب تقويم) و هذا هو أفضل الحلول

2 - خلع ضرس العقل تماما (هذا ضروري لتلافي مشاكل أخرى بسبب وضعه المنحرف) وبعد الخلع يصبح عندنا خيارين أخرين :
أ- يبقى الوضع على ما هو عليه و على المتضرر اللجوء للقضاء .
ب- غرس ضرس بديل للمخلوع (اللي بيسموها زراعة الأسنان)


ده توضيح مبدئي فكر و أنا معاك في أي حاجة للتوضيح

المشاركة الأصلية كتبت بواسطة birdybirdy

اولا انا احب اشكر حضرتك على الموضوع الهايل ده وربنا يجعله في ميزان حسناتك ان شاء الله.
انا كان ليا استفسار كده
انا والحمد لله اسناني كلها سليمة ومعنديش اي تسوس ولا عملت اي حشو قبل كده ولا حاجة والحمد لله وبحاول اهتم بيها على قد ماقدر وبغسلها بالفرشة والمعجون على الاقل خالص مرة واحدة في اليوم وناوية اروح كل فترة اعمل تنضيف شامل ليها .

السنة اللي فاتت روحت لدكتور اسنان وعملي تنظيف لأسناني كلها وكان في شوية التهابات في اللثة والحمد لله راحت (مع انها بترجع على فترات بس الغرغرة بتعمل الواجب يعني)
المهم انا عندي مشكلة من زمان وهي اني مش باكل غير علي ناحية واحدة فقط والناحية التانية مش بستخدمها خالص من زمان من وانا صغيرة كمان وده لإنها كان عليها طبقات بلاك وكانت بتألمني في عملية المضغ فمكنتش بمضغ بيها تماما ورغم اني رحت اعمل كحت وتنظيف قبل كده (كان سني وقتها حوالي 10 او 15 سنة) والدكتورة قالتلي لازم تاكلي علي الناحيتين الا اني مقدرتش استمر برده لإنها مكنتش بتريحني في عملية المضغ تماما وفضلت على الحال ده لحد الان (انا سني وصل ل 27) والسبب اكتشفته من حوالي سنتين وهو اني الناحية اللي مش باكل عليها خالص حصل فيها التهاب وورم في اللثة واتساب من غير علاج لحد مابقي صعب علاجه دلوقتي والدكتور قاللي هاتحتاجي عملية قص لثة وبرده اقترح عليا اني اخلع ضرسين من عندي (رغم اني كل ضروسي خالية من التسوس تماما والحمد لله) بس قاللي ده لإنهم عاملين مشكلة مع اللثة المتورمة دي عشان تتمكني من عملية المضغ علي الناحية دي (يإما خلع ضرسين من غير عملية يإما بعد العملية لو مجابتش نتيجة مُضية يخلع الضرسين دول ) ولما رفضت الخلع قالي انهم مش هايأثروا عندي تماما لا في شكل ولا اي حاجة المهم قلتله خللي حكاية خلع الضروس دي اخر حل خالص :k30:.

حددت كذا معاد لعملية قص اللثة دي بس بصراحة كنت كل مرة بكسل وبيني وبينك انا خايفة برده من حكاية عملية وقص ولزق وكده وانا بخاف من العمليات اوي وسيرتها لوحدها بترعبني (خصوصا بعد انتشار فيروس C بالذات في جراحات الاسنان)

هو الموضوع مش عاملي مشكلة قوية وجوهرية لكن لما بيحصل التهاب في اللثة في الناحية اللي شغالة بإستمرار طبعا مببقاش اعرف اعمل ايه وده بيخلي اللثة في المكان ده متخفش بسرعة لإن المضغ عليها بيتعبها زيادة :k30:.
دلوقتي انا عايزة رأي حضرتك في الموضوع ده؟ وتنصحني بإني اعمل العملية ولا لأ؟ وهل حضرتك واجهت حالات زي دي قبل كده وكانت نتايج العملية ايه؟ وايه الاعراض اللي ممكن تحصل بعد كده في حالتي سواء عملت العملية او معملتهاش؟
شكرا

أسف على التأخير في الرد

أولا لاشكر على واجب بسيط و تقبل الله من منك و جازاك بالمثل ان شاء الله .

الحالة اللي عند حضرتك دي disused -non functioning
side
و دي مشكلتها انها بتتسبب في انعدام تأُير العضلات و الطعام و الحركة المنظف للأسنان و اللثة فتيقى الأنسجة في حالة حمول و تراخي مما يجعلها مخبأ ممتاز للرواسب الجيرية و البكتيريا مما يترتب عليه التهاب في اللثة.

عاما بعد عام ....تزداد الرواسب و يتأثر طول النسيج الرابط للأسنان و هو الذي يثبتها في العظم و تصبح هذه الأربطة أقصر مما يجع أي محاولة للأكل على الأسنان مؤلمة لأنها تشد الأربطة (زي تمارين الإطالة أربطة الحوض في الجمباز تماما) مما يترتب عليه إهمال زائد و هو ما يؤدي الى ضرر زائد بالتبعية و تدهور الحالة يوم بعد يوم

و بسبب التكونات الجيرية الكبيرة نوعا ما .. .. تبدأ اللثة في التورم بشكل واضح وملحوظ و يتحول الالتهاب الى الصورة المزمنة

وهذا ما تشتكين منه حاليا

الحل ...

استبعدي الخلع تمــــــــــــاما

الخطوات الصحيحة للعلاج :

1 - بداية تنظيف و ازالة الترسبات الجيرية على زيارات متقاربة و ليس في زيارة واحدة
2 - بالتزامن مع ازالة الجير ستتبعين نظاما لصحة الفم (يصفه الطبيب) وسيكون مكثف بعض الشيء و عايز اهتمام
3 - الجزء المهم هو بداية التعود علة الأكل على هذا الجانب (حتى لو مؤلمة) البداية بمشروبات ساخنة و باردة
ثم مأكولات طرية جدا ساخنة و بارة (أيس كريم - خضار الشوربة-كورن فليكس طري)
ثم مأكولات ضعيفة (خيار-طماطم-رز-مكرونة)
ثم الأكل بطريقة عادية مع تلافي اللحوم و التي ستكون المرحلة الأخيرة لأنها الأكثر اجهادا للأسنان

يوم بعد يوم و مرحلة بعد مرحلة و خلال شهر أو ستة أسابيع سيقل الألم بشكل تدريجي وواضح ان شاء الله .

و تبقى مشكلة اللثة و تورمها
زيادة الحجم ناتجة عن التهاب مما يعني أنه بإزالة السبب يزول الإلتهاب
و لكن بسبب الحالة المزمنة فإن الالتهاب قد يتحول جزئيا الى تليف مما يجعل العودة للحجم الأصلي غير كاملة (يعني الوضع هايتحسن بس ممكن ما يرجعش للطبيعي) و هنا .. و بعد كل المشوار ده ممكن نلجأ لعملية نهائية لتجميل و قص اللثة

انما نبدأ المشوار بقص اللثة ... ده يبقى تضييع للوقت و المجهود و الفلوس و اختصار للخطوات الطبيعية و بدون نتيجة.

ملاحظة بالنسبة لفيرس C (لسنا سبب انتشاره كما أشاعة وسائل الإعلام لتغطية فضائح حملات البلهارسيا ذات الحقن الزجاجية و التي غرست فس مئات الأجساد بدون تعقيم)

طبيب الأسنان هو أكثر طبيب يهتم (شخصيا) بنظافة و تطهير و تعقيم أدواته لأنه ممارس مباشر للعمل أولا و لأنه في نفس العرضة للإصابة كما المريض تماما بأي أداة ملوثة .

في انتظار أي استفسار

المشاركة الأصلية كتبت بواسطة mo7a_mo7a

شكري علي النصيحة الغالية فعلا فعلا
بس الحشو ده مفتش عليه غير 6 شهور وللاسف كان قرار خاطئ من زوجتي
فقد اقنعتها الطبيبة الالمانية بانه اقوي!!
وفي حين ان الطبيبة لم تكن تكذب الا انه علي ما يبدوا انها لم تكن تعرض الامور بوضوح
كثير من سوء الفهم وارد الحدوث خاصة ان اللغة الالمانية هي اللغة الثالثة لزوجتي.

لكن هنا السؤال ايهما اكثر مخاطرة ازالة هذا الحشو ام تركه؟؟ لا اريد ان ابدوا كمن يكرر سؤال تمت الاجابة عليه
ولكن انا اعني هنا تضرر الضرس اثناء عملية الازالة بنزع جزء سليم مع الحشو او تعرضه للاضرار بالعصب او حتي الكسر؟؟






واضح ان حضرتك تسلك طريق الدراسات العليا وربما عضوا في هيئة التدريس
زاد الله في علمك

وانا قد شاهدت في احدي العيادات مصاب في حادث شاب الماني في العقد الثالث وقد تفتت زراعه اثناء مباراه للهوكي وكان هناك شاسيه للتثبيت له 6 اعمده تمر عبر الجلد ومتصلة بالعظام
وكان يسير به دون ضمادات
وجمعنا حوار قصير استفسرت فيه عن كيفيه حماية اللحم والجلد من العدوي وهو ظاهر ومكشوف حول الاعمدة والمسامير لدرجة انك تري لون الانسجة الداخلية بوضوح
وكانت اجابته بانه لا يعلم وهو لا يتناول غير المسكنات وليس ضمن علاجه اية مضادات حيوية!!!
انا لست طبيبا لكن اعتقد ان مثل تلك الاجزاء المعدنية سواء كانت تيتانيوم كما ذكرت او بلاتين يمكن طلائها بمادة حاملة لمضادات ميكروبية (هذا مجرد توقع) او ان يتم شحنها مغناطيسيا لا ادري
وانا واثق من اني ساستمتع بالبحث معك في هذه النقطة وربما يمكن ان نتعاون فيها ما المانع



كن واثق انني في حل من مجاملتك فانا اعتبرها احد دروب النفاق
انا الذي استمتعت حقا بحديثك الشيق
وكنت في غاية السعادة عندما ناديتني صديقي في صدر مداخلتك
ارجو ان اكون اهلا لها

بالنسبة للإزالة الحشو و تبديله
هي بالطبع اجهاد اضافي للسن و لكن اذا تمت العملية بشفرة حادة تدور بسرعة كبيرة و تحت تبريد مائي (كثيف)و بدون قطع اضافي في جسم السن فسيكون الاجهاد ضعيف جدا و مهمل فعليا .
كسر السنة خطأ غير وارد للعملية
اجهاد العصب بسبب الحفر المتكرر أو التسخين الناتج ممكن وكما ذكرت ممكن تلافيه بمهارة بسيطة.

الموضوع الثاني
المعدن المستخدم هو سبيكة التيتانيوم طبعا و معقمة بجاما راي و مصقولة ultra polish كمان مش super polish
بس أنا عايز أعرف طبيعة سطح التلامس و تكون granulation tissue من عدمه و البكتيريا الأكثر تواجدا


أما موضوع المجاملة التي ذكرتها
أحزنني تقبلك لجملتي بهذه الصورة
لأن الحوار المبني على التفاهم في تخصصات مغايرة و مشتركة في موضوع واحد هو بالفعل حوار ممتع بدون مجاملة

تحياتي

المشاركة الأصلية كتبت بواسطة meza

طب سؤال بقى لدكتور أحمد حبيبنا

أنا سنانى فيها بلاك و رايح يوم التلات أعملها تنظيف ... لكن الفكرة إن ساعات ألاقى كده فى يوم أصحى الصبح بمجرد ما أشرب مية ألاقى ألم شديد جوه دروسى ... أو لو كلت حاجة عليها بيبقى فيه ألم برضه بس مش زى المية.

ممكن أعرف السبب ؟ و ليه بيجى فى يوم و بعد كده يروح خالص؟

عارف إنى حالتى متأخرة ... بس إن شاء الله يوم التلات هروح و مش هكسل

الأعراض المتقطعة لألم الأسنان غالبا ما تكون بدون سبب عضوي حقيقي الا اذا كان العرض شديد و على فترات متقاربة

الآلام المتقطعة أو الموسمية و التي يتبين بعد الفحص الجيد عدم وجود سبب عضوي لها فهي تعامل معاملة الصداع الطبيعي الذي يكون بسبب مؤقت و ينتهى من تلقاء نفسه لأسباب كثيرة ومنها الكثير الغير مفسر
متعلق بالحالة المزاجية و الإجهاد و قوة الجهاز المناعي و انتظام الأيض metabolism في الجسم

يبقى انت يوم التلات ما تكسلش
و تروح تنظف البلاك و تشيك على الطقم اللولي و ترجع تقوللي الأخبار

انت اسنانك غالية علينا يا عم مينا

و السنان برضه غالية في كندا ..الحق ظبط الدنيا هنا قبل ما تخلع

مستني أخبارك ..طمنني عليك يا أبو الدكاترة

السلام عليكم يا دكتور وشكرا علي الموضوع الهايل
عندي استشاره او كشف زي ما حضرتك تحب
لما بصحي من النوم بلاقي سناني لونها من فوق اصفر و طرفها ابيض وممكن يعد وقت علي كده علي ما ترجع للونها الطبيعي وتبقي كلها لون واحد