و الشاهين عملة زى موضة البناطيل الكوسر
عرض للطباعة
و الشاهين عملة زى موضة البناطيل الكوسر
اتفق معكم يا شباب فى معظم ما قولتوه
و عن نفسى شايف انها عربية حلوة فى قوة الماتور و انها رخيصة فى قطع الغيار و يمكن الاعتماد عليها ... بس عليها ملاحظات
1-سعرها ارتفع فعلا اكثر من قيمتها الحقيقية (بسبب شرائها تاكسى)
2-الشكل الخارجى كلاسيكى جدا و المفروض يعملوا فيها تعديل على التصميم او الفوانيس
3-نقص الكماليات ... مشكلة طبعا
اتمنى انها تكون ارخص من كدا كانت تكون اكثر جاذبية
"و الشاهين عملة زى موضة البناطيل الكوسر"
:laugh6::laugh6::laugh6::laugh6::laugh6::laugh6::l augh6::laugh6::laugh6::laugh6::laugh6:
بصو يا جماعه انا معايه شاهين 1300 موديل 1996 وشاريها تاني يد كانت سنه 1999 ورأيي في الشاهين بعد العشرة الطويله دي انها لو عايز تجيب عربيه علشان تخرج بيها يوم الجمعه كدا ويومين في الاسبوع مثلا تفاريح يبقي الشاهين لان كثرة سواقتها وخاصه في الزحمه كل يوم بتجيب الضغط ..... انا برجع من اي مشوار:
1- عرقان ميه
2- مصدع وببلبع في مسكنات بسبب ازعاج الموتور و ازعاج الشارع اللي مش عارف اهرب منه بسبب عدم وجود تكييف
3-منهك بسبب صعوبه صواقتها في الفتيس الثقيل اولا وكثير الغيارات ثانيا (يعني كل شويه تنقل بعد ما ماتلحقش تمشي بالغيار)... دا غير الدبرياج اللي حايجبلي روماتيزم دا :K15: .... ويا سلام بقي لوعلي علي كوبري اكتوبر الظهر ولا حاجه ... ولا في منطقه زحمه وواقفه ...... بتحس انك في كابوس وتبقي شويه شويه نفسك تسيب العربيه وتقول (انا عايز ماما :K14:)
4- دا غير اني طويل كمان "188سم" والشاهين لا تصلح لطوال القامه نهائيا .... انا برجع بالكرسي لورا علي الاخر خاااااالص ومع ذلك ركبي بتبقي طالعه جنب الدركسيون كدة وشكلي بيبقي عبيط اوي :k16:..... دا غير ان ماينفعش حد يقعد ورايا وانا سايق.
5- دا غير انك طول مانتا ماشي بتعاني من المطبات لانها تفتقر النعومه علي الطريق خالص .... وخصوصا في فواصل الكباري زي اللي علي الاوتستراد كدة بلاقي العربيات معديه من جنبي ولا حاسه بحاجه وانا عمال اتنخل زي الدقيق جوا العربيه
لكن من مميزاتها انها علي السرعات العاليه زي 110 مثلا بتبقي اثبت من عربيات تانيه كتير بتحس انها ممكن تتقلب لو عدت علي طوبه
بالاضافه لكدة بصراحه بروح للميكانيكي قليل اوووووووي ما شاء الله ودي اكثر النقاط ميزة في هذة الدبابه... اهم حاجه اي حاجه عايزة تتغير تجيب الاصلي علي طول وتنساه
موفرة في البنزين اوي خصوصا ال 1300سي سي انا بعمل المشوار اروح وارجه والمؤشر منزلش اصلا مش عارف ازاي:crazy:
وكمان في نقطه حلوة ان العزل فيها حلو بصراحه ..... يعني في الشتاء ايام السقعه بقفل ازاز العربيه كله وانا ماشي ....... مش بسمع اي حاجه خااااص بدون مبالغه غير بس صوت الموتور وصوت الهواء علي السرعات العليا خصوصا ابتداء من 100كم
الدركسيون عندي خفيف في ناس بتقول عليه هاف باور بس مش عارف مدي صحه المعلومه دي لكن مقارنه بالادا و 128 دركسيون الشاهين قشطه اخر حاجه لأني متعلم اصلا علي 128
بس فعلا يا جماعه العربيه دي معمرة ..... يكفي اني من سنه 1996 مغيرتش اسطوانه دبرياج غير السنه دي (صدق او لا تصدق):7bteen:
دا حتي الميكانيكي لما فك الموتور بيقولي المسامير كلها متبرشمه وبتك وانا بفكها هوا انتا اول مرة تركب اسطوانه دبرياج ..... مكنش مصدق ، وركبتلها طقم دبرياج يوميها الماني شغال معايا الله اكبر ما شاء الله .
