مشكله سخونه وتفريغ مياه فى سويفت

**mmatouk** · 03-01-2008 01:55 PM

السلام عليكم ورحمة الله
عندى مشكله فى عربيتى و هى انى اما بمشى بيها مشوار و اركنها وابطل الموتور بلاقى المياه اللى فى القربه كلها بدأت تنزل على الارض من فتحه خروج المياه الزائده فى القربه, زى ما يكون الرادياتير بيرجع ميه كتير فى القربه و يسحبها تانى. اما اجى اخرج تانى بلاقى القربه فاضيه تماما زى مايكون الرادياتير سحب الميه تانى. احيانا العربيه بتسخن لدرجتين بعد النصف, مكانتش بتوصل للمستوى ده قبل كده وده بيحصل وانا مسافر بس بعد حوالى ساعه ونص سواقه على السريع.

ارجو الافاده وجزاكم الله خيرا على المنتدى الرائع و المشاركات المتميزه, بصراحه لاقيت حاجات كتير اوى من اللى كنت عايز اعرفها هنا.

**moody2002** · 03-01-2008 04:15 PM

اول يتم التاكد من وش السلندر بالتى
يتم تدور العربيه لفتره حتى تسخن كويس ثم اقف بالعربيه وهى ساخنه وبطل وبعدين افتح غطاء الريداتير برفق وسيبه مفتوح ثم ادخل العربيه ودور وشوف المياه فى الريداتير لو ارتفعت وخرجت منه الاعلى يبقى وش سلندر (جوان)
افتح غطاء الزيت لوالزيت لون الطحينه يبقى جوان وش سلندر شوف مياه الريداتير لو عليها زيت يبقى وش سلندر
تانى حاجه لو كل ده مضبوط غير غطاء الريداتير

**moody2002** · 03-01-2008 04:16 PM

واعتقد ان شاء الله ان عندك مش جوان عندك تسريب من الغطاء او الخراطيم اكشف عليها كويس

**ahmedezzat78** · 03-01-2008 04:23 PM

شكلها كده وش سلندر
لان التمدد ده كله للقربه مش طبيعى

اول ما بتشغل العربيه بتبقى مبرجله و فيه بخار ميه طالع من الشكمان؟

**mmatouk** · 04-01-2008 01:38 PM

الف شكر يا جماعه على الرد, انا هعمل الفحوصات اللى قلتم عليها و اقولكم على النتيجه ان شاء الله.
أستاذ احمد عزت, ايوه بيبقى فى بخار ميه من الشكمان ول ما بدور, طيب لو مشكله وش سلندر دى تصليحها بيكلف كام لأن انا اصلا ببيع العربيه عشان اشترى لانوس زيرو ان شاء الله ف هنزل تمن تصليح وش السلندر من تمنها. ارجو الافاده

الف شكر مره تانيه ع المساعده

**ahmedezzat78** · 04-01-2008 04:28 PM

لو وش السلندر معقول وما فيهوش تاكل فى مجارى المياه ممكن تقشطه و تركبه تانى وع تغير شوية جوانات (وش سلندر و وش تاكيهات) و الحكاية دى كلها بالمصنعية مش هتعدى 250 جنيه

لكن لو الوش فيه تاكل لازم تجيب واحد استعمال فى حدود 300 او 500 مش عارف بالضبط

لو التاكل بسيط ممكن تملاه الومونيوم و يتقشط

**ahmedezzat78** · 04-01-2008 04:30 PM

لاشكر على واجب يا باشا و ربنا يوفقك و ماتنساش تضبط تاكيهات بعد الشغلانه دى

**moody2002** · 04-01-2008 05:38 PM

اخى انا بكلم جد انا ركبت اربع عربيات سويفت وممكن اشوف العربيه بتاعتك علشان انا بحب العربيه وممكن اشتريه للمدام وانا جد فى عرضى بس اولى وانا حخدها على كده

**yara2006** · 04-01-2008 09:59 PM

يا باشوات اى عربية لما تفتح غطا الرادياتير وهى دايرة و ساخنة لازم تطلع منه المية وده حسب قوة طلمبة المية ولا ايه لو حد فاهم يوضحلى لو انا غلطان لأنى معايا هوندا اكورد 94 من سبع سنوات وده اللى باشوفه فيها لو انا غلطان أرجو التوضيح

**moody2002** · 04-01-2008 10:28 PM

لا مين اللى ال كده لما العربيه بتكون سليمه مفيش اندفاع للمياه زى متكون فيها وش سلندر اندفاع المياه فى حاله وجود وش اقوى من كونه سليم انا مجرب الموضع والله واعلم طلمبه المياه مش هى اللى بتعمل اندفاع لما بيكون فيه هوا داخل الموتور بيعمل اندفاع للمياه وعلى فكره ممكن جوان وش السلندر يكون من الخارج يعنى المياه تنقص وبس ومفيش زيت متطحن