بسم الله الرحمن الرحيم
اللهم صل على محمد وعلى آله وصحبه أجمعين
المرشد الاساسى
التوقف خلف سيارة أخرى
لازم تتوقف وتترك مسافة آمنة بينك وبين السيارة التى أمامك ... على الأقل ترى عجل السيارة التى امامك ... يعنى انت تكون واقف بعربيتك وشايف عجل العربية التى امامك ... الناس بتقول عليها "منطقة الهروب"
ههههههههه يعنى لازم تترك مسافة كافية للخروج من السيارة التى امامك إذا حدث اى توقف لهذه السيارة بدون داعى ... طبعا موش معقول هافضل واقف وراها انا كمان .. لو انت تركت "منطقة هروب" مناسبة ... خلاص مافيش مشاكل هاتخرج من العربية اللى امامك وتستمر فى السير بدون مشاكل
ملحوظة: إذا حصل وتوقفت سيارة امامك بسبب عطل او انه كان "لازق" امام عربية متعطلة او لأى سبب ... فى حالة انك قررت المرور من السيارة المتعطلة امامك ...
اوعى تنسى نفسك وتعمل فيها ناصح وتقول لنفسك : انا شاطر ... انا تارك مسافة كافية بينى وبينه عشان المشاكل اللى زى كده ..... انا هاعدى منك واريح نفسى ..... هوووووب يحصل مشاكل مع العربيات القادمة من الخلف .... ليه ؟ ..... لأن كل تركيزك كان معى العربية المتوقفة امامك ... وانك تركت مسافة جيدة "منطقة هروب" بينك وبين السيارة التى امامك ... وانت وجدت ان المسافة التى تركتها كافية ومناسبة ... ونسيت تماما ان فيه عربيات اخرى خلفك ... وكان لازم تنظر فى المرايات اللى فى العربية ... وتنظر فوق كتفك لكى ترى هل مناورة المرور من السيارة التى امامك هاتم بنجاج ولا هاتعمل مشاكل للسيارات القادمة من الخلف ..... لازم تحترس جيدا من السيارات القادمة من الخلف حتى ولو كنت ماشى فى اشارة مرور مزدحمة والعربية شبه متوقفة .... لازم تراقب السيارات القادمة من الخلف خصوصا اثناء تحويل مسار السيارة من حارة الى حارة اخرى ... لاى سبب
قبل الدخول فى الملفات
افحص قبل الدخول كل العربيات فى جميع الاتجاهات ... انظر بعينيك وحرك رأسك يمين وشمال وإلى الامام ومن فوق كتفك ... لازم قبل ما ادخل الملف اتأكد ان العربيات القادمة لن اسبب لها اى مشاكل او انها سوف تهدىء من سرعتها بسببى .. او ان العربيات الآخرى تعمل مناورة لكى تتجنب الاصطدام بى ...
افسح المجال لاى سيارة اخرى فى التقاطعات او اترك فرصة للمشاة للمرور
يجب ان تضع يدك فوق عجلة القيادة ... يعنى للأسف الشديد يوجد الكثير من المبتدأين يمسك عجلة القيادة بيد واحدة ههههههههههه لزوم "المنظرة" ... لازم تمسك عجلة القيادة بإيديدك الاثنين خصوصا وانت بتلف بالعربية ... اوعى تمسك عجلة القيادة بيد واحدة إلا اذا كنت تستخدم اليد الأخرى فى نقل الفتيس.
عند الدخول فى اى ملف .... لازم تلتزم بالحارة التى تسير عليها ... يعنى لا تدخل الملف وانت تسير على الخط الفاصل بين الحارات ... وطبعا اوعى تلمس الرصيف وانت داخل على الملف لازم تعمل حساب الرصيف وتبتعد عنه قدر الامكان ...
عند الدخول فى اى ملف ...لازم تتم العملية دى بسرعة معقولة ... يعنى العربية لا تكون سريعة جدا ولا بطيئة جدا ... لأن فى عربيات قادمة من خلفك بسرعة هى كمان ...
عند الإنتهاء من الدخول فى الملف
افحص العربيات فى كل الإتجاهات من حولك ... استخدم النظر المباشر ... وحرك رأسك فى كل الإتجاهات لتشاهد العربيات على يمينك وشمالك وامامك وفى المنطقة العمياء
استخدم الحارة المناسبة قبل الدخول فى الملف
يعنى داخل يمين ... لازم التزم الحارة اليمين قبل الدخول على قدر الإمكان
ولو داخل شمال ... احاول الإلتزام بالحارة الشمال على قدر الإمكان
المحافظة على السير فى خط مستقيم
مثلا : بعد الإنتهاء من الدخول فى الملف ... ابدأ فى "عدل" عجلة القيادة للسير إلى الأمام فى خط مستقيم ... طبعا الكثير من المبتدأين ... بعد الدخول فى الملف العربية "بتحدف" منه ... يعنى ممكن ينزل بها منتصف الشارع ... هههههه وممكن يطلع بها على الرصيف ... الموضوع محتاج تدريب كويس جدا ... اول ما تنتهى من الملف تحاول تحافظ على استقامة العربية ... والإلتزام بحارة تسير فيها على خط مستقيم
طبعا اسوأ حاجة فى شوارع المحروسة "التاكسيات" ... و"الميكروباس" ... واحيانا بعض اصحاب السيارات الملاكى اللى موش فاهمين حاجة ..... دول يا جماعة ربنا مديهم دماغ غير كل الناس ... الحكومة عاملة خطوط بيضاء على الشارع عشان تمشى فى حارتك وبين الخطين .... يعنى موش على الخط .... لأ تمشى بين الخطين ... وخلاص تلتزم بالسير حتى تصل بالسلامة
طبعا اللى بيحصل للأسف غير كده ... الاسبوع الماضى كنت نازل "كوبرى القبة" .. وكل الشوارع الجانبية "مقفولة" ... اضريت انى انزل العباسية ... ودى كانت اول مرة انزل العباسية ... المهم قلت لنفسى مافيش اى مشاكل ... ما دام انت ملتزم بالحارة اللى انت ماشى فيها كل شىء هايكون تمام ... وفعلا كل شىء الحمد لله كان تمام ... رغم الزحام ...
المشكلة فى اللى بيخرج لك من اقصى اليمين وعامل فيها ناصح ... اكنك واقف على شباك تذاكر وبشكل محترم فى الطابور ... ويخرج لك ناس واقفة بجوار الطابور ... عاملين طابور تانى هههههههههههههه ... موش عارف الناس دى بتفكر ازاى
تصدقوا انهم موش بيحترموا نفسهم إلا اذا كان فيه "رجل مرور" ... الكل تلاقيه خاف واحترم نفسه .... يعنى الناس تشوف رجل المرور وتقول ياريتنى عديت من شارع تانى ... وانا لما الاقى اشارة مثلا فيها رجل مرور واقف .. اقول : احسن عشان الكل يحترم نفسه ... ههههههههههه
زيادة سرعة السيارة
وده تدريب مهم جدا جدا جدا ... يعنى موش عشان احنا مبتدأين هههههههههه نعمل مشاكل لنفسنا ...
يعنى مثلا انت ماشى فى شارع طوالى مثل شارع المطار ... وانت رايح على مطار القاهرة ... العربيات كلها بتجرى زى الصواريخ ... لازم احنا كمان نجارى سرعة العربية التى تسير ... يعنى انا موش بقول انك تسير 100 و 120 كيلوا ... على الأقل تمشى مثلا 70 كيلوا فى الساعة .... لازم تجارى سرعة السيارات التى تسير حولك ... يعنى موش معقولة انزل حارة شمال وامشى فيها على سرعة 60 كيلوا ... والعربيات فى الشمال بتجرى جامد .. اقل حاجة 90 كيلوا ... اختيار السرعة المناسبة التى تجارى العربيات الآخرى ... مع مراعاة انى اتحكم فى السيارة ولا تسرقنى السيارة بحيث انى امشى اسرع من اللزوم ... ده تدريب مهم جدا جدا جدا ... وفى نفس الوقت خطر يعنى محتاج ان المبتدأ يكون مصحصح .. وانه يشعر بسرعة السيارة دون النظر فى عداد السرعة ... وانه يحافظ على مسافة بينه وبين السيارة التى امامه ... مهما كانت سرعته ... ولو عايز يخفف سرعته ... كفاية عليه انه يرفع رجله من فوق البنزين ...ولو عايز يتوقف لازم يعرف ويحدد النقطة التى اذا وصل اليها سوف يبدأ فى التوقف او تهدئة السيارة
استخدام الإشارة فى الإنتقال الى الحارة اليمين
يعنى مثلا لو انت مسافر على سرعة بطيئة .. او حصل اى مشكلة وترغب فى الإنتقال الى الحارة اليمنى ... لا تنتقل مرة واحدة ... انت ماشى على طريق سريع ... طريق سفر ... لازم تعطى اشارة قبل الإنتقال الى الحارة اليمين ...
واحنا ربنا يسترها معانا ... كل يوم نسمع عن ميكروباص على الطريق الدائرى يقف مرة واحدة على الطريق او ينقل نفسه مرة واحدة الى حارة اخرى عشان زبون ... والنتيجة كوارث وربنا يحفظ الجميع ...
الخلاصة لو انت بتمشى بطىء عن باقى العربيات ومسافر ... يبقى الافضل تعطى اشارة يمين وتسير على الحارة اليمين ... او لو وجدت ان فيه عربيات بتعدى منك ناحية اليمين "كثيير" يبقى الافضل انك تسير فى الحارة اليمين
بالنسبة لموضوع التقاطعات
سبق واتحدثنا فيها كثير
ارجوا ان اكون وفقت
وكل عام وحضراتكم بخير
مع اطيب التمنيات
اخوكم حسين غزالة