وقيس علي كدة حاجات كتير في الشاهين ما عدا المساعدين الامامي بتتغير كل سنتين بالكتير بسبب ثقل العربيه ، ومشط الكهرباء اللي برضه عمرة مش بيزيد عن كدة دا لو اصلي كمان
نهايه الموضوع وملخصه في كلمتين ..... "الشاهين عربيه معمرة غير مريحه"
وشوف بقي انت عايز ايه من العربيه
وشكرا
سلامي لكل الشاهيناويه:002:
تقييمك جميل جداً يا أستاذ modygemy86
ربنا يخليك يا م/احمد دا من زوقك والله
الشاهين سيارة محترمة جداً وقطع غيرها ببلاش ولا تقارن بالفيرنا لأن المقارنة في السعر وقت الشراء فقط مقارنة ظالمة ولكن ما بعد الشراء الصيانة وسهولتها قطع الغيار وتوافرها ( ببلاش _ عند البقالين ) ويكفي أنها أفضل من السيارات الصيني كلها .
كانت عندي واحدة مو1999إلى 2002 أول يد 1400 سم3 سيارة محترمة داخل المدينة وفي السفر كانت حلوة مغيرتش فيها غير البوجيهات وتيل الفرامل والفلاتر فقط خلال 3سنوات عملت فيهم40000كم .
بس هي لا قدر الله في الحوادث 0/10 .
هي مش بيتعمل لها أحتبارات تصادم في أوروبا ولا أيه ؟؟؟؟
المهم عملت حادثة وش مع ميكروباص في طريق بني سويف الجير بتاعها دخل الصالون وخلع الكرسي اليمين والقائم اليمين في المنتصف اتخلع من أرضية السيارة و القائم الشمال أمام السائق اتخلع هو الآخر بس للأمانة لو شوفتها من الخلف السيارة زيرو .
بس برجع وأقول كل سيارة على قدرها اللادا بتتكسر في الحوادث والتريللات بتتبهدل ، يعني لو سيارة من الجداد مكنها مكنش بانلها أثر .
والحمد لله الذي لا يحمد على مكروه سواه .
الخلاصة الشاهين حلوه جداً وسعرها مناسب جداً جداً جداً ولو قارناها بالصيني أو سيارة أخرى بعد الشراء أي سهولة الصيانة في أي مكان وتوافر قطع الغيار الرخيصة .
وآسف على الإطالة أو الرخامة بذكر تلك الحادثة .
السلام عليكم ورحمه الله
كل احترامى لاراء كل الزملاء (وانا اقلقم فى الشأن والرأى )
بس اسمحولى انا زعلان جدا من الناس اللى واخده الموضوع من جانب وطنى او من جانب دلع والاخ اللى قال بالتقسيط او من فلوس ابوه ............ده كلام جارح جدا
انا معايا الشاهين من 98 والعربيه استحملتنى كتير
بس مفهاش كماليات
تكييف. ده انا والله ما بعرف اسافر بيها بالنهار فى الصيف ومعاى اولادى
وده لاننا فرافير؟؟
طب حضرتك لو معاكش عربيه اصلا وهتركب مواصلات تركب اتوبيس مكيف مريح ولا بيجو7راكب يطلع عنيك عشان تبقى راجل ومش فرفور زى حالتنا
والناس اللى بتتكلم عن صناعه وطنيه
تقدر تصدر العربيه ديه ولا نبقى زى النعامه وندفن راسنا فى التراب
فى شركه محترمه بتتعامل فى صناعه مهمه زى ديه ومفهاش اداره تطوير ولا خدمه عملاء تهتم الناس عاجبهم ايه وملاحظتهم ايه ولا عربيه مبتطورش من اكتر من 15 سنه..طب مانبص للماليزى ونتعلم احنا الحمد لله مصريين جدا ورجاله جدا وبنتعب فى الفلوس فمن حقى اشترى بتمن تعبى حاجه تريحنى
طب ولله انا بحب الشاهين قطع غيار وصيانه وبتستحمل ,,بس فيها عيب كورونا مدوخنى وحاولت مفيش فايده لازم ابقى وطنى واستحملها زى ما هى ولا اغيرها بنفس النوع وادفع فرق كبييييييييييييييييير فى عربيه نفس اللى معاى من عشر سنين بدون تطوير؟؟؟؟؟؟؟؟؟؟
يا باشا فى شباب ومهندسين مصريين زى الفل وكفاءه يصمموا عربيه ممتازه يا ترى حد فى النصر للسيارات اداهم فرصه ولا غاويين ناخد بواقى تركيا وايطاليا؟؟؟؟؟؟؟
اتمنى اسمع اراء المدافعيين بدون مبرر لما ربنا يوفقهم ويشتروا عربيات احسن ان شاء الله .
ومع خالص احترامى للاخ سبعاوى اللى قيم العربيه بموضوعيه من غير ما يغلط فى حد.
مع تحيات واحد فرفور مش وطنى وبيددلع ومش تعبان فى الفلوس زى الرجاله ؟؟؟؟؟؟؟
لا اله الا انت سبحانك انى كنت من الظالمين
"الشاهين عربيه معمرة غير مريحه" و كمان اقتصادية.
العربية معايا من سنة و شهرين موديل 96 1300
رأي م/سبعاوي جايب من الآخر "بس نفسي في التكييف"
بسم الله الرحمن الرحيم
الاخوة الافاضل اعضاء المنتدى (متحيزين للشاهين ومعارضين )
أحب أبدى رايى المتواضع فى هذا الموضوع على امل ان حد يستفيد بية
اولا انا معايا عربية شاهين موديل 2002 (باور وتكيف وسنتر من الشركة الام ) 1400العربية معايا من حوالى شهر وانا ثانى يد العربية فابريكة برة وجوة بحالة الزيرو وكان معايا لادا قبل كدة ولكن للحق انا حسيت بفرق كبير جدا من يوم ما غيرت لان اللادا عربية لا تصلح الا لدخول الحرب ولظروف عملى كمندوب مبيعات فانا اقدر واحد احكم على العربية اللى معايا الخص القول فى عدة نقاط
1- الادا مكنة كبيرة 1600 بتاكل بنزين ودا حاجة كلنا مش بنحبها على العكس فى الشاهين لو قورنت بنفس الفئة 1600
2- العربية اللادا صوت المكنة بتاعها والالات الجر جرار زراعى قوة 5000حصان على العكس الشاهين صوت نوعا ما اخف ولكن مش زى اللانوس ولا الفيرنا
3- ارتفاع سعر الشاهين عن سعرها الحقيقى ظلم اللادا سعرها مناسب للامكانيتها
4- اهم سببين لشرائى الشاهين 1- رخص قطع الغيار 2- لى عم مهندس معاه الشاهين من 92 العربية بيجيبها زيرو وبيبعها بعد 5 سنين عمرة ماعملت معاة دقت نقص العربية مش بيغير فيها اى حاجة غير زيت وفلاتر والصيانة العاديةمع العلم ان العربية معاة ممكن فى ال5 سنين تعمل أكثر من 1/2 مليون كم
5- العربية الشاهين عند مقارنتها باللانوس والفيرنا ظلم للشاهين انا معاك انها غالية بس بص بعد كدة قطع الغيار الشاهين اى واحد يصلحها لو جرى فيها حاجة عكس اللانوس مثال صغير وش الفانوس بتاع الشاهين 10ج اللانوس الفانوس 350 الى بيقولوا علية أصلى والصينى 250 وخد على كدة كثير
6- العربية الشاهين عالية فى المطبات عن اى عربية ثانية
7- الثبات مش قوى فى الشاهين بعد 120 عكس العربيات الثانية
8- عزل الكبينة يعتبر جيد 8/10
9- الموتور الناس اللى بتقول صوتة عالى دا طابع الفيات عموما بتمتاز بالاداء الرياضى
10 - الناس اللى ببتقول العربية مش بتسد معاه فى الجرى لا العربية تمام التمام انا بجيب 140 بسهولة جدا وبشد مع عربيات شديدة قوى منها الصينى واللانوس
11- العربية سعر اعادة بيعها حلو مش بتخسر كثير يعنى حاجة كلنا بندور عليها
12- العربية الشاهين فيها عيب انها ضيقة من جوة وخصوصا طوال القامة من ذوى الارجل الطويلة زى حالتنا
13-العربية الشاهين العيب اللى الناس بتقول علية ا نها الرؤية بتاعتها وحشة دا كلام غلط انت فى الشاهين بتبقى شايف أبعاد العربية كويس وتقدر تناور على الاساس دة
14- الشاهين يا جماعة عربية فى رايى انها مناسبة للاجواء المصرية 100000 % بس ياريت ينزلوا سعرها الزيرو شوية
اسف للاطالة ولكن اردت ان اعطى حبيبة قلبى الشاهين حقها فى التقيم
اللهم وفقنا لما فية الخير ان شاء الله