الى استاذى ومعلمى الاساذ حسين
شكرا كثيرا لمساهماتك مع الاعضاء الاعزاء وربنا سبحانه وتعالى يجازيك خيرا عنا جميعا ويجعله فى ميزان
حسناتك آآآآآميييييييييييين اسحوا لى ان اسرد على حضراتكم تجربتى مع تعلم القيادة
اولا- بقالى حوالى ثلاثة شهور فى التعلم بس لظروف العمل وعدم ترخيص السيارة وهى ماتريكس 2002 التعليم على فترات متباعدة يعنى مرة كل اسبوع واحيانا كل عشرة ايام وفى البداية كان عندى فكرة بسيطة عن القيادة وقمت بقيادة اكثر من سيارة على خفيف كده يعنى ساعة او نص المهم ابتديت اتعلم وقلت ابتدى صح ورحت لمكتب تعليم قيادة واسمحلى ياستاذ حسين احكيلك عن التجربة لاستفادة الاخوة الاعضاء اول استقبال لى فى مكتب التعليم قالى عندك فكرة قلت ايوة وعايز انمى مهارتى فى القيادة والتعلم والتدريب علشان عندى عربية وعايز اطمن على قيادتى لها المهم المعلم قالى طب اركب المهم لاقيت العربية 128 وبدور على مفتاح الكونتكت ملقتش ليها مفتاح قالى دور بالسلكتين ما علينا دورت وطلعت ومشيت تمام قالى اول ملحوظة انت دايس على الدبرياج ليه قلتله علشان شايف قدامى على بعد 20 متر العربيات واقفة فبجهز نفسى علشان اقف واضغط فرامل مع دبرياج علشان العربية متبطلش قالى غلط فرامل بس لحد ماتقف عند اول عربية وبعدين تلحقها بسنة دبرياج قلتله انا لسة بتعلم وحركتى على الدبرياج والفرامل مش بالمهارة الكافية فمش عارف الصح فين ثانيا--- فى مطلع المطب كنت على التانى ولما قربت على المطب رحت سنة فرامل مع دبرياج ورحت مديها الاول وطالع المطب وقبل مانزل اديتها التانى قالى غلط فرامل بس وانت على التانى قلت له مانا مش عارف امكانيات العربية ايه المهم فى المطب التانى سمعت كلام المعلم العربية بطلت وجيت ادور مادريتش ونزل يزق طب ده يبقى اسمه تعليم والحصة ب30ج ده غير الزعيق ويقول لى انا امهر معلم بالمدرسة ومرتبى بسيط والمدرسة بتتكل على المتعلم يروق المدرب يعنى من الاخر عشرين جنيه كمان المهم الساعة خلصت على ساعة الا ربع ومتعلمتش حاجة وحسيت انى مهارتى صفر وافقدنى الثقة فى نفسي ثالثا--- فى الحصة التانية لاقيت مدرب اخر اول ماطلعت بالعربية روحت شايل رجلى من على الدبرياج وماشى زى المعلم الاولانى ماقال لقيته راح مازعق وقالى انت بتعمل ايه مين اللى قالك تشيل رجلك من على الدبرياج طول مانت ماشى عايزك تخنق الدبرياج انت ماشى فى زحمة ولسة بتتعلم قلتله لا بقى هو ماينفعش حصة واحد بقولى شيل رجلك والتانى يقولى حط رجلك ثم انا عايز اتعلم الركنة وطلعت الكوبرى زى المعلم الاولانى ماقال قالى مافيش حاجة اسمها طلعت الكوبرى قلتله لا فى طلعت الكوبرى لما يكون زحمة ازاى اتحكم فى سرعة العربية بالدبرياج والبنزين او الفرامل او بفرامل اليد قالى طب اطلع جيت اطلع الكوبرى ماسحبتش ولا تانى ولا اولانى قلت له اديها التالت قالى مافيهاش تالت المهم طلعت بالعافية وانا نازل لقيت واحد ماشى اخر الكوبرى مش واخد باله حبيت انبهه بالكلاكس قالى مافيهاش كلاكس قلتله طب اديله فلاشر وقلبات او اشارة اواى نور قالى مافيهاش حاجة خالص قلتله طب المرايات فين قالى الناس اللى بتتعلم بيكسروها فبنشيلها وقالى مافيش قدامك الا انك تفرمل وتزعقله يطلع على الرصيف وحياة ام...... رابعا----- خلصت الخمس حصص وندمت اشد الندم علشان ماتعلمتش حاجة سادسا --- قررت اتواصل مع حضراتكم وكل اسبوع اتابع الجديد معاكم وتوجيهات حضرتك والاخوة الاعضاء الافاضل وانزل اركب العربية وامشى بيها ساعة على مهلى واحدة واحدة بس حاسس انى ناقصنى كتير قوى خاصة ان اجراءات الترخيص لسة ماخلصتش فبمشى على خفيف ولسة ماطلعتش على السريع سابعا --- اسف على وقت حضراتكم واكتفى بتلك التجربة الى تجربة اخرى ان شاء الله وتحياتى لك ولكل الاعضاء hesham